“Erau vinakata meu vakadeitaka ga vakataki au na ka dina”

NOQU BULA E LIU:

Au sucu i Santo Domingo, ena Dominican Republic, au gone duadua vei keitou na le va na veitacini. Rau vuli vinaka na noqu itubutubu, rau qai vinakata me keitou dau veimaliwai kei ira na tamata vinaka kei na tamata daudina, me keitou gone vinaka kina. Ena 1978, rau sotava na noqu itubutubu e rua na daukaulotu ni lotu Momani. E uqeti rau sara ga na rakorako ni nodrau isulusulu kei na maqosa ni kedrau irairai na cauravou qo, sega ni dede rau vakatulewataka na noqu itubutubu me keitou imatai ni vuvale ena yanuyanu qo me keitou lewena na Church of Jesus Christ of Latter-day Saints, se na Lotu Momani.

Niu tubu cake tiko, au marautaka noqu dau veimaliwai e valenilotu, au doka tale ga nira dau raica vakabibi na bula vakavuvale kei na ivakarau ni itovo vinaka na lotu Momani. Au marautaka niu lotu Momani, qai noqu isausau meu dua na daukaulotu.

Niu sa yabaki 18, keitou toki vakavuvale i Merika me rawa niu lai vuli ena dua na univesiti vinaka. Ni oti e rauta e dua na yabaki, rau sikovi keitou mai ena vanua keitou tiko kina i Florida o nei kei momo, rau iVakadinadina i Jiova. Rau sureti keitou me keitou tomani rau ena dua na nodra soqo ni tikina e yavutaki vakaivolatabu. E tarai au sara ga niu raici ira kece na tiko ena soqo nira dikeva tiko na nodra iVolatabu ra qai vakavola na veitikina bibi. Au mani kerea e dua na peni kei na pepa meu vakavola tale ga eso na ka.

Ni oti na soqo rau tukuna o nei kei momo ni rau rawa ni vukei au meu vulica eso na ka mai na iVolatabu, me vaka niu vinakata tiko meu dua na daukaulotu. Au nanuma ni na vinaka qori baleta ena gauna oya au kila ga vakavinaka na nodra ivola na lotu Momani, sega soti na iVolatabu.

VEISAUTAKI AU NA IVOLATABU:

Ni keitou dau veitalanoataka na iVolatabu ena talevoni, rau dau vakauqeti au o nei kei momo meu veidutaitaka na noqu vakabauta kei na ivakavuvuli ena iVolatabu. Erau vinakata meu vakadeitaka ga vakataki au na ka dina.

Au vakabauta e levu na ivakavuvuli ni lotu Momani, ia au sega ni vakadeitaka se tokona vakacava na ivakavuvuli qori na iVolatabu. A vakauta mai vei au o nei e dua na mekesini na Yadra! na itabataba ni 8 Noveba, 1995, tabaka na iVakadinadina i Jiova. E tiko kina eso na ulutaga me baleta na vakabauta ni lotu Momani. Au kurabuitaka niu sega ni kila tu e levu na ivakavuvuli ni lotu Momani. E uqeti au sara ga qori meu lai rai ena nodra web site vakadonui meu vakadinadinataka na ka e tukuna na Yadra! E tautauvata sara ga na ka e tukuni kina, au vakadeitaka tale ga qori niu sikova na nodra vale ni iyau maroroi na lotu Momani e Utah.

Au dau vakabauta tu ni tautauvata na ka e tukuna na iVolatabu kei na nodra ivola na lotu Momani. Ia niu wilika vagumatua na iVolatabu, au raica ni rau veisaqasaqa.

Au sega tale ga ni taleitaka na ivakavuvuli ni boletaki vanua era vakavulica na lotu Momani. Kena ivakaraitaki, era vakavuvulitaka ni tiko mai Jackson County, Missouri, Merika na were o Iteni. Era tukuna tale ga na iliuliu ni lotu Momani ni gauna “ena veiliutaki kina na Matanitu ni Kalou, ena cecebuya ena lagilagi na kuila ni Merika ena kaunikuila ni Bula Galala kei na dodonu e soli vakatautauvata vei ira na tamata kece.”

Au lomatarotarotaka ke yaco dina na ka era vakavuvulitaka na lotu Momani, na cava ena yacovi ira na vo tale ni matanitu​—me vaka na vanua au sucu kina. Au mani taroga qori ena gauna a qiriti au mai kina e dua na cauravou lotu Momani ena dua na yakavi, e vuli daukaulotu tiko. Au tarogi koya sara vakababa se na tu vakarau me valuti ira era lotu vata ena gauna era veiraravui kina na neirau dui matanitu. Au kurabui sara ga ni vakaiotaka na noqu taro! Au vakadikeva vinaka na ka au vakabauta, au vakatarogi ira tale ga na iliuliu ni lotu Momani. E mani tukuni vei au ni noqu taro e okati tiko ena so na ka vuni, ena qai vakatakilai ni toso na gauna.

Niu sega ni lomavakacegu ena nodra isaunitaro, au mani dikeva vinaka tale na vuna au via dua kina na daukaulotu ni lotu Momani. Au liaca ni dua na vuna au via daukaulotu kina niu via vukei ira na tamata. Au vinakata tale ga mera dokai au na tamata. Ia au se sega mada ga ni kila e levu na ka me baleta na Kalou. Dina niu dau wilika vakalevu na iVolatabu ena gauna sa oti, au sega ni dau raica vakabibi. Au sega ni kila na inaki ni Kalou me baleta na vuravura kei na kawatamata.

KENA YAGA:

E levu na ka au vulica ena iVolatabu kei ira na iVakadinadina i Jiova, au vulica tale ga na yaca ni Kalou, na kedra na ituvaki na mate, kei na itavi i Jisu ena kena vakayacori na inaki ni Kalou. Sa qai matata vei au na ka e tukuna na iVolatabu, au marau tale ga ni wasea vei ira eso tale na ka au vulica tiko. Au dau vakabauta wale tu ga ni bula tiko na Kalou, ia qo au sa rawa ni masuti koya me vaka e dua na noqu iTokani vinaka duadua. Au mani papitaiso meu dua na iVakadinadina i Jiova ena 12 Julai, 2004, ni oti e ono tale na vula au sa cakacaka vakaitalatala vakatabakidua.

Sa oti qo e lima na yabaki na noqu cakacaka tiko ena nodra itikotiko liu na iVakadinadina i Jiova mai Brooklyn, e Niu Yoka. Au marautaka dina noqu veivuke tiko ena kena tabaki na iVolatabu kei na ivola vakaivolatabu mera vukei kina e milioni vakacaca na tamata e veiyasa i vuravura. Au se marautaka tiko ga meu vukei ira eso tale mera vulica na veika me baleta na Kalou.