Sala ni Vakadewa iTukutuku!
● Raitayaloyalotaka mada na ituvaki qo. E dau vakalialiai o Sam ena nona sega ni dau via vakayagataka na iyaya vovou. E sa vakayabaki na nona sega ni dau vinakata na iyaya vovou, qo e dua na sala me veitaratara kina kei ira na nona vuvale kei na nona itokani. E levu era dau via vakayagataka na iyaya vovou, erau okati mada ga kina na luvei Sam. E dau veiwalitaka o Sam vua na luvena yalewa yabaki 16: “Au dau mistaka na gauna eda dau veiraici ga kina, da qai veivosaki!”
Mani vakasamataka tale o Sam na nona rai me baleta na iyaya vovou. E vakasamataki ira kina eso e sa vica vata na yabaki era sega ni veiraici tu se ra sega ni veivosaki. E lai nanumi ira na wekana era sa sega tu ni veitaratara, de dua era sa rui osooso. E mani nanuma kina: ‘Keu na via veitaratara tiko ga kei ira qo, de dua ena vinakati meu vakayagataka e dua tale na sala.’ E yaco tiko na ituvaki qo ena loma ni 1940 ina 1950 ena dua na vanua mai Merika, e yawa tale ga mai na taoni. E sa qai nanuma kina o Sam me sa na dua na nona talevoni.
Raitayaloyalotaka tale mada na ituvaki qori ena yabaki 2012. E se qai veivosaki oti ga ena talevoni o Nathan, na makubui Sam. A veivosaki tiko kei rau na nona itokani voleka o Roberto kei Angela, erau sa toki ena dua tale na yasa ni vuravura. E kurabuitaka sara o Nathan na totolo ni gauna, e lai tukuna kina, ‘Erau se toki sara ena tini na yabaki sa oti.’
Ena vica na yabaki sa oti e sa bau marautaka toka o Nathan na nodra qiriti koya ena so na gauna na nona vuvale kei ira na nona itokani era tu vakayawa. Ia e kena irairai ni voleka ni tamata kece ena gauna qo, wili kina o ratou na luvena itabagone o Nathan, era sa vakayagataka tiko e dua na sala ni veikilai ena Internet mera dau veitaratara kina.
E dau kilai tu o Nathan ni sega ni dau via kila na ka me baleta na iyaya vovou. E tukuna: “Au nanuma lesu na gauna eda rawa ni veitalanoa kina ena talevoni, meda rogoca sara ga na domodra.” Ia qo sa vaka me veisau na rai i Nathan. E vosavosaiyalonataka tiko, ‘Keu vinakata meu veitaratara tiko ga kei ira na noqu vuvale kei ira na noqu itokani, vaka vei au meu sa vakayagataka tale ga na iyaya vovou.’
Vakacava o sotava tale ga ena dua na gauna na ituvaki qori? E dau noda ivakarau ga meda dau veitaratara kei ira tale eso. (Vakatekivu 2:18; Vosa Vakaibalebale 17:17) Me vaka ni levu era sa veitaratara tiko ena sala ni veikilai ena Internet, na cava e bibi kina meda kila na sala ni veitaratara qori?