Mo Vakavinakataka Tiko ga Nomu Bula Vakawati

“Qo na noqu ivakasala vei ira na vakawati, ia e sega ni noqu, e nona ga na Turaga.”​—1 KOR. 7:10.

O RAWA NI VAKAMACALATAKA?

Ena sala cava e vauci rau vata kina na veiwatini na Kalou?

Rawa nira veivukei vakacava na qase ni ivavakoso ena bula vakawati?

Meda raica vakacava na bula vakawati?

1. Mera raica vakacava na vakamau na lotu vaKarisito, na cava na vuna?

ENA siga ni vakamau erau bubului vua na Kalou na veiwatini, qo e dua na veiyalayalati me raici vakabibi. (Dauv. 5:4-6) Ni tauyavutaka o Jiova na imatai ni vakawati, e “vauca vata” o koya na nodrau bula na veiwatini ena gauna ni vakamau. (Mari. 10:9) E bibi duadua vua na Kalou na ivau qori, sega ni lawa buli tale eso me baleta na vakawati. E dodonu gona vei keda na dauveiqaravi i Jiova meda raica na ivau ni vakawati ena nona rai. E bibi me tiko vei keda na rai qori se da sokaloutaki koya ni bera na vakamau se sega.

2. Na taro cava eda na veivosakitaka ena ulutaga ni vuli qo?

² Ena vakilai dina na marau ena vakawati e dei. Ia na cava e rawa ni caka ke sa luluqa na ivau ni bula vakawati? Ena rawa ni vakavinakataki tale na vakawati? Na cava e rawa ni vukei ira na veiwatini era sa sega tu ni veiyaloni?

ENA VAKAVU MARAU SE RARAWA?

3, 4. Na cava e rawa ni yaco ke vakariri e dua me digia na kena isa?

³ Ke vinaka nona bula vakawati e dua na lotu vaKarisito, ena vakavu marau qai dokai kina o Jiova. Ia ke leqa, ena rarawa sara ga. Ni lalawataka gona e dua na lotu vaKarisito me vakawati, me nanuma matua ni na tekivu vinaka na nona vakawati ke muria na veidusimaki vakalou. Ena yasana dua, ni dua e vakariri ena nona digia na kena isa, ena lomabibi ga qai rarawa. Kena ivakaraitaki, e levu na itabagone era siova totolo na veibuku, ia na icolacola ni bula vakawati era sega ni rawata. Eso vei ira era veikilai ga ena Internet, totolo sara nodra vakamau, era tini rarawa kina. Eso tale era cakava na itovo dukadukali ena gauna ni veibuku, dina nira qai vakamau e muri, era sa sega so ni dauveidokai.

⁴ Kuria qori, eso tale na lotu vaKarisito era bese ni vakawati “ga ena Turaga,” era sa taqea dredre tiko nikua na rarawa nira sa lewe ni vuvale duidui lotu. (1 Kor. 7:39) Ke o vakila tiko qori, masuta na veivosoti i Jiova kei na nona veivuke. Ena sega ni tarova o Jiova na ituvaki dredre e sotava e dua e digidigi cala, ia e tu vakarau me vukei ira na veivutuni dina mera vosota. (Same 130:1-4) Me nomu inaki mada ga mo vakamarautaki Jiova ena veigauna kece, o na qai raica ni ‘vu ni nomu kaukaua na marau e solia o koya.’​—Niem. 8:10.

NI YACO NA LEQA ENA BULA VAKAWATI

5. Na cava me rau kua ni vakasamataka na veiwatini ke rau sega ni marautaka nodrau bula vakawati?

⁵ E levu vei ira na vakila tu na mosi ni yalo ena bula vakawati era veinanuyaka voli: ‘Meu vakavinakataka tale noqu bula vakawati? Sobo ke dau lesu tale na gauna meu digia vinaka tale e dua na kequ isa!’ Eso tale era nanuma mera biuti kedra isa ra qai kaya: ‘Au sa bese na vakawati! Vakacava me keirau sere? Ke mani sega ni donu vakaivolatabu, keirau sa na veibiu ga meu rawa ni marau.’ E sega sara ga ni ka vakayalomatua vei ira na lotu vaKarisito me va qori nodra rai se mera tatadrataka tiko ga na bula vakawati e vinaka. Ena yasana adua, mera gumatua ni kerea na veidusimaki i Jiova ra qai muria sara.

6. Vakamacalataka mada na ivakasala i Jisu ena Maciu 19:9.

⁶ Ke rau sa sere mada ga na veiwatini lotu vaKarisito, ena rairai sega ni vakatara na iVolatabu me rau dui vakawati tale. E kaya o Jisu: “Na tagane e sereka na watina qai vakawati tale e sa wili me veibutakoci ke sega ni veidauci o watina.” (Maciu 19:9) Na “veidauci” e vakamacalataki eke e okati kina na veibutakoci kei na ivakarau vakasisila tale eso ni veiyacovi. E ka vakayalomatua gona mo kerea na veivuke i Jiova ke o mani vakasamataka mo sereki watimu e veibutakoci.

7. Na cava era na rairai tukuna eso ke leqa na nodrau vakawati na lotu vaKarisito?

⁷ Ke leqa na bula vakawati ena lomatarotarotaki kina nona bula vakayalo e dua. Sa rauta me taroga o Paula: “Ke dua e sega ni qarava rawa nona vuvale, ena qai qarava vakacava na ivavakoso ni Kalou?” (1 Tim. 3:5) Ke leqa gona nodrau bula vakawati na lotu vaKarisito, era na vakalewa na nodrau cakacaka vakavunau o ira era tiko veitikivi.​—Roma 2:21-24.

8. Na cava e rawa ni vu ni nodrau veibiu na veiwatini lotu vaKarisito?

⁸ Ke rau vakatulewataka na veiwatini lotu vaKarisito me rau sa na sere ena yavu e sega ni vakaivolatabu, qo e vakatakila ni leqa tiko nodrau bula vakayalo. Kena irairai ni o rau ruarua, se dua ga vei rau e sa sega ni muria tiko na ivakavuvuli vakaivolatabu. Ke rau ‘vakararavi dina vei Jiova mai vu ni lomadrau,’ erau na nuidei ni rawa ni vakavinakataki tale nodrau bula vakawati.​—Wilika Vosa Vakaibalebale 3:5, 6.

9. Na ka marautaki cava era vakila na veiwatini era vosota tiko na ituvaki dredre ena nodra vakawati?

⁹ E levu nikua era marautaka tale nodra bula vakawati dina ni a voleka sara nira sere. E laurai ni mana na nodra sasaga na veiwatini era sega ni vakariritaka na nodra veibiu. Vakasamataka mada qo na ka e rawa ni yaco ina vuvale era duidui lotu. A vola na yapositolo o Pita: “Me vaka kina o kemuni na yalewa vakawati, moni vakamalumalumu vei ira na dui watimuni, baleta ke ra sega ni talairawarawa ina vosa ni Kalou, ena rawa ni veisautaki ira na nomuni itovo, ke oni sega mada ga ni tukuna e dua na ka, nira na raica ga na nomuni itovo savasava kei na nomuni veidokai dina.” (1 Pita 3:1, 2) Koya gona ena rawa wale ga ni mai ciqoma na ka dina e dua e tawavakabauta ke vakaraitaka o watina na itovo vinaka! Ni vinaka tale na vakawati, ena dokai kina o Jiova, rau qai vakila na kena vinaka na veiwatini kei ratou na gone.

10, 11. Na ituvaki tawanamaki cava e rawa ni yaco ina bula vakawati? Na cava e rawa ni vukei rau na veiwatini?

¹⁰ Nira via vakamarautaki Jiova e levu na tacida dawai, era digitaka kina e dua sa papitaiso me kedra isa. Ni toso na gauna se rawa tiko ga ni yaco na leqa, lai vakavuna me lomabibi vakalevu e dua vei rau. De dua sa na sega sara ga ni vakaitavi ena cakacaka vakavunau e dua vei rau ni oti ga nodrau vakamau. Me kena ivakaraitaki: O Litiaa e dua na lotu vaKarisito gugumatua qai dau qarava vinaka nona itavi vakatina. E yalolailai ni sa tekivu cakava na itovo vakasisila o watina, sega ni veivutuni qai vakasivoi mai na ivavakoso. Ia na cava me cakava na lotu vaKarisito ke yavavala na nona bula vakawati?

¹¹ O na rairai vaqaqa, ‘Meu saga tiko ga meu vakavinakataka noqu vakawati?’ Qori e nomu vakatulewa sara ga. E tiko na yavu vinaka mo kua kina ni soro ke yavavala nomu bula vakawati. Ke o sega ni biuti watimu ena vuku ni nomu lewaeloma, o qai vosota na ituvaki dredre, o na talei ena mata i Jiova. (Wilika 1 Pita 2:19, 20.) Ena vakayagataka o Jiova nona vosa kei na yalona tabu me vukea na lotu vaKarisito e sasagataka me vinaka nona bula vakawati.

ERA TU VAKARAU MERA VEIVUKEI

12. Era na raici keda vakacava na qase ni ivavakoso nida kerea nodra veivuke?

¹² Ke o vakila tiko na rarawa ena nomu bula vakawati, kua ni rere ni kerea nodra veivuke na lotu vaKarisito matua. Nira ivakatawa dauloloma, era marautaka na qase mera veivakasalataki ena iVolatabu. (Caka. 20:28; Jeme. 5:14, 15) Drau kua ni nanuma ni ka vakamadua me veitalanoataki kei ratou na qase na nomudrau leqa vakaveiwatini ke drau kerea na veivuke vakayalo. Eratou na marautaka qai doka nomudrau sasaga mo drau vakamarautaka na Kalou.

13. Na ivakasala cava e tiko ena 1 Korinica 7:10-16?

¹³ Nira saga na qase ni ivavakoso mera vukei ira na lotu vaKarisito era tiko ena vuvale duidui vakabauta, era na vakabibitaka eso na ivakasala me vaka e vola o Paula: “Qo na noqu ivakasala vei ira na vakawati, ia e sega ni noqu, e nona ga na Turaga, oya me kua ni biuti watina na yalewa vakawati. Ia ke mani biubiu na yalewa vakawati me tu duadua ga, ke sega, me lesu ga vei watina; na tagane vakawati tale ga me kua ni biuta na watina. . . . Vei iko na yalewa vakawati, o kila vakacava ni o na sega ni vakabulai watimu? Se, o iko na tagane vakawati, o kila vakacava ni o na sega ni vakabulai watimu?” (1 Kor. 7:10-16) E marautaki na nona mai kila na ka dina e dua e tawavakabauta!

14, 15. Gauna cava era nanuma kina eso na yalewa lotu vaKarisito ni veiganiti mera biuti watidra? Na cava e bibi kina na masu kei na nona dikevi koya vinaka e dua?

¹⁴ Na yavu cava e rawa ni vakatulewataka kina na yalewa lotu vaKarisito me ‘biuti’ watina? Eso era cakava qo ni sa sega ni via qarava nona vuvale o tagane. Eso tale na yalewa era vakatotogani qai ririkotaki tale ga nodra bula vakayalo.

¹⁵ Ke via biubiu gona e dua, qori e nona vakatulewa sara ga. E ka vakayalomatua vua na lotu vaKarisito papitaiso me masulaka na ituvaki qo qai dikevi koya vinaka tale ga. Kena ivakaraitaki, vakacava e vakavuna o koya e sega ni tiko ena dina na ririkotaki ni nomu bula vakayalo, se o iko ga? De o sa sega ni dau vulica vakataki iko na iVolatabu, sega ni tiko wasoma ena soqoni qai vakavudua nomu vakaitavi ena cakacaka vakavunau.

16. Na cava mera kua kina ni vakariritaka na lotu vaKarisito na nodra veisere?

¹⁶ Eda na sega ni vakariritaka meda veibiu ke da mareqeta na noda veiwekani kei na Kalou da qai doka na isolisoli ni vakawati. Nida nona tamata eda na raica me vakalagilagi tiko ga na yaca tabu i Jiova. Me kua gona ni yavu ni nomu via veibiu ni o vakasamataka tiko mo vakawatitaka tale e dua.​—Jere. 17:9; Mala. 2:13-16.

17. Na ituvaki cava e rawa kina vua na Kalou me vakaceguya e dua na lotu vaKarisito?

¹⁷ Me saga ena nona vinaka taucoko na lotu vaKarisito e sega ni tiko ena dina o kena isa me dei tiko ga na nodrau vakawati. Ke mani biubiu o koya e sega ni tiko ena dina, me kua ni rarawa na tacida se beitaki koya ni vakavuna nona lako. E vakadeitaka qori o Paula ni kaya: “Ke via biubiu o koya e sega ni vakabauta, laiva me biubiu. E sa na sega ni bobula kina na tacida se ganeda, ia na Kalou ena vakacegui kemuni.”​—1 Kor. 7:15.b

NUITAKI JIOVA

18. Se mani dredre vakacava na nomu bula vakawati, cava e rawa ni yaco ke o saga mo vakavinakataka?

¹⁸ Ke vakilai na ituvaki dredre ena bula vakawati, kerea na veidusimaki i Jiova kei na nona veivakaukauataki. (Wilika Same 27:14.) Vakasamataki Litia mada sa cavuti oti mai. Erau qai veibiu kei watina ni a dreve nona sasaga me vakavinakataka na nodrau vakawati. A nanuma ni vakalusi gauna nona sasaga? “Sega,” e kaya o koya, “E ivakadinadina vinaka vei ira keimami tiko veitikivi na noqu sasaga qai savasava tiko ga noqu lewaeloma. E marautaki duadua ni uqeti luvequ yalewa na veigauna mosimosi qori me dei tiko ga ena dina qai yaco me dua na dauveiqaravi yalayala i Jiova gugumatua.”

19. Na cava ena yaco ke o saga tiko ga mo vakavinakataka nomu vakawati?

¹⁹ Dua tale na tacida yalewa o Marilyn a marautaka ni vinaka tale na nona bula vakawati ena nona vakararavi vei Jiova. E kaya: “Voleka sara meu biuti watiqu ni sa sega ni vukei keitou vakailavo qai vakaleqa noqu bula vakayalo. A qase tu ni vavakoso o watiqu ni bera ni mai vakaitavi ena dua na bisinisi a sega ni cicivaki vinaka. Sa tekivu me calata na soqoni, dredre tale ga me keirau dau veitalanoa. Nira vakacaca na batikadi ena siti keitou vakaitikotiko kina, dua na ka noqu rere qai dredre meu veimaliwai. Qori na gauna au liaca kina ni o au tale ga na vu ni neirau leqa. Keirau sa qai veivosaki tale, toso tale na vuli vakavuvale, keirau sega ni calata na soqoni. Ratou kauaitaki keirau dina na qase, ratou vukei keirau tale ga. Vaka sara ga e tauyavu vou neirau bula vakawati. Toso na gauna sa vakaitavi tale ena ivavakoso o watiqu. Au sotava dina na dredre, ia e muri au marau vakalevu.”

20, 21. Nida doka na vakawati, na cava meda cakava?

²⁰ Ke da mani vakawati se dawai, meda yaloqaqa tiko ga qai nuitaki Jiova. Tovolea ena nomu igu taucoko me vinaka tale nomu bula vakawati ke yavavala tiko ena gauna qo. Mo nanuma tiko ni rua erau vakamau erau sa “sega ni lewe rua tiko, erau sa na dua ga na yago.” (Maciu 19:6) Ke o saga tiko ga ni vakavinakataka nomu vakawati veitalia ke sega ni tiko ena dina o watimu, o na marau ni dua na siga ena tomani iko ena nomu sokalou.

²¹ Se ituvaki cava eda rairai sotava, meda ivakaraitaki vinaka tiko ga vei ira ena taudaku ni ivavakoso. Ke sa luluqa mai na ivau ni vakawati ena gadrevi meda masu vagumatua, meda dikevi keda tale, vakasamataka vakatitobu na ivakavuvuli vakaivolatabu, qai kerea nodra veivuke na qase ni ivavakoso. Meda vakamarautaki Jiova mada ga ena veika kece eda cakava da qai vakaraitaka nida vakavinavinakataka dina na isolisoli ni vakawati.

[iVakamacala e ra]

[Tikina bibi ena tabana e 10]

Era marau na lotu vaKarisito nira sega ni vakariri mera veibiu

[Tikina bibi ena tabana e 12]

Nuitaki Jiova qai rai vua me vakaukauataki iko

[iYaloyalo ena tabana e 9]

E vakalougatataki ira na veiwatini lotu vaKarisito o Jiova nira vakavinakataka nodra bula vakawati

[iYaloyalo ena tabana e 11]

O na vakacegui qai vukei vakayalo ena ivavakoso