E Rawa Nida Daudina ena Vuravura Ca Qo?

Ni keitou vinakata me keitou dina ena ka kece.”​—IPERIU 13:18.

DINA ga ni rawa ni vakamuai keda na yagoda ivalavala ca, na vuravura eda bula tiko kina qo, kei na Tevoro, eda se rawa ga ni vorata na veivakamuai kece qori! Ena sala cava? Ena noda toro voleka vua na Kalou kei na noda bulataka na ivakavuvuli mai na Vosa ni Kalou na iVolatabu, e yaga ena veisenitiuri sa sivi. Raica mada e rua na kena ivakaraitaki.

IVAKAVUVULI VAKAIVOLATABU: “Kua ni muria na ivakarau ni veika vakavuravura qo.”​—Roma 12:2.

Ka e yaco dina: O Guilherme e dua na turaga ni Brazil e vakabisinisi vinaka. E vakadinadinataka sara ga ni sega ni rawarawa na daudina. E tukuna: “Ena rawarawa sara ni cakacaka vakailawaki e dua na daubisinisi, ena vuku ni kena leqataki me rawata na bisinisi na nona takete se me kua ni lusi ena veiqati vakabisinisi ni vuravura qo. Levu era nanuma ni sega ni cala na veivaqumi. E sega ni rawarawa meda daudina ena gauna eda tauyavutaka kina e dua na bisinisi qai levu na ka vakailavo meda qarava.”

Ia e sega ni bau rawai vakadua o Guilherme me lawaki. E tomana: “Ena vanua mada ga ni bisinisi e sa vakadonui tu kina na cakacaka vakailawaki, e se rawa ga ni o daudina. E bibi me dei tiko vei iko na ivakarau ni itovo vinaka. E vukei au na iVolatabu meu vakila na yaga ni daudina. Na tamata daudina ena vinaka na nona lewaeloma, ena lomavakacegu qai vinaka na kena irogorogo. Ena rawa tale ga ni ivakaraitaki vinaka vei ira eso tale.”

IVAKAVUVULI VAKAIVOLATABU: “O ira era qara na bula vutuniyau era na temaki, era na coriti, ena curumi ira tale ga e levu na gagadre ca e veivakaleqai, na ka kece qo ena vakavuna na nodra leqa kei na nodra rusa. Ni levu sara na ka ca e vu mai na lomani ni ilavo.”​—1 Timoci 6:9, 10.

Ka e yaco dina: O André e taukena e dua na kabani ni vakacoba misini me dau taqomaki kina na itikotiko (security system). E dau lai konitaraki ena dua na kalavo ni soka rogo levu. Ena dua na gauna ni oti e dua na qito levu, a gole o André ena kena valenivolavola qai lai solia na dokete ni nona cakacaka. Eratou se ogaoga tiko na tabana e qarava na ilavo ena kena wiliki na ilavo e rawa mai na vanua era volitaki kina na tikite ni sarasara. Me vaka ni ratou sa bera tiko, e saumi ratou ga vakatotolo na tamata cakacaka o supavaisa wili kina o André.

E tukuna o André: “Niu gole tiko i vale au raica ni sivia na ilavo e saumi au kina o supavaisa. Au kila ni na sega ni kila o supavaisa se o cei e saumi vakasivia. Au kila tale ga ni na sauma na turaga qori na ilavo e yali mai na nona taga! Au nanuma meu lesu tale. Au sasaga ena kedra maliwa na sarasara meu lai vakasuka tale na ilavo e saumi vakasivia vei au. Dua na ka na nona kurabui na supavaisa. E sega ni dua e se bau vakasuka vua na ilavo.”

E tomana o André:“Na noqu daudina e vinaka kina na kequ irogorogo vua na supavaisa. Sa oti qo e vica na yabaki na noqu se konitaraki tiko ena kalavo qo, ni vakatauvatani kei ira na kabani era konitaraki kina e liu. Au vakavinavinaka ni noqu muria na ivakavuvuli totoka ena iVolatabu e vinaka kina na kequ irogorogo.”

E veivakauqeti dina nida kila nida rawa ni vorata na veivakamuai ni cakacaka vakailawaki ena veivuke ni Kalou. Ia eda na sega ni vorata rawa ena noda kaukaua ga vakatamata. Na ka e vakavuna na cakacaka vakailawaki e dredre me walia ga vakataki koya na tamata ivalavala ca. Kena ibalebale beka qori ni na sega ni oti rawa na cakacaka vakailawaki? Na iotioti ni ulutaga veitaravi qo ena vakamacalataki kina na kena isau veivakauqeti vakaivolatabu.

[iYaloyalo ena tabana e 6]

[Tikina bibi ena tabana e 6]

“E vukei au na iVolatabu meu vakila na yaga ni daudina.”​—GUILHERME

[iYaloyalo ena tabana e 6]

[Tikina bibi ena tabana 6]

“Au vakavinavinaka ni noqu muria na ivakavuvuli totoka ena iVolatabu e vinaka kina na kequ irogorogo.”​—ANDRÉ