SAUMI NA TARO VAKAIVOLATABU

O cei na yaca ni Kalou?

E tiko kece na yacadra na lewe ni noda vuvale. Vakacava e veiganiti me tiko tale ga na yaca ni Kalou? E levu na icavuti ni Kalou e tukuni ena iVolatabu, me vaka na Kalou Kaukaua Duadua, Turaga Cecere Duadua, kei na Dauveibuli, ia e tiko na yacana dina.​—Wilika Aisea 42:8.

Ena levu na ivakadewa ni iVolatabu e volai ena Same 83:18 na yaca ni Kalou. Kena ivakaraitaki, ena ivakadewa ni Ai Vola Tabu vakaViti e tukuni kina: “Ni sai kemuni na yacamuni ga ko Jiova, sa Cecere sara duaduaga e vuravura taucoko.”

Na cava meda vakayagataka kina na yaca ni Kalou?

Na Kalou e vinakata sara ga meda vakayagataka na yacana. Nida veivosaki kei ira eda veivolekati me vakataki ira na noda itokani voleka, eda na vakayagataka sara ga na yacadra​—vakabibi ke ra vinakata meda cakava qori. Ena vinaka ke da cakava tale ga qori nida vosa vua na Kalou. Kena ikuri, a uqeta sara ga o Jisu Karisito me vakayagataki na yaca ni Kalou.​—Wilika Maciu 6:9; Joni 17:26.

Ia meda itokani ni Kalou, e gadrevi meda kila e levu tale na ka me baleti koya, sega ni yacana wale ga. Kena ivakaraitaki, e Kalou vakacava? E rawa dina nida veivolekati kei na Kalou? O rawa ni kunea na isaunitaro qori ena iVolatabu.