Meda Marau Vata Vakaveitacini!

SA RUI dredre me rawati na vakacegu kei na marau. E dredre mada ga vei ira e levu mera dau marau kei ira tale eso. Ena ivakarau ni bula nikua, vakabibi ena siti lelevu e vakavuna mera kua ni veimaliwai e levu, ra qai via tu taudua tu ga.

E tukuna e dua na Parofesa ni Psychobiology o Alberto Oliverio: “E takalevu dina na galili. Na ivakarau ni bula ena siti lelevu e vakavuna mera sega ni veimaliwai kina e levu. Ena levu na ituvaki, e vakavuna meda sega ni dau kauaitaki ira kina eda cakacaka vata, eda tiko veitikivi, se da sega ni kauaitaki ira na taukeni sitoa eda volivoli kina.” Na ka kece qori ena vakavuna ga na lomabibi.

Ia e duidui na ituvaki era sotava na tacida, e duidui tale ga na nodra ivakarau ni rai. E vola na yapositolo o Paula: “Moni marau tiko ga.” (1 Ces. 5:16) E levu na vuna e dodonu meda marau da qai reki vata kina. Qori na noda sokaloutaka na Kalou Cecere Duadua o Jiova; eda kila na ka dina e tukuni ena iVolatabu; eda nuitaka na veivakabulai kei na bula tawamudu; da rawa tale ga ni vukea eso tale mera rawata tale ga na veivakalougatataki qori.—Same 106:4, 5; Jere. 15:16; Roma 12:12.

Na ivakatakilakila ni lotu vaKarisito dina oya na noda duavata ena marau. Sa rauta me vola kina vei ira e Filipai o Paula: “Au na reki au na marau vata kei kemuni kece. Qori tale ga na ka moni rekitaka, moni marautaka vata kei au.” (Fpai. 2:17, 18) Ena rua ga na yatuvosa lekaleka qori, e cavuta kina vakarua o Paula na reki kei na marau.

E macala ga ni bibi vei ira na lotu vaKarisito mera kua ni dau vakayawaki ira se mera tu taudua tu ga. Ke da cakava qori, eda na sega ni marau vata kei ira na tacida vakayalo. Koya gona, eda na muria vakacava na veiuqeti i Paula meda ‘marau vata tiko ga ena vuku ni Turaga’ kei ira na tacida vakayalo?—Fpai. 3:1.

Marau Vata kei Ira na Tacida Vakayalo

Ena gauna a vola kina na nona ivola o Paula vei ira e Filipai, a rairai vesu tu e Roma ena vuku ni nona cakacaka vakavunau. (Fpai. 1:7; 4:22) Ia e sega ni vakayalolailaitaki koya qori me tarova na nona gumatuataka na cakacaka vakaitalatala. E marautaka ga me qaravi Jiova ena nona vinaka taucoko me qai ‘liviraki me vaka na isoro waini.’ (Fpai. 2:17) Na ivakaraitaki i Paula e dusia ni nona marau e dua e sega ni vakatau ena ituvaki e sotava. Ena gauna mada ga e vesu tu kina, e tukuna: “Au na marau tiko ga.”—Fpai. 1:18.

Me vaka ni tauyavutaka na ivavakoso e Filipai o Paula, dua na ka nona lomani ira vakalevu na tacina vaKarisito e kea. E kila ni na uqeti ira tale ga na nona talanoataka vei ira na marau e vakila ena nona qaravi Jiova. Koya gona, e vola kina: “Au vinakata moni kila raveitacini, ni ka kece e yacovi au e tete kina na itukutuku vinaka, e sega ni tarovi, e sa kilai levu gona vei ira nona yadra na Empara ni Roma kei ira na kena vo niu vesu ena noqu muri Karisito.” (Fpai. 1:12, 13) Dua na sala ena marau kina o Paula kei ira na tacina vakayalo oya na nona talanoataka na nona ivakaraitaki veiuqeti. De dua era marau vata sara ga kei Paula na tacina vakayalo e Filipai. Nira cakava qori ena vinakati kina mera kua ni yalolailai ena ka e sotava tiko o Paula. Mera vakatotomuria ga na nona ivakaraitaki. (Fpai. 1:14; 3:17) Kuria qori, mera tomana tiko ga na lotu vaKarisito e Filipai na nodra masulaki Paula, ra qai vukei koya ena ka ga era rawata.—Fpai. 1:19; 4:14-16.

Vakacava, eda dau marau tale ga me vakataki Paula? Eda dau saga me donu tiko ga na noda rai me baleta eso na ituvaki eda sotava kei na noda cakacaka vakaitalatala? Nida dauveimaliwai kei ira na tacida vakayalo, e vinaka meda dau marautaka na cakacaka vakavunau. E sega ni kainaki meda waraka sara e dua na gauna marautaki meda qai cakava kina qori. De dua e kauaitaki na itukutuku ni Matanitu ni Kalou ena noda tekivuna vakamaqosa na noda ivakamacala. De dua eda veitalanoataka vakavinaka kei na dua na itaukeinivale e dua na tikinivolatabu. Se noda kilai nida dua na iVakadinadina i Jiova ena noda yasayasa, e dua dina na vakadinadina vinaka qori. Na noda tukuna na ka eda sotava qori, e dua na sala meda marau vata kina.

E levu vei ira na dauveiqaravi i Jiova era vakuai ira ra qai sasaga tiko ga me rawa nira vakaitavi ena cakacaka vakavunau. Era soli ira ena veiqaravi vakatabakidua o ira na painia, ivakatawa dauveilakoyaki, lewe i Peceli, ira na daukaulotu, kei ira na dauveiqaravi raraba ra qai marau nira cakava qori. Vakacava eda reki, da qai marautaki ira? Meda vakavinavinakataki ira gona era ‘dau cakava na ka e vauca na matanitu ni Kalou.’ (Kolo. 4:11) Eda rawa ni uqeti ira ena gauna eda dau soqoni vata kina ena ivavakoso se ena dua na noda soqo cokovata vaKarisito. Eda rawa tale ga ni vakatotomuria na nodra ivakaraitaki ni gugumatua. Eda rawa tale ga ni sureti ira ena so na “gauna” meda rogoca kina na ka era sotava kei na nodra veiuqeti ena noda dau kauaitaki ira, oya na noda vakarautaka e dua na kakana meda vakayagataka vata.—Fpai. 4:10.

Nanumi Ira na Vakacacani

Ni vosota o Paula na veivakacacani kei na veivakatovolei, e vakaukauataki koya qori me dei tiko ga nona yalodina vei Jiova. (Kolo. 1:24; Jeme. 1:2, 3) E kila o Paula nira na sotava tale ga na ituvaki qori na tacina vakayalo e Filipai, ena vakaukauataki ira tale ga na nona yalodina, qori e vakamarautaki koya kei ira tale ga na tacina. E vola kina: “Ni soli vei kemuni na ilesilesi dokai qo ena vuku i Karisito, moni kua wale ga ni vakabauti koya, moni vakararawataki tale ga ena vukuna. Oya na vuna oni mai sotava kina na ka rarawa vata ga oni raica niu sotava, oni rogoca tale ga.”—Fpai. 1:29, 30.

Era vakacacani tale ga nikua na lotu vaKarisito nira vunau tiko. So na gauna e dau kaukaua sara na veivakacacani, ia e levu na gauna e sega soti sara ni kaukaua. Qori ena nodra veibeitaki na vukitani, veitusaqati na lewenivuvale, nodra veivakalialiai na icaba e koronivuli se nomu itokani. E veivakasalataki kina o Jisu meda kua ni kurabuitaka qori se meda yalolailai kina. Ia me vakamarautaki keda ga. E tukuna: “Moni marau ni oni vakasewasewani, vakacacani, se vosavakacacataki ena vukuqu. Ni marau, io moni marau vakalevu, ni na levu na kemuni isau mai lomalagi.”—Maciu 5:11, 12.

E sega ni dodonu meda rere se taqaya nida rogoca nira vakacacani vakaca na tacida ena dua na vanua. Ia meda marautaka ga nodra yalodina tiko. Eda rawa ni masulaki ira, da kerei Jiova me vukei ira me dei tiko ga nodra vakabauta, ra qai vosota. (Fpai. 1:3, 4) De dua ena lailai ga na ka eda rawa ni cakava vei ira na tacida qori, ia eda se rawa ga ni vukei ira na tacida ena noda ivavakoso era sotava tu na ituvaki dredre. Eda rawa ni kauaitaki ira, da qai vukei ira. Eda rawa ni vakamarautaki ira ena noda sureti ira ena so na gauna ena noda Sokalou Vakavuvale ena yakavi, eda cakacaka vata kei ira ena cakacaka vakavunau, kei na noda cakava vata eso na ka ni veivakamarautaki.

E levu na vuna meda marau vata kina! Koya gona, meda vorata mada ga na yalo ni via tu taudua sa takalevu tu qo, da qai marau vata tiko kei ira na tacida vakayalo. Nida cakava qori, eda na sega wale ga ni tokona na loloma kei na duavata ena ivavakoso, eda na marautaka tale ga vakalevu na noda duavata vakamataveitacini. (Fpai. 2:1, 2) Io, me vaka ga nona uqeti keda o Paula: “Moni marau tiko ga ena vuku ni Turaga. Au kaya tale moni marau!”—Fpai. 4:4.

[iTaba ni Credit Line ena tabana e 6]

Globe: Courtesy of Replogle Globes