Toro Voleka Vua na Kalou
‘Oni na Lolou Mai Vei Au’
DUA na itovo talei na yalomalumalumu. Eda dau taleitaki ira era vakaraitaka na itovo qori. Ia sa dredre me kunei ena gauna qo na yalomalumalumu dina, vakabibi vei ira na veiliutaki. Vakacava na Kalou o Jiova, o koya e cecere duadua e lomalagi kei vuravura taucoko? E dau yalomalumalumu? Meda dikeva mada na vosa i Jeremaia na parofita ena Lele i Jeremaia 3:20, 21.—Wilika.
A vola o Jeremaia na Lele i Jeremaia ena gauna era sotava tu kina na Isireli na ituvaki dredre. A se qai raica ga e dua na ka rarawa, oya na nodra vakarusa na kai Papiloni na nona koro lomani o Jerusalemi. Ia a kila na parofita qori ni veiganiti na nona vakatauca na lewa na Kalou ena vuku ni nodra valavala ca na Isireli. Vakacava a yalolailai beka o Jeremaia? A bau nanuma ni sa rui yawa o Jiova me sega kina ni kauaitaki ira era veivutuni qai vukei ira ena nodra rarawa? Rogoca mada na vosa i Jeremaia me vaka ga e vosa tiko vei ira na nona tamata.
E levu era rarawa tu, ia e nuidei tu ga o Jeremaia. E tagicaka kina vei Jiova: ‘Oni na nanuma sara ga, oni na lolou mai vei au.’ (Tikina e 20) E sega ni bau lomalomarua o Jeremaia. E kila ni na sega ni guilecavi koya o Jiova se o ira na nona tamata era veivutuni. Ia na cava ena cakava na Kalou Kaukaua Duadua?—Vakatakila 15:3.
E kila deivaki o Jeremaia ni o Jiova ena ‘lolou’ vei ira era veivutuni dina. E tukuna e dua tale na ivakadewa: “Isa moni nanuma, moni lolou sobu tale ga mai vei au.” Na vosa qori eda raica kina ni o Jiova e dau yalololoma. Ni “Cecere sara duaduaga e vuravura taucoko,” e vaka me lolou sobu mai me kauti ira tani na nona dauveiqaravi mai na ituvaki lolovira qai vakadonui ira. (Same 83:18) Na inuinui qori e vakacegui Jeremaia sara ga. E vakadeitaka kina na parofita yalodina qori me waraka ga na gauna lokuci i Jiova me vakabulai ira na nona dauveiqaravi era veivutuni.—Tikina 21.
Na ka a volatukutukutaka o Jeremaia eda vulica kina e rua na ka me baleti Jiova. Kena imatai, e yalomalumalumu. (Same 18:35) E ‘uasivi ena kaukaua’ o Jiova, ia e yalorawarawa me biuti koya ena ituvaki eda tu kina, me vukei keda tale ga ena noda leqa. (Jope 37:23; Same 113:5-7) E veivakacegui dina oya, se vakacava? Kena ikarua, o Jiova e tu vakarau me veivosoti; e ‘vosoti’ ira era veivutunitaka nodra cala qai vakadonui ira tale. (Same 86:5) Erau lako vata sara ga na itovo qo—yalomalumalumu kei na dauveivosoti.
Eda vakavinavinaka ni o Jiova e sega ni vakataki ira na veiliutaki tu qo, nira dau yalodredre qai sega ni dauveinanumi ena vuku ni nodra dokadoka! Ni o raica na nona yalorawarawa na Kalou yalomalumalumu qo me ‘lolou sobu’ vei ira na nona dauveiqaravi qai solia vei ira na inuinui nira dau sotava na ituvaki dredre, vakacava o via vulica e levu tale na ka me baleti koya?
Wili iVolataba e Vakatututaki ena June:
[Tikina bibi ena tabana e 14]
E yalorawarawa o Jiova me biuti koya ena keda ituvaki, me vukei keda tale ga ena noda leqa