Au Vinakata Meu Vakatotomuri Luvei Jefica Yalewa
Talanoataka o Joanna Soans
Niu se itabagone, au vinakata sara ga meu vakataki luvei Jefica. Meu vakamacalataka mada na ka au vakasamataka voli kei na noqu vakatotomuria na ka a cakava.
NA IMATAI ni nodra soqo na iVakadinadina i Jiova au a tiko kina ena 1956 a caka mai Bombay (sa o Mumbai nikua) e Idia, e veisautaka sara ga na noqu bula. E uqeti au na ivunau au rogoca kina me baleti luvei Jefica yalewa.
De dua o sa wilika ena iVolatabu na nona vakatulewa ni se itabagone na luvei Jefica me kua ni vakawati. A rawa kina me vakayacora o tamana na nona bubului. Ni se goneyalewa a lai veiqaravi ena vale i Jiova se na valeniveitavaki ena nona bula taucoko.—Dauveilewai 11:28-40.
Au vinakata sara ga meu vakataki koya. Ia e dua na leqa, meu dawai tu ga e veisaqasaqa kei na neimami itovo vakavanua e Idia ena gauna oya.
Noqu iSususu
Keitou le ono na veitacini, au ikarua ni iotioti. Na neitou itubutubu o Benjamin kei Marcelina Soans mai Udipi na siti ena ra kei Idia. Na neitou vosanisucu na vosa vakaTulu, era vosataka tale ga qori e rauta na rua na milioni na lewenivanua. Ia me vakataki ira e levu e Udipi, keimami vuli ena vosa vaKannada.
O ira na vakaitikotiko eke era nanuma ni bibi na vakawati kei na vakaluveni. Niu tubu cake tiko au sega ni bau rogoca na vosa vakaTulu ni “dawai,” “galili,” kei na “vakanananu.” E vaka sara ga me sega ni dau yaco qori ni keitou tiko vata kei rau na tukaqu kei buqu, ira na noqu momo kei na noqu nei kei na so tale na weka voleka!
Na kena ivakarau ena noqu vanua o ira na gone era na wili ena vuvale i tinadra. Ena muri na yatukawa nei tina, qai levu cake na nodra ivotavota na yalewa. Ena so na itikotiko e Tulu, ni vakamau oti e dua na goneyalewa e dau tiko ga kei tinana qai toki yani e kea o tagane.
Eso na ka e duidui kina na neitou vuvale ni keitou lotu vaKarisito. E veiyakavi ena liutaka o tukaqu na sokalou vakavuvale, e daumasu qai wilika i cake na iVolatabu vakaTulu. E vaka e dolava e dua na kato e tu kina na vatu talei ni cega na nona iVolatabu kakadresudresu me wilika vei keitou. Qori e gauna marautaki dina! E uqeti au na Same 23:1: “A noqui vakatawa ko Jiova; ena sega na ka me yali vei au.” Au lomatarotarotaka, ‘O cei o Jiova? Na cava e tukuni kina ni o koya na ivakatawa?’
Vaka e Lutu Mai Mataqu na “Vari ni Ika”
Ena dredre ni bula vakailavo ni oti na iKarua ni iValu Levu, keitou toki kina i Bombay e sivia na 900 na kilomita na kena yawa. Erau mai raici Ta e rua na iVakadinadina i Jiova ena 1945 rau qai solia vua e dua na ivola vakaivolatabu. A wilika vagumatua o tamaqu na ivola, taleitaka na ka e wilika, qai lai wasea vei ira era vosa vaKannada. Ena itekivu ni veiyabaki ni 1950 a tubu e dua na iwasewase lailai me imatai ni ivavakoso vaKannada e Bombay.
Erau vakavulici keitou o Na kei Ta me keitou gonevuli gugumatua ni iVolatabu qai qasenivuli maqosa. E tiko na gauna e veisiga me keitou masu qai vuli vata kina. (Vakarua 6:6, 7; 2 Timoci 3:14-16) Niu wili iVolatabu tiko ena dua na siga e vaka e lutu mai mataqu na vari ni ika. Au vulica ni o Jiova e vaka e dua na ivakatawa ni dusimaki ira era qaravi koya, vakani ira, e taqomaki ira tale ga.—Same 23:1-6; 83:18.
Dusimaki Yau o Jiova
Ni oti ga vakalailai na soqo ni tikina guilecavi dredre e Bombay ena 1956, au papitaiso sara. Au vakatotomuri Prabhakar na ganequ meu cakacaka vakaitalatala vakatabakidua ni oti ga e ono na vula. E gu na lomaqu meu tukuna yani na ka dina, ia dua na ka na noqu taqaya niu saga meu vakamacalataka na noqu vakabauta. E tata na gusuqu qai ninini na rorogo ni domoqu. Au vosavosaiyaloqu, ‘Au rawa ga ni cakava qo ena veivuke i Jiova!’
E vukei au o Jiova ni lesi rau mai ke e dua na veiwatini daukaulotu o Homer kei Ruth McKay mai Kenada, erau a vuli ena koronivuli ni daukaulotu ni iVakadinadina i Jiova mai Niu Yoka, Merika, ena 1947. Erau vukei au sara ga niu tekivu ena noqu cakacaka vakaitalatala vakatabakidua. Keirau dauvakatovotovotaka kei Ruth na ka au rawa ni tukuna e veivale. E kila vinaka na iwali ni noqu taqaya. E dau taura na ligaqu ninini qai kaya: “Kua ni leqa, daru tovolea na vale tarava.” Qori e vakayaloqaqataki au sara ga.
A tukuni vei yau ena dua na siga ni keirau na cakacaka vata kei Elizabeth Chakranarayan e dua na kena marama e qasenivuli maqosa ni iVolatabu. Na imatai ga ni ka au tukuna: ‘E rawa vakacava meu na bula vata kei na taciqu qo? E qase sara vei au!’ Ia au vakadinata ni noqu itokani vinaka e vukei au vakalevu.
“Sega ni tu Taudua”
Na imatai ni neirau ilesilesi ena siti kilai levu o Auranagabad, voleka ni 400 na kilomita ena ceva kei Bombay. Keirau qai kila ni siti oya era tiko kina e voleka ni duanamilioni, keirau ga na iVakadinadina. Ni vosataki vakalevu kina na vosa vakaMarathi, ena gadrevi meu vulica tale ga.
Au galili ena so na gauna, au dau mamakeukeu me vaka na gone e sega na tinana. Ia e vakayaloqaqataki au na nona loloma vakatina o Elizabeth ni dau tukuna: “Eda na galili ena so na gauna, eda sega ga ni tu taudua. O yawa mai vei ira na wekamu kei na nomu itokani, ia e sega vakadua ni yawaki iko o Jiova. Ke o veitokani kei koya, ena seavu totolo nomu galili.” Au dau mareqeta nona ivakasala me yacova mai nikua.
Ni sa lailai na ivodovodo, keirau taubaletaka e veisiga e 20 na kilomita, se mani kuvu se soso na gaunisala, katakata se batabata na draki. Ena vulaikatakata, e dau yacova sara na 40 na dikiri celcius na katakata. Ena vulaiuca, eso na yalava ni vunau e dau vakavula na kena soso. Ia e sega ni leqa levu sara na draki ni vakatauvatani kei na nodra rai na lewenivanua.
Era sega ni dau veivosaki e matanalevu na yalewa kei na tagane vakavo ga ke ra veiwekani, qai tu tu yadua mera vakavulici ira na tagane na yalewa. Keirau dau vakalialiai, dau vosacataki tale ga. Ena imatai ni ono na vula, e sega ni dua tale e tiko ena vuli iVolatabu e veimacawa, keirau ga. Toso na gauna era sa qai lako mai na tataleitaki. Sega ni dede sa tekivu e dua na iwasewase lailai, ra tomani keirau sara eso ena cakacaka vakaitalatala.
“Mo Kenadau ena Nomu Cakacaka”
Keirau lesi tale i Bombay ni oti e rua veimama na yabaki. A tomana tiko ga o Elizabeth na nona cakacaka vakavunau, niu a kerei meu lai vukei tamaqu a vakadewataka duadua tiko na neimami ivola vakaivolatabu ena vosa vaKannada. A marautaka vakalevu na noqu veivuke, ni levu tu na nona itavi ena ivavakoso.
Erau mani vakatulewataka na noqu itubutubu me rau lesu ina neitou itikotiko e Udipi ena 1966. A tukuna o Ta ni bera ni biuti Bombay: “Tovolea mo kenadau sara ena nomu cakacaka luvequ. Me kilai rawarawa qai matata na nomu vakadewa. Mo kua ni nuidei vakasivia, yalomalumalumu ga qai nuitaki Jiova.” Qori na iotioti ni nona ivakasala, ni a takali ni oti ga vakalailai nona yaco i Udipi. Au saga sara meu muria na nona ivakasala ena noqu cakacaka ni vakadewa me yacova mai nikua.
“O Sega ni Via Vakavuvale?”
E dau kena ivakarau e Idia me rau tuvanaka na itubutubu mera vakamau na luvedrau nira se gone ra qai uqeti mera vakavuvale. Au dau tarogi kina: “O sega ni via vakavuvale? O cei ena qaravi iko ni o sa qase? O na sega ni galili?”
Au dau yalolailai ena so na gauna ni weroki na taro qori. Ia au sega ni vakaraitaka vua e dua, au na talaucaka ga na lomaqu vei Jiova ena gauna au tiko taudua kina. Au lomavakacegu niu kila ni sega ni raica o Jiova me yali e dua na ka ena noqu bula niu dawai. Niu vinakata tiko ga me kua ni dua na ka e vakalatilati ena noqu qaravi koya, au vakasamataka kina na ivakaraitaki i luvei Jefica vaka kina o Jisu—erau dawai tu ga rau qai oga ena vakayacori ni loma ni Kalou.—Joni 4:34.
iSolisoli i Jiova
E voleka ni 50 na yabaki na neirau veitokani vinaka kei Elizabeth. A mai takali ena 2005, ni yabaki 98. Ni sa sega ni wilika rawa na iVolatabu ni sa buawa na matana, e levu na gauna e masu vakabalavu vua na Kalou. Ena so na gauna au nanuma ni vakamacala tiko vakaivolatabu vua e dua ena nona rumu, ia au qai raica ni masu tiko vei Jiova. E vakabauta ni bula dina tiko o Jiova, qai vaka sara ga e raici koya tiko ena veika e cakava e veisiga. Au vulica ni qo sara ga na itakele meu dei tiko ga kina ena noqu qarava na Kalou me vakataki luvei Jefica. Au vakavinavinaka vei Jiova ni digia e dua na taciqu matua vakayalo me vakavulici niu se gone qai vakayaloqaqataki au ena veika dredre au sotava.—Dauvunau 4:9, 10.
Au kalougata niu qaravi Jiova me vakataki luvei Jefica! Niu dawai tu ga qai muria na ivakasala ena iVolatabu e vakainaki na noqu bula au qai vakalougatataki niu saga tiko ga ‘me kua ni dua na ka e vakalatilati ena noqu qarava na Turaga.’—1 Korinica 7:35.
[iYaloyalo ena tabana e 28]
Vunau tiko o tamaqu e Bombay ena veiyabaki ni 1950
[iYaloyalo ena tabana e 28]
Keirau kei Elizabeth ni bera ni takali
[iYaloyalo ena tabana e 29]
Veisureti ina dua na ivunau vakaivolatabu e Bombay ena 1960
[iYaloyalo ena tabana e 29]
Kei rau na noqu itokani vakacakacaka ena tabana ni vakadewa