Necani​—E Dau Tutaka na Sokalou Dina

E sega ni rawarawa meda lai tukuna vua e dua e veiliutaki ni ca na ka e cakava, qai vinakati me veisau. Vakacava, o na doudou mo vosa vua ni o kila ni a vakamatea e dua me rawa ga ni taqomaki koya kina?

A bukete o Pacisepa ni a veibutakoci kei Tui Tevita. Ni via vunitaka o Tevita na cala erau cakava, mani vakamatei wati Pacisepa qai vakawatitaki Pacisepa sara. Ni oti e vica na vula sa rua tu na ivakarau ni nona bula, ia e se tui tiko ga. E sega ni guilecava o Jiova na cala e cakava. A talai nona parofita kina o Necani me lai vosa vei Tevita.

E sega ni itavi rawarawa dina oya. Vakasamataka mada ke o tu ena ituvaki qori. Nona yalodina o Necani vei Jiova kei na nona dei ena ivakatagedegede ni Kalou e uqeti koya me lai tukuna vei Tevita na cala a cakava. Ena cakava vakacava qori o Necani? Ena vukei Tui Tevita vakacava me veivutuni?

QASENIVULI MAQOSA

Vakacava mo vakayagataka mada e vica na miniti mo wilika kina na 2 Samuela 12:1-25? Kaya mada ni o duri tu ena mata i Tevita mo qai talanoataka tiko vua na italanoa qo: “Sa tiko e na dua na koro e lewe rua na tamata, e dua sa vutuniyau, ka dua sa dravudravua. Na tamata vutuniyau sa levu sara na nona qele ni sipi, kei na nona qele ni pulumokau; ia sa sega vua na tamata dravudravua e dua na ka, e dua walega na lami yalewa lailai, ka volia ko koya, ka dauvakania: a sa tubu cake kaya kei iratou talega na luvena; sa kania eso na tiki ni kena, a sa gunu mai na mena bilo, a sa koto e lomaserena, a sa tautauvata vua kei na dua na luvena yalewa. A sa lako vua na tamata vutuniyau e dua na tamata sa lako tu, ia sa sega ni taura ko koya e dua na nona sipi se na nona pulumokau, me vakarau vua sa taubale voli ka sa lako mai vua; ia sa taura na nona lami na tamata dravudravua, ka vakarautaka me kena na tamata sa lako mai vua.”​—2 Sam. 12:1-4.

Me vaka ni dua tale ga na ivakatawanisipi o Tevita, e vakabauta sara ga na itukutuku qori. E tukuna e dua na vuku: “De dua a nona ivakarau ga o Necani me dau lai kerea vei Tevita me raica mada na vuna e dau vakayacori kina e dua na ka ca e sega ni vosoti rawa, qai raica o Tevita ni nona itavi qo.” Ke dina mada ga qori, ena vinakati ga vei Necani me yalodina vua na Kalou qai doudou me lai vosa vua na tui. Na italanoa a tukuna o Necani e vakacudrui Tevita sara ga, ni tukuna kina: “Me vaka sa bula ko Jiova, sa dodonu me mate na tamata sa cakava na ka oqo”! Oti ga qori e tukuna sara o Necani: “Sai kemuni ga na tamata ko ya”!​—2 Sam. 12:5-7.

Vakasamataka mada na iwalewale e vakayagataka o Necani me vakaraitaka kina na leqa oya. E sega ni rawarawa mo vakadodonutaka e dua drau veivolekati. De dua eda dau vakaiulubale ni sega ni cala na ka eda cakava, vakabibi ke lomatarotarotaki na ka eda dau cakava. Ia na vosa vakatautauvata i Necani e uqeti Tevita sara ga me vakaraitaka kina ni ca na ka e cakava, dina ni sega ni kidava qori. E kila vinaka kina na tui ni sega ni vinaka na ka a caka ena italanoa i Necani. Ia ni oti ga nona tukuna o Tevita ni cala na ka e caka oya, e sa qai vakaraitaka o Necani ni vosa vakatautauvata oya e baleti koya sara ga. Sa qai raica e keri o Tevita ni ka e cakava e cala bibi. Qo e rawa sara ga kina me ciqoma na ivakasala. E vakadinata o Tevita ni ka e cakava kei Pacisepa e “beci” sara ga kina o Jiova, e ciqoma tale ga na ivakasala e ganiti koya.​—2 Sam. 12:9-14; Same 51, ivakamacala taumada.

Na cava eda vulica kina? Na inaki ni nomu veivakavulici ena iVolatabu mo vukei koya e vakarorogo me kila na vakasama o via tukuna tiko. E dokai Tevita o Necani, qai maqosataka na ka me tukuna vua. E kila o Necani ni o Tevita e dau vinakata na ka dodonu kei na lewadodonu. E vakaraitaki gona na itovo vakalou qori ena gauna e tukuna kina na italanoa oya na parofita. Eda rawa tale ga ni vukei ira na yalomalumalumu mera kila na rai i Jiova. Ena sala cava? Era kila na tamata na ka e dodonu. Eda rawa gona ni vukei ira mera vakayagataka na ka era sa kila qori, mera kua ni nanuma kina nida vinaka cake vei ira se ni dodonu ga meda tukuna vei ira na ka mera cakava. Na iVolatabu ga me veidusimaki ena ka e donu kei na ka e cala, sega ni noda nanuma.

A rawa ga ni vosa vakadodonu o Necani vua na tui kaukaua ena vuku ni nona yalodina vua na Kalou. (2 Sam. 12:1) Nida vakatotomuria tale ga na yalodina i Necani, ena vakayaloqaqataki keda meda dei ena ivakavuvuli dodonu i Jiova.

TOKONA NA SOKALOU SAVASAVA

E kena irairai ni rau veitokani vinaka dina o Tevita kei Necani, baleta ni dua sara ga na luvei Tevita e vakatokayacataki vei Necani. (1 Vei. 3:1, 5) Na imatai ni gauna a cavuti kina o Necani ena iVolatabu oya nona tu vata kei Tevita. Erau lomani Jiova ruarua. Eda kila ni dau nuitaki Necani na tui baleta ni a tukuna vua na parofita na nona vinakata me tara na valenisoro i Jiova. E tukuna o Tevita: “Mo raica mada, oi au, ka’u sa tiko e na vale sitari, ia na kato ni Kalou sa tiko e loma ni vale laca. A sa kaya vua na tui ko Necani, A ka kecega sa tu e lomamuni mo ni la’ki cakava; ni sa tiko vata kei kemuni ko Jiova.”​—2 Sam. 7:2, 3.

E dau yalodina ena sokalou o Necani, qori na vuna a tu vakarau kina me tokoni Tevita ena nona via tara na imatai ni valenisoro e vuravura, e vauca na sokalou dina. Ia qori na ka ga e nanuma o Necani, sega ni ka e vinakata o Jiova. Ena bogi oya, e vakaroti Necani na Kalou me tukuna vei Tevita e dua tale na itukutuku: Ena sega ni tara o Tevita na valenisoro i Jiova. Ena tara ga e dua na luvena. E tukuna ga o Necani ni sa veiyalayalati tiko na Kalou kei Tevita me ‘vakataudeitaki me tawamudu’ na nona veiliutaki.​—2 Sam. 7:4-16.

E sega ni salavata kei na inaki ni Kalou na ka e nanuma o Necani me baleta na kena taravaki na valenisoro. Ia a sega ni vosakudrukudru kina na parofita yalomalumalumu qo. E ivakaraitaki vinaka dina meda muria ke mani vakadodonutaki keda na Kalou ena so na gauna! Na nona vakayagataki Necani na Kalou e dusia ni se lomani koya tiko ga. Kena irairai ni a uqeti vakalou o Necani kei na dauraivotu o Kata me dusimaki Tevita me tuvanaka e 4,000 na daunivakatagi mera veiqaravi ena valenisoro.​—1 Vei. 23:1-5; 2 Vei. 29:25.

TAQOMAKA NA VEILIUTAKI

E kila o Necani ni dodonu me na tui o Solomoni ni oti nona veiliutaki o Tevita. A totolo sara na ka e cakava o Necani ena nona sasaga o Atonaija me vuaviritaki Tevita ni sa qase tiko. E baci vakaraitaka tale eke o Necani na nona maqosa kei na nona yalodina. Kena imatai, a uqeti Pacisepa me lai tukuna vei Tevita me nanuma tiko na nona na ka sa yalataka oya me na tui o luvedrau o Solomoni. Oti e mani lako sara ga o Necani vua na tui me lai tarogi Tevita ke sa digi Atonaija me sosomitaki koya. E raica kina o Tevita ni ituvaki bibi dina qo, mani vakaroti Necani kina kei na so tale na nona dauveiqaravi yalodina mera lumuti Solomoni me tui, me tukuni tale ga ni sa tui. E dreve kina na sasaga i Atonaija me vuaviritaki Tevita.​—1 Tui 1:5-53.

DAUVOLAITUKUTUKU MAKAWA YALOMALUMALUMU

E levu era kila ga ni o Necani kei Kata erau vola na 1 Samuela wase 25 ina 31, wili tale ga kina na 2 Samuela 1-24. E tukuni ena ivola uqeti vakalou oya: “Ia na cakacaka i Tevita na tui, eliu, emuri talega, raica, sa volai e nai vola i Samuela na rairai, kei nai vola i Necani na parofita, kei nai vola i Kata na rairai.” (1 Vei. 29:29) E tukuni tale ga ena iVolatabu ni o Necani e vola na “cakacaka i Solomoni.” (2 Vei. 9:29) Qori e rairai dusia ni o Necani a veiqaravi tiko ga ena vale vakatui ena gauna sa mate kina o Tevita.

E levu na ka eda kila me baleti Necani a rairai vola ga o koya. Ia eso tale na itukutuku e sega ni vola, eda rawa ni vuli vakalevu kina. Kena irairai ni dua na dauvolaitukutuku makawa yalomalumalumu o Necani, a sega tale ga ni vaqara rogo. E tukuna e dua na ivolavosa ni iVolatabu ni sega ni dua na kena ivakamacala taumada ena iVolatabu, e sega tale ga ni dua na ivakamacala me baleta nona vuvale. Eda sega sara ga ni kila na itukutuku matata me baleti Necani.

VEIUQETI NODA YALODINA VEI JIOVA

Ena vica ga na itukutuku me baleti Necani eda wilika ena iVolatabu, eda kila kina ni turaga yalomalumalumu, ia e yaloqaqa ni tokona na veika e vinakata na Kalou. E lesia vua na Kalou e levu na itavi bibi. Vakasamataka vakabibi na itovo i Necani, me vaka na nona yalodina kei na nona doka na ivakatagedegede ni Kalou. Sasagataka mo vakatotomuria na veitovo qori.

De dua o na sega sara ni kacivi mo lai vosa vua e dua na tui e veibutakoci se mo lai tarova e dua e via vuaviri. Ia ena veivuke ni Kalou eda rawa ni yalodina vua, da qai tokona na nona ivakatagedegede savasava. O rawa ni doudou qai maqosa nomu veivakavulici ena ka dina, o na tokona tale ga na sokalou dina.

[iYaloyalo ena tabana e 25]

Nona taqomaka na veiliutaki vakatui o Necani, a maqosataka kina na ka e lai tukuna vei Pacisepa