Me Yaga Qai Marautaki Noda Vulica na iVolatabu

Eda rawa ni marautaka vakacava noda vulica vakataki keda na iVolatabu? Na cava meda cakava me yaga kina? Meda raica mada e tolu na ka bibi me yaga kina noda vuli vakataki keda.

1 MASU: Qori sara ga na imatai ni ka meda cakava. (Same 42:8) Na cava na vuna? E bibi meda raica ni wili tiko ena noda sokalou na noda vulica na iVolatabu. Koya gona, e vinakati meda kerei Jiova me dei noda vakasama kei na lomada ena noda vuli, me solia tale ga vei keda na yalona tabu. (Luke 11:13) E tukuna o Barbara, e sa dede nona daukaulotu: “Au na masu rawa ni bera niu dau wilika se vulica na iVolatabu. Oti oya, au vakila sara ga na veivuke i Jiova kei na nona marautaka na ka au cakava tiko.” Noda dau masu ni bera noda vulica na iVolatabu, ena dei kina noda vakasama kei na lomada meda kila vakavinaka na levu ni kakana vakayalo eda vulica tiko.

2 VAKASAMA VAKATITOBU: Eso era dau wiliwili wale ga ena gauna ni nodra wili iVolatabu baleta nira osooso. Ia ena sega ni yaga sara vakalevu qori. O Carlos, e sa sivia e 50 na yabaki na nona qaravi Jiova, e sa qai kila ni bibi me tiko na gauna me vakasamataka kina vakatitobu na ka e vulica, me rawa ni yaga vakalevu vua. E tukuna: “Nikua, ena gauna au dau wili iVolatabu kina, e sa vica ga na tabana au na wilika​—rauta ni rua na tabana ena dua na siga. Qo au rawa ni vakayagataka kina e levu na gauna meu vakasamataka vakatitobu na ka au wilika, meu rawa ni vulica kina eso na ka bibi.” (Same 77:12) Nida vakayagataka eso na gauna meda vakasama kina vakatitobu, ena levu na ka eda kila, ena vakalevutaka tale ga na noda kila na inaki ni Kalou.​—Kolo. 1:9-11.

3 BULATAKA: Ena yaga vakalevu ke da raica ni tiko na yaga ni ka eda cakava tiko. E va qori sara ga na noda vulica na iVolatabu. “Na noqu vulica na iVolatabu e vukei au meu walia kina na leqa au dau sotava, e rawa tale ga niu vukea eso tale,” qori e tukuna o Gabriel, e dua na tacida e tiko nona ituvatuva ni vuli vakataki koya. E tomana: “Au dau saga meu bulataka sara ga na ka au vulica.” (Vkru. 11:18; Josua 1:8) Io, e levu na itukutuku me baleta na Kalou e rawa nida kila da qai bulataka.​—Vkai. 2:1-5.

RAILESUVA: E ka dokai dina noda rawa ni vakadikeva na ka e vakarautaka o Jiova, o koya na iVurevure ni vuku! (Roma 11:33) Koya gona, ena nomu vuli tarava, masuti Jiova rawa me dei nomu vakasama kei na lomamu, me solia tale ga na yalona tabu. Oti qori, cegu vakalailai mo vakasamataka vakatitobu na ka o wilika. Bulataka tale ga na veika o vulica. Ni o cakava na veika bibi qori, o na raica ni yaga qai marautaki duadua na nomu vulica na iVolatabu.