Vukei Ira na Tagane Mera Toso Vakayalo

“Me tekivu qo o sa na qolivi ira na tamata.”—LUKE 5:10.

1, 2. (a) Na cava era cakava na tagane nira rogoca na veivakavulici i Jisu? (b) Na cava ena veivosakitaki ena ulutaga qo?

ENA dua na ilakolako vakavunau ena yasayasa o Kalili, e vodo ena dua na waqa o Jisu kei ratou na nona imuri me ratou gole ena dua na vanua lala. Ia e muri ratou tiko e vanua e dua na ilala levu. Na kedra iwiliwili na gole yani e “rauta ni limanaudolu na tagane, sega ni wili kina na yalewa kei na gone.” (Maciu 14:21) Ena dua tale na gauna, era golevi Jisu e dua na ilala levu nira vinakata mera vakabulai, mera rogoca tale ga na nona ivunau. Na kedra iwiliwili e rauta ni “vanaudolu na tagane, sega ni wili kina na yalewa kei na gone.” (Maciu 15:38) E laurai e keri ni levu na tagane era golevi Jisu ra qai taleitaka na ka e vakavulica. A vinakata o Jisu me levu tale na tagane mera muri koya. Eda kila qori ena ka e tukuna vua na tisaipeli o Saimoni ni oti ga na nodratou rawata vakacakamana e levu na ika: “Me tekivu qo o sa na qolivi ira na tamata [se tagane].” (Luke 5:10) A vakaibalebaletaka e keri o Jisu ni nodratou vunau ena vaka ga na qoli. Ena vukei ratou na nona tisaipeli me ratou kunea e levu mera ciqoma na ka dina. Era na wili tale tiko ga kina e levu na tagane.

² Nikua tale ga era taleitaka na tagane na itukutuku vakaivolatabu eda vunautaka, ra qai muria sara. (Maciu 5:3) Ia e levu na tagane era lomalomarua ra qai sega ni toso vakayalo. Eda na vukei ira vakacava? A sega ni tauyavutaka o Jisu e dua na mataqali cakacaka vakaitalatala mera qarai ga kina na tagane, ia e vakaraitaka ga na ka era dau kauai vakalevu kina na tagane ena nona gauna. Meda vakatotomuri koya ena noda veivosakitaka e tolu na usutu era dau kauai vakalevu kina nikua na tagane: (1) qarai ni bula ni veisiga, (2) kauaitaki na nodra rai e levu, kei (3) na nodra dau beci ira.

Qarai ni Bula ni Veisiga

3, 4. (a) Na cava era dau kauaitaka vakalevu na tagane? (b) Na cava era vakaliuca kina eso na tagane na qarai ni bula ni veisiga mai na veika vakayalo?

³ A tukuna vei Jisu e dua na vunivola: “Qasenivuli, au na muri kemuni ena vanua cava ga oni lako kina.” Ia e lomalomarua tale ena gauna e tukuna kina o Jisu ni “Luve ni tamata e sega na vanua me kotora kina na uluna.” A sega ni taleitaka na vunivola na ka e tukuna o Jisu me baleta na kena sega ni kilai na vanua ena kau mai kina na kena se na vanua ena tiko kina. A sega tale ga na kena ivakadinadina ni a dua o koya na imuri Karisito.—Maciu 8:19, 20.

⁴ E levu na gauna era dau kauaitaka na tagane mera tiko vinaka vakayago mai na kena vakaliuci na veika vakayalo. E levu vei ira qori era kauaitaka ga na vuli torocake, me dua tale ga na nodra cakacaka vinaka. E laurai ena ka era vakatulewataka, ni bibi qai yaga na rawa ilavo, e sega soti ni bibi na kena vulici na iVolatabu kei na nodra saga mera veiwekani voleka kei na Kalou. De dua era na taleitaka na ka e tukuni ena iVolatabu, ia “na nuiqawaqawataki ni bula ena gauna qo, na kaukaua ni veitemaki ni iyau” ena vakavuna me seavu kina na ka era sa taleitaka toka. (Mari. 4:18, 19) Raica mada na ka e cakava o Jisu me vakadodonutaka kina na ka eratou vakaliuca na nona tisaipeli.

5, 6. Na cava e uqeti Adriu, Pita, Jemesa kei Joni me ratou rawa ni vakatulewataka na cakacaka bibi me ratou vakaliuca?

⁵ O rau na veitacini o Adriu kei Saimoni Pita, e dua tiko na nodrau bisinisi ni volitaki ika. Erau dau cakava tale ga qori na luvei Sepeti, o Joni kei Jemesa. Na toso vinaka ni nodratou bisinisi, a rawa kina nira vakacakacakataki eso tale. (Mari. 1:16-20) Ena gauna erau kila kina o Adriu kei Joni na ka e tukuna o Joni na Dauveipapitaisotaki me baleti Jisu, erau vakabauta ni rau sa kunea na Mesaia. O Adriu e lai tukuna sara vei Saimoni Pita na tacina, de dua e tukuna tale ga qori o Joni vua na tacina o Jemesa. (Joni 1:29, 35-41) Ena vica na vula tarava, eratou salavata kei Jisu me ratou vunau e Kalili, Jutia kei Samaria. Ni oti ga qori, eratou lesu me ratou lai tomana na nodratou qoli. Eratou taleitaka na ka vakayalo, ia eratou sega sara ni raica vakabibi na cakacaka vakaitalatala.

⁶ Ena dua na gauna e muri, a sureti Pita kei Adriu o Jisu me rau muri koya me rau “gonedau ni tamata.” Na cava erau qai cakava? “Sega ni bera ni rau biuta na nodrau lawa me rau muri koya.” Erau cakava tale ga qori o Jemesa kei Joni. “Sega ni bera ni rau sa biuta na waqa, rau biuti tamadrau tale ga, me rau muri koya.” (Maciu 4:18-22) Na cava e uqeti ratou me ratou digia na cakacaka vakaitalatala vakatabakidua? Vakacava e vakasauri ga na nodratou vakatulewataka qori? Sega! Sa vica na vula nodratou rogoci Jisu tiko, ratou raica na nona cakamana, nona dau guta na caka dodonu, kei na nodra taleitaka na lewenivanua na nona cakacaka vakaitalatala. Qori e dei sara ga kina na nodratou vakabauta kei na nodratou nuitaki Jiova na tisaipeli.

7. Eda na uqeti gonevuli vakacava me nuitaki Jiova?

⁷ Eda na vakatotomuri Jisu vakacava meda uqeti koya na noda gonevuli me nuitaki Jiova? (Vkai. 3:5, 6) Na ivakarau ni noda veivakavulici ena rawa ni uqeti koya. Nida veivakavulici tiko, meda vakabibitaka na ka e yalataka na Kalou oya ni na vakalougatataki keda vakalevu ke da vakaliuca na ka e vauca na Matanitu ni Kalou. (Wilika Malakai 3:10; Maciu 6:33.) Eda rawa ni vakayagataka eso na tikinivolatabu meda vakamatatataka kina na sala e dau karoni ira kina na nona tamata o Jiova, ia meda kua ni guilecava ni bibi tale ga me kila na ka eda sotava mai. Nida talanoataka qori ena uqeti gonevuli me vulica me nuitaki Jiova. Eda rawa tale ga ni talanoataka eso na irogo eda wilika ena noda ivola.a

8. (a) Na cava e bibi kina vua na gonevuli me “tovolea mada ka raica ni sa yalovinaka ko Jiova”? (b) Eda na vukea vakacava na noda gonevuli me raica sara ga na yalovinaka i Jiova?

⁸ Me rawa ni bucina na vakabauta e dei na gonevuli, ena sega wale ga ni vinakati vua me wilika se rogoca na sala e vakalougatataki ira kina eso o Jiova. Ena vinakati tale ga vua me raica sara ga na yalololoma i Jiova. E seretaka na daunisame: “Dou tovolea mada ka raica ni sa yalovinaka ko Jiova; sa kalougata na tamata sa vakararavi vua.” (Same 34:8) Eda na uqeti ira vakacava na gonevuli mera raica ni yalovinaka o Jiova? Kaya mada ke dua na gonevuli e leqataka tiko na nona ka vakailavo, e saga tale tiko ga me valuta na nona malumalumu, me vaka na kana tavako, veimauilavo, se gunu vakasivia. (Vkai. 23:20, 21; 2 Kor. 7:1; 1 Tim. 6:10) Ke da vakavulici koya me dau masuta na veivuke ni Kalou me valuta kina na nona malumalumu, ena rawa ni raica na yalovinaka i Jiova ni toso na gauna. Vakasamataka tale ga na ka e rawa ni yaco nida uqeti koya me vakaliuca na veika vakayalo ena nona tuvanaka na gauna me vuli iVolatabu kina e veimacawa, me vakavakarau qai tiko ena soqoni. Io, ke sasagataka o gonevuli me raica na yalovinaka i Jiova, ena dei tiko ga na nona vakabauta.

Kauaitaki na Nodra Rai e Levu

9, 10. (a) Na cava erau vinakata kina o Nikotimo kei Josefa me kua ni kilai na ka erau vakabauta me baleti Jisu? (b) Na cava era tu suka kina na tagane nikua mera muri Karisito?

⁹ E levu na tagane era sega ni via muri Karisito nira kauaitaka na nodra rai e levu. Kena ivakaraitaki, erau sega ni vinakata o Nikotimo kei Josefa na kai Arimacea mera kila na vo ni Jiu ni rau vakabauti Jisu, erau leqataka na ka era na tukuna kei na ka era na cakava. (Joni 3:1, 2; 19:38) Erau lomaleqa baleta nira cati Jisu vakalevu na iliuliu ni lotu. Ke dua e kilai ni vakabauti Jisu ena vakatalai tani mai na nodra valenilotu. —Joni 9:22.

¹⁰ Ena so na vanua nikua, ke dua e kauaitaka vakalevu na iVolatabu, Kalou, se lotu, era na vakalialiai koya na nona itokani vakacakacaka, itokani se wekadra. Ena so na vanua, ena rerevaki toka ke o tukuna mo veisautaka na nomu lotu. Ia ena rawa ni vakalewai e dua e cakacaka tiko ena mataivalu, politiki se lewena e dua na komiti ena dua na itikotiko ke veivosakitaka na ka e baleta na lotu. Kena ivakaraitaki, e tukuna e dua na turaga ni Jamani: “Na ka oni dau vunautaka na iVakadinadina me baleta na iVolatabu e ka dina. Ia keu iVakadinadina i Jiova nikua, mataka ga era sa na kila kece na tamata. Na cava era na kaya o ira au cakacaka vata, tiko veitikivi kei na isoqosoqo keimami dau gole kina vakavuvale? Ena dredre sara ga qori.”

11. A vukei ratou vakacava na nona tisaipeli o Jisu me ratou kua ni leqataka na nodra rai eso tale?

¹¹ Eratou dau yaloqaqa na yapositolo i Jisu, ia eso na gauna eratou dau leqataka na nodra rai na tamata. (Mari. 14:50, 66-72) A vukei ratou vakacava o Jisu me ratou kua ni kauaitaka na nodra rai eso tale? A vakarautaki ratou na nona tisaipeli me baleta na veivakacacani eratou na sotava. E tukuna: “Moni marau ni oni cati, ni oni vakaduiduitaki, ni oni vakasewasewani, qai vosavakacacataki na yacamuni ena vuku i koya na Luve ni tamata.” (Luke 6:22) A tukuna vei ratou na nona imuri o Jisu ni ratou na vakacacani. Eratou na sotava qori ena “vuku i koya na Luve ni tamata.” A tukuna tale ga ni na tokoni ratou na Kalou, vakavo ke ratou vakararavi tiko ga vua me vukei ratou qai vakaukauataki ratou. (Luke 12:4-12) A sureti ira tale ga na ka vou o Jisu mera dau veimaliwai ra qai veitokani tale ga kei iratou na tisaipeli.—Mari. 10:29, 30.

12. Eda na vukea vakacava na noda gonevuli me kua ni dau rerevaki ira na tamata?

¹² E bibi tale ga meda vukei koya na noda gonevuli me kua ni rerevaki ira na tamata. Dua na sala eda na cakava kina qori, oya noda vukei koya me namaka tiko ni na sotava na veivakacacani. (Joni 15:19) Kena ivakaraitaki, vakacava mo vukei nomu gonevuli me vakarautaka e dua na isaunitaro rawarawa e yavutaki vakaivolatabu, me sauma kina na nodra vakatataro kei na nodra ile na itokani vakacakacaka? Eda na nona itokani voleka, eda na veikilaitaki koya tale ga vei ira na mataveitacini ena ivavakoso, de dua o ira e tautauvata na ka era taleitaka se tautauvata na kedra ituvaki. Koya e bibi duadua meda vakavulici koya me masu wasoma mai vu ni lomana. Qo ena uqeti koya me toro voleka vua na Kalou, me nona iDrodro qai nona Uluvatu o Jiova.—Wilika Same 94:21-23; Jemesa 4:8.

Nodra Dau Beci Ira

13. Na cava era tu suka kina eso na tagane mera cakava na ka e vauca na veika vakayalo?

¹³ Eso na tagane era dau tu suka mera cakava eso na ka e vauca na veika vakayalo, baleta nira sega ni kila vinaka na wilivola, era sega ni matau ena vosa se era mamadua. Eso tale e sega ni matau mera tukuna na nodra nanuma e matanalevu. Ena rairai nanuma kina ni rui dredre na vuli, saumi taro ena soqoni, se tukuna na nodra vakabauta vei ira tale eso. E tukuna e dua na tacida tagane: “Na gauna au se gone kina, e dau totolo ga noqu gole ena matanikatuba, meu tabaka tu vakalasulasu na kena lali. Ni oti qori au na lesu tale vakamalua me kua ni raici au se rogoci au e dua . . . Na gauna kece au vakasamataka kina na cakacaka vakavunau, e vakamalumalumutaki au sara ga.”

14. Na cava eratou sega ni vakabula rawa kina na tisaipeli i Jisu e dua na gonetagane e curumi tevoro?

¹⁴ Vakasamataka mada na nodratou yalolailai na tisaipeli i Jisu ena nodratou sega ni vakabula rawa na gone e curumi tevoro. A golevi Jisu na tamana qai tukuna: “[Na luvequ] e dau vakaleqai koya vakalevu na nona manumanusoni, e dau bale vakalevu ina bukawaqa kei na wai; au kauti koya vei iratou na nomuni tisaipeli, ia eratou sega ni vakabulai koya rawa.” A qai vakabula o Jisu na gone qori ena nona vakasava na timoni. Eratou qai tarogi Jisu na nona imuri: “Na cava keitou sega ni vakasava rawa kina na timoni ya?” E tukuna o Jisu: “E lailai na nomudou vakabauta. Au tukuna vakadodonu vei kemudou, ke vaka mada ga na levu ni sore ni musita na nomudou vakabauta, dou rawa ni kaya ina ulunivanua qo, ‘Toki i kea,’ ena toki dina. Ena sega na ka e dredre vei kemudou.” (Maciu 17:14-20) E bibi meda vakabauti Jiova ke da vinakata meda vosota na ituvaki dredre cava ga. Ia vakacava ke sega ni cakava qori e dua, me nuitaki koya ga? Ena rawa ni guce na nona sasaga, yaco sara me lai beci koya.

15, 16. Eda na vukei ira vakacava na noda gonevuli mera kua ni beci ira?

¹⁵ Na sala vinaka duadua meda vukea kina e dua e dau beci koya, oya meda uqeti koya me vakararavi vei Jiova, me kua ni nuitaki koya ga. E vola o Pita: “Moni vakamalumalumutaki kemuni ena liga kaukaua ni Kalou, ena qai vakacerecerei kemuni ena gauna lokuci; moni biuta vua na nomuni lomaocaoca kece.” (1 Pita 5:6, 7) Ena vinakati meda vukei ira na noda gonevuli mera kauaitaka na nodra bula vakayalo. Ke cakava qori o gonevuli, ena raica vakabibi na veika vakayalo. Ena taleitaka na Vosa ni Kalou qai vakaitovotaka ena nona bula na “vua ni yalo tabu.” (Kala. 5:22, 23) Ena dau masu tale ga vagumatua. (Fpai. 4:6, 7) Kuria qori, ena nuitaka na Kalou me vakaukauataki koya se vakayaloqaqataki koya me vosota kina na ituvaki dredre se me vakayacora tiko ga kina vakavinaka na itavi e lesi vua.—Wilika 2 Timoci 1:7, 8.

¹⁶ Eso tale na gonevuli ena rairai vinakati mera vukei ena nodra wilivola, se matau ena vosa. Eso tale era na rairai nanuma ni tawayaga na nodra qaravi Jiova ena vuku ni ivalavala ca era dau cakava ni bera nira mai kilai Jiova. Ena ituvaki ruarua qori, na noda dau veinanumi kei na noda vosovoso ena yaga vakalevu vei ira. E tukuna o Jisu: “E sega ni yaga na vuniwai vei ira na bula vinaka, e yaga ga vei ira na tauvimate.”—Maciu 9:12.

‘Vunau’ Vei Ira na Tagane

17, 18. (a) Eda na kunei ira vakacava na tagane ena noda cakacaka vakaitalatala? (b) Na cava ena veivosakitaki ena ulutaga e tarava?

¹⁷ Eda vinakata mera ciqoma e levu tale na tagane na itukutuku ni veivakacegui ena iVolatabu. (2 Tim. 3:16, 17) Koya gona, eda na kunei ira vakacava e levu na tagane ena noda cakacaka vakaitalatala? Qori ena noda vunau vakalevu ena yakavi, ena yakavi ni muanimacawa, se olodei, ni levu na tagane era na rairai tu e vale ena gauna qori. Ke rawa, eda na kerea sara ga meda veivosaki kei ira na ulunivuvale. Meda vunau vei ira na tagane eda cakacaka vata ena gauna veiganiti, kei ira tale ga na tagane e tiko ena dina o watidra.

¹⁸ Nida vunau vei ira kece eda sotava, eda nuidei nira na ciqoma na noda itukutuku o ira na yalomalumalumu. Meda yalovosovoso mada ga ni vukei ira era tataleitaki. Ia vakacava o ira na tagane papitaiso ena ivavakoso, eda na vukei ira vakacava mera tadolova ra qai sauva na itavi ena isoqosoqo i Jiova? Ena veivosakitaki qori ena ulutaga e tarava.

[iVakamacala e ra]

O na Sauma Vakacava?

• Era na vukei vakacava na tagane mera vakaliuca na veika vakayalo?

• Eda na vukea vakacava na noda gonevuli me kua ni kauaitaka na nodra rai eso tale?

• Eda na vukei ira vakacava eso tale mera kua ni beci ira?

[iYaloyalo ena tabana e 25]

O dau saga mo vunautaka na itukutuku vinaka vei ira na tagane?

[iYaloyalo ena tabana e 26]

O na vukea vakacava nomu gonevuli me vosota na veivakacacani ena sotava?