Taro na Dauwiliwili . . .

Ena rusa beka na vuravura ena 2012?

▪ “Levu era gole ina dua na koro mai Varanise nira vakabauta sa vakarau yaco e dua na ka . . . Era vakabauta ni icavacava kei vuravura ena yaco ena 21 Tiseba 2012, na gauna e cakacakataki me cava kina na nodra ivolanivula na Maya sa vakayagataki voli mai me 5,125 na yabaki.”—BBC News.

Se mani cava era tukuna me baleta na icavacava kei vuravura na iliuliu ni lotu, o ira era kaya nira saenitisi se o ira era tukuna na veika e se bera ni yaco ena ika21 ni senitiuri, ena tu ga na vuravura ena 2012. Ena sega ni rusa ena yabaki qori se na yabaki cava tale.

E tukuna na iVolatabu: “Sa lako yani e dua nai tabatamata, ka sa lako mai e dua tani tale nai tabatamata: ia ko vuravura sa tu ga ka sega ni mudu.” (Dauvunau 1:4) Dikeva tale ga na ka e tukuna na Aisea 45:18: “Sa kaya vakaoqo ko Jiova, . . . ko koya ka bulia na vuravura ka cakava; sa vakataudeitaka ko koya, a sa sega ni cakava me lala, sa bulia ga me tawa: koi au ko Jiova; ka sa sega e dua tale.”

Ena rawa beka vua na tama dauloloma me cakava e dua na waqa ni vakatatalo nei luvena tagane se vale ni vakatatalo nei luvena yalewa, oti me qai vakacacana tale ni solia oti ga vua? Qori e tawaloloma dina! Ena vakasama vata ya, a bulia sara ga na Kalou na vuravura meda marautaka kina na bula na kawatamata. A kaya na Kalou vei rau na imatai ni veiwatini o Atama kei Ivi: “Drau vakaluveni, ka tubu me lewe vuqa, ka vakatawai vuravura, ka vakamalumalumutaka.” Oti e “vakaraica na Kalou na ka kecega sa bulia ko koya, ka raica, sa ka vinaka sara.” (Vakatekivu 1:27, 28, 31) E se dei tiko ga na inaki ni Kalou me baleta na vuravura ena sega gona ni vakalaiva me vakarusai. A tukuna vakamatata me baleta na ka kece e yalataka: “Ena vaka talega kina na noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka ka’u sa vinakata, ka daucaka yaco e na ka ka’u a tala kina.”—Aisea 55:11.

Ia o Jiova ena “vakawabokotaki ira . . . na vakarusai vuravura tiko.” (Vakatakila 11:18) E yalataka ena nona Vosa: “Ni ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura, kei ira na dautalaidredre era na cavu laivi maikina.”—Vosa Vakaibalebale 2:21, 22.

Ena yaco ena gauna cava qori? E sega ni dua vei keda e kila. “E sega ni dua e kila na siga ya kei na kena aua, era sega ni kila na agilosi mai lomalagi, e sega ni kila na Luvena, e kila duadua ga o Tamana.” (Marika 13:32) Era sega ni rawa ni tukuna na iVakadinadina i Jiova na gauna ena vakarusai ira kina na tamata ca na Kalou. Ia era kila na “ivakatakilakila” ni sa voleka na icavacava, era kila tale ga nida bula tiko ena gauna e vakatoka na iVolatabu me “iotioti ni veisiga,” era sega ga ni kila na gauna ena yaco kina na “icavacava.” (Marika 13:4-8, 33; 2 Timoci 3:1) Era kila ni rau kila duadua ga na Tamada vakalomalagi kei na Luvena.

Ena yasana adua, era ogaoga na iVakadinadina i Jiova mera vunautaka na itukutuku vinaka ni Matanitu ni Kalou. Na matanitu vakalomalagi qo ena veisautaka na vuravura me parataisi ena vakilai kina na vakacegu, qori na vanua era na ‘taukena na yalododonu, qai tiko kina me sega ni mudu.’—Same 37:29.

[iTaba ni Credit Line ena tabana e 10]

Image Science and Analysis Laboratory, NASA-Johnson Space Center