Yadra Tiko me Vakataki Ratou na Yapositolo
“Me datou yadra tiko.”—MACIU 26:38.
NA CAVA O VULICA ME BALETA NOMU:
Yadrava na veidusimaki ena vanua mo lai vunau kina?
Yadra tiko ga ena nomu gugumatua ena masu?
Vunautaka sara vakavinaka na itukutuku vinaka, dina ni o sotava na ituvaki dredre?
1-3. Ena iotioti ni bogi i Jisu e vuravura, na cava eratou sega ni yadra tiko kina na yapositolo, na ivakadinadina cava e dusia ni ratou qai vuli mai na nodratou cala?
VAKASAMATAKA mada na iotioti ni bogi i Jisu e vuravura. A gole ena were o Kecisemani na vanua e dau taleitaka, qori ena tokalau kei Jerusalemi. Eratou tomani koya na nona tisaipeli yalodina. E sega ni tukuni rawa na lomaleqa i Jisu, e vinakata gona me dua na vanua vagalala me lai masu kina.—Maciu 26:36; Joni 18:1, 2.
2 Eratou qai gole kei Jisu ena loma ni were o Pita, Jemesa, kei Joni. E tukuna vei ratou o Jisu: “Dou tiko eke me datou yadra tiko,” mani gole sara me lai masu. Ni lesu mai, eratou moce tu na nona itokani. E vakamasuti ratou tale: “Dou yadra.” Ia ena rua tale na gauna eratou se baci moce. Ena bogi tiko ga oya, eratou moce kece vakayalo na yapositolo. Eratou biuti Jisu mada ga me ratou dro!—Maciu 26:38, 41, 56.
3 Ratou qai veivutunitaka e muri na yapositolo na nodratou sega ni yadra tiko. Eratou vuli sara ga na tagane yalodina qori mai na nodratou cala. E vakamacalataka e muri na ivola na Cakacaka ni ratou qai ivakaraitaki vinaka na yapositolo ena nodratou yadra tiko. De dua na nodratou ivakaraitaki vinaka e uqeti ira tale ga kina na tacidra vakayalo mera yadra tiko ga. E rui bibi vakalevu nikua meda yadra tiko. (Maciu 24:42) Meda dikeva mada e tolu na lesoni eda rawa ni vulica ena ivola na Cakacaka me baleta na noda yadra tiko.
YADRAVA NA VEIDUSIMAKI ME BALETA NA VUNAU
4, 5. A dusimaki vakacava ena yalo tabu o Paula kei ratou na nona itokani?
4 Na kena imatai, eratou yadrava na yapositolo na veidusimaki ena vanua me ratou vunau kina. E tukuni ena iVolatabu na nona vakayagataka o Jisu na yalo tabu e solia o Jiova, me dusimaki Paula kei ratou na nona itokani ena dua na nodratou ilakolako duatani duadua. (Caka. 2:33) Meda raica tale mada na ilakolako qori.—Wilika Cakacaka 16:6-10.
5 Eratou biuta na koro o Lisitira o Paula, Sailasa, kei Timoci ena nodratou ilakolako, na koro qori e tiko ena ceva kei Kalatia. Ni oti e vica na siga, ratou yacova na nodra gaunisala na kai Roma. Na gaunisala qo e gole tiko ena ra kei Esia, era vakaitikotiko kina e levu. Eratou via muria na gaunisala qori me rawa ni vunautaki na itukutuku kei Karisito vei ira na vica vata na udolu na lewenivanua era vakaitikotiko ena vica na koro qori. Ia e dua na ka e qai tarovi ratou. E tukuni ena tikina e 6: “Ia eratou muri i Firijia kei na vanua o Kalatia, ni sega ni vakatara na yalo tabu me ratou tukuna na vosa ena yasana o Esia.” E sega ni kilai na vuna e tarovi ratou kina na yalo tabu me ratou vunau ena yasana o Esia. Ia e dua ga na ka e macala, ena veidusimaki ni yalo ni Kalou, e vinakata o Jisu me dusimaki Paula kei ratou na nona itokani me ratou lai vunau ena dua tale na vanua.
6, 7. (a) Na cava e yaco ni ratou volekati Picinia o Paula kei ratou na nona itokani? (b) Na vakatulewa cava eratou cakava na tisaipeli, na cava e yaco kina?
6 Eratou qai gole e vei o Paula kei ratou na nona itokani? E tukuni ena tikina e 7: “Ni ratou gole sobu i Misia eratou sasaga me ratou lako i Picinia. A sega ni vakatara qo o Jisu ena veidusimaki ni yalo tabu.” Me vaka ni sega ni vakatarai me ratou vunau e Esia, eratou qai gole ena vualiku me ratou vunau ena veikorokoro e Picinia. Ia ni ratou voleka yani e kea, a vakayagataka tale o Jisu na yalo tabu me tarovi ratou. De dua ratou veilecayaki sara ga. Eratou kila na ka me ratou vunautaka, kila tale ga na sala me ratou vunau kina, ia e sega ni matata na vanua me ratou lai vunautaka kina na itukutuku vinaka. Qo e vaka ga e ratou tukia na katuba e gole e Esia, ia e sega ni dola. Eratou tovolei Picinia, e sega tale ga ni dola. Vakacava, eratou yalolailai? Sega vakadua!
7 Na ka eratou qai cakava tarava, e vou sara ga. E tukuni ena tikina e 8: “Eratou siviti Misia ratou gole sobu sara i Tiroa.” Kena ibalebale ni ratou gole ina ra, ratou qai taubaletaka e 563 na kilomita, eratou lakosivita na veikoro me yacova sara na ikelekele ni waqa mai Tiroa, qo na vanua era dau kele kina na waqa mera gole i Masitonia. Ena ikatolu ni gauna, eratou tukia tale na katuba o Paula kei ratou na nona itokani. Ia qo sa qai dola! E tukuni ena tikina e 9 na ka e yaco tarava: “E qai raivotu o Paula ena bogi: e raica ni wavu tu e dua na kai Masitonia qai vakamasuti koya tiko: ‘Lako mai Masitonia mo mai vukei keimami.’” Sa qai kila o Paula kei ratou na nona itokani na vanua me ratou lai vunau kina. Sega ni bera nodratou gole e Masitonia.
8, 9. Na cava eda vulica mai na nodratou ilakolako o Paula?
8 Na cava eda vulica ena itukutuku i Paula kei ratou na nona itokani? Nanuma tiko, e tekivu veidusimaki na yalo tabu ena gauna e biubiu kina o Paula me gole e Esia. A qai veidusimaki o Jisu ena gauna a volekati Picinia kina o Paula. Ia ena gauna sara ga e yaco kina e Tiroa, a qai dusimaki koya o Jisu me gole i Masitonia. Me vaka ni Ulu ni ivavakoso o Jisu, ena rairai dusimaki keda tale ga va qori. (Kolo. 1:18) Kena ivakaraitaki, o na rairai vakasamataka tiko mo painia se toki ena vanua e gadrevi vakalevu kina na veivuke. Ia ena gauna o tekivu saga kina mo tadolova na nomu isausau, ena rairai dusimaki iko o Jisu ena nona vakayagataka na yalo tabu. Kena ivakaraitaki: Ena rawa ga vei draiva me vagolea nona motoka ina imawi se imatau ke toso tiko na motoka. E rawa tale ga ni dusimaka na noda cakacaka vakaitalatala o Jisu ke da toso tiko, qori ke da sasaga tiko meda tadolova na noda isausau.
9 Vakacava ke sega ni vakavotukana totolo na noda sasaga? Vakacava eda na soro, nida nanuma ni sa sega ni dusimaki keda na yalo tabu? Nanuma tiko, a sotava tale ga o Paula eso na ituvaki dredre. Ia e vaqaqara tiko ga, tukituki tiko ga me yacova ni sa dola na katuba. Ke o sasaga tale ga vagumatua mo kunea “e dua na katuba levu ni cakacaka,” o na rawa tale ga ni vakalougatataki.—1 Kor. 16:9.
YADRA TIKO ENA NODA GUGUMATUA ENA MASU
10. Meda rawa ni yadra tiko ga, na cava e bibi kina meda kua ni cegu ena masu?
10 Qo na ikarua ni lesoni eda vulica vei ratou na tagane lotu vaKarisito ena imatai ni senitiuri: Eratou yadra tiko ena nodra gumatua ena masu. (1 Pita 4:7) Me rawa nida yadra tiko, e bibi meda kua ni cegu ena masu. Nanuma lesu na were o Kecisemani ni bera toka ga ni vesu o Jisu, a tukuna vei ratou na tolu na yapositolo: ‘Dou yadra, dou masu tiko ga.’—Maciu 26:41.
11, 12. Na cava eso na ka e cakava o Eroti me vakacacani ira kina na lotu vaKarisito, okati kina o Pita? Na cava e cakava kina qori?
11 A tiko tale ga ena were o Kecisemani o Pita, a vakadinadinataka e muri na yaga ni nodra masu vagumatua eso tale. (Wilika Cakacaka 12:1-6.) Ena itekitekivu ni wase 12 ena ivola na Cakacaka, eda vulica ni a vakacacani ira na lotu vaKarisito o Eroti mera taleitaki koya kina na Jiu. De dua a kila vinaka o Eroti ni o Jemesa e dua na yapositolo qai itokani voleka i Jisu. A mani vakamatei Jemesa “ena iseleiwau.” (Tikina e 2) E ituvaki dredre dina qori vei ira na ivavakoso baleta ni sa takali na tacidra lomani!
12 Na cava tale e cakava o Eroti? E tukuni ena tikina e 3: “Ni raica nira taleitaka ya na Jiu, sa qai vesuki Pita tale ga.” Ia e levu na gauna era dau sereki vakacakamana na yapositolo mai valeniveivesu, dua vei ira qori o Pita. (Caka. 5:17-20) A rairai kila vinaka tu qori o Eroti. E qaseqase na iliuliu qo, e saga me kua tale ni yaco qori vei Pita. E raica mera “yadravi koya e va na matayadra, e dua na matayadra e lewena e va na sotia, qai nona inaki me na vakaraitaki koya vei ira na lewenivanua ni oti na lakosivia.” (Tikina e 4) Vakasamataka mada! Ena lewa i Eroti, e vesu ena sinucodo o Pita, rau tu e yasana e rua na yadra, era yadra tale tiko ga e 16 na yadra ena siga kei na bogi me kua kina ni dro. A vinakata tiko o Eroti me vakamatei Pita ni oti na lakosivia, me vakamarautaki ira kina na Jiu. Dua dina na ituvaki dredre vei ira na mataveitacini ena gauna oya, na cava era na cakava?
13, 14. (a) Ni vesu o Pita, na cava era cakava na ivavakoso? (b) Na cava eda vulica ena nodra masulaki Pita na tacina vakayalo?
13 Era kila vinaka na mataveitacini na ka mera cakava. E tukuni ena tikina e 5: “Ena nona tiko o Pita e valeniveivesu, dua na ka nodra masulaki koya vua na Kalou na lewe ni ivavakoso.” Io, era sega ni cegu ni masulaki Pita na tacidra lomani, qai vu dina mai lomadra na nodra vakamamasu. Kena ibalebale ni sega ni vakayalolailaitaki ira na mate i Jemesa, se mera lai nanuma kina ni tawayaga na masu. Ia era kila ni talei vei Jiova na nodra masu na dausokalou yalodina. Ena sauma na nodra masu ke salavata kei na nona inaki.—Iper. 13:18, 19; Jeme. 5:16.
14 Na cava eda vulica ena ka era cakava na mataveitacini vei Pita? Na noda yadra tiko nikua e sega ni okati ga ena noda masuta na ka e baleti keda, e okati tale ga kina na noda masulaki ira na tacida. (Efeso 6:18) Vakacava, o kila eso na mataveitacini era sotava tu eso na ituvaki dredre? De dua eso era sotava tiko na veivakacacani, leqa tubukoso, se vakatabui na cakacaka ena nodra vanua. Vakacava mo okati ira sara ga ena nomu masu? De dua o kilai ira eso e sega ni laurai levu na ituvaki dredre era sotava tiko me vaka na leqa vakavuvale, yalolailai, se tautauvimate. Vakacava mo cavuti ira sara ga ni o masuti Jiova, o koya e “Daurogoca na masu”?—Same 65:2.
15, 16. (a) Vakamacalataka na nona sereki Pita mai valeniveivesu na agilosi i Jiova. (Raica na iyaloyalo e ra.) (b) Na cava e veivakacegui kina na noda vakasamataka na sala e vakabulai Pita kina o Jiova?
15 Ia na cava e qai yaco vei Pita? Ena iotioti ni nona bogi ena valeniveivesu, e moce lutu o Pita ena kedrau maliwa na yadra, ia e dua na ka veivakurabuitaki e qai yaco. (Wilika Cakacaka 12:7-11.) Raitayaloyalotaka mada na ka a yaco: E cilava vakasauri na rumu na rarama. E basika vakasauri e dua na agilosi, ia o rau na yadra rau sega ni raici koya. E vakayadrati Pita qai tasere mai ligana na sinucodo! Erau gole e tuba, rau takoso sara ga ena matadra na yadra era tu e kea, erau curu ina matamata levu kaukamea “e tadola mai vakataki koya.” Nirau sa yaco ena taudaku ni valeniveivesu, e yali vakasauri na agilosi. Sa sereki o Pita!
16 Nida vakasamataka na kaukaua i Jiova me vakabulai ira na nona dauveiqaravi, e vakaukauataka dina na noda vakabauta, se vakaevei? Macala ga ni na sega ni vakabulai keda vakacakamana va qori o Jiova ena gauna qo. Eda nuidei ga ni na vakayagataka na nona kaukaua me vakabulai ira kina na nona dauveiqaravi. (2 Vei. 16:9) Ena vakayagataka na yalona tabu me vakaukauataki keda meda vosota na ituvaki dredre cava ga eda sotava. (2 Kor. 4:7; 2 Pita 2:9) Sa voleka tale ga qo me solia vei Luvena na kaukaua me sereki ira na vica vata na milioni mai na ivau ni mate. (Joni 5:28, 29) Na noda vakabauta na yalayala kece i Jiova ena vakayaloqaqataki keda sara ga nida sotava na ituvaki dredre.
VUNAU TIKO GA VAKAVINAKA NI YACO NA ITUVAKI DREDRE
17. E ivakaraitaki vinaka vakacava o Paula ena nona gugumatua, qai sega ni lokuyara ena vunau?
17 Qo na ikatolu ni lesoni eda vulica ena nodratou yadra tiko na yapositolo: Eratou vunautaka tiko ga vakavinaka na itukutuku vinaka, dina ni sotavi na ituvaki dredre. Me rawa nida yadra tiko ga, e bibi meda gugumatua ena vunau, me kua tale ga ni lokuyarataki. E ivakaraitaki vinaka ena tikina qori na yapositolo o Paula. E dau gugumatua, e goleva e levu na vanua, e tauyavutaka tale ga e levu na ivavakoso. E sotava e levu na ituvaki dredre, ia e sega vakadua ni datuvu se lokuyara.—2 Kor. 11:23-29.
18. Sala cava e vunau tiko ga kina vakavinaka o Paula ena nona vesu tu e Roma?
18 Na iotioti ni gauna e cavuti kina o Paula ena ivola na Cakacaka, oya na wase 28. A kau vakavesu e Roma me rairai vei Nero. De dua erau vesuki vata ena sinucodo kei na dua na yadra. Ia e sega ni vagalui koya qori, e vunau tiko ga. (Wilika Cakacaka 28:17, 23, 24.) Ni oti ga e tolu na siga, o Paula e kacivi ira sara na nodra vakailesilesi na Jiu me vunau vei ira. Ni oti qori era lokuca e dua tale na siga mera sikovi Paula, e vunautaka sara kina vakavinaka vei ira na itukutuku vinaka. E tukuni ena tikina e 23: “Era mani lokuca vua e dua na siga, ra qai lako yani vakalewe levu ina nona icili. E vakamacalataka sara vakavinaka vei ira ena nona vakamatatataka na veika e vauca na matanitu ni Kalou, e sereka tale ga na veika me baleti Jisu ena lawa i Mosese kei na nodra ivola na Parofita. E vakamacala tiko mai na mataka me lai yacova sara ni sa karobo.”
19, 20. (a) Na cava e laulau kina na vunau i Paula? (b) Na cava e cakava o Paula nira sega ni vakabauta e levu na itukutuku vinaka?
19 Na cava e laulau kina na vunau i Paula? E vakamacalataki ena tikina e 23 eso na vuna. (1) E vunautaka na ka e baleta na Matanitu ni Kalou kei Jisu Karisito. (2) E uqeti ira na vakarorogo ena nona dau ‘vakamacala vinaka.’ (3) E vakayagataka na iVolatabu. (4) E kauaitaki ira vakalevu na tamata ena nona vunau “mai na mataka me lai yacova sara ni sa karobo.” E vunau sara vakavinaka o Paula, ia e sega ni o ira kece na vakarorogo era vakabauta na itukutuku vinaka. E tukuni ena tikina e 24: “Eso era vakabauta na ka e tukuna, eso tale era sega ni vakabauta.” Qo e vakavuna na duidui, era mani biubiu kina eso.
20 Vakacava e yalolailai o Paula ni vica ga era vakabauta na itukutuku vinaka? Sega! E tukuna na Cakacaka 28:30, 31: “E tiko ga o Paula ena vale e sauma me tiko kina me rua na yabaki, qai dau vakacegui ira kece na lako yani kina, e doudou ni vunautaka vei ira na matanitu ni Kalou kei na nona vakavulici ira ena veika me baleta na Turaga o Jisu Karisito qai sega ni dua e vakalatilati vua.” Ni oti na vosa veiuqeti qori, sa mai cava tale ga kina na ivola na Cakacaka.
21. Na cava eda rawa ni vulica ena ivakaraitaki Paula, dina ni vakatabui me biuta na nona vale?
21 Na cava eda vulica mai na ivakaraitaki i Paula? A vakatabui me biuta na nona vale, a sega ni rawa gona me vunau e veivale. Ia e tiko ga vua na rai donu, e vunau vei ira kece era sikovi koya. E levu tale ga nikua era qaravi Jiova tiko ga ena marau, ke ra mani bala vakatawadodonu e valeniveivesu ena vuku ni nodra vakabauta, era vunau tiko ga. Eso na tacida lomani era sa tu ga e vale, de dua era tiko ena vale ni malumalumu. Ke vakatara na kedra ituvaki, era vunau vei ira na vuniwai, ira na tamata cakacaka, vulagi kei na so tale. E gu na lomadra mera vunautaka sara vakavinaka na Matanitu ni Kalou. Eda vakavinavinakataka dina na nodra ivakaraitaki!
22. (a) Me yaga vei keda na ivola na Cakacaka, na idusidusi cava e vakarautaki? (Raica na kato e cake.) (b) Na cava mo saga tiko ni o waraka me takali na ituvaki ca qo kei vuravura?
22 Io, e levu sara na ka eda vulica ena Cakacaka me baleti ratou na yapositolo kei ira na lotu vaKarisito ena imatai ni senitiuri. Nida waraka me takali na ituvaki ca qo kei vuravura, meda vakatotomuri ira mada ga na lotu vaKarisito ena imatai ni senitiuri ena nodra doudou ni vunau kei na nodra gugumatua. E sega tale ni dua na itavi dokai me tautauvata kei na noda ‘vunautaka sara vakavinaka’ na Matanitu ni Kalou!—Caka. 28:23.
[Kato ena tabana e 13]
“LEVU TALE NA KA AU VULICA ENA IVOLA NA CAKACAKA”
Ni wilika e dua na ivakatawa dauveilakoyaki na ivola “Bearing Thorough Witness” About God’s Kingdom, e tukuna: “Levu tale na ka au vulica ena iVola na Cakacaka. Au sa wilika vakalevu na ivola na Cakacaka ena iVolatabu, ia e vaka ga au wiliwili tu ena mata ni kadrala, au qai dara tu e dua na matailoilo buawa. Ena gauna qo au marautaka ni sa qai matata na ka au wilika me vaka na rarama ni matanisiga.”
[iYaloyalo ena tabana e 12]
A dusimaki Pita na agilosi me curuma na matamata levu kaukamea