iSoqosoqo e Cakava na Loma i Jiova

DUA na ka na levu ni isoqosoqo vakalotu era tu nikua, isoqosoqo vakapolitiki, vakabisinisi, kei na so tale. E duidui na ka era kilai kina, inaki, rai kei na ka era valataka. Ia e tiko e dua na isoqosoqo e duidui sara. E vakaraitaka vakamatata na iVolatabu ni isoqosoqo ga qori na iVakadinadina i Jiova.

² E ka marautaki ni o sa veitomani tiko kei na isoqosoqo i Jiova. O sa kila na loma ni Kalou, o sa cakava sara tiko ga. (Same 143:10; Roma 12:2) O sa italatala ni Kalou, o veiqaravi tale ga kei ira na mataveitacini e veiyasa i vuravura. (2 Kor. 6:4; 1 Pita 2:17; 5:9) Me vaka e yalataka na Vosa ni Kalou, ni o cakava qo o na vakalougatataki kina, o na marau tale ga. (Vkai. 10:22; Mari. 10:30) Ni o yalodina ni cakava na loma i Jiova nikua, o sa vakarautaki iko tiko ena dua na gauna lagilagi tawamudu se bera mai.—1 Tim. 6:18, 19; 1 Joni 2:17.

³ E tiko e vuravura e dua na isoqosoqo talei e liutaki vakalou. Kena ibalebale ni liutaka tiko na Dauveibuli Cecere na Kalou o Jiova. Eda nuitaki koya vakatabakidua. E noda Turaganilewa, Vunilawa, e noda Tui tale ga. (Aisea 33:22) Ni Kalou dau tuvatuvanaki, e tuvanaka meda “cakacaka vata kei koya” ena vakayacori ni nona inaki.—2 Kor. 6:1, 2.

⁴ Ni sa voleka ni cava na ituvaki qo, eda na yalodina da qai talairawarawa tiko ga ena veiliutaki ni Tui e lesi, o Karisito Jisu. (Aisea 55:4; Vkta. 6:2; 11:15) A parofisaitaka sara ga o Jisu ni na levu na cakacaka era na cakava nona imuri ni vakatauvatani kei na ka e rawata ena nona cakacaka vakaitalatala. (Joni 14:12) Ena balavu toka na gauna era na cakacaka kina ra qai lewe levu sara, ena levu tale ga na yalava. Era na kacivaka na itukutuku vinaka ni Matanitu ni Kalou me yacova na iyalayala kei vuravura.—Maciu 24:14; 28:19, 20; Caka. 1:8.

⁵ Sa vakayacori tiko qori nikua. Ia me vaka e vakamatatataka o Jisu, ena qai cava ga na kacivaki ni itukutuku vinaka ena gauna lokuci i Jiova. Na ivakatakilakila kece ena parofisai ni iVolatabu e dusia ni sa voleka sara na siga i Jiova, e levu, e vakatubuqoroqoro.—Joeli 2:31; Sefa. 1:14-18; 2:2, 3; 1 Pita 4:7.

⁶ Nida kila na loma i Jiova ena iotioti ni veisiga qo, ena vinakati meda gumatua ni cakava na lomana. E dodonu gona meda kila vinaka na ka e vauca na cicivaki ni isoqosoqo i Jiova, da qai tokona ena noda vinaka taucoko. E yavutaki qori ena ivakavuvuli vakaivolatabu, okati kina na ivakaro, lawa, lewa, ivunau, kei na ivakavuvuli ena Vosa ni Kalou.—Same 19:7-9.

⁷ Nida muria na veidusimaki vakaivolatabu qo, eda na duavata da qai veiyaloni. (Same 133:1; Aisea 60:17; Roma 14:19) Na cava e vaqaqacotaka na keda ivau vakamataveitacini e veiyasa i vuravura? Na loloma. E uqeti keda na loloma, eda sulumaka sara ga. (Joni 13:34, 35; Kolo. 3:14) Qo e vakadonui keda kina na Kalou, da qai toso vata kei na isoqosoqo vakalomalagi i Jiova.

ISOQOSOQO VAKALOMALAGI I JIOVA

⁸ Eratou raivotutaka na isoqosoqo vakalomalagi i Jiova na parofita o Aisea, Isikeli, kei Taniela. (Aisea, wase 6; Isik., wase 1; Tani. 7:9, 10) A raivotutaka tale ga na yapositolo o Joni na isoqosoqo vakalomalagi qo, mani vakamacalataka vakalailai vei keda ena ivola na Vakatakila. E raici Jiova ni dabe tiko ena dua na idabedabe vakaturaga lagilagi, era tu e yasana na kabula vakayalo era kacivaka tiko: “E savasava, e savasava, e savasava o Jiova na Kalou, o koya e Kaukaua Duadua, o koya e bula e liu, o koya e bula tiko qo, o koya tale ga e lako tiko mai.” (Vkta. 4:8) E raica tale ga o Joni “ni duri tu ena maliwa ni idabedabe vakaturaga . . . e dua na lami,” na Lami ni Kalou o Jisu Karisito.—Vkta. 5:6, 13, 14; Joni 1:29.

⁹ Ni dabe tiko o Jiova ena idabedabe vakaturaga e dusia ni Ulu ni isoqosoqo vakalomalagi. E kaya na 1 Veigauna 29:11, 12 me baleti koya kei na nona itutu cecere: “Kemuni ga Jiova oni cecere, oni kaukaua, oni lagilagi, oni uasivi, oni rokovi, ni nomuni na ka kece mai lomalagi kei vuravura. E nomuni ga Jiova na matanitu. Oni cecere oni ulu ni ka kece. E vu mai vei kemuni na iyau kei na lagilagi, oni lewa na ka kece, e tiko e ligamuni na kaukaua kei na qaqa, e rawarawa e ligamuni moni vakalevulevuya na tamata kece, moni vakaukauataki ira.”

¹⁰ Ni cakacaka vata kei Jiova o Jisu Karisito, e soli kina vua na itutu cecere mai lomalagi kei na lewa. Io, e “vakamalumalumutaka . . . na Kalou na ka kece e ruku ni yavana, qai vakacerecerei koya me ulu ni ka kece ena vuku ni ivavakoso.” (Efeso 1:22) E kaya na yapositolo o Paula me baleti Jisu: “E vakacerecerei koya kina na Kalou ena dua na itutu cecere qai solia vakayalololoma vua na yaca e uasivia na vo tale ni yaca, mera tekiduru ena yaca i Jisu—o ira kece mai lomalagi, o ira e vuravura, kei ira e lomaniqele—mera vakatakila na yame kece ga ni Turaga o Jisu Karisito, me vakalagilagi kina na Kalou na Tamada.” (Fpai. 2:9-11) Eda nuidei gona ni na vinaka vakaoti na veiliutaki i Jisu Karisito.

¹¹ Na parofita o Taniela e raivotutaki Koya e Dede sara na nona bula ena nona idabedabe vakaturaga kei ira na agilosi era “udolu vakaudolu, era duri tu e matana e oba vakaoba.” (Tani. 7:10) Na iVolatabu e vakatokai ira na mataivalu agilosi qo mera “yalo dauveiqaravi . . . era talai yani mera qaravi ira era na rawata na icovi ni bula.” (Iper. 1:14) O ira kece na kabula vakayalo qo era tuvanaki ena ‘idabedabe vakatui, veiliutaki, matanitu kei na lewa.’—Kolo. 1:16.

¹² Nida vakasamataka nodra tuvanaki vakamaqosa na lewe ni isoqosoqo vakalomalagi i Jiova, eda na qai taura rawa na vuna e uqeti Aisea kina na nona raivotu ni “raici Jiova ni dabe tiko ena idabedabe vakaturaga cecere,” ra qai “tu e cake vua na serafimi.” E kaya o Aisea: “Isa o yau! Au sa vaka ga na mate, niu tamata tebenigusu dukadukali, au bula maliwai ira na tamata tebenigusu dukadukali, ni raica sara ga na mataqu na Tui, o Jiova ni lewe vuqa!” E qoroqoro dina o Aisea, e drukataka na cecere ni isoqosoqo vakalomalagi i Jiova. E uqeti koya dina na ka e raica. Sa rauta, na gauna e vakarogoi kina mai lomalagi me vakayacori na cakacaka bibi ni kena kacivaki na lewa i Jiova, e totolo ga ni kaya o Aisea: “O yau qo! Moni talai au!”—Aisea 6:1-5, 8.

¹³ Me vakataki Aisea ga, ena uqeti keda tale ga nida kila qai doka na isoqosoqo i Jiova. Ni toso tiko na isoqosoqo, eda saga tale ga meda toso vata. Eda na vakaraitaka kina nida nuitaka na isoqosoqo i Jiova nikua.

TOSO TIKO GA NA ISOQOSOQO I JIOVA

¹⁴ Ena wase 1 ni parofisai i Isikeli, e laurai kina ni vodo tiko o Jiova ena dua na qiqi vakalomalagi. Na qiqi lagilagi qo e dusia na isoqosoqo tawarairai i Jiova. Ni vodo tiko ena qiqi e vakaraitaka ni dusimaka tiko na nona isoqosoqo ena vanua ga e vinakata me vakayacori kina na nona inaki.—Same 103:20.

¹⁵ Na yavaniqiqi yadua e coba veilatai kei na dua tale na yavaniqiqi. Oya na vuna e tukuni kina ni yavaniqiqi qo e “toso ena dua vei ratou na va na yasana.” (Isik. 1:17) E rawa ni veisau kosi vakasauri na yavaniqiqi. E sega ni toso tu ga vakaveitalia se me sega ni lewai na kena toso. E sega ni vakalaiva o Jiova na nona isoqosoqo me lako tu ga vakaveitalia ena vanua e via lako kina. E kaya na Isikeli 1:20: “Eratou toso ena vanua e via lako kina na yalo tabu.” O koya gona, na yalo i Jiova sara ga e tosoya tiko na nona isoqosoqo ena vanua e vinakata me lako kina. Ia meda dui tarogi keda, ‘Au toso vata tiko kei na isoqosoqo i Jiova?’

¹⁶ Nida toso vata kei na isoqosoqo i Jiova e sega ni okati wale ga kina noda dau tiko ena soqoni se vakaitavi ena cakacaka vakaitalatala. Ena kilai ga nida toso vata kei na isoqosoqo i Jiova ena noda toso vakayalo. Meda “vakadeitaka . . . na veika era bibi sara,” meda kua tale ga ni calata na ituvatuva ni veivakani vakayalo. (Fpai. 1:10; 4:8, 9; Joni 17:3) Meda nanuma tale ga ni na cicivaki vinaka na isoqosoqo ke da cakacaka vata da qai veitokoni. E bibi meda vakayagataka vinaka sara na isolisoli vakayalo kei na isolisoli vakayago e vakarautaka mai o Jiova meda vakayacora kina na lomana. Nida toso vata tiko kei na qiqi vakalomalagi i Jiova, me salavata na noda ivakarau ni bula kei na itukutuku eda kacivaka.

¹⁷ Ena veivuke ni isoqosoqo i Jiova, e toso tiko kina na vakayacori ni loma ni Kalou. Kua ni guilecava ni o Jiova sara ga e vodo tiko ena qiqi vakalomalagi. O koya gona, nida toso vata tiko kei na qiqi vakalomalagi e vakaraitaka nida dokai Jiova, eda nuitaki koya tale ga ni noda Uluvatu. (Same 18:31) E yalataka na iVolatabu: “O Jiova ena solia na kaukaua vei ira na nona tamata. O Jiova ena vakalougatataki ira na nona tamata ena vakacegu.” (Same 29:11) Nida lewe ni isoqosoqo i Jiova ena gauna qo, eda vakila na nona kaukaua, eda marautaka tale ga na bula vakacegu. E macala ga nida na vakalougatataki ke da cakava na loma ni Kalou ena gauna qo me tawamudu.