SAUMI NA TARO VAKAIVOLATABU

Na cava e dredre kina na veiyaloni ena vuravura qo?

E tukuna na iVolatabu e rua na vuna. Kena imatai, eda sega ni buli na tamata meda lewa ga na noda ilakolako, dina nida sa bulia e levu na ka vakasakiti. Kena ikarua, e dreve na sasaga ni kawatamata ni “lewa tiko na . . . vuravura taucoko” o Setani na Tevoro. Koya gona, ena sega tu ga ni rawati na veiyaloni e vuravura ena sasaga ni tamata.​—Wilika Jeremaia 10:23; 1 Joni 5:19.

Ena dredre tale ga meda veiyaloni nida dau nanumi keda ga, da qai dau vaqara rogo. Ena rawati ga na veiyaloni ke dua na matanitu e vakavulici ira na tamata mera vinakata na ka dodonu ra qai veikauaitaki.​—Wilika Aisea 32:17; 48:​18, 22.

O cei ena tauyavutaka na veiyaloni e vuravura?

E yalataka na Kalou Kaukaua Duadua me tauyavutaka e dua na matanitu me liutaka na kawatamata. Ena sosomitaka na matanitu vakatamata. (Taniela 2:44) Ena veiliutaki kina na Luve ni Kalou o Jisu, me Tui ni Sautu. Ena vaqeavutaka na veika ca kece ena vuravura qo qai vakavulici ira na tamata mera veiyaloni.​—Wilika Aisea 9:​6, 7; 11:​4, 9.

Sa dusimaki ira tiko e vica vata na milioni nikua o Jisu mera vakayagataka na Vosa ni Kalou na iVolatabu mera vakavulici ira na tamata mera veiyaloni. Sa voleka nira veiyaloni na lewe i vuravura.​—Wilika Aisea 2:​3, 4; 54:13.