1 E Tawakilai na Kalou—E Dina Oya?
Ka o rairai rogoca: “E dau cakacaka vuni na Kalou.”
“E Tawakilai na Tamana, e Tawakilai na Luvena, e Tawakilai na Yalo Tabu.”—E tukuna na ivola, The Athanasian Creed, me baleta na Letoluvakalou era vakavuvulitaka e levu na lotu ni Veivanua vaKarisito.
Ka e kaya na iVolatabu: A tukuna o Jisu nira na vakalougatataki o ira era ‘vulica tiko ga na veika e baleta na Kalou dina duadua ga.’ (Joni 17:3) Ia ke tawakilai na Kalou, eda na kila vakacava na veika me baleti koya? E sega ni dau vunitaki koya o Jiova, e vinakata meda kilai koya.—Jeremaia 31:34.
Eda na sega vakadua ni kila na ka kece me baleta na Kalou. E sega ni kurabuitaki qori ni nona vakanananu na Kalou kei na nona ivalavala e cecere mai na noda.—Dauvunau 3:11; Aisea 55:8, 9.
Yaga ni nomu kila na ka dina: E tawayaga meda saga meda kila na Kalou e tawakilai. Ia e vinakata na Kalou meda kilai koya, meda veiwekani voleka tale ga. A tukuna na Kalou ni turaga yalodina o Eparama e nona ‘itokani,’ a vola tale ga o Tevita na Tui Isireli: “E voleka o Jiova vei ira era rerevaki koya.”—Aisea 41:8; Same 25:14, NW.
E rawa beka nida veiwekani voleka kei na Kalou? De dua o nanuma ni dredre qori, ia raica mada na ka e tukuna na Cakacaka 17:27: “E sega ni yawa o koya [Kalou] vei keda yadua.” Ena sala cava? Na Kalou e vakatakila vei keda ena iVolatabu na sala meda kilai koya vinaka kina.a
E tukuna vei keda ni yacana o Jiova. (Aisea 42:8) Na veika e dau cakava ena vukuda e volatukutukutaka meda kila kina se Kalou vakacava. Sega ni koya ga qori, e vakaraitaka tale ga vei keda na nona itovo. E dau “yalololoma ka daulomasoli, sa vosovoso vakadede, ka levu na nona yalovinaka kei na dina.” (Lako Yani 34:6) E dau tarai koya na ka eda cakava. Kena ivakaraitaki, era “vakararawataki koya” na matanitu makawa o Isireli nira talaidredre vua, ia o ira era talairawarawa era vakamarautaki koya.—Same 78:40; Vosa Vakaibalebale 27:11.
[iVakamacala e ra]
a Me ikuri ni ivakamacala ena ka e kaya na iVolatabu me baleta na Kalou, raica na wase 1 ni ivola Na Cava Sara Mada e Kaya na iVolatabu? tabaka na iVakadinadina i Jiova.
[Tikina bibi ena tabana e 4]
Eda na kila vakacava na Kalou ke tawakilai se oka ena Letoluvakalou?
[iTaba ni Credit Line ena tabana e 4]
The Trinity c.1500, Flemish School, (16th century)/H. Shickman Gallery, New York, USA/The Bridgeman Art Library International