Taro 3: Na Cava e Vakalaiva Kina na Kalou Meu Sotava na Rarawa?

E DAU gunu sivia na tamai Ian. E dina ni vakarautaki na ka e gadreva o Ian ena gauna e tubu cake tiko kina, ia a sega ga ni vakila na loloma vakatama a diva tu vei tamana. E kaya o Ian, “au a sega ni dau taleitaki koya baleta ni daugunu kei na ka e dau cakava vei tinaqu.” Ni sa uabula o Ian, a tekivu lomatarotarotaka ke bula dina na Kalou. “Au dau vaqaqa, ‘ke bula dina na Kalou, na cava e vakalaiva kina meda sotava na rarawa?’”

Cava e tarogi kina qori?

Ke o sega mada ga ni sotava tiko na leqa, ena vakararawataki iko ga nomu raica na nodra vakalolomataki na tamata e sega na nodra cala. Ia me vakataki Ian, o na rairai lomatarotarotaka vakalevu na vuna e yaco kina na rarawa ena gauna o sotava sara ga kina na veika dredre se ni tauvimate se mate e dua na wekamu lomani.

Na cava na nodra isaunitaro e levu?

Era vakabauta eso ni vakatara na Kalou na veika rarawa me vakavulici keda meda yalomalumalumu da qai veinanumi. So tale era nanuma ni vakavuna tiko na nodra rarawa ena gauna qo na ka ca era cakava ena dua na gauna sa oti.

Na cava e vakavotui ena isaunitaro qori?

Ni Kalou e sega ni kauaitaka na nodra rarawa na kawatamata, qori ena vakadredretaka na noda lomani koya. E dauveivakalolomataki na Kalou.

Na cava e kaya na iVolatabu?

E tukuna vakamatata na iVolatabu ni sega ni dodonu meda beitaka na Kalou ena veika rarawa eda sotava na kawatamata. “Ena gauna e vakatovolei kina e dua me kua ni kaya: ‘E vakatovolei au na Kalou. E sega ni rawa ni vakatovolei na Kalou ena ka ca, e sega tale ga ni vakatovolea e dua ena ka ca.’” (Jemesa 1:13) Koya gona, na vakasama me baleta na nona beitaki na na Kalou ni vakavuna na rarawa e veisaqasaqa kei na ka e tukuna na iVolatabu me baleta na nona itovo. Ena sala cava?

Na loloma e dua na itovo e kilai tani kina na Kalou. (1 Joni 4:8) Me vakamatatataki na tikina qori, na iVolatabu e vakatauvatana na Kalou ina dua na tina ni gone e lomana na luvena. E taroga na Kalou: “E dua li na yalewa me na guilecava na luvena sa sucu, me kua ni lomana na luve ni ketena? io, ena sa guilecava beka, ia koi au ka’u na sega ni guilecavi iko.” (Aisea 49:15) Vakacava e rawa vua e dua na tina dauloloma me nakita nona vakamavoataki luvena? E macala ga ni na sega ni cakava qori e dua na itubutubu e lomana na luvena, ia ena saga ga me vukei koya me kua ni sotava na rarawa. E vaka tale ga kina na Kalou, e sega ni vakavuna mera sotava na rarawa na tamata e sega na nodra cala.—Vakatekivu 18:25.

Dina ni dau veikauaitaki na Kalou, ia era se rarawa ga na tamata e sega na nodra cala. O na rairai taroga, ‘Ke lomani keda na Kalou qai levu na nona kaukaua, cava e sega ni vakaotia kina na veika e vakavuna tiko na rarawa?’

E tiko na vuna vinaka e vakalaiva tiko kina na Kalou na rarawa e yaco tiko nikua. Dikeva mada e dua na vuna: E dau vakavuna ga na tamata na nodra rarawa na so tale. Era sega ni via veisau o ira na dau veivakasagai kei ira era voravora na nodra veiliutaki. Koya gona, me vakaotia na Kalou na ka e vakavuna tiko vakalevu na rarawa, ena vakarusai ira mada na mataqali tamata va qori.

E vola na yapositolo o Pita na vuna e se bera ni vakarusai ira kina na dau cakacala na Kalou: “E sega ni dau berabera ni vakayacora nona yalayala o Jiova me vaka era nanuma eso ni berabera, ia e vosoti kemuni ga ni sega ni vinakata me rusa e dua, e vinakata ga moni veivutuni kece.” (2 Pita 3:9) Na nona dau vosovoso na Kalou o Jiova e vakaraitaka na nona yalololoma kei na nona dauveivosoti.

Ia ena sega ni vosovoso tu ga na Kalou o Jiova, sa voleka qo me yavala. Ena “sauma na nomuni rarawa vei ira era dau vakararawataki” ira na sega na nodra cala. O ira era veivakararawataki tiko era na “lewai mera rusa tawamudu.”—2 Cesalonaika 1:6-9.

O Ian sa cavuti oti mai, e kunea na isaunitaro veivakacegui me baleta na rarawa. Na veika e vulica e veisautaka sara ga na nona itovo ni rai me baleta na bula. Wilika na kena italanoa ena tabana e 13 ni mekesini qo.

Me ikuri ni ivakamacala me baleta na vuna e vakalaiva tiko kina na Kalou na rarawa kei na ka ena cakava kina, raica na wase 11 ni ivola Na Cava Sara Mada e Kaya na iVolatabu? Rawa ni kopitaka ena www.jw.org

Na Cava e Kaya o Jisu me Baleta na Veika Rarawa?

O Jisu a sega ni beitaka na Kalou ni vakavuna tiko na veika rarawa a yaco tu ena gauna oya. Ia raica mada qo na ka a cakava.

A vakaraitaka o Jisu ni Kalou e sega ni dau totogitaki ira na tamata e sega na nodra cala me vakararawataki ira. A vakabulai ira na tauvimate, lokiloki kei ira na mataboko o Jisu. (Maciu 15:30) Na cakamana kece a vakayacora e vakaraitaka vei keda e rua na ka bibi: Kena imatai, e sega ni vakayagataka o Jisu na kaukaua e solia vua na Kalou me vakavuna na rarawa, me vakaotia ga. Kena ikarua, e vakabulai ira na tamata o Jisu ena vuku ni nona loloma. Ni raica na nodra rarawa na tamata, dua na ka na nona ‘lomani ira.’ (Maciu 20:29-34) E laurai sara ga vei Jisu na ivakarau ni rai i Tamana me baleta na rarawa. Koya gona, na veika e tukuna kei na ka e cakava o Jisu eda vulica kina ni rarawa na Kalou ena gauna e raica kina na veika ca, qai vinakata me vakaotia.—Joni 14:7, 9.

O Jisu e tukuna sara ga ni o Setani na Tevoro e vakavuna dina tiko na rarawa ni kawatamata. E kaya: “E daulaba o koya mai na ivakatekivu.” (Joni 8:44) E vakatakila tale ga o Jisu ni o Setani na Tevoro e “turaga ni vuravura qo” qai “vakacala tiko na vuravura taucoko.”—Joni 12:31; Vakatakila 12:9.

E vakatakila vei keda o Jisu na inuinui me baleta na gauna ena oti kina vakadua na rarawa. E vakavulici ira na nona imuri mera masuta: “Tamai keimami mai lomalagi, . . . me yaco mai na nomuni matanitu. Me caka na lomamuni e vuravura me vaka e caka tiko mai lomalagi.” (Maciu 6:9, 10) Ni yaco mai na Matanitu ni Kalou, ena vakaotia vakadua na rarawa e vuravura, me vaka ga sa caka mai lomalagi.

Ena raivotu a vakaraitaka o Jisu vua na yapositolo o Joni, a vakamacalataka kina na ivakarau ni bula era na vakila o ira era na vakarurugi ena ruku ni Matanitu ni Kalou. Ena gauna ya na Kalou “ena qusia . . . na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”—Vakatakila 1:1; 21:3, 4.