Taro 2: Ena Vakacava na Kequ iTuvaki Niu sa Mate?

NI SE gone o Roman a laucoqa mate e gaunisala e dua na nona itokani voleka. A tukuna: “E tarai au sara ga vakabibi na nona mate na noqu itokani. Sa oti e vica vata na yabaki na kena yaco na vakacalaka qori, au dau lomatarotarotaka se vakacava tu na keda ituvaki nida sa mate.”

Cava e tarogi kina qori?

Eda dau rarawataka ni mate e dua. Se mani cava na noda yabaki ni bula, eda sega ni vinakata meda mate. E levu era rerevaka na ka ena yaco ni sa mate e dua.

Na cava na nodra isaunitaro e levu?

Ni mate e dua, levu era vakabauta ni bula tale tiko e dua na ka. Era vakabauta tale ga nira na vakalougatataki i lomalagi na tamata vinaka, ia o ira na tamata ca era na totogitaki me tawamudu ena vuku ni nodra valavala ca. Eso tale era vakabauta ni gauna e mate kina e dua ena sega ni bula tale tiko e dua na ka, sa na sega ni nanumi tale tiko.

Na cava e vakavotui ena isaunitaro qori?

Ni mate e dua, na imatai ni ka e nanumi oya ni bula tale tiko e dua na ka. Kena ikarua, oya ni sega ni vakainaki na bula. O ira era nanuma ni sega ni vakainaki na bula era sega ni via kauaitaka na nodra bula ena veigauna se bera mai: “Meda kana ga, da gunu, nida na mate nimataka.”—1 Korinica 15:32.

Na cava e kaya na iVolatabu?

E sega ni vakavuvulitaka na iVolatabu ni bula tale tiko e dua na ka ena gauna e mate kina e dua. E uqeti Tui Solomoni na Kalou me vola: “Ni ra sa kila ko ira sa bula ni ra na mate: ia ko ira na mate era sa sega ni kila e dua na ka.” (Dauvunau 9:5) O ira era “sega ni kila e dua na ka” era sega ni kidava na ka e yaco wavoliti ira tiko. Era sega ni vakila se cakava e dua na ka. Koya gona, o ira na mate era sega ni rawa ni vukei ira na bula se vakaleqai ira.

E sega ni inaki ni Kalou me mate na tamata me vaka era vakabauta e levu. A bulia na imatai ni tamata o Atama me bula tawamudu e vuravura. Na gauna duadua ga a cavuta kina na Kalou na mate, ena gauna a totogitaki Atama kina ena vuku ni nona talaidredre. E sega ni vakatarai Atama me kania na vuanikau vakatabui qai vakasalataki koya ni na “mate vakaidina” ke kania. (Vakatekivu 2:17) Ke rau talairawarawa o Atama kei Ivi, a rawa sara ga ni rau bula tawamudu e vuravura kei ira na nodrau kawa era yalodina vua na Kalou.

Ia a vakatulewataka o Atama me vakalecalecava na ivakasala ni Kalou. A valavala ca ena gauna a talaidredre kina vua na Kalou mani mate. (Roma 6:23) E sega ni bula tale tiko e dua na ka ni mate o Atama. Sa sega ni qai bula tale o Atama. A tukuna vua na Kalou: “E na buno ni matamu ko na kania kina na kemu kakana, ka yacova na siga ko na suka tale kina ki na qele; ni ko a buli maikina eliu: ni ko sa kuvu ni qele ga, ia ko na suka tale mo kuvu ni qele.” (Vakatekivu 3:19) Me vaka nida kawa i Atama, e takavi keda kina na ivalavala ca kei na mate.—Roma 5:12.

Dina ni sa vakatulewataka o Atama me talaidredre vua na Kalou, ia ena vakayacora ga na Kalou na nona inaki oya mera tawana na vuravura na kawa i Atama. (Vakatekivu 1:28; Aisea 55:11) Sa voleka qo me na vakaturi ira e dua na iwase levu ni tamata era mate tu o Jiova. E tukuna o Paula me baleta na gauna qori: “Nira na vakaturi mai na mate na yalododonu kei ira na sega ni yalododonu.”—Cakacaka 24:15.

A vulica o Roman, sa vakamacalataki oti mai, na ituvaki me baleti ira na mate kei na veika e baleta na Kalou o Jiova mai na iVolatabu. E tarai koya sara ga na veika qori. Wilika ena tabana e 11 ni mekesini qo na kena itukutuku.

Me ikuri ni ivakamacala me baleta na kedra ituvaki na mate, raica na wase 6 ni ivola Na Cava Sara Mada e Kaya na iVolatabu? Rawa ni kopitaka ena www.jw.org

Na Cava e Kaya o Jisu me Baleta na Mate?

A sega ni duavata o Jisu kei na so na iliuliu ni lotu ena nona gauna era vakavuvulitaka nira na sega ni vakaturi na mate. (Luke 20:27) A sega tale ga ni vakavuvulitaka ni na bula tale tiko e dua na ka ni mate na tamata. Ia raica mada qo na ka a vakavulica o Jisu.

Mate e vaka ga na moce. Ena gauna a mate kina o Lasarusa na nona itokani, a tukuna o Jisu: “Sa moce na nodatou itokani o Lasarusa, ia au sa lako qo meu lai vakayadrati koya.” Eratou sega ni taura rawa na tisaipeli i Jisu na ibalebale ni ka a tukuna. Eratou sauma: “Turaga, ke moce dina o koya, ena bula vinaka mai.” E vakamacalataka na iVolatabu: “A tukuna tiko o Jisu ni sa mate o Lasarusa. Eratou nanuma ga nona tisaipeli ni tukuna tiko ni moce me vakacegu. E qai tukuna vakamatata vei iratou o Jisu ena gauna ya: ‘Sa mate o Lasarusa.’”—Joni 11:11- 14.

Era na vakaturi na mate. Ni yaco yani o Jisu ena koro i Lasarusa, a vakacegui Marica na gane i Lasarusa ena nona kaya: “Ena tucake tale na ganemu.” A qai tukuna o Jisu e dua na yalayala bibi: “O yau na tucake tale kei na bula. O koya e vakabauti au, ke mani mate, ena bula tale.” A qai yaco dina na ka a yalataka qori o Jisu. Era vakadinadinataka e levu nona vakaturi Lasarusa o Jisu, dina ga ni a mate tu me va na siga.—Joni 11:23, 25, 38- 45.

Ena raivotu a vakaraitaki vua na yapositolo o Joni, a yalataka tale o Jisu nira na vakaturi na mate. A vakamacalataka ni dua na gauna se bera mai era na sereki mai vei mate o ira era vesuki tu kina.—Vakatakila 20:13.