Tukutuku Mai na Daukacivaka na Matanitu

“Noqu Via Qarava na Kalou”

“DOU lako tani mai vua, oi kemudou na noqu tamata.” Oqori na kaci ni dua na agilosi a rogoca na yapositolo o Joni ena imatai ni senitiuri S.K. Edaidai, era lewe vica vata na milioni na yalomalumalumu era sa ciqoma na kaci oya ra qai dro tani mai vei “Papiloni na Ka Levu,” na isoqosoqo ni lotu lasu kece kei vuravura. (Vakatakila 18:​1-4, NW) E dua vei ira o Wilner mai Haiti, e talanoataka na ka a sotava.

“Au a sucu ena 1956 ena dua na vuvale lotu Katolika kaukaua ena korolailai o St. Marc, e Haiti. Sega ni tukuni rawa na levu ni nodratou marau e vale ena noqu digitaki kei na rua tale, me keitou lai tiko ena dua na vuli ena seminari e St. Michel de l’Atalaye, e Haiti. Ena 1980, keitou a vakau tale i Stavelot, mai Belgium, me tomani kina na veika keitou vulica. Keitou qai lai vuli tale ga ena dua na univesiti ni lotu Katolika.

“Ni sa qai tekivu, au mamarau niu sa lai vuli bete. Dua na siga ena rumu ni kana, a kerei au na bete e qarava tiko na neitou iwasewase meu waraki koya ni via vosa tale vei au. Au kidroa dina ni sa tukuna mai o koya vakadodonu ni vinakati au! Au sega sara ga ni vakadonuya na lomana qai dua na ka na noqu yalolailai. Au a vola vei iratou mai vale na ka a yaco au qai biuta na seminari ni oti tale e vica na vula, dina ga ni ratou a sega ni marautaka. Au kunea e dua na vale meu tiko kina ena koro, au qai vulica tale e dua na cakacaka vou.

“Niu sa suka i St. Marc, sa oti vakadua na noqu vakabauta na lotu Katolika. Ia, e se tu ga na noqu via qarava na Kalou, au qai sega tu ni kila na ka meu cakava. Au a lako ena lotu iKavitu, na lotu Baptist kei na lotu Momani. Au veilecayaki tu vakayalo.

“Au nanuma lesu na gauna au a vuli tu kina mai na seminari e Belgium, au dau wilika na ivakadewa ni iVolatabu i Crampon. Au kunea kina ni dua tiko na yaca ni Kalou. O koya gona, au a masuta vagumatua na Kalou me vukei au meu kunea na lotu dina.

“Sega ni dede, rau a toki tikivi au yani e rua na iVakadinadina i Jiova. Erau sega ni dauvakasosa, rau veidokai, qai maqosa na kedrau irairai. Au drukataka na nodrau itovo ni bula. Dua na siga, a sureti au e dua vei rau meu tiko ena iVakananumi ni mate i Karisito era dau vakayacora ena veiyabaki. Au taleitaka dina na soqo oya au qai vinakata meu vuli iVolatabu wasoma kei ira na iVakadinadina. Voleka ni ono wale ga na vula e tauri au meu vakadeitaka kina niu sa kunea na sala dodonu meu qarava kina na Kalou. Au yalataki au vei Jiova, qai papitaiso ena 20 Noveba, 1988.”

Yaco na gauna, me cakacaka vakaitalatala vakatabakidua o Wilner. Edaidai, e sa veiqaravi tale tiko ga vaqase ena ivavakoso. O rau vakaveiwatini kei rau na luvedrau, eratou marautaka tiko na nodratou veiqaravi ena ivavakoso.

[iYaloyalo ena tabana e 9]

Nona dauwili iVolatabu o Wilner e kunea kina ni yaca ni Kalou o Jiova