E Veisautaka na Bula na iVolatabu

NA CAVA a uqeta e dua na dautei tavako me veisautaka na nona cakacaka kei na vakabauta vakalotu sa muria voli mai vakadede? A veisautaka vakacava na ivakarau ni nona bula e dua na marama e daugunu alakaolo? Wilika mada na ka erau tukuna.

“Au Marau Dina Niu Lewe ni Dua na Vuvale Levu.”​—DINO ALI

SUCU: 1949

VANUA: OSITERELIA

KA E KILAI KINA: DAUTEI TAVAKO

NOQU BULA E LIU: Ena 1939 erau biubiu mai Albania na noqu itubutubu me rau toki i Mareeba, e dua na taoni lailai e Kuinisiladi, Ositerelia. Era vakaitikotiko tale ga ena vanua qori e levu na kai Bosnia, Kirisi, Itali, Serbia kei na so tale, ra qai dui kauta mai na ka era vakabauta kei na nodra itovo vakavanua. E vanua ni tei tavako o Mareeba, rau mani tei tavako tale ga na noqu itubutubu.

Sega ni dede sa sucu na ganequ qase, tarava e rua na tagane, sa qai o yau. Ka ni rarawa ni a takali o tamaqu niu se yabaki dua ni tauvi koya na mateniuto. A vakawati tale o Nana qai va tale na luvena tagane. Keitou susu kece ena vanua e tei tavako kina o tamaqu vakacabecabe.

Au biubiu mai vale niu se itabagone. Niu yabaki 20 vakacaca, keirau vakamau kei Saime ena dua na valenilotu ni Musilimi ena vanua keitou vakaitikotiko kina ni keirau Musilimi ruarua. Eratou lotu Musilimi kece na wekaqu. Au wilika na Koran kei na ivola e volaitukutukutaki kina na nona bula na parofita o Muhammad. Au wilika tale tiko ga na iVolatabu ena gauna vata qori. Era vakamacalataki ena Koran na parofita era tukuni ena iVolatabu, au qai kila na gauna era bula kina niu wilika na iVolatabu.

Era dau gole mai vale na iVakadinadina i Jiova, keirau dau taleitaka kei Saime na wilika na mekesini kei na ivola era dau solia. Au nanuma lesu na levu ni gauna au dau veitalanoa vinaka kina kei ira na iVakadinadina ena veika me baleta na lotu. Ena gauna kece qori, era dau sauma na noqu taro ena iVolatabu, era sega ni tukuna ga na nodra nanuma. Qori e uqeti au sara ga.

Era sureti au na iVakadinadina i Jiova meu vulica na iVolatabu ra qai sureti au ina nodra soqoni, ia au vakasuka tu ga na nodra veisureti. Au vinakata ga me dua noqu iteitei, me dua tale ga na noqu vuvale levu. A mani sega ni dua na noqu teitei, au marautaka ga ni qai lima na luvequ tagane.

VEISAUTAKI AU NA IVOLATABU: Ni oti e ciwa na yabaki au sotavi ira kina na iVakadinadina i Jiova, au se sega ga ni veisautaka na noqu vakabauta vakalotu. Ia au marau ni ciqoma qai wilika na nodra ivola. Ena veisigatabu keirau dau vakawilika kei Saime na ivola qori. Keirau dau maroroya na mekesini kece a soli vei keirau ena veiyabaki sa sivi. A yaga sara vakalevu na itukutuku e volai tu kina, ni vukei au meu dei tiko ga nira vakatovolei au eso ena veika vou au sa vulica.

Kena ivakaraitaki, a via vakasaurarataki au e dua na italatala ni lotu Tawase meu ciqomi Jisu me noqu ivakabula. Na italatala qori sa rawai rau na ganei Saime kei na taciqu vakacabecabe me rau muri koya. Sega ni dede era saga na noqu itokani ena so tale na lotu mera rawai au meu lewena na nodra lotu. Eso era solia vei au na ivola era vakacacani kina na iVakadinadina i Jiova. Au tarogi ira na dauvakalelewa na ivakadinadina vakaivolatabu ni nodra ivakavuvuli, ia era sega ni sauma rawa na noqu taro.

Na veitusaqati kece au sotava sa qai vakavuna ga meu vakadidike ena iVolatabu niu vakayagataka na ivola era solia vei au na iVakadinadina. Au vakasamataka ni dodonu meu veisautaka na noqu bula me salavata kei na ka au vulica ena iVolatabu.

A sega ni vakavulici au e dua na iVakadinadina i Jiova ena iVolatabu; au lako ga ena nodra soqoni. Au madua au rere tale ga ena imatai ni gauna au lako kina, ia era kauaitaki au e levu au qai marautaka na ka au vulica. Au mani vakadeitaka meu iVakadinadina i Jiova, au vakaraitaka na noqu yalayala vua na Kalou ena 1981 ena noqu papitaiso.

A sega ni saqata o watiqu na noqu vakatulewa, ia e dau vakataroga ena so na gauna keu vakacalai ena ka e vakamacalataki vei au. Ia a tiko o koya ena gauna au papitaiso kina. Au dau wasea vua na ka dina au vulica. Ni oti e dua na yabaki noqu papitaiso ni keirau lesu tiko mai ena gade, a tukuna vei au o Saime ni sa vinakata me iVakadinadina i Jiova tale ga. Au rikaca sara ga ni tukuna vei au qori! A papitaiso ena 1982.

A sega ni rawarawa me vakayacori na veisau ena neirau bula. Au sa sega ni tei tavako ni saqati kina na ivakavuvuli vakaivolatabu. (2 Korinica 7:1; Jemesa 2:8) Sa oti toka e dua na gauna sa qai dua na cakacaka veiganiti me vukei keitou ena neitou bula vakailavo. Ni oti tale ga e vica na yabaki era sega ni via veisiko mai eso na wekai keitou. Keitou saga me keitou muria na ivakavuvuli vakaivolatabu ena neitou lomani ira. Ni toso na gauna sa qai wali rawa na leqa, sa ra veisiko tale yani na wekai keitou voleka.

KENA YAGA: Na leqa kece au sotava me vaka na noqu valuta na mamadua, leqa vakailavo, se veitusaqati ni vuvale, e vakavulici au ena nona dauvosovoso o Jiova ni vukei au ena leqa au sotava. Me kena ivakaraitaki, au sa qase tiko ni ivavakoso ena gauna qo, au qai vunau wasoma mai na buturara. E se dredre tiko ga vei au qori ni dau tata na gusuqu niu taqaya. Ia au qarava rawa na itavi dokai qori ena noqu masu wasoma kei na veivuke i Jiova.

Keirau sa veivolekati sara kei watiqu ena gauna qo, sa qaqaco sara na keirau ivau vakaveiwatini. A sega ni vinaka sara na neirau tuberi iratou na gone, ia keirau saga ena neirau vinaka taucoko me keirau tugana e lomadratou na ka dina keirau vulica ena iVolatabu. (Vakarua 6:6-9) Sa daukaulotu tiko ena gauna qo o neirau ulumatua kei watina.

Au nanuma lesu e dua na gauna ni keitou se qai tekivu lakova vakavuvale na nodra soqoni na iVakadinadina i Jiova. Au vakelea na motoka au qai vakaraici ira na ilala era tu e loma ni olo. Au tarogi ratou sara na noqu vuvale: “Na cava dou raica?” Era marautaka tu na nodra veimaliwai na duikaikai, duivosavosa qai duidui na nodra itovo vakavanua​—o ira na Aborigine, o ira mai Albania, Ositerelia, kei ira mai Croatia. Au marau dina niu lewe ni dua na vuvale levu era lewena na taciqu vakayalo, qai laurai qori e veiyasa i vuravura, sega ni Ositerelia ga.​—1 Pita 5:9.

“A Sega ni Soro o Taciqu me Vukei au.”​—YELENA VLADIMIROVNA SYOMINA

SUCU: 1952

VANUA: RUSIA

KA E KILAI KINA: DAUGUNU ALAKAOLO, SAGA ME VAKAMATEI KOYA

NOQU BULA E LIU: Au sucu e Krasnogorsk, e dua na siti lailai e volekati Moscow qai totoka na bula ena vanua qori. Erau qasenivuli na noqu itubutubu. Au dau qacoya na vuli, au vulica tale ga na ivakatagi. Kena irairai ni na vinaka na noqu veisiga nimataka.

Na gauna au vakamau kina keirau toki kei watiqu ena dua na vanua e takalevu kina na vosavosa ca, mateni kei na vakatavako. Au a sega ni kila ni na vakaleqai au e muri na ituvaki ni bula qori. Au dau lako ga ena soqo ni marau meu lai qiri qita qai lagasere. Ia niu yaco e kea au dau sureti meu kana tavako, meu gunu tale ga. Lakolako au sa bobula ena alakaolo.

E vakacacana na noqu bula na veika au sa bobula tu kina. E taura toka na gauna meu qai yacova na kena ivakatagedegede torosobu duadua, ni qai yaco qori sa voleka ga niu sega ni kania rawa e dua na ka. Au vinakata meu mate, au mani cakava e dua na ka lialia meu vakamatei au kina. Au marau ni a seva na noqu sasaga.

Ena gauna kece qori a dau sikovi au o taciqu, sa dua tiko na iVakadinadina i Jiova qai saga me vakamacalataka vei au na sala ena vukei au kina na iVolatabu. Ia au cemuri koya ena imatai ni gauna e cakava kina qori niu sega ni taleitaka na iVolatabu. Ia a sega ni soro o taciqu, dua na ka nona vosovoso kei na nona loloma, au mani vakadonuya meu vulica na iVolatabu.

VEISAUTAKI AU NA IVOLATABU: Niu tekivu vulica na iVolatabu au vakadeitaka meu na muduka na noqu daugunu. Donuya na gauna qori a mokulaki au e dua na mateni keitou tiko veitikivi. Au mani vakasa i valenibula niu mavoa vakaca. A ramusu e va na suinisaresarequ, a vakaleqai tale ga e dua na loanimataqu. A yaga sara na noqu curu i valenibula ni a lakovakaca tale tiko ga vei au ena gauna oya na noqu sa sega ni gunu.

Ena gauna qori au dau masu wasoma. A vakacegui au na Lele i Jeremaia 3:55, 56, e tukuna: “Au a kaciva na yacamuni, Jiova, mai nai keli titobu. Ko ni a rogoca na domoqu: ni kakua ni tabonaka na daligamuni ki na noqu cegu, kei na noqu tagi.”

Au vakabauta dei ni sauma o Jiova na noqu masu. A vakaukauataki au meu kua ni lesuva na noqu ivakarau ni bula makawa. Au dau temaki ena so na gauna meu gunu tale. Au marau niu sega ni vakamalumalumu ena veitemaki qori.

Niu vulica tiko na iVolatabu au raica ni dodonu meu tokoni watiqu ena nona itavi vakaulunivale. (1 Pita 3:1, 2) A sega ni rawarawa qori niu dau via lewai watiqu. Au kerea na veivuke i Jiova ena masu. A taura toka na gauna meu veisau, lakolako sa vinaka na noqu itovo, au dau tokoni watiqu tale ga.

A kurabui sara ga o watiqu ni raica na noqu veisau. Ia a sega ni taleitaka ena gauna oya na iVolatabu. Niu vakatulewataka meu muduka na vakatavako, e kaya: “Ke o muduka na vakatavako, au na vulica na iVolatabu!” Keirau biuta ruarua na vakatavako ena dua ga na siga.

KENA YAGA: A vulica na iVolatabu o watiqu me vaka ga a yalataka. Ena gauna qo keirau dau wilika vata e veisiga na iVolatabu, keirau vakasamataka vakatitobu, qai saga me keirau muria na kena ivakasala.

Sa vinaka sara na noqu vuvale kei na noqu bula. Au vakavinavinakataki Jiova ni vagolei au mai meu qaravi koya. (Joni 6:44) Au vakavinavinakataka tale ga ni sega ni soro o taciqu. Au vakadinadinataka kina ni rawa ni veisautaka na bula na iVolatabu.

[Tikina bibi ena tabana e 11]

Au vakasamataka ni dodonu meu veisautaka na noqu bula

[Tikina bibi ena tabana e 13]

A sega ni soro o taciqu, dua na ka nona vosovoso kei na nona loloma, au mani vakadonuya meu vulica na iVolatabu