E Veisautaka na Bula na iVolatabu

NA CAVA e lesuva tale kina e dua na turaga na ivakavuvuli vakalotu a susugi kina? A kunea vakacava e dua na cauravou na tama a diva tu ena nona bula taucoko? Wilika mada na ka erau tukuna.

“E Dodonu Meu Lesu Vei Jiova.”​—ELIE KHALIL

SUCU: 1976

VANUA: SAIPURUSI

A E KILAI KINA: GONE CIDROI

NOQU BULA E LIU: Au sucu e Saipurusi, ia au susu e Ositerelia. Erau iVakadinadina i Jiova na noqu itubutubu, rau qai solia na nodrau vinaka kece me rau vakavulici au meu lomani Jiova kei na nona Vosa na iVolatabu. Au dau be niu se itabagone. Au dau dro mai vale ena bogi meu sotavi ira na noqu ilala. Keimami butako motoka, qai levu tale na ka ca keimami cakava.

Na ka kece qori au dau cakava vunivuni tu ga niu leqataka ni rau na rarawa kina na noqu itubutubu. Toso na gauna au sa sega ni leqataka qori. Au vakailala kei ira era qase sara vei au era sega ni kilai Jiova, qai ca nodra veivakamuai. Au tukuna tale ga vei rau na noqu itubutubu niu sa sega ni via lewena na nodrau lotu. Erau vukei au tiko ga, ia au sega ni kauaitaka na nodrau sasaga. Dua na ka na nodrau rarawa.

Niu biubiu mai vale, au tekivu vakatovolea na veimataqali wainimate gaga, au tea mada ga qai volitaka vakalevu na mariwana. E levu na ka ca au cakava, au dau lai pati ena valenidanisi. Au sa dau yalototolo tale ga. Ke dua e tukuna se cakava e dua na ka au sega ni taleitaka, au dau katakata sara ga. E levu na gauna au kailavaki ira eso tale se vaculaki ira. Au cakava na ka kece au sega ni vakavulici kina me cakava e dua na lotu vaKarisito.

VEISAUTAKI AU NA IVOLATABU: Keirau veitokani sara kei na dua e dau vakayagataka tale ga na wainimate gaga, a takali na tamana ni se gone. Keirau dau veitalanoa me yacova na bogi levu. E dau tukuna ena so na bogi ni nanumi tamana vakalevu. Au vakavulici niu se gone me baleta na inuinui ni veivakaturi, au vakamacalataka kina vua na itukutuku ni nona vakaturi ira na mate o Jisu, kei na nona yalayala me cakava tale qori ena dua na gauna se bera mai. (Joni 5:28, 29) Au tukuna vua: “Vakasamataka mada mo drau sota tale kei nomu Ta. Eda rawa ni bula tawamudu kece ena Parataisi e vuravura.” E tarai koya sara ga na ka au vakamacalataka vua.

Ena so tale na gauna, e dau kauta cake mai eso na ulutaga me baleta na iotioti ni veisiga se na ivakavuvuli ni Letoluvakalou. Au vakaraitaka vua ena nona iVolatabu eso na tikinivolatabu e vakamacalataka na ka dina me baleta na Kalou o Jiova, Jisu, kei na iotioti ni veisiga. (Joni 14:28; 2 Timoci 3:1-5) Na levu ga ni noqu tukuni Jiova vei noqu itokani, na levu tale ga ni noqu nanumi Jiova.

Sa mate tu na ka dina ena iVolatabu erau a saga na noqu itubutubu me rau bucina e lomaqu, ia e kadre tale na sore ni ka dina qori ni toso na gauna. Kena ivakaraitaki, au dau vakasamataki Jiova ena so na gauna ni keimami pati tiko kei ira na noqu itokani, keimami qai vakayagataka na wainimate gaga. Era tukuna e levu na noqu itokani nira lomana na Kalou, ia e veicalati na ka era cakava. Au sega ni vinakata me va qori na noqu bula, au liaca kina ni dodonu meu lesu vei Jiova.

E dau rawarawa meda kila na ka meda cakava, ia e dredre meda cakava sara. Eso na veisau e rawarawa meu cakava, me vaka noqu tamusuka na vakayagataki ni wainimate gaga. Au sa sega ni vakailala kei ira na noqu itokani makawa. Au tekivu vulica tale ga na iVolatabu kei na dua na qase ni ivavakoso lotu vaKarisito.

Ia eso tale na ka e dredre meu veisautaka, vakabibi na noqu lewa vinaka noqu cudru. Au dau lewa vinaka noqu cudru ena so na gauna, ia ena so tale na gauna e sega. E dau ca na lomaqu ena gauna kece e yaco kina qori niu nanuma ni sa tawayaga na noqu sasaga. Au yalolailai sara ga, au mani kerea me vukei au o koya e vakavulici au tiko ena iVolatabu. E dau yalomalua qai yalololoma, qai vakayaloqaqataki au sara ga. A tukuna ena dua na gauna meu wilika ena Vale ni Vakatawa na ulutaga me baleta na bibi ni gugumatua.a Keirau veivosakitaka na ka meu cakava ena gauna au cudru kina. Niu dau vakasamataka na ulutaga oya, au qai masu wasoma vei Jiova, au lewa vinaka kina na noqu cudru ni toso na gauna. Ena Epereli 2000, au papitaiso meu dua na iVakadinadina i Jiova. Dua na ka na nodrau marau na noqu itubutubu.

KENA YAGA: Au sa vakila qo na vakacegu, e savasava tale ga noqu lewaeloma niu kila ni sa sega ni vakadukadukalitaki na yagoqu ena wainimate gaga se na ka ca au dau cakava. Se mani cava au cakava—cakacaka, tiko ena soqoni vaKarisito se marautaka eso na ka ni veivakamarautaki—au sa marau vakalevu qai donu na noqu rai me baleta na bula.

Au vakavinavinakataki Jiova ni rau saga tiko ga na noqu itubutubu me rau vukei au. Au vakasamataka tale ga na vosa i Jisu ena Joni 6:44: “Ena sega ni lako mai vei au e dua ke sega ni vagolei koya mai o Tamaqu e talai au mai.” E tarai au sara ga na noqu vakasamataka ni rawa ni vagolei au lesu mai o Jiova meu qaravi koya tale.

“Au Diva me Dua na Tamaqu.”​—MARCO ANTONIO ALVAREZ SOTO

SURU: 1977

VANUA: CHILE

KA E KILAI KINA: DEATH-METAL BAND MEMBER

NOQU BULA E LIU: A susugi au o tinaqu e Punta Arenas, e dua na siti totoka ena tadrua ni rua na vanua volekata na ceva kei Sauca Amerika. Erau veibiu na noqu itubutubu niu se yabaki lima, au nanuma kina niu sa sega ni lomani. Au diva me dua na tamaqu.

A vuli iVolatabu o tinaqu kei ira na iVakadinadina i Jiova, e dau kauti au tale ga ena nodra soqoni vaKarisito ena Kingdom Hall se na nodra vale ni soqoni. Ia au sega ni dau via lako, au dau vakacudrucudru ena gauna keirau gole kina. Niu yabaki 13, au sa sega tale ni gole ina nodra soqoni.

Au sa tekivu taleitaka na ivakatagi, au qai kila ni noqu taledi qori. Niu yabaki 15, au lewena na mataqiriqiri karakaravisa. Keitou dau qiriqiri ena so na soqo, vale ni gunu, kei na so tale na soqo era sureti ga kina e vica. Niu dau veimaliwai kei ira na kenadau ena ivakatagi, au taleitaka kina na ivakatagi malumu. Au lai vulica sara na ivakatagi ena kena koronivuli. Au toki ena koroturaga o Santiago niu yabaki 20 meu lai tomana kina noqu vuli. Au lewena tiko ga na mataqiriqiri karakaravisa.

Au galili ena gauna kece qori. Au dau mateni qai vakayagataka na wainimate gaga kei ira na noqu ilala ena mataqiriqiri me vakaseavutaka na noqu galili. O ira qori era vaka na noqu vuvale. Au dau be qai laurai qori ena kequ irairai. Au dau dara na isulu loaloa, vakatubu kumi, na balavu tale ga ni uluqu e yaco sara e toloqu.

Na noqu itovo e dau vakavuna na vala, ra qai dau lakovi au mai kina na ovisa. Au gunu ena dua na gauna au qai via mokulaki ratou na dau volitaki wainimate gaga eratou dau vakasagai au kei ira na noqu itokani. Eratou buturaki au vakaca lai ramusu kina na galegalequ.

Ia e rarawataki sara na ka eratou cakava na noqu itokani. Au qai kila ena dua na siga ni lasa tiko kei na noqu itokani dredre na goneyalewa a noqu itau tu me vica na yabaki, eratou qai vunitaka vei au na noqu itokani. Au kavoro sara ga.

Au veivakavulici ena ivakatagi niu toki lesu i Punta Arenas, au dau vakatagitaka tale ga e dua na iyaya ni ivakatagi e levu cake mai na vaiolini. Au lewena tiko ga na mataqiriqiri karakaravisa, au katokatoni tale ga. Au sotavi Sussan e dua na goneyalewa totoka, keirau mani tiko vakasuva. Toso na gauna, e qai kila o Sussan ni vakabauta o tinana na ivakavuvuli ni Letoluvakalou, ia o au e sega. E mani tarogi au: “Na cava mada na ka dina?” Au tukuna vua niu kila ga ni cala na ivakavuvuli ni Letoluvakalou, ia au sega ni rawa ni vakadinadinataka qori ena iVolatabu. Au tukuna nira rawa ni vakaraitaka vua na iVakadinadina i Jiova na ka dina mai na iVolatabu. Au masuta na veivuke ni Kalou, na ka au sega ni cakava tu me vica vata na yabaki.

Oti e vica na siga, au sotava e dua au nanuma niu kila, au mani tarogi koya ke dua na iVakadinadina i Jiova. E via rerevaka na kequ irairai, ia e sauma vakavinaka na noqu taro me baleta na soqoni ena nodra vale ni soqoni na iVakadinadina i Jiova. Au vakadeitaka ena ka e yaco qori ni sa saumi na noqu masu. Au gole ina nodra vale ni soqoni, au dabe sara e muri me kua ni dua e raici au. Ia e levu era kilai au niu dau tiko ena soqoni niu se gone. Era kauaitaki au ra qai mokoti au, e vakacegui au sara ga na nodra loloma, e vaka ga niu lesu i vale. Au sotava na turaga a vakavulici au ena iVolatabu niu se gone, au qai kerei koya me vakavulici au tale.

VEISAUTAKI AU NA IVOLATABU: Au wilika ena dua na siga na Vosa Vakaibalebale 27:11, e kaya: “Mo vuku, na luvequ, ka vakamarautaka na lomaqu.” Au kurabui sara ga niu vakasamataka ni rawa nida vakamarautaka na Dauveibuli ni lomalagi kei vuravura na tamata. Au sa qai kila ni o Jiova na Tama au diva tu ena noqu bula taucoko!

Au bobula tu ena wainimate gaga kei na alakaolo me vica vata na yabaki, ia au vinakata meu vakamarautaka na Tamaqu vakalomalagi, meu cakava tale ga na lomana. Au sa qai kila na ibalebale ni ivakavuvuli i Jisu ena Maciu 6:24, e tukuni kina ni “sega ni dua e rawa ni qarava e rua na turaga.” E ka ni sasaga dina meu veisau, qai lauti au sara ga na ivakavuvuli ena 1 Korinica 15:33: “Na ilala ca e vakacacana na itovo vinaka.” Au liaca niu na sega ni rawa ni biuta noqu itovo ca keu goleva tiko ga na vanua au dau lakova e liu se vakailala tiko ga kei ira na noqu itokani makawa. E matata na ivakasala ena iVolatabu: E vinakati dina meu sasaga vakaukaua meu biuta na noqu ivakarau ni bula makawa.​—Maciu 5:30.

Na noqu dau taleitaka na ivakatagi e vakadredretaka na noqu vakatulewataka meu kua ni qai vakarogoca se lewena tale na mataqiriqiri karakaravisa. Ia au vorata rawa qori ena nodra veitokoni na noqu itokani ena ivavakoso. Au sa sega ni gunusivia, au sa sega tale ga ni vakayagataka na wainimate gaga. Au kotiva na uluqu, toro vakavinaka, au sa sega tale ga ni dara na isulu loaloa. Ena gauna au tukuna kina vei Sussan niu vinakata meu koti, e via kila sara ga na cava au dau lai cakava ena nodra vale ni soqoni na iVakadinadina i Jiova. E tukuna: “Daru na lako vata meu lai raica na ka e dau caka kina!” E marautaka na ka e raica, e tekivu vulica tale ga na iVolatabu. Keirau vakamau, keirau papitaiso ena 2008 me keirau iVakadinadina i Jiova. Keitou marautaka tiko vata kei tinaqu na neitou qaravi Jiova.

KENA YAGA: Au sa galala mai na ivakarau ni bula e sega kina na marau dina, au galala tale ga mai na ilala ca. Au se taleitaka tiko ga na ivakatagi, ia au sa digia na ivakatagi kilikili. Au dau talanoataka na ka au sotava me yaga vei ira na vuvale kei na so tale, vakabibi vei ira na itabagone. Au vinakata mera raica ni rairai totoka na ka e dulaka tu o vuravura, ia era “benu” wale ga.​—Filipai 3:8.

Au sa kunea na itokani nuitaki ena ivavakoso vaKarisito e vakilai kina na loloma dina kei na vakacegu. E bibi sara niu sa kunea na Tamaqu niu toro voleka vei Jiova.

[iVakamacala e ra]

[Tikina bibi en tabana e 13]

“A vagolei au lesu mai o Jiova meu qaravi koya tale”