“Mera Dokai Nira Dei ena Nodra Saqata na Veiliutaki ni Nazi”

ENA gauna vakadomobula a iliuliu tu kina kei Jamani o Adolf Hitler, a vakau vua e tini vakacaca na udolu na ivola. E levu na ivola qori era lai maroroi i Moscow ena 1945, nira sa vakarurugi i Rusia na veivanua volekati Berlin. A dikeva na daunitukutuku makawa o Henrik Eberle e vica na udolu na ivola va qori ena vanua ni maroroi itukutuku makawa e Moscow, me kilai ira kina era volavola vei Itala kei na vuna era volavola kina. A vola o Eberle na macala ni nona vakadidike ena ivola na Briefe an Hitler (iVola vei Itala).

E tukuna o Dr. Eberle: “Era volavola kece vei Itala na qasenivuli kei na gonevuli, sista kei na bete, o ira na sega ni cakacaka kei ira na vakabisinisi lelevu, o ira na vakailesilesi liu ni nevi kei ira na sotia dauvakacaca.” “Eso era dokai koya me vaka na Mesaia e sucu tale; eso tale era raici koya me vu ni veika ca.” A taura beka o Itala na nodra ivola na vakailesilesi ni lotu mera kudruvaka kina na nodra veivakalolomataki na Nazi? A taura eso na ivola, ia e sega ni levu sara na nodra ivola na vakailesilesi ni lotu.

Ia ena vanua ni maroroi itukutuku makawa e Moscow, a kunea kina o Eberle na ivola era vakauta vei Itala na iVakadinadina i Jiova mai na veiyasa i Jamani era kudruvaka na nodra ivalavala na Nazi. E rauta ni 20,000 na ivola kei na telekaramu era vakauta vei Itala na iVakadinadina mai na rauta na 50 na vanua, era kudruvaka kina na nodra vakalolomataki na iVakadinadina i Jiova. Era vesu e udolu vakacaca na iVakadinadina, e vica tale na drau era vakamatei se ra mate ena nodra veivakatotogani na Nazi. E tinia o Dr. Eberle: “Ni vakatauvatani kei na vica na milioni era vakalolomataki ena veiliutaki ni Nazi, ena rairai lailai na kedra iwiliwili [na iVakadinadina]. Ia mera dokai nira dei ena nodra saqata na veiliutaki ni Nazi.”