Vukei au o Jiova Meu Rai

Talanoataka o Patrice Oyeka

Au mataboko, galili, qai noqu cakacaka tu ga na vakarorogo ena retio. E vakalomabibitaki au sara ga na kequ ituvaki, au mani nanuma ena dua na yakavi meu sa vakamatei au. Au sova e dua na pauta gaga ina dua na bilo wai qai biuta ena dela ni teveli e toka e mataqu. Au a nanuma meu sili, vakaisulu vakavinaka qai gunuva na bilo wai gaga qori meu mate. Na cava au via vakamatei au kina? E rawa vakacava niu se bula tiko nikua meu talanoataka na ka au sotava?

AU SUCU ena 2 Feperueri, 1958, ena yasana o Kasaï Oriental ena Democratic Republic of the Congo. A mate o tamaqu niu se yabaki ciwa, qai susugi au na tuakaqu.

Ni oti noqu vuli, au cakacaka sara ena vanua ni tei rapa. Ena dua na mataka ena 1989, e buto ga vakasauri na ka kece niu vakarautaka tiko e dua na ripote ena noqu ofisi. Au nanuma ga ni boko na livaliva, ia au rogoca ni se yavala tiko na idini ni cina, se siga tale ga na vanua! Dua na ka noqu taqaya niu sa sega ni raica e dua na ka, au sega mada ga ni raica rawa na ivola e tu e mataqu!

Au kaciva sara e dua na noqu tamata cakacaka me kauti au vua e dau qarava na mavoa kei na tauvimate ena kabani. A tukuna meu kau vua e dua na vuniwai sa dede na nona veiqaravi. E raica tale ga na vuniwai qori ni mavoa tu na loanimataqu qai ca sara ga na kequ ituvaki, mani tukuna meu lako ina koroturaga o Kinshasa.

Bula e Kinshasa

Au lai raica e levu na vuniwai ni mata e Kinshasa, ia e sega ni dua e vukei au. Ni oti e 43 na siga noqu curu tu e valenibula, eratou tukuna na vuniwai niu na mataboko ena noqu bula taucoko! Eratou kauti au na lewe ni noqu vuvale ena levu na lotu meu lai vakabulai vakacakamana kina, ia e sega ni dua e vakabulai au rawa.

Toso na gauna, au sa sega tale ni qai saga me vinaka na mataqu. Au lomabibi sara ga. Au sega ni rai rawa, sa sega noqu cakacaka, a biuti au o watiqu qai kauta kece na neirau iyaya ni vale. Au dau madua na lako e tuba se meu veimaliwai kei ira eso tale. Au dau via tu taudua ga e vale, au beci au tale ga.

Au saga vakarua meu vakamatei au. Na ikarua ni gauna au via cakava kina qori e vakamacalataki ena itekitekivu ni noqu italanoa. A vakabulai au e dua na gonelailai e vale. E sega ni nakita nona taura na bilo qai sova i tuba na wai gaga ena gauna au sili tiko kina. E vinaka ni sega ni gunuva, ia dua na ka na noqu rarawa niu sega ni kunea na bilo. Au tukuna sara vei ratou e vale na vuna au vaqara tiko kina na bilo kei na ka au via cakava.

Au vakavinavinaka vua na Kalou kei ratou noqu vuvale ena nodratou qaravi au. E oti sara ga noqu via vakamatei au.

Marautaka Tale na Noqu Bula

Niu dadabe tiko e vale ena dua na Sigatabu ena 1992 au qai vakatavako tiko, erau vunau yani e rua na iVakadinadina i Jiova. Ni rau kila niu mataboko, rau wilika sara vei au na Aisea 35:5: “Ena qai rai na matadra na mataboko, ka rogo na daligadra na didivara.” Au marau sara ga niu rogoca qori! Erau sega ni tukuna na iVakadinadina ni rau rawa ni vakabulai au vakacakamana. Erau vakamacalataka ga keu kila na Kalou, au na rawa ni rai tale ena vuravura vou e yalataka tu. (Joni 17:3) Qori e duidui sara mai na ka au rogoca ena lotu au lai qara bula tu kina. Sega ni bera au sa vulica na iVolatabu kei ira na iVakadinadina, ni vakayagataki na ivola E Rawa Mo Bula Tawamudu ena Parataisi e Vuravura. Au sa lako tale ga ena nodra Vale ni Soqoni na iVakadinadina i Jiova ena noqu yasayasa, au veisautaka tale ga na ivakarau ni noqu bula. Au sa sega ni qai vakatavako.

Ia e vakadredretaka noqu veisau na kequ ituvaki. Au gole sara ena dua na koronivuli ni mataboko meu rawa ni vulica kina na wiliwili kei na volavola ena Braille. Qori e vukei au ena noqu vakaitavi ena vuli e dau vakarautaki ena nodra Vale ni Soqoni na iVakadinadina i Jiova. Toso na gauna au dau vunau tale ga vei ira ena noqu yasayasa. Au sa marautaka tale ga na bula. Au vakavinakataka tiko ga noqu ivakarau ni bula, au yalataka sara na noqu bula vei Jiova. Au papitaiso ena ika7 ni Me, 1994.

Au vinakata meu cakacaka vakaitalatala vakatabakidua niu lomani Jiova vakalevu kei ira na lewenivanua. Me tekivu ena 1 Tiseba, 1995, sa noqu cakacaka vakatabakidua na vunau. Ena Feperueri 2004, au marau niu sa dua tale ga na qase ni ivavakoso. Au dau sureti ena so na gauna meu lai vunau ena so tale na ivavakoso ena noqu yasayasa. Na veivakalougatataki kece qori e vakamarautaki au vakalevu, e vakadeitaka tale ga nida se rawa ga ni qaravi Jiova ke vakaleqai mada ga e dua na tikiniyagoda.

Vukei au o Jiova Meu “Rai”

Me vaka ga au sa tukuna oti, a biuti au o watiqu niu sa mataboko. Ia a vakalougatataki au o Jiova ni solia mai e dua me vukei au ena ituvaki au tu kina. Qori o Anny Mavambu, e kila tu niu mataboko, ia keirau vakawati ga. E dau tomani au ena cakacaka vakaitalatala ni nona cakacaka tale ga vakatabakidua na vunau. E wilika tale ga vei au na ivakamacala e yavutaki kina na noqu ivunau meu qai vola ena Braille. Au marautaka sara vakalevu nona veitokani. Na ka e dau cakava e vakadeitaka vei au ni dina na ka e tukuni ena Vosa Vakaibalebale 19:14: “A vale kei nai yau na ka era taukena na qase: Ia sa maivei Jiova ga na yalewa vakawati sa yalomatua.”

O Jiova e vakalougatataki keirau tale ga kei Anny ena rua na luvei keirau—dua na tagane, dua na yalewa. Au vakanamata tu meu raica na matadrau ena Parataisi! A yalovinaka o tuakaqu me keitou tawana e dua na nona tikiniqele, na nona ciqoma na ka dina ena iVolatabu kei na nona papitaiso e dua tale na ka au vakalougatataki kina! Keitou lewena kece e dua na ivavakoso.

Au mataboko, ia au via cakava tiko ga na ka e vakamarautaka na Kalou baleta ni vakalougatataki au vakalevu. (Malakai 3:10) Au masuta e veisiga me yaco mai na nona Matanitu me kauta laivi e vuravura na rarawa kece. Niu sa mai kilai Jiova, au sa rawa ni tukuna: “Na veivakalougatataki maivei Jiova sa ia na veivakavutuniyautaki, ka sa sega ni kuria ko koya e na ka rarawa.”​—Vosa Vakaibalebale 10:22.

[iYaloyalo ena tabana e 13]

Solia tiko e dua na ivunau vakaivolatabu; ratou noqu vuvale kei na tuakaqu