O Mareqeta na iSolisoli ni Kalou na Vakawati?

“Me solia vei kemudrau ko Jiova, mo drau dui kunea na vakacegu e na vale i na watina.”​—RUCI 1:9.

VAQARA NA KENA ISAU:

Na cava eda kaya kina nira vakamareqeta na dauveiqaravi ni Kalou ena veigauna sa oti na isolisoli ni Kalou na vakawati?

Eda kila vakacava ni raica vakabibi o Jiova nomu digia na watimu?

Na ivakasala vakaivolatabu cava me baleta na bula vakawati o na via vakayagataka sara ga?

1. Na cava a yacovi Atama ni sa dua na watina?

“OQO dina na sui mai na suiqu, kei na lewe mai na lewequ: ena vakatokai ko koya me yalewa, ni sa kauti tani mai vua na tagane.” (Vkte. 2:23) Dua na ka na marau nei Atama ni sa dua na watina! Sa rauta me cavuta vakaserekali na vosa qori! A vakalaivi Atama na Kalou me moce lutu sa qai bulia na marama totoka qo mai na dua ga na sui ni sarisarina. E qai vakayacani koya o Atama me o Ivi, oti sa qai vakamautaki rau na Kalou. Ni vakatauvatani kei ira na vakawati nikua, erau veivolekati sara o Atama kei Ivi ni a vakayagataka o Jiova na sui i Atama me buli kina o Ivi.

2. Na cava e vakavuna me rau veitaleitaki na tagane kei na yalewa?

² Ni Kalou vuku o Jiova, e solia tu vei keda na gagadre ni veidomoni, me rau veitaleitaki kina na tagane kei na yalewa. E kaya na ivola The World Book Encyclopedia: “Ni rau vakamau e dua na tagane kei na yalewa erau nuitaka ni rau na dau veivakacegui qai dei tale ga na nodrau veidomoni.” Qori sara ga na ka era vakila e levu na tamata i Jiova.

RAU MARAUTAKA NA ISOLISOLI NI VAKAWATI

3. A rawata vakacava o Aisake na watina?

³ E doka vakalevu o Eparama na rai i Jiova me baleta na vakawati. Qori na vuna a tala kina nona dauveiqaravi qase duadua i Mesopotemia me lai qara mai e dua na wati Aisake. A rogoci nona masu ni kere veivuke na dauveiqaravi qori mani kauti Repeka mai me wati Aisake. E vakayagataki Repeka sara ga o Jiova me vakatubura na kawa i Eparama. (Vkte. 22:18; 24:12-14, 67) E sega ni kena ibalebale qo me dua e vakatulewataka mai se o cei me keda isa. Levu nikua era sa dau digia ga se o cei me watidra. Na Kalou tale ga ena sega ni digitaka na keda isa, ia e rawa ni dusimaki ira na nona tamata ena veivuke ni yalona tabu kevaka era masuta. ​—Kala. 5:18, 25.

4, 5. O kila vakacava ni rau veidomoni dina na goneyalewa ni Sulamaiti kei na ivakatawa ni sipi?

⁴ A sega ni vinakata na goneyalewa totoka ni Sulamaiti mera vakaukauataki koya na nona ilala me wati Tui Solomoni. E kaya: “Au sa vakaroti kemudou, na goneyalewa ni Jerusalemi, mo dou kakua ni yavalata, se vakayadrati koya ka’u sa lomana, ka me vakatau mada ga vua.” (Sere 8:4) Erau sa veidomoni tiko na goneyalewa ni Sulamaiti qo kei na dua na ivakatawa ni sipi. A kaya na goneyalewa: “Koi au na rose ni Seroni, kei na viavia ni buca.” E sauma na ivakatawa ni sipi: “Me vaka na viavia e na maliwa ni soni, sa vakakina na wekaqu e na kedra maliwa na goneyalewa”! (Sere 2:1, 2) Erau veidomoni dina.

⁵ Na nodrau lomani Jiova na goneyalewa ni Sulamaiti kei na ivakatawa ni sipi ena vakavuna me dei na ivau ni nodrau vakawati. E laurai qori ena nona kaya na goneyalewa vua na ivakatawa ni sipi: “Mo tabaki au me vaka na mama ki lomamu, io, me vaka na mama ki ligamu: Ni sa gumatua me vaka na mate na loloma; Sa yalokaukauwa me vaka nai bulubulu na vuvu: A kena qilaiso na qilaiso waqa, io, na yameyame ni buka sa kurukuru [e vu mai vei Jiova]. Sa na sega ni bokoca rawa na loloma na wai e vuqa, ena sega tale ga ni luvuca rawa na waluvu: Kevaka ena solia na tamata nai yau kece e nona vale mei sosomi ni loloma, sa na beci sara ga.” (Sere 8:6, 7) Qori tale ga na ka era namaka vei kedra isa o ira era qaravi Jiova.

VAKATULEWA E KAUAITAKA NA KALOU

6, 7. Eda kila vakacava ni raica vakabibi o Jiova na nomu digia na watimu?

⁶ E raica vakabibi o Jiova nomu digia na watimu. Raica mada nodra vakaroti na Isireli me baleti ira na kai Kenani: “Mo ni kakua tale ga ni veiwatini kei ira; mo ni kakua ni musuka na luvemuni yalewa vua na luvena tagane, se kauta na luvena yalewa me nona na luvemuni tagane. Ni ra na vagolea tani na luvemuni me ra kakua ni muri au, ka me ra qarava eso na kalou tani: ena qai waqa mai na cudru i Jiova vei kemuni, ka na vakawabokotaki kemuni vakasauri.” (Vkru. 7:3, 4) Ni oti tale e vica na senitiuri e kaya na bete o Esera: “Kemuni sa talaidredre, ni kemuni sa kauta na yalewa tani me watimuni, me vakalevutaka na nodra talaidredre na Isireli.” (Esera 10:10) A tukuna tale ga o Paula vei ira na nona itokani lotu vaKarisito: “E vauci tu vei watina na yalewa vakawati ena gauna kece e bula tiko kina o tagane. Ia ke sa mate o tagane, sa galala o yalewa me vakawati kei koya ga e vinakata, ia me vakawati ga ena Turaga.”​—1 Kor. 7:39.

⁷ Ke dua na dauveiqaravi yalayala i Jiova e vakawatitaka e dua e tawavakabauta, qori e vakaraitaka ni nakita me talaidredre vua na Kalou. Era sega ni yalodina na Isireli ena gauna i Esera nira “kauta na yalewa tani.” Nikua tale ga, ena cala ke da vakalecalecava na ivakasala vakaivolatabu. (Esera 10:10; 2 Kor. 6:14, 15) E sega ni ivakaraitaki vinaka na lotu vaKarisito ke vakawatitaka e dua e tawavakabauta qai sega ni mareqeta na isolisoli ni Kalou na vakawati. Ke vakayacora qori dua e papitaiso, ena rawa ni kau laivi na nona itavi ena ivavakoso. Sa na ka vakalialia gona me nanuma ni na vakalougatataki ke masuta: ‘Jiova, au sa nakita meu talaidredre vei kemuni. Ia au kerei kemuni moni vakalougatataki au.’

E KILAI KEDA VINAKA NA TAMADA VAKALOMALAGI

8. Vakamacalataka na vuna meda muria kina na veidusimaki ni Kalou me baleta na vakawati.

⁸ E kila vinaka na misini o koya e bulia. Ke gadrevi me vakacobari vata na kena gacagaca, o koya duadua ga e rawa ni solia na kena idusidusi dodonu. Na cava ena yaco ke da sega ni muria na idusidusi qori da qai cobara ga vakataki keda na misini? Eda na vakacacana ga. Qori e tautauvata tale ga kei na vakawati. Ke da vinakata me marautaki, meda muria na veidusimaki i Jiova ni o koya ga e tauyavutaka na vakawati.

9. Eda kila vakacava ni raica o Jiova na galili ena bula vakawati?

⁹ Na itukutuku kece eda via kila tu meda baleti keda kei na bula vakawati e tu vei Jiova. E solia o Jiova vua na tamata na gagadre ni veiyacovi me rawa ni “vakaluveni, ka tubu me lewe vuqa.” (Vkte. 1:28) Ni bera ni buli na imatai ni yalewa, a raica votu o Jiova na galili nei tagane mani kaya kina: “Sa sega ni vinaka me tiko duadua na tamata: au na bulia e dua na dauveivuke e yaga vua.” (Vkte. 2:18) Io, e vinakata sara ga o Jiova me marautaki na bula vakawati.​—Wilika Vosa Vakaibalebale 5:15-18.

10. Na cava me rau vakasamataka tiko na veiwatini me baleta na veiyacovi?

¹⁰ Me yacova mai nikua, sa sega tale ni qai uasivi na bula vakawati ena vuku ni ivalavala ca i Atama. Ia e rawa nira marautaka nodra vakawati na tamata i Jiova ke ra muria na nona ivakasala e tu ena iVolatabu. Kena ivakaraitaki, raica mada na ivakasala i Paula ena ivakarau ni rai me tiko vei ira na veiwatini me baleta na veiyacovi. (Wilika 1 Korinica 7:1-5.) E sega ni tukuna na iVolatabu mera veiyacovi ga na veiwatini ke ra via vakaluveni. Na veitaleitaki qo ena vakaceguya tale ga na lomadrau kei na nodrau dui gagadre. Ia na veiyacovi dukadukali e sega sara ga ni taleitaka na Kalou. Ena gadrevi gona vei ira na tagane kei na yalewa vakawati mera mareqeta nodra bula vakawati qai yalololoma tiko ga vei kedra isa. E bibi me rau cata na ivakarau e vakararawataki Jiova. Mera kua ni vakacudrui Jiova ena dua na ka.

11. E vakalougatataki vakacava na yalodina i Ruci?

¹¹ E dodonu me marautaki na vakawati, me kua ga ni vakavu rarawa se veivakaocai. E bibi me laurai qori ena vuvale lotu vaKarisito ni dodonu me vakilai kina na vakacegu dina kei na veiyaloni. Vakasamataka mada na ka e yacovi Neomai, kei rau na vugona o Oripa kei Ruci ni ratou taubale tiko mai Moapi me ratou gole i Juta ena 3000 na yabaki sa oti. Dua na ka nona cikevi rau o Neomai me rau lesu i nodrau vanua. Ia e yalodina vua na Kalou o Ruci a mani kabiti Neomai voli ga qai vakadeitaki vua ni tiko na kena ‘isau mai vei Jiova, ni a vakararavi e ruku ni tabana.’ (Ruci 1:9; 2:12) A qai wati Poasa o Ruci, e dua e yalodina vei Jiova, e marautaka kina na isolisoli i Jiova na vakawati. Ni sa vakaturi o Ruci, sa na wacava na nona marau ni kila ni basika ena nona kawa o Jisu Karisito. (Maciu 1:1, 5, 6; Luke 3:23, 32) Ni yalodina vei Jiova, e vakalougatataki kina vakalevu!

IVAKASALA ME DEI KINA NA VAKAWATI

12. Ena laurai e vei na ivakasala vinaka duadua me baleta na vakawati?

¹² O koya ga a tauyavutaka na vakawati e vakarautaka tale ga na kena ivakasala me rawa ni dei kina. E sega ni dua na tamata e rawa ni solia na ivakasala qori. Eda kila ni dina na iVolatabu, ia ena rawa ga ni dusimaka vakadodonu na bula vakawati ke muri na kena ivakatagedegede. Kena ivakaraitaki na veika e vola o Paula: “Kemuni na tagane moni lomana tale ga na dui watimuni me vaka ga nomuni lomani kemuni; ia na yalewa me dokai watina vakalevu.”(Efeso 5:33) E matata sara tu ga na ivakasala vakaivolatabu qo vei ira na lotu vaKarisito. Vakacava era na muria? Era na muria ga ke ra mareqeta dina na isolisoli ni vakawati.a

13. Ke sega ni muri na ivakasala ena 1 Pita 3:7, na cava e rawa ni yaco?

¹³ Na tagane vakawati lotu vaKarisito e dodonu me dau yalololoma vei watina. E vakadreta qori o Paula ni kaya: “Kemuni tale ga na tagane vakawati, moni kilai ira vinaka tiko ga na watimuni ena nomuni bula vata, ni dokai ira nira ka malumalumu sara vei kemuni, nira yalewa, ni oni taukena vata na bula e rawati ena loloma soli wale ni Kalou, me kua ni tarovi na nomuni masu.” (1 Pita 3:7) Ena sega ni rogoca o Jiova na masu nei tagane ke sega ni muria na nona ivakaro. Qori sa na qai vakaleqa ga na kedrau ituvaki vakayalo, rawa ni curu oso na nona vakasama, vakavu veiba qai tini ena ivalavala kaukaua.

14. E yaga vakacava ina vuvale na yalewa vakawati dauloloma?

¹⁴ Na yalewa vakawati e dusimaki ena vosa ni Kalou kei na yalo tabu e rawa ni ivurevure ni vakacegu kei na marau ena nona vuvale. E dodonu ga vua na tagane e rerevaka na Kalou me lomani watina qai taqomaki koya vakayago, vakayalo tale ga. Ia ni vinakata o yalewa me lomani koya o tagane, e dodonu vua me daulomani tagane tale ga. E kaya na Vosa Vakaibalebale 14:1: “O ira na yalewa vuku era sa dui tara cake na nona vale: Ia ko koya na lialia sa basuka sobu ga e na ligana.” Koya gona, na yalewa vakawati e vuku qai dauloloma ena saga me vinaka qai mamarau na nona vuvale. Ena vakaraitaka qori ni vakamareqeta na isolisoli ni Kalou na vakawati.

15. Na ivakasala cava e tiko ena Efeso 5:22-25?

¹⁵ Dua tale na sala e vakavinavinakataki kina na isolisoli ni Kalou na vakawati, oya nodra muria na veiwatini na ivakaraitaki ni nona karona na ivavakoso o Karisito. (Wilika Efeso 5:22-25.) Erau na vakalougatataki vakalevu na veiwatini erau veilomani dina, rau sega ni vakalaiva na dokadoka, veigaluvi vaka na gonelalai, se na itovo e sega ni vaKarisito me vakaleqa na nodrau bula vakawati!

KUA NI DUA NA KA ME TAWASEI RAU

16. Na cava era dawai kina eso na lotu vaKarisito?

¹⁶ E levu nikua era sa lokuca tu na gauna mera na vakawati kina. Ia e duatani sara o ira na tamata i Jiova, ni levu vei ira era dawai voli me dua na gauna balavu nira sega ni raica rawa e dua na kedra isa e veiganiti e marautaka tale ga o Jiova. Eso tale era vakamareqeta na isolisoli ni Kalou na bula vakadawai me rawa nira qarava e levu na itavi vakalou, era galala mai na bula osooso ni vakawati. Io, ena marautaki sara na bula vakadawai ke da vakaogai keda ena veiqaravi vei Jiova.​—Maciu 19:10-12; 1 Kor. 7:1, 6, 7, 17.

17. (a) Na ivakasala cava i Jisu me baleta na vakawati meda kua ni guilecava? (b) Ke dua na lotu vaKarisito e domona na watina e dua tale, na cava me totolo ni cakava?

¹⁷ Se da vakawati se dawai meda kua ni guilecava na ivakasala qo i Jisu: “Oni sega beka ni wilika ni o koya e bulia na tamata mai na ivakatekivu e bulia na tagane kei na yalewa qai kaya, ‘Ena biuti tamana kina kei tinana o tagane me kabiti watina me rau sa na dua ga na yago’? Erau na sega ni lewe rua tiko, erau sa na dua ga na yago. O koya gona, na ka sa vauca vata na Kalou me kua ni tawasea na tamata.” (Maciu 19:4-6) E cala ke o domona na watina e dua tale. (Vkru. 5:21) Ke sa tekivu kadre na gagadre qo vua e dua na lotu vaKarisito, me saga ena kena gauna totolo duadua me cavuraka laivi mai na nona vakasama. Ke mani mosimosi, e dodonu ga me cavuraka ni a vakalaiva me kadre. (Maciu 5:27-30) E bibi dina meda vakavinakataka na ivakarau ni noda vakasama da qai tarova na lomada dauveivakaisini mai na ivalavala dukadukali.​—Jere. 17:9.

18. Meda raica vakacava na isolisoli ni Kalou na vakawati?

¹⁸ E levu era sega ni kila na Kalou kei na nona isolisoli ni vakawati. Eso tale e lailai ga na ka era kila ia era doka na isolisoli ni vakawati. Sa na qai wacava sara o keda nida yalataki keda vua na “Kalou mamarau” o Jiova. Meda marautaka mada ga na veisolisoli vinaka e vakarautaka vei keda na Kalou da qai mareqeta tiko ga na isolisoli ni vakawati!​—1 Tim. 1:11.

[iVakamacala e ra]

[Tikina bibi ena tabana e 6]

E dokai o Jiova ena vakawati vinaka, ena vakavu marau tale ga vei ira na lewenivuvale

[iYaloyalo ena tabana e 5]

E mareqeta o Ruci na isolisoli ni Kalou na vakawati

[iYaloyalo ena tabana e 7]

O mareqeta dina na isolisoli ni Kalou na vakawati?