Taro na Dauwiliwili . . .

Na Cava Era Vunau Kina e Veivale na iVakadinadina i Jiova?

▪ E tukuni ena iVolatabu na ivakaro qo i Jisu vei ira na nona imuri: “Ni lako moni vakavulici ira na lewe ni veivanua kece ga mera noqu tisaipeli.” (Maciu 28:19, 20) Vakacava e baleti ira kece na lotu vaKarisito na ivakaro qori? Eratou kila na tisaipeli taumada i Jisu nira okati kece kina na lotu vaKarisito. Kena ivakaraitaki, a tukuna na yapositolo o Pita: ‘E vakaroti keimami o Jisu me keimami vunau sara vakavinaka vei ira na lewenivanua.’ (Cakacaka 10:42) A vola tale ga na yapositolo o Paula: “E noqu itavi ga. Au sa na kalouca dina keu sega ni tukuna na itukutuku vinaka!”​—1 Korinica 9:16.

Era muria tale ga na ivakaro i Jisu na lotu vaKarisito ena imatai ni senitiuri, sega ni o Paula ga kei Pita. Era vakaliuca sara ga na cakacaka vakavunau. (Cakacaka 5:28-32, 41, 42) Era saga tale ga mera cakava qori na iVakadinadina i Jiova nikua. Era vunautaka na itukutuku vata ga a vunautaka o Jisu, oya “na matanitu vakalomalagi.”​—Maciu 10:7.

Me vunautaki vei cei na itukutuku ni Matanitu ni Kalou? E tukuna o Jisu ni dodonu me vunautaki vei ira kece na tamata ena veivanua. A tukuna vei ratou na nona tisaipeli: “Dou na qai tukuni au . . . [ina] veivanua yawa sara kei vuravura.” (Cakacaka 1:8) A parofisaitaka sara ga ni na “vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece,” sa na qai yaco na icavacava ni veika vakavuravura. (Maciu 24:14) Me vakayacori na ivakaro qori, era saga na lotu vaKarisito ena imatai ni senitiuri mera vosa vei ira kece na tamata, sega ni o ira ga na nodra itokani se o ira era sega ni lewena tu e dua na lotu. (Kolosa 1:23; 1 Timoci 2:3, 4) O ira tale ga na iVakadinadina i Jiova nikua era dau saga mera vosa vei ira kece na tamata.a

Na cava na iwalewale laulau duadua me vunautaki kina na itukutuku ni Matanitu ni Kalou? A kila o Jisu na sala mera rogoca kina na itukutuku vinaka e levu, mani talai ratou na nona tisaipeli ina veikoro lelevu, veikoro lalai, kei na veivale. (Maciu 10:7, 11, 12) Ni mate qai vakaturi oti o Jisu, a sega ni cegu na nodratou vunau na nona tisaipeli ena “veivale.” (Cakacaka 5:42) Me vakataki Jisu ga, eratou vunau tale ga ena vanua kece era tu kina na tamata, e matanalevu tale ga. (Joni 4:7-26; 18:20; Cakacaka 17:17) Era muria tale ga na iwalewale qori na iVakadinadina i Jiova nikua mera vunau kina vei ira kece na tamata.

A tukuna o Jisu nira na sega ni vakarorogo kece na tamata. (Maciu 10:14; 24:37-39) Vakacava me tarova qori na nodra vunau na lotu vaKarisito? Vakasamataka na ivakatautauvata qo: Kaya mada o lewe ni dua na timi ni veivueti ni oti e dua na uneune levu. O na nanuma me sa cegu na nomu vaqaqara baleta ni vica wale ga era kune? Sega, o na vaqaqara tiko ga ni o nuitaka ni na rawa ni kune e dua tale. A vakasalataki ratou na nona tisaipeli o Jisu me ratou kua ni soro, me ratou nuitaka ga nira rawa ni kune tale eso era na ciqoma na itukutuku vinaka ni Matanitu ni Kalou. (Maciu 10:23; 1 Timoci 4:16) Nira vaqarai ira va qori e veivale na iVakadinadina i Jiova, era vakaraitaka kina nira lomana na Kalou kei na wekadra, ni vakatau tiko na nodra bula ena nodra rogoca kei na nodra ciqoma na itukutuku ni Matanitu.​—Maciu 22:37-39; 2 Cesalonaika 1:8.

Na itukutuku vakaivolatabu qori e vakamacalataki ena mekesini o wilika tiko qo. Ke o via kila eso tale na ka, tarogi ira na iVakadinadina i Jiova nira veisiko tale yani se volavola vei ira na vakarautaka na mekesini qo.

[iVakamacala e ra]