Taro na Dauwiliwili
Era dau vakamatei na daubasulawa e Isireli makawa ena nodra vakaliligi?
E levu na matanitu ena gauna makawa era dau vakamatea eso na daubasulawa ena nodra vakoti ira ena kau se tolonikau. E dau vako se vesu ena kau na daubasulawa va qori ena nodra gauna na kai Roma, e rawa ni bula toka me vica na siga o koya qori me yacova ni sa sega ni vosota rawa na mosi, karamaca, walokai, kei na veisau ni draki. E ka vakamadua vei ira na kai Roma na nona vakoti e dua me kena itotogi, qori e ganiti ira ga na daubasulawa torosobu duadua.
Vakacava e Isireli makawa? Era dau vakamatei ira na daubasulawa ena nodra vakaliligi ena kau? E tukuni ena Lawa a soli vei Mosese: “Kevaka e dua na tamata sa kitaka nai valavala ca sa dodonu me mate kina, a sa lewai ko koya me mate, ka ko ni sa vakalilica e na kau: me kakua ni lili tu na yagona e na kau e na bogi, ia mo ni buluta e na siga dina ga ko ya.” (Vkru. 21:22, 23) Koya gona, ena gauna ni iVolatabu vakaIperiu, e dau vakamatei e liu e dua e totogimate, oti sa qai vakaliligi ena kau se vunikau.
E tukuna kina na Vunau ni Soro 20:2: “A tamata yadua vei ira na Isireli, se vei ira na kai tani sa tiko vulagi kei ira na Isireli, sa solia e dua na luvena vei Moloke; ena vakamatei vakaidina ko koya: me ra vakaviriki koya e na vatu ko ira na lewe ni vanua.” Mera vakamatei tale ga o ira na ‘daucurumi se dauveinita.’ Ena sala cava? Ena nodra ‘vakaviriki ena vatu.’—Vunau 20:27.
Eda wilika ena Vakarua 22:23, 24: “Kevaka sa dua na goneyalewa, sa musu vua e dua na tagane, a sa kunei koya e na koro e dua na tagane, ka rau ca kaya; dou na qai kauti rau ruarua yani ki na matamata ni koro ko ya, ia dou na vakaviriki rau e na vatu me rau mate; na goneyalewa, ni sa sega ni qoqolou, e na koro: kei koya na tagane, ni sa vaqasea na wati ni kai nona: kemuni na vakaotia kina na ca mai na kemuni maliwa.” O ira gona na Isireli era dau cakava na ivalavala torosobu duadua, era na vakamatei ga vakalevu ena nodra vakaviriki ena vatu.a
Ena gauna ni iVolatabu vakaIperiu, e dau vakamatei e liu e dua e totogimate, oti sa qai vakaliligi ena kau se vunika
E tukuni ena Vakarua 21:23 “ni sa cudruvi maivua na Kalou ko koya sa vakalilici e na kau.” Na kena vakaraitaki e matanalevu na yagona e dua na tamata ca sa mate e “cudruvi maivua na Kalou” ena rairai tarai ira sara ga na Isireli. Io, na kena vakaliligi tu va qori na yago ni mate ena kau se vunikau ena uqeti ira eso tale mera dau qaqarauni.
a Era duavata e levu na dauvakadidike ena ka e tukuni ena Lawa, oya ni dau vakamatei e liu e dua na basulawa ni bera ni vakaliligi na yagona ena kau. Ia e tiko na ivakadinadina ni so na daubasulawa ena imatai ni senitiuri era vakoti bulabula ra qai mate ena kanunirarawa, era cakava sara ga qori na Jiu.