Cava e Bibi Kina Meda Kila ni Dina na Cakamana?
“Na cakamana e veisaqasaqa kei na ivakavuvuli vakasaenisi.”—RICHARD DAWKINS, PAROFESA VAKACEGU NI PUBLIC UNDERSTANDING OF SCIENCE.
“E tiko na vuna vinaka meda vakabauta kina na cakamana. E sega ni veisaqasaqa kei na ivakavuvuli vakalotu, e ivakatakilakila ga ni nona loloma na Kalou, e vakaraitaka tale ga ni na vukei ira tiko ga na nona ibulibuli.”—ROBERT A. LARMER, PAROFESA NI FILOSOFI.
“O VAKABAUTA na cakamana?” Mai na ka erau vakamacalataka na parofesa qori, eda raica kina ni duidui na noda nanuma. Ia vakacava o iko, o na sauma vakacava na taro ya?
De dua o na sega sara ni tukuna, “Io, au vakabauta.” Baleta ke o tukuna qori, ena rairai nanumi ni o dau vakabauta na ka vakatevoro se o sega ni vuli vinaka. E levu e va tale ga qori na nodra rai.
Ena yasana adua o na rairai vakabauta ni dau yaco dina na cakamana. De dua o vakabauta na cakamana e volatukutukutaki ena iVolatabu, me vaka nona wasea rua o Mosese na Wasa Damudamu. O na rairai vakabauta ni dau yaco tale ga na cakamana ena noda gauna. E laurai mada ga ena dua na ripote ga qo “ni levu vei ira na lewenivanua ena vanua vakavavalagi—kena ivakaraitaki e rauta ni tolu na ikava ni lewenivanua e Merika kei na 38 na pasede mai Peritania—era se vakabauta tiko ga na cakamana.” (The Cambridge Companion to Miracles, editataka o Graham H. Twelftree) E sega ni o ira wale ga na lotu vaKarisito era vakabauta na cakamana. E tukuna na Britannica Encyclopedia of World Religions, “ni voleka ni lotu kece” era vakabauta ni so na ka e yaco vakacakamana.
De dua ena sega ni va qori nomu rai, o na rairai tukuna: “Au sega ni kila, au sega tale ga ni via kauaitaka! E sega ni dua na ka e yaco vakacakamana ena noqu bula!” Ia na cava ga e bibi kina mo kila ni dina na cakamana?
Dikeva mada na ituvaki qo: Kaya mada ke tauvi iko tiko e dua na mate e sega na kena iwali. O qai wilika ena dua na ivola nuitaki vakavuniwai na ivakamacala ni dua na wainimate vou e rawa ni walia na mate e tauvi iko tiko. E macala ga ni na yaga ke o vakayagataka vakalailai kina na nomu gauna kei na nomu kaukaua mo vaqaqa na kena dina. E va tale ga qori na iVolatabu, e yalataka ni sa voleka ni yaco eso na cakamana veivakurabuitaki. Qori ena tara na bula ni tamata kece e vuravura. Vakacava, ena yaga ke o vakayagataka na nomu gauna kei na nomu kaukaua mo vakadinadinataka kina ke dina na yalayala qori?
Ia ni bera nida dikeva eso na cakamana veivakurabuitaki, meda raica mada e tolu na ka era tukuna e levu mera saqata kina na cakamana.
[Kato ena tabana e 3]
NA CAVA NA CAKAMANA?
E dua na ka e yaco e sega ni rawati ena kaukaua vakatamata, e rawati ga ena kaukaua vuni.