4 E Dauveivakaduiduitaki na Kalou​—E Dina Oya?

Ka o rairai rogoca: “E lewa tu na vuravura na Kalou, na ka kece e yaco e nona inaki. De dua e vakavuna tiko na Kalou na veivakaduiduitaki, veika tawadodonu, kei na veivakalolomataki e takalevu tu e vuravura.”

Ka e kaya na iVolatabu: E sega ni vakavuna tiko na Kalou na veika tawadodonu e vuravura. E tukuna na iVolatabu me baleti Jiova: “Sa sega ni cala na nona cakacaka: Ni sa dodonu na nonai valavala kecega.”—Vakarua 32:4.

E daulomasoli na Kalou vei keda kece, wili kina o ira e rairai sega ni ganiti ira qori. Kena ivakaraitaki, e “dau vakacabea na matanisiga vei ira na tamata ca kei na tamata vinaka, e vakatauca tale ga na uca vei ira na yalododonu kei ira na sega ni yalododonu.” (Maciu 5:45) E sega ni vakaduiduitaka e dua na matatamata se na kena itovo, e tukuna na Cakacaka 10:34, 35: “[E] sega ni dau veivakaduiduitaki na Kalou, ia e vakadonui ira era dokai koya ra qai cakava na ka e vinakata mai na veivanua kece.”

O cei ga e vakavuna tiko na veika tawadodonu? E levu era vakatulewataka ga mera cakava na veika ca, era sega ni vakatotomuria na nona dau caka dodonu na Kalou. (Vakarua 32:5) E tukuna tale ga na iVolatabu ni se vakatara tiko na Kalou me lewa na vuravura na kena meca na Tevoro.a (1 Joni 5:19) Ia sa vakarau muduka na Kalou na nona lewa tu na vuravura na Tevoro. Sa tuvanaka tu na sala me “vaqeavutaka na cakacaka ni Tevoro.”—1 Joni 3:8.

Yaga ni nomu kila na ka dina: Ena rairai vakavu veilecayaki na kena sega ni oti rawa na veidabui, veivakalolomataki, kei na veika tawadodonu. Ni o kila o cei e vakavuna tiko na leqa, o na qai kila na vuna sa rui ca kina na ituvaki e vuravura kei na vuna e guce tiko ga kina na nodra sasaga na tamata mera vakavinakataka. (Same 146:3) Kua gona ni vakalusi gauna ena kena sasagataki na veisau ena rairai lekaleka ga na kena yaga se sega sara ga ni yaco. Me dei ga na nomu vakanuinui ina veigauna se bera mai o qai yavutaka qori ena yalayala ni Kalou.—Vakatakila 21:3, 4.

Na noda kilai koya e vakavuna dina tiko na veika tawadodonu ena yaga sara nida sotava na ituvaki dredre. Ni caka vei keda na ka tawadodonu, eda na rairai tagi me vakataki Apakuki na dauveiqaravi ni Kalou: “Sa malumalumu kina na vunau, ka sa sega sara ni vakayacori rawa na lewa dodonu.” (Apakuki 1:4) Na Kalou a sega ni cudruvi Apakuki ena vosa a cavuta qori. A vakadeitaka ga vua ni sa lokuca tu na gauna me muduka kina na veika tawadodonu qai vukei Apakuki me marau tiko ga ni sotava na leqa. (Apakuki 2:2-4; 3:17, 18) Ni o nuitaka tale ga na yalayala ni Kalou me muduka na veika tawadodonu, o na lomavakacegu qai vakacegu na nomu vakasama ena vuravura e yaco tu kina na veika tawadodonu.

[iVakamacala e ra]

[Tikina bibi ena tabana e 7]

E vakavuna dina tiko na Kalou na rarawa kei na veika tawadodonu?

[iTaba ni Credit Line ena tabana e 7]

© Sven Torfinn/Panos Pictures