‘Gauna ni Loloma kei na Gauna me Cati Kina e Dua’
NA “KALOU ga na loloma.” Eso na vanua na vosa qori e vakawaqataki qai lili ena lalaga ni vale. Io e totoka dina na matavosa oya, e dusia ni nona itovo sara ga na Kalou na loloma.
Ia era sega ni kila e levu ni qori na vosa mai na iVolatabu. A vola sara ga na yapositolo o Joni: “O koya e sega ni dau loloma e sega ni kila na Kalou, baleta ni Kalou ga na loloma.” (1 Joni 4:8) A vola tale ga me baleta na nona lomani ira kece na kawa i Atama e rawa mera vakabulai ena isoro i Jisu: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.”—Joni 3:16.
Nida vakasamataka tiko qori, era na rairai nanuma eso ni sega ni kauaitaka na Kalou na veika eda cakava. E laurai ena nodra ivakarau ni bula e levu nira nanuma era na sega ni saumitaro vua na Kalou ena nodra ivalavala. E dina oya? Na Kalou e lomani ira kece na tamata ca kei na tamata vinaka? Ena rawa beka ni cata e dua?
Loloma ni Kalou, Ka e Cata
E tukuna na Tui vuku o Solomoni: “Sa dui vagauna na ka kecega, ka sa dui vakasiga na ka kece sa caka e ruku i lomalagi: . . . Na siga me veilomani kina, kei na siga me veicati kina.” (Dauvunau 3:1, 8) E laurai ena ivakavuvuli qori ni dauloloma qai yalovinaka na Kalou, ia e rawa ni cata e dua, e tiko tale ga na veika e cata.
Kena imatai, na cava na ibalebale ni ‘cati’ ena iVolatabu? E tukuna e dua na ivolavosa: “Na iVolatabu e vakayagataka e vica na ibalebale ni ‘cati.’ E rawa ni vakaibalebaletaka na veitusaqati kaukaua ena loma ni dua na gauna qai rawa ni salavata mai kei na veivakamavoataki.” Qori na kena ibalebale eda kila vinaka qai laurai na kena ca e veiyasa i vuravura. E tomana na ivolavosa vata qori: “Na ‘cati’ e rawa ni vakaibalebaletaki tale ga ina veicati kaukaua, ia e sega kina na veivakamavoataki.”
Eda veivosakitaka tiko eke na ikarua ni kena ibalebale. Na nomu cata matua, vakasisilataka e dua na ka—sega ni cudru katakata, yalo ca se nomu via vakamavoataka e dua. E rawa ni va qori na nona cata e dua o Jiova? Raica mada na ka e tukuni ena Vosa Vakaibalebale 6:16-19: “Sa ono na ka sa cata ko Jiova: Io, e vitu sa ka vakasisila ki na yalona: Na mata viavialevu, na yame daulasu, kei na liga sa vakadave dra sa sega ni cala, na yalo e veinanuyaka na ka ca, na yavai koya sa kusarawa ni ciciva na ca. Na dautukutuku vakailasu sa dauvosataka na ka lasu, kei koya sa kaburaka na veileti vei ira era veiwekani.”
Eda raica ni tiko eso na ivalavala e cata na Kalou. Ia e sega ni kena ibalebale ni cati koya e cakava na ivalavala qori. E kauaitaka na veika e rawa ni yalorawarawa kina me veivosoti, me vaka na nona malumalumu e dua, na kena ituvaki, nona isususu, kei na nona cakava tu na ka ena lecaika. (Vakatekivu 8:21; Roma 5:12) E vakamacalataka o koya a vola na Vosa Vakaibalebale na ivakaraitaki vinaka qo: “Sai koya sa lomana ko Jiova, sa vunauca ko koya; me vaka sa ia na tamata [tama] vua na luvena sa vinakata ko koya.” (Vosa Vakaibalebale 3:12) Ena rairai cati na nona talaidredre na gone, ia e lomana tiko ga na luvena na itubutubu qai saga vagumatua me vakadodonutaki koya me biuta na nona itovo ca. E cakava tale ga qori ena yalololoma o Jiova ke raica ni rawa ni vukei o koya e cala.
Gauna Veiganiti me Cati Kina e Dua
Vakacava ke dua sa kila na loma ni Kalou qai sega ni via cakava? Ena sega ni lomani koya na Kalou, ena sega tale ga ni vakadonui koya. Ke nakita me cakava tiko ga na ka e cata o Jiova, sa veiganiti ga me cati. Kena ivakaraitaki, e tukuna na iVolatabu: “Sa vakatovolea na tamata yalododonu ko Jiova: Ia na tamata lomaca kei koya sa vinakata nai valavala kaukauwa, sa cati koya na yalona.” (Same 11:5) O koya e sega ni veivutuni ena sega ni vosoti me vaka e tukuna vakamatata na yapositolo o Paula vei ira na Iperiu: “Ke da nakita gona meda valavala ca nida sa kila na ivakavuvuli ni ka dina, sa na sega tale ni dua na isoro me cabori ena vuku ni noda ivalavala ca, eda sa na waraka ga ena rere na veilewai kei na cudru katakata me vakarusai ira na saqata na Kalou.” (Iperiu 10:26, 27) Na cava me cakava kina qori na Kalou dauloloma?
Ni nakita e dua me cala bibi tiko ga, ena rawa ni vakawakana e lomana na ca. Na ka kece me baleti koya e ca qai dredre me veisau. Na iVolatabu e vakatauvatana e dua va qori ina lepate e sega ni rawa ni veisautaka na kena tavutonotono. (Jeremaia 13:23) Ni sega ni veivutuni, e tukuna na iVolatabu ni ka e cakava ena okati me nona “ivalavala ca me tawamudu” qai sega sara ga ni vosoti.—Marika 3:29.
A vakadinati qori ena ka a yaco vei Atama kei Ivi vaka kina o Jutasa Isikarioti. Erau a buli me uasivi o Atama kei Ivi qai matata na ivakaro ni Kalou vei rau, erau kila ruarua tale ga. E laurai ni rau nakita nodrau valavala ca qai sega na nodrau iulubale. Ni oti nodrau valavala ca a sega ni soli vei rau na gauna me rau veivutuni kina. (Vakatekivu 3:16-24) E sega ni uasivi o Jutasa, ia a veitokani voleka kei na luve ni Kalou qai liumuritaki koya. A tukuna o Jisu ni o Jutasa “e dodonu me rusa.” (Joni 17:12) E tukuna tale ga na iVolatabu ni o Setani a se valavala ca sara mai na ivakatekivu, sa dodonu ga me vakarusai. (1 Joni 3:8; Vakatakila 12:12) Sa rauta ga me cati iratou na Kalou.
Ia eda lomavakacegu nida kila ni rawa nira veisau tale ga na tamata valavala ca. E vosovoso o Jiova qai sega ni vinakata me totogitaki ira era sega ni nakita na nodra valavala ca. (Isikeli 33:11) E vinakata ga mera veivutuni me rawa nira vosoti. E tukuna na iVolatabu: “Me biuta mada na nonai tovo na tamata ca, kei na nona vakanananu na tamata daucaka cala; ka me lesu mai ko koya vei Jiova, ena yalololoma vua, io vei koya na noda Kalou, ni na gugumatua ni lomana [“veivosoti vakalevu,” NW].”—Aisea 55:7.
Gauna ni Loloma, Gauna me Kua Kina na Veicati
E dodonu meda kila na lotu vaKarisito dina eda vakatotomuria na Kalou na “gauna ni loloma” kei na ‘gauna me cati’ kina e dua. Ni dau tarai keda na kena ituvaki e dua ena vakavuna me sega ni veiraurau kina na noda rai me baleta na loloma kei na yalololoma. Ia e vukei keda na nona vosa na tisaipeli o Juta me veiraurau na noda yalololoma kei na noda cata na ivalavala ca: “Ni lomani ira tiko ga eso tale, ia moni qaqarauni tale ga. Era vakadukadukalitaka na isulu balavu e loma ena nodra itovo vakayago.” (Juta 22, 23) Meda cata gona na ka ca, sega ni o koya e cakava.
Era vakaroti tale ga na lotu vaKarisito mera lomani ira na kedra meca ena nodra caka vinaka vei ira. E kaya o Jisu: “Lomani ira tiko ga na kemuni meca, masulaki ira tale ga era vakacacani kemuni.” (Maciu 5:44) Qori na vuna era gumatua kina na iVakadinadina i Jiova mera vunautaka tiko ga na itukutuku vinaka ni Matanitu ni Kalou vei ira na wekadra, ke so mada ga era sega ni via vakarorogo. (Maciu 24:14) Nira yavutaka na iVakadinadina na nodra rai ena ka e tukuna na iVolatabu, era kila ni tamata kece ena ganiti ira na loloma i Jiova kei na nona yalololoma. Ke sega ni kauaitaki na nodra sasaga se ra cati se vakacacani, era muria na nona ivakasala na yapositolo o Paula: “Masulaki ira tiko ga era vakacacani kemuni; vosa vinaka vei ira, kua ni vosavakacacataki ira. . . . Kua ni sauma na ca e caka vei kemuni.” (Roma 12:14, 17) Era kila ni na vakatau ga vei Jiova o koya e ganita me lomani kei koya me cati. O Jiova ga ena lewai ira na bula kei ira na mate.—Iperiu 10:30.
Io na “Kalou ga na loloma.” Meda vakaraitaka noda vakavinavinakataka nona loloma, da saga meda kila na lomana da qai cakava. Era marau na iVakadinadina i Jiova ena nomu itikotiko mera vakavulici iko ena nomu iVolatabu mo kila na loma ni Kalou kei na sala mo bulataka kina. Ni o cakava qori ena sega ni cati iko o Jiova, ena lomani iko ga.
[Tikina bibi ena tabana e 23]
“Sa ono na ka sa cata ko Jiova: Io, e vitu sa ka vakasisila ki na yalona: Na mata viavialevu, na yame daulasu, kei na liga sa vakadave dra sa sega ni cala, na yalo e veinanuyaka na ka ca, na yavai koya sa kusarawa ni ciciva na ca. Na dautukutuku vakailasu sa dauvosataka na ka lasu, kei koya sa kaburaka na veileti vei ira era veiwekani.”—VOSA VAKAIBALEBALE 6:16-19
[Tikina bibi ena tabana e 24]
“Ke da nakita gona meda valavala ca nida sa kila na ivakavuvuli ni ka dina, sa na sega tale ni dua na isoro me cabori ena vuku ni noda ivalavala ca, eda sa na waraka ga ena rere na veilewai kei na cudru katakata me vakarusai ira na saqata na Kalou.”—IPERIU 10:26, 27
[Tikina bibi ena tabana e 25]
“Me biuta mada na nonai tovo na tamata ca, kei na nona vakanananu na tamata daucaka cala; ka me lesu mai ko koya vei Jiova, ena yalololoma vua, . . . ni na gugumatua ni lomana [“dauveivosoti vakalevu,” NW].”—AISEA 55:7
[iYaloyalo ena tabana e 24]
Ena vakadodonutaki luvena na itubutubu dauloloma me vukei koya
[iYaloyalo ena tabana e 25]
Sa yaga vei ira e levu na kaivesu na loloma kei na yalololoma ni Kalou