E Yaga Noda Dau Vuli Vakataki Keda

O SA bau sarava mera digi vuanikau e so? E levu era raica na rokana kei na kena levu mera kila kina se sa matua se sega. E so era boica. E so era tara, e so era boboka sara. E so tale era vakarautaka, dua ena ligadra imawi dua ena imatau, mera qai vakila na kena e bibi vei rau ni na levu na kena wai. Cava era vakasamataka o ira oqo? Era dikeva vinaka na vuanikau era raica, ra vakalewa na kedra duidui, na kena era sa raica oti kei na kena era raica tiko, kei na nodra veidutaitaka na ka era raica tiko kei na ka era kila tu. Nira sa na kania na vuanikau, era na qai kila na yaga ni nodra a vakasamataka vinaka na ka mera volia.

Ia, e macala ni duatani sara na yaga ni noda vulica na Vosa ni Kalou. Ni yaco me tiki bibi ni noda bula na vuli vaka oqo, ena kaukaua cake noda vakabauta, ena titobu noda loloma, ena vuavuaivinaka cake noda cakacaka vakaitalatala, ena laurai tale ga ena noda vakatulewa na yalomatua kei na vuku vakalou. E kaya kina na Vosa Vakaibalebale 3:15: “Na ka kecega ko sa domona sa sega ni yaga me vakatauvatani kaya.” O sa vakila tale tiko beka ga o iko na yaga ni nomu dau vuli vakataki iko? Ena rawa ni vakatau vakalevu oqo ena kena icakacaka.​—Kolo. 1:9, 10.

Na cava mada na vuli vakataki iko? Na vuli vakataki iko e sega ni nomu wilivola wale tu ga. E okati kina nomu vakasama ena nomu digova se dikeva vinaka e dua na ulutaga. O vakalewa na ka o wilika, o vakatauvatana kei na ka o sa kila tu, o raica na ile e vakamacalataki kina kei na kedra yavu. Ke vou vei iko e dua na ka ni o vuli tiko vakataki iko, vakasamataka vakatitobu. Vakasamataka tale ga na sala o rawa ni bulataka vakavoleka sara kina na ivakasala vakaivolatabu. Ni o iVakadinadina i Jiova, o na vakasamataka tale ga na gauna o rawa ni vakayagataka kina na ka o vulica mo vukei ira kina na tani. E macala gona ni nomu vuli vakataki iko e okati kina nomu vakananuma na ka o vulica.

Me Tu Vinaka Nomu Vakasama

Ni o vakarau vuli vakataki iko, o na vakarautaka na nomu iVolatabu, ivola o digia mo vulica, peni, kei na dua beka na ivola ni volavola. Ia, o vakarautaka tale beka ga na lomamu? E tukuna na iVolatabu ni “vakarautaka . . . na lomana ko Esera me vakasaqaqara e na vunau i Jiova, ka me cakava talega, ka me vakavulica e Isireli nai lesilesi kei na lewa.” (Esera 7:10) Na cava e okati ena noda vakarautaka na lomada?

Na masu ena vukei keda me donu na inaki ni noda vulica na Vosa ni Kalou. Eda vinakata me tara na lomada na ka e vakavulici keda kina o Jiova. Ena gauna kece o vuli kina vakataki iko, masuta na veivuke ni yalo i Jiova. (Luke 11:13) Kerei koya me vakamatatataka vei iko na ibalebale ni ka o na vulica, e vauci vakacava kina na nona inaki, ena vukei iko vakacava mo vakaduiduitaka na vinaka mai na ca, sala o na bulataka kina na kena ivakavuvuli, kei na sala ena vaqaqacotaka kina nomudrau veiwekani kei koya. (Vkai. 9:10) Ni o vuli vakataki iko, “kerea [tiko ga] vua na Kalou” na vuku. (Jeme. 1:5) Dau dikevi iko me salavata kei na ka o vulica ni o masuti Jiova tiko me vukei iko mo cavuraka laivi na vakasama sesewa kei na gagadre cala e tu e lomamu. Dau ‘sere ena vakamolimoli vei Jiova’ ena vuku ni ka e dau vakatakila vei iko. (Same 147:7) Ni vaka oqo na nomu vuli vakataki iko, o na volekati Jiova, ni nomu dau vosa vua ena vakarawarawataka nomu dau vakarorogo ni vosa vei iko ni o wilika na nona Vosa.​—Same 145:18.

Na yalo ni via muria na Vosa ni Kalou e vakaduiduitaki keda na tamata i Jiova. E nodra cakacaka e levu nikua mera vuli ena inaki ni vakalelewa. Ia, oya e sega ni inaki ni noda vuli. Eda vakararavi vei Jiova. (Vkai. 3:5-7) Ni sega ni matata vei keda e dua na ka, eda sega ni siosio meda vakacala. Eda vaqara na isaunitaro, eda vakekeli, ia eda dau waraki Jiova tale ga. (Maika 7:7) Me vakataki Esera, e noda inaki meda muria na ka eda vulica, meda vakavulica tale ga. Ke vaka oya na noda rai ena yaga sara ga vei keda na noda vuli vakataki keda.

iWalewale ni Vuli

Kua ni cega ga nomu ivola o sa tekivu vuli sara vakataki iko me yacova ni oti. Raica mada vakalekaleka e liu na lewe ni wase ni ivola o na vulica, oqo me tekivu sara ga ena ulutaga ena nomu vakasamataka na vosa e vakayagataki kina. Oqori na usutu ni ka o na vulica. Oti oya, qai vakatauvatana na ulutaga lalai kei na ulutaga levu, kei na kedra isema. Dikeva na iyaloyalo, chart, se kato ni veivakavulici ena lewe ni ulutaga. Tarogi iko: ‘Mai na vica na ka au raica oqo, na cava beka au na vulica? Na cava na kena yaga vei au?’ Sa na qai vakainaki kina na nomu vuli vakataki iko.

Tekivu sara. Na ulutaga ni vuli Vale ni Vakatawa kei na so tale na ivola e vakarautaki na kedra taro. Ni o wilika na parakaravu yadua, ena yaga mo toqa na isaunitaro. Ke sega ni vakarautaki na taro ena ivola o vulica, ena yaga mo toqa e so na tikina o na via nanuma. Ke basika e dua na vakasama vou, me matata sara vei iko o qai toso. Raica tale tiko ga de o sotava e so na vosa vakatautauvata se ile o na rawa ni vakayagataka ena cakacaka vakaitalatala se nomu itavi e tarava. Vakasamataka e so o nanuma ni na vakayaloqaqataki ira vakayalo e so na tikina o vulica. Vola sara ga na tikina e so o na via vakayagataka, railesuvi ira tale ni cava na nomu vuli.

Ni o vuli tiko, raica tale ga na veitikinivolatabu. Dikeva se veisemati vakacava kei na ka e vakabibitaki tiko ena dua na parakaravu na veitikinivolatabu era cavuti kina.

O na sotava beka e so na tikina ena sega ni totolo nomu taura na kena ibalebale, se o na via vakekeli tale kina. Kua ni se dikeva oqo de vagolea tani nomu vakasama, vola toka mo qai dikeva malua. So na gauna ena qai matata ga mai e so na ka ni toso nomu vuli. Ke sega, qai lai vakekeli malua. Cava soti e rawa ni o qai vakelia malua? Dua beka na tikinivolatabu e lavetaki e sega ni matata sara vei iko. Se o sega ni kila na veisemati ni ka e veivosakitaki tiko. Se, o nanuma ni o sa taura rawa e dua na vakasama e tukuni tiko, ia e sega ni mani matata sara mo vakamacalataka rawa kina vua e dua tale. Kua ni oti ga o sa guilecava na veika oqo, e vinaka mo lai vakelia vinaka sara ni oti nomu vuli vakataki iko.

Ni veimama tu na ivola e vola na yapositolo o Paula vei ira na Iperiu lotu Vakarisito, a cegu mada qai vola: “Oqo na tikina bibi.” (Iper. 8:1, NW) O dau vakasamataka tale ga vaka oya na tikina e vakabibitaki ena ka o vulica? Raica mada na vuna e cakava kina oqo o Paula. Ena vica na wase yani i liu ni nona ivola, sa vakaraitaka oti tiko kina ni sa curu oti i lomalagi dina o Karisito, na Bete Levu ni Kalou. (Iper. 4:14–5:10; 6:20) Ia, nona vakabibitaka tale na tikina oqo ena itekitekivu ni wase 8, e vakarautaka kina na nodra vakasama na wilika nona ivola mera vakasamataka vakatitobu na sala e tara kina nodra bula. E kaya ni o Karisito e sa rairai oti ena mata ni Kalou ena vukudra, sa dolava kina na sala mera curu rawa tale ga ina “loqi tabu” vakalomalagi. (Iper. 9:24; 10:19-22) Sa dei tu na nodra inuinui, oqo ena uqeti ira mera muria na vo ni ivakasala e volai ena ivola oqo me baleta nodra vakabauta, vosota, kei na ivalavala vakarisito. E vaka kina nida vuli vakataki keda, kauaitaka mada ga na veitikina bibi era babasika mai. Nida cakava oqo, ena lai matata vei keda na uto ni ka eda vulica, ena matata tale ga ena noda vakasama na vuna meda muria kina.

Ena uqeti iko beka na ka o vulica mo bulataka sara? Oqo e dua na taro bibi. Ni o vulica e dua na ka, tarogi iko mada: ‘Me na tara vakacava na noqu rai kei na ka au vakaliuca ena noqu bula? Meu na taurivaka vakacava na itukutuku oqo niu walia e dua na leqa, niu vakatulewa, se niu kakavaka tiko e dua na isausau? Au na vakayagataka vakacava ena noqu vuvale, ena cakacaka vakaitalatala, ena ivavakoso?’ Vakasamataka sara vakabibi na taro kece oqo, veinanuyaka na ituvaki dina o rawa ni sotava mo na vakayagataka kina na ka o sa mai kila.

Ni o vakacavara e dua na wase se dua na ulutaga, railesuva tale vakalekaleka. O se nanuma na veitikina bibi kei na kedra dui ivakamacala? Sala oqo o na nanuma vinaka kina na ka o vulica, o na rawa tale ga ni vakayagataka mai muri.

Ka Mo Vulica

O keda na tamata i Jiova e levu sara tu na ka e rawa nida vulica. Ia, meda na tekivu e vei? Ena veisiga yadua, ena yaga meda vulica na kena tikinivolatabu kei na ivakamacala ena Dikeva na iVolatabu e Veisiga. E tiko tale ga noda soqoni ena veimacawa, ia ena qai yaga sara vei keda na soqoni ke da vulica rawa yani na veika eda na lai rogoca. Me kena ikuri, e so era biuta vakatikitiki na gauna mera vulica kina e so na noda ivola era a tabaki ni bera nira vulica na ka dina. E so tale era digia e so na tikina mai na nodra wili iVolatabu vakamacawa mera vakekeli tale kina.

Vakaevei ke kemu ituvaki ena sega ni rawa kina ni o vulica vinaka kece na ka e dau lai rogoci ena soqoni e veimacawa? Kua ni saga mera caka ga me rawa. Ia, ke sa mani tadre sara, e vinaka cake mo vakarautaka e so na ka, e ca ga ke o sega sara ga ni vakarautaka e dua na ka. Na ka mo cakava oqo, vakadeitaka na soqoni mo na vulica rawa yani, vulica sara vakavinaka. Vakayacora e veimacawa. Ni toso na gauna, vakarabailevutaka ena nomu kuria e so tale na soqoni.

“Tara na Nomu Vuvale”

E sega ni lecava o Jiova ni dodonu mera cakacaka vakaukaua na ulunivale mera bula rawa kina na nodra lewenivuvale. “Vakarautaka mai bili na nomu cakacaka,” e kaya na Vosa Vakaibalebale 24:27, “ka vakarautaka mai veikau me yaga vei iko.” Ia, e sega ni rawa ni o vakaweleweletaka na ka vakayalo e dodonu mo vakarautaka tale ga vei iratou na nomu lewenivuvale. E tomana kina na tikinivolatabu oqo: “Mo qai tara na nomu [“vuvale,” NW].” Ena cakava vakacava oqo e dua na ulunivale? E kaya na Vosa Vakaibalebale 24:3: “Na vuku ga sa tara rawa kina na [“vuvale,” NW].”

Ena yaga vakacava ina nomu vuvale na vuku? Na tamata vuku ena sega ni vovodea na nona rai, ena titobu. Ena qai yaga na vuli vakavuvale ke dikevi mada ga e liu na matavuvale. Sa vakacava tiko na nodratou toso vakayalo na lewenivuvale? Rogoci iratou vinaka ni dou dau veitalanoa. Eratou dau vosa kudrukudru tiko beka se vaka me ratou dau cata ni ratou vakavulici? Sa laurai tiko beka na yalo ni domodomoiyau? Ni o cakacaka vakaitalatala vata tiko kei iratou na luvemu, eratou dau madua beka mera kila na nodratou icaba ni ratou iVakadinadina i Jiova? Eratou taleitaka tiko na porokaramu ni wili iVolatabu kei na vuli vakavuvale o dau vakarautaka? Sa ratou raica tiko beka na sala i Jiova me sala eratou muria ena nodratou bula? Nomu dikeva vinaka na veika oqo, ni o ulunivale, o na kila kina na ka mo cakava mo vakadeitaka kina vei iratou na lewenivuvale yadua na itovo talei vakayalo, mo tarai iratou cake tale ga vakayalo.

Dau yadrava ena Vale ni Vakatawa kei na Yadra! na ulutaga e so e tara sara ga na ka e ganita nomu vuvale. Qai tukuna vei iratou na lewenivuvale na ka dou na vulica vata me ratou vakarau mai kina. Me taleitaki na gauna ni vuli. Kua ni cudruva se vakamaduataka e dua na lewenivuvale ena gauna ni vuli, vakabibitaka ga na yaga ni ka e vulici, vakabibitaka sara ga na tikina e so dou rawa ni cakacaka kina vakavuvale. Cakava mera vakaitavi kece na lewenivuvale ena vuli. Mera raica na lewenivuvale yadua ni Vosa i Jiova e “vinaka sara,” ni vakarautaka vei ira na ivakasala e dui ganiti ira.​—Same 19:7.

Kena Yaga

Na tamata vuli e sega ni vakayalo na nona rai e rawa ni vulica na veika e baleta na noda vuravura, vulica na veika e yaco tu, vulica sara mada ga na veika e baleti koya, ia ena sega ga ni raica rawa na kedra ibalebale. Ena yasana adua, o ira era vulica wasoma na Vosa ni Kalou e rawa ni vukei ira na yalona tabu mera raica ena veika oqo na cakacaka ni Kalou, na vakayacori ni parofisai vakaivolatabu, kei na kena sa vakavatukana tiko na inaki ni Kalou me na lai tini ena vakalougatataki ni kawatamata.​—Mari. 13:4-29; Roma 1:20; Vkta. 12:12.

Ia, e sega ni dodonu meda dokadokataka na ka oqo. Kena veibasai ga, ni noda vulica e veisiga na Vosa ni Kalou ena vakayalomalumalumutaki keda. (Vkru. 17:18-20) Ena taqomaki keda tale ga mai na ‘veivakaisini ni ivalavala ca’ baleta ni cakacaka tiko e lomada na Vosa ni Kalou qai kaukaua vei keda, e malumalumu na idre ni ivalavala ca. (Iper. 2:1; 3:13; Kolo. 3:5-10) Ena sala oqo, eda na ‘ia kina na ivalavala e kilikili kei ira sa nona na Turaga, me vinakata kece ga ko koya, nida vakavuana tiko ena cakacaka vinaka kece ga.’” (Kolo. 1:10) Oqo sara ga na inaki ni noda vulica na Vosa ni Kalou, ia nida rawata, eda sa tauca na kena yaga.