A Lasu o Pita kei Ananaiasa—Na Cava Eda Vulica Kina?

Na lasu, oya na nomu tukuna na ka e sega ni dina. O sa bau lasu ena dua na gauna?—a Era lasu mada ga eso na uabula era lomana na Kalou. Kena irairai ni o kila tiko e dua a cakava qori e volai ena iVolatabu. Na yacana o Pita, e dua vei ratou na 12 na yapositolo i Jisu. Meda raica mada na kena italanoa meda kila na vuna a lasu kina.

A vesu o Jisu, sa qai kau ena nona vale na bete levu ni oti toka na tinikarua ena bogi levu. A lako o Pita ena rara ni nona vale na bete, ia e sega ni dua e kila ni tiko ekea. Ena rarama ni buka, sa qai kilai Pita na nona dauveiqaravi yalewa na bete levu a vakacurumi koya e loma. A qai kaya: “O iko tale ga o dau tiko vata kei Jisu.” Ena levu ni nona rere, a cakitaka o Pita.

A tukuna na iVolatabu ni a ‘raici koya e dua tale na goneyalewa.’ A qai kaya: “Na tamata qo e dau tiko vata kei Jisu.” Se baci cakitaka tale o Pita. Dede vakalailai, era kaya vei Pita na tu ekea: “O dua sara ga vei iratou.”

A rere sara ga o Pita. Ena ikatolu ni gauna, a lasu qai kaya: “Au sega ni kilai koya!” A tagi sara na toa. E raici Pita o Jisu, sa qai nanuma lesu o Pita na ka a tukuna vua ena vica na aua sa oti: “Ni bera ni tagi na toa, o sa na cakitaki au vakatolu.” Sa qai tabalaka na tagi o Pita. Dua na ka na nona veivutuni!

Vakacava e rawa ni yaco tale ga qori vei iko?— De dua o tu e koronivuli o qai rogoca nira talanoataki ira tiko na iVakadinadina i Jiova na gonevuli. E kaya e dua: “Era sega ni dau vakarokorokotaka na kuila.” Dua tale e tukuna: “Era sega ni dau boletaki vanua.” E tukuna tale e dua: “Era sega ni lotu vaKarisito nira sega ni dau solevutaka na Kirisimasi.” Oti sa qai tarogi iko e dua, “O iko dua vei ira na iVakadinadina i Jiova?” Na cava o na tukuna?—

E bibi mo vakarautaki iko ena ka mo tukuna ni bera ni yaco na ituvaki va qori. A sega ni vakarautaki koya o Pita. A lasu ena gauna a tarogi kina! Ia a veivutunitaka dina na ka a cakava, mani vosoti koya na Kalou.

A lasu tale ga o Ananaiasa, e dua na tisaipeli taumada i Jisu. Ia a sega ni vosoti koya na Kalou, a sega tale ga ni vosoti Savaira na watina. Rau duavata vakaveiwatini me rau lasu. Meda raica mada na vuna rau sega ni vosoti kina.

Ni oti e tini na siga na nona biuti ratou na yapositolo o Jisu me lesu vua na Kalou i lomalagi, era papitaiso e rauta nira le 3,000 e Jerusalemi. E levu era gole mai na veivanua yawa mera tiko ena Solevu ni Penitiko. Ni sa yaco mera tisaipeli i Jisu era mani vakatulewataka mera se tiko tale vakalailai, mera vulica e levu tale na ka me baleta na nodra vakabauta vou. Eso gona na tisaipeli i Jisu era vakayagataka na nodra ilavo mera qaravi kina o ira qori.

Erau volitaka o Ananaiasa kei watina eso na tikiniqele me rau rawata eso na ilavo mera vukei kina o ira era se qai papitaiso. E kauta sara na ilavo o Ananaiasa vei ratou na yapositolo, qai tukuna ni oya sara ga na levu ni ilavo e rawa. Ia e lasu! A vunia eso na ilavo! A qai vakatakila na Kalou vei Pita na ka e yaco, mani tukuna o Pita vei Ananaiasa: “O sega ni lasutaka na tamata, o lasutaka sara ga na Kalou.” Sa qai cibati koya o Ananaiasa, mani mate sara! Oti tale e tolu na aua, a gole mai o watina. A sega ni kila na ka a yaco vei Ananaiasa, a lasu tale ga mani cibati koya, cavuka sara na nona icegu.

Eda vulica ena italanoa qo e dua na lesoni bibi: Meda dau tukuna na ka dina! Io, eda vuli kece kina! Ia, eda dau cala kece, vakabibi nida se gone. O marau ni lomani iko o Jiova, ena vosoti iko tale ga me vaka a cakava vei Pita?— Ia nanuma tiko, meda dau tukuna na ka dina. Ke da lasu mada ga ena dua na gauna, e bibi meda kerekere vua na Kalou, da qai cikevi koya tiko ga me vosoti keda. Qori sara ga na ka a rairai cakava o Pita, mani vosoti kina. Ke da saga vakaukaua meda kua ni lasu, ena vosoti keda tale ga na Kalou!