‘Vakadeitaka na Veika Era Bibi Sara’

1, 2. Na parofisai cava me baleta na iotioti ni veisiga eratou rairai kauai kina na tisaipeli, na cava na vuna?

ERATOU tiko voli kei na nodratou Turaga o Pita, Jemesa, Joni kei Adriu. Dua na ka na nodratou vakasamataka vakabibi na ka e cavuta e liu o Jisu me baleta na vakarusai ni valenisoro. (Mari. 13:​1-4) Eratou mani tarogi koya: “Ni tukuna mada vei keitou se na yaco ninaica na veika qo, na cava tale ga na ivakatakilakila e dusia ni oni sa tiko, kei na ivakataotioti ni veika vakavuravura?” (Maciu 24:​1-3) Sa qai tukuna vei ratou o Jisu na veika ena yaco se ituvaki ena kauta mai e levu na veiveisau, ena vakatakilakilataka tale ga na iotioti ni veisiga ni ituvaki ca i Setani. Dua vei ira na ka e cavuta qori o Jisu a rairai vakavuna na nodratou kauai na nona tisaipeli. Ni cavuta oti o Jisu na ituvaki rarawataki me vaka na ivalu, leqa ni kakana kei na tubu ni ivalavala tawadodonu, a parofisaitaka sara ni dua na ka vinaka ena vakatakilakilataka na iotioti ni veisiga. E tukuna: “Ena vunautaki mada na itukutuku vinaka ni matanitu ni Kalou ena veiyasa i vuravura me ivakadinadina ina veimatanitu kece, sa na qai yaco na icavacava.”​—Maciu 24:​7-14.

² Eratou marautaka na tisaipeli i Jisu na nodratou tomani koya ena vunautaki ni itukutuku vinaka ni Matanitu ni Kalou. (Luke 8:1; 9:​1, 2) De dua eratou nanuma lesu na ka e tukuna o Jisu: “E levu dina na ka me tamusuki, ia era lewe lailai ga na tamata cakacaka. Ni kerea gona na Turaga ni tatamusuki me tala mai eso tale na tamata cakacaka ina nona tatamusuki.” (Luke 10:2) Ia eratou na vunau vakacava “ina veiyasa i vuravura,” me “ivakadinadina ina veimatanitu kece”? Era na gole mai vei na tamata cakacaka? Ke ratou a kila wale ga na tisaipeli na ka ena yaco ena gauna e se bera mai ni ratou dabe toka kei Jisu ena siga ya! Ratou na kurabuitaka dina na vakayacori ni vica na malanivosa eda wilika ena Maciu 24:14.

3. Sa vakayacori tiko vakacava nikua na Luke 21:​34, na taro cava meda vakasamataka?

³ Eda bula donuya tu qo na gauna sa vakayacori kina na parofisai i Jisu. Era sa duavata tiko e vica vata na milioni ena vunautaki ni itukutuku vinaka ni Matanitu ni Kalou e vuravura. (Aisea 60:22) Ia a tukuna o Jisu ni na dredre vei ira eso ena iotioti ni veisiga qo me donu tiko ga na ka era vakaliuca. Era na vakawelei qai “bibi” na lomadra. (Wilika Luke 21:34.) Eda sa raica tale tiko ga nikua na kena vakayacori qori. Eso na dauveiqaravi ni Kalou era sa vakawelei. Ena rairai kilai qori mai na vakatulewa era cakava me baleta na cakacaka saumi, vuli torocake, qarai ni iyau, na levu ni gauna e vakayagataki ena qito kei na ka ni veivakamarautaki. Eso tale era sa oca ena nodra nuiqawaqawataka ra qai lomaocaocataka na bula ni veisiga. E vinaka mo taroga: Vakacava o yau, na cava e laurai ena noqu vakatulewa me baleta na ka e bibi duadua ena noqu bula?

4. (a) Na cava e masulaka o Paula me baleti ira na lotu vaKarisito e Filipai, na vuna? (b) Na cava eda na dikeva ena ulutaga qo kei na kena e tarava, ena uqeti keda vakacava?

⁴ Dua na ka na levu ni sasaga era cakava na lotu vaKarisito ena imatai ni senitiuri mera vakaliuca tiko ga kina na veika vakayalo. A raica na yapositolo o Paula ni vinakati mera masulaki o ira mai Filipai mera “vakadeitaka kina na veika era bibi sara.” (Wilika Filipai 1:​9-11.) Me vakataki koya na yapositolo o Paula, levu tale ga ena gauna ya era ‘yaloqaqa ni tukuna na vosa ni Kalou ena doudou.’ (Fpai. 1:​12-14) Nikua tale ga, e levu era yaloqaqa ni vunautaka na Vosa ni Kalou. Ia nida vakasamataka vakabibi na ka sa rawati tiko ena gauna qo ena isoqosoqo i Jiova, vakacava ena rawa ni uqeti keda qori meda sa qai gumatua ga ena cakacaka bibi duadua, na vunau? Io e rawa! Ena ulutaga qo, meda dikeva mada na ituvatuva e vakarautaka o Jiova me vakayacori kina na Maciu 24:14. Na cava e vakaliuca sara tiko ga na nona isoqosoqo, ena uqeti keda vakacava kei na noda vuvale na noda kila qori? Ena ulutaga e tarava, eda na dikeva kina na ka ena vukei keda meda vosota da qai toso vata tiko ga kei na isoqosoqo i Jiova.

TOSO TIKO GA NA ISOQOSOQO VAKALOMALAGI I JIOVA

5, 6. (a) Na cava e vakarautaka kina o Jiova na raivotu me baleta na nona isoqosoqo tawarairai? (b) Na cava e raivotutaka o Isikeli?

⁵ E levu na ka a nakita o Jiova me kua ni volai ena nona Vosa. Kena ivakaraitaki, a sega ni vakarautaka na itukutuku matailalai me baleta na cakacaka ni mona se na lomalagi kei na vuravura, dina nira itukutuku veivakurabuitaki sara! E vakarautaka ga o Jiova na itukutuku eda gadreva me rawa nida kila vinaka na nona inaki, me qai salavata qori kei na noda bula. (2 Tim. 3:​16, 17) E vakasakiti kina ni vakamacalataki vakalailai ena iVolatabu na isoqosoqo tawarairai i Jiova! Eda matalau nida wilika na kena vakamacalataki na ituvatuva vakalomalagi i Jiova ena Aisea, Isikeli, Taniela kei na ivolatukutuku i Joni ena Vakatakila. (Aisea 6:​1-4; Isik. 1:​4-14, 22-24; Tani. 7:​9-14; Vkta. 4:​1-11) E vaka sara ga e cega o Jiova e dua na ilatilati meda raici lomalagi. Na cava e vakarautaka kina na itukutuku qori?

⁶ E vinakata o Jiova meda kua vakadua ni guilecava nida lewe tiko ni dua na isoqosoqo e lomalagi kei vuravura. E levu na ka sa caka tiko nikua me tokoni kina na inaki ni Kalou, ia eda sega ni raica rawa. Kena ivakaraitaki, a raica o Isikeli na qiqi vakalomalagi vakaitamera e vakatayaloyalotaka na isoqosoqo tawarairai i Jiova. Na qiqi vakalomalagi qori e rawa ni toso vakatotolo qai dau veisau kosi vakasauri. (Isik. 1:​15-21) Ni cawiri mada ga vakadua na yava ni qiqi, e rawa ni dua na vanua balavu sara e ciciva. A raica tale ga o Isikeli o koya e vodo tiko ena qiqi. E kaya: “Ka’u a raica na rokana sa vaka na mata ni parasa matavinaka, ka rairai me vaka na bukawaqa sa volita, . . . Sa vakaoqo na raivotu ni vakatakarakara ni ukuuku i Jiova.” (Isik. 1:​25-28) Sa na bau qoroya mada ga qori o Isikeli! E raica o Isikeli ni lewa sara tu ga o Jiova na nona isoqosoqo, e vakayagataka na yalona tabu me dusimaka na vanua me gole kina. E vakatubuqoroqoro dina na kena vakatakarakarataka qori na toso ni isoqosoqo vakalomalagi i Jiova!

7. E uqeti keda vakacava na raivotu i Taniela?

⁷ E uqeti keda tale ga na ka e raica o Taniela. A vakatarai me raici koya sa ‘dede sara nona bula,’ e vakatayaloyalotaki Jiova e dabe tiko ena itikotiko vakaturaga e yameyame kina na bukawaqa. Na itikotiko vakaturaga qori e tiko na kena qiqi. (Tani. 7:9) A vinakata o Jiova me raica o Taniela ni toso tiko na nona isoqosoqo, e vakayacora tiko na nona inaki. A raica tale ga o Taniela “e dua sa vaka e dua na Luve ni tamata,” qori o Jisu a lesi me liutaka na isoqosoqo i Jiova e vuravura. Ena sega ni vica ga na yabaki na nona veiliutaki uasivi o Jisu. Ia na “nona lewa sa sega ni mudu, ena sega ni takali, kei na nona matanitu ena sega ni vakarusai.” (Tani. 7:​13, 14) E uqeti keda qori meda nuitaki Jiova, meda kila tale ga na veika sa cakava tiko. Sa vakatovolei oti qai vakadinadinataki na Luvena, e soli gona vei Jisu na “lewa, kei na vakarokoroko, kei na matanitu.” O Jiova e nuitaki Luvena. Eda rawa tale ga ni nuitaka na veiliutaki i Jisu.

8. E uqeti rau vakacava o Isikeli kei Aisea na raivotu a vakaraitaka o Jiova, ena uqeti keda tale ga vakacava?

⁸ Me uqeti keda vakacava na noda dikeva na isoqosoqo tawarairai i Jiova? Me vakataki Isikeli, eda qoroya da qai drukataka na ka e sa cakava tiko o Jiova. (Isik. 1:28) Nida vakananuma na isoqosoqo i Jiova, e rawa ni uqeti keda meda yavala me vakataki Aisea ga. Ni basika na ituvaki me tukuna kina vei ira eso tale na ka sa cakava tiko o Jiova, a sega tale ni tu suka o Aisea. (Wilika Aisea 6:​5, 8.) A nuidei o Aisea ni na rawa ni vorata na ituvaki dredre cava ga ena veitokoni i Jiova. Na noda kila tale ga vakacaca na veika e baleta na isoqosoqo i Jiova, ena vakadrukai keda qai uqeti keda meda toso. Sa na bau veiuqeti mada ga na noda vakasamataka na toso ni isoqosoqo, kei na kena vakaliuca na vakayacori ni inaki i Jiova!

ISOQOSOQO I JIOVA E VURAVURA

9, 10. Na cava e bibi kina me dua na isoqosoqo rairai i Jiova?

⁹ O Jiova a vakayagataki Luvena me tauyavutaka e dua na ituvatuva e vuravura me cakacaka vata kei na isoqosoqo tawarairai. Na cava e vinakati kina e dua na ituvatuva e vuravura me vakayacori kina na cakacaka ena Maciu 24:14? Raica mada qo e tolu na vuna.

¹⁰ Kena imatai, e tukuna o Jisu ni ratou na vunau na nona tisaipeli ena “veivanua yawa sara kei vuravura.” (Caka. 1:8) Kena ikarua, ena vinakati e dua na ituvatuva me vakarautaki kina na kakana vakayalo, mera qaravi tale ga kina o ira na vakaitavi ena cakacaka qori. (Joni 21:​15-17) Kena ikatolu, ena vinakati e dua na ituvatuva me rawa nira soqoni vata na daukacivaka na itukutuku vinaka mera sokalou vei Jiova, mera vakavulici tale ga ena sala mera vakayacora kina na nodra cakacaka. (Iper. 10:​24, 25) Ena sega ni tu tu ga me yaco kece qori. Me rawa nira cakava vinaka na nodra itavi na imuri i Karisito, e bibi me tuvanaki vinaka na cakacaka.

11. Eda na tokona vakacava na ituvatuva e vakarautaka na isoqosoqo i Jiova?

¹¹ Eda na tokona vakacava na ituvatuva e vakarautaka na isoqosoqo i Jiova? Dua na sala bibi oya na noda dau nuitaki ira e lesia o Jiova kei Jisu mera liu tiko vei keda ena cakacaka vakavunau. Dua na ka na levu ni cakacaka se sasaga e vakayacori tu nikua era rawa ni vakaogai ira kina o ira na liutaki keda tiko. Ia na cava e vakaliuca tu ga na isoqosoqo rairai i Jiova?

VAKALIUCA ‘NA VEIKA ERA BIBI SARA’

12, 13. Era qarava vakacava na qase ni ivavakoso na nodra itavi, e uqeti iko vakacava qori?

¹² Era lesi na qase ni ivavakoso matua ena veiyasa i vuravura mera liutaka ra qai raica na kena vunautaki na itukutuku vinaka ni Matanitu ni Kalou ena veivanua era veiqaravi kina. Nira vakatulewa gona na tacida qori, era na qara na veidusimaki ena Vosa ni Kalou me ‘cina kina yavadra me vakararamataka na nodra sala’ ra qai masuta vagumatua na veidusimaki i Jiova.​—Same 119:105; Maciu 7:​7, 8.

¹³ Me vakataki ira ga era liutaka na cakacaka ena imatai ni senitiuri, o ira tale ga na qase ni ivavakoso era liutaka tiko na cakacaka vakavunau nikua era solibula ena “vakavulici ni vosa ni Kalou.” (Caka. 6:4) Era marautaka vakalevu na toso ni cakacaka vakavunau ena nodra vanua kei na veiyasa i vuravura. (Caka. 21:​19, 20) Era sega ni kotora na lawa se iwalewale ni kena caka e dua na ka. Era muria ga na iVolatabu kei na veidusimaki ni yalo tabu ni Kalou nira vakarautaka na ituvatuva e vinakati me toso tiko ga kina na cakacaka vakavunau. (Wilika Cakacaka 15:28.) Nira cakava qori na tagane era lesi, era sa ivakaraitaki vinaka sara tiko ga vei ira na lewe ni ivavakoso.​—Efeso 4:​11, 12.

14, 15. (a) Na ituvatuva cava e vakarautaki me tokona na cakacaka vakavunau e vuravura? (b) O raica vakacava na nomu tokona na kena vunautaki na itukutuku vinaka?

¹⁴ E levu era sega ni raica na cakacaka levu ni kena vakarautaki na kakana vakayalo ena noda ivola, soqoni, kei na soqo lelevu. Era bole e vica vata na udolu mera cakacaka vagumatua ena kena vakadewataki na kakana vakayalo ena rauta ni 600 na vosa, mera rogoca kina e levu ena nodra dui vosa “na veika vakatubuqoroqoro me baleti koya na Kalou.” (Caka. 2:​7-11) Era cakacaka na cauravou kei na goneyalewa ena vanua e vakayagataki kina na misini lelevu e totolo na kena tabaka na ivola kei na misini e dau dabana na ivola. Sa qai vakau na ivola qori ena ivavakoso kece, ina veivanua yawa mada ga.

¹⁵ E vakarautaki e levu na ituvatuva ena noda ivavakoso me rawa nida vakaliuca na vunautaki ni itukutuku vinaka. Kena ivakaraitaki, vica vata na udolu era bole mera veivuke ena tara Vale ni Soqoni kei na Assembly Hall, nodra vukei o ira era vakaleqai ena leqa tubukoso se ira era gadreva vakatotolo na veiqaravi vakavuniwai, tuvanaki na soqo cokovata, veivakavulici ena koronivuli vakalou, qori eso ga na cakacaka e sega ni laurai levu. Na cava na inaki ni cakacaka kece qori? Me vakarawarawataka na vunautaki ni itukutuku vinaka, me vakavinakataka na nodra bula vakayalo na vakaitavi ena cakacaka qo, me vakatetea tale ga na sokalou dina. Vakacava e vakaliuca tiko ga na isoqosoqo i Jiova e vuravura na veika e bibi sara? Io!

MURIA NA KA E CAKAVA NA ISOQOSOQO I JIOVA

16. Na cava o rawa ni dikeva ena nomu vuli vakataki iko se nomudou vuli vakavuvale?

¹⁶ Vakacava o dau vakasamataka vakabibi ena so na gauna na ka e cakava tiko na isoqosoqo i Jiova? Eso era digia mera vulica ena nodra sokalou vakavuvale se nodra vuli vakataki ira na ka e cakava tiko na isoqosoqo ra qai vakasamataka vakatitobu. Ena marautaki tale ga nida vulica na raivotu i Aisea, Isikeli, Taniela kei Joni. Na ivola Jehovah’s Witnesses​—Proclaimers of God’s Kingdom kei na so tale na ivola se DVD e vakamacalataki kina na veika talei me baleta na isoqosoqo.

17, 18. (a) E yaga vakacava vei iko na ulutaga qo? (b) Na taro cava meda vakasamataka?

¹⁷ Ena yaga vei keda na noda vakasamataka vakabibi na ka e cakava tiko o Jiova ni vakayagataka na nona isoqosoqo. Meda nakita dei mada ga meda vakadeitaka na veika era bibi sara meda tokona kina na veika e cakava tiko na isoqosoqo talei qori. Ena vakaukauataki keda qori meda nuidei me vakataki Paula a vola: “Keitou na sega ni soro kina ena cakacaka vakaitalatala e soli vakayalololoma vei keitou.” (2 Kor. 4:1) E uqeti ira tale ga na nona itokani vakacakacaka: “Meda kua mada ga ni soro ena caka vinaka, nida na tamusuka ena kena gauna ke da sega ni vakacauoca.”​—Kala. 6:9.

¹⁸ Vakacava e tiko eso na veisau meda cakava yadua se vakavuvale me rawa nida vakadeitaka kina na ka e bibi sara ena noda bula e veisiga? E rawa nida bula rawarawa ga se vakalailaitaka na ka e rawa ni veivakawelei meda vakaliuca tiko ga kina na cakacaka bibi duadua, na vunau? Ena ulutaga e tarava, eda na dikeva tiko e lima na ka e rawa ni vukei keda meda toso vata tiko ga kei na isoqosoqo i Jiova.