2 E Sega ni Kauaitaki Keda na Kalou​—E Dina Oya?

Ka o rairai rogoca: “Ke kauaitaki keda dina na Kalou, ena kauta laivi na ca kei na rarawa e vuravura. E kauaitaki keda vakailawalawa, ia e sega ni kauaitaki keda yadudua.”

Ka e kaya na iVolatabu: Na Kalou o Jiova e sega ni vakavuna na ca. (Jemesa 1:13) E rawa sara ga ni vakaotia na ca, ia se vakatara tiko me yaco qori nikua me vakalasui kina na ile a tarogi ena itekivu ni bula ni kawatamata. Eda nuidei ni na vakacegui keda, ena vakaotia tale ga na leqa kece era vakavuna o ira era cata na nona veiliutaki.—Vakatekivu 3:1-6; Aisea 65:17.a

E kauaitaki keda kece na Kalou, e lomani keda yadudua tale ga. E tukuni ena Maciu 10:29-31 ni veika mada ga eda sega ni kila me baleti keda, e kila vinaka tu na Kalou: “E sega beka ni volitaki e rua na siparo ena dua na ilavo lailai? Ena sega ni lutu ina qele e dua vei rau me sega ni kila na Tamamudou. Ia e kila vinaka o koya na iwiliwili ni drauniulumudou. Dou kua gona ni rere: Dou talei sara vei ira na siparo.”

Yaga ni nomu kila na ka dina: Eda sega ni taleitaki ira era dau voravora se sega ni veikauaitaki. E sega gona ni kurabuitaki ni ivakavuvuli lasu me baleta na nona sega ni veikauaitaki na Kalou sa vakavuna na nodra sega ni via kilai koya e levu, se ra qai masu ga vua ni sa sega ni dua tale na ka era rawa ni cakava. Ke o kila ni dauveikauaitaki dina na Kalou o Jiova, o na via vulica e levu tale na ka me baleti koya qai saga mo drau veitokani.

Kena ivakaraitaki, o rairai masu vua na Kalou o qai veinanuyaka ena rogoca qai sauma na nomu masu se sega. E vakadeitaka na iVolatabu o koya e “daurogoca na masu” e tu vakarau e veigauna me rogoci ira era masu vua mai vu ni lomadra.—Same 65:2.

E sureti iko na Kalou mo ‘biuta vua na nomu lomaocaoca kece, ni kauaitaki iko o koya.’ (1 Pita 5:7) Eda nuidei ni na kauaitaki keda na Kalou nida rarawa, e tukuna na nona Vosa: “Sa voleka ko Jiova vei ira sa ramusu na yalodra; ka sa vakabulai ira sa dasila na lomadra.”—Same 34:18.

[iVakamacala e ra]

[Tikina bibi ena tabana e 5]

Ke sega ni kauaitaki keda na Kalou, na cava e sureti keda kina meda masu vua?