A Raica o Ilaisa na Qiqi Bukawaqa​—Vakacava o Iko?

Na Tui Siria a vaqarai Ilaisa na parofita ni Kalou me yaco sara i Tocani, na siti vakabai ena ulunivanua. A talai ira na dauvodo ose, qiqinivalu kei na nona mataivalu i Tocani. Ni kida na mataka, era sa volekata yani na siti.​—2 Tui 6:​13, 14.

Ni gole e tuba na dauveiqaravi i Ilaisa, a raici ira na mai via vesuka na parofita. E kaya: “Isa noqu turaga! a cava me daru cakava?” E sauma o Ilaisa: “Kakua ni rere: ni ra sa lewe vuqa era sa tiko kei kedaru, ka lewe lailai era tiko kei ira.” A qai masu na parofita: “Kemuni Jiova, mo ni vakayadrata mada na matana, me rai rawa ko koya.” E tukuna na kena itukutuku: “A sa vakayadrata na matana na cauravou ko Jiova; a sa rai ko koya: ka raica, sa oso na ulu-ni-vanua e na ose, kei na qiqi bukawaqa, era tiko vakavolivoliti Ilaisa.” (2 Tui 6:​15-17) Na cava eda rawa ni vulica ena italanoa qo kei na so tale na ka a sotava o Ilaisa?

E sega ni rere o Ilaisa nira wavoliti koya na mataivalu i Siria, baleta ni nuitaki Jiova, e raica tale ga ni vakayagataka tiko na Kalou nona kaukaua me veitaqomaki. Eda sega ni namaka nikua me vakayacori eso na cakamana, ia eda vakadeitaka ga ni taqomaki ira tiko vakailawalawa nona tamata o Jiova. E vaka ga era wavoliti keda tu na dauvodo ose kei na qiqinivalu bukawaqa. Ke tiko vei keda na vakabauta da qai nuitaka tiko ga na Kalou, eda na “tiko vinaka,” ena vakalougatataki keda tale ga o Jiova. (Same 4:8) Meda dikeva mada qo na ka eda vulica mai na so tale na ka e sotava o Ilaisa.

ILAISA​—NA DAUVEIQARAVI NEI ILAIJA

Dua na gauna a siviyara tiko o Ilaisa, a lako yani o Ilaija qai vakasulumi koya ena nona isulu ni parofita. E kila sara ga o Ilaisa na kena ibalebale. A mani vakarautaka e dua na magiti, vakamoce vei tamana kei tinana qai tomani Ilaija me nona dauveiqaravi. (1 Tui 19:​16, 19-21) Na nona yalorawarawa o Ilaisa me qarava na Kalou, a vakayagataki koya kina o Jiova ena levu na itavi, lai tini sara me sosomitaki Ilaija me parofita.

A rairai qaravi Ilaija tu o Ilaisa me ono na yabaki. Ena gauna kece qori, a ‘daulivia na wai ena liga i Ilaija’ o Ilaisa. (2 Tui 3:11) Ena gauna makawa, e kena ivakarau vei ira na tamata mera kana ga e ligadra, e sega na icula, isele, se so tale na iyaya ni kana. Nira kana oti, na dauveiqaravi ena livia na wai ina ligai nona turaga me vuluvulu kina. E dina ni lolovira eso na cakacaka e qarava o Ilaisa, ia e raica me itavi dokai me nona dauveiqaravi o Ilaija.

E levu tale ga vei ira na lotu vaKarisito nikua era veiqaravi vakatabakidua. Nira vakayacora qori, e uqeti ira nodra vakabauta ra qai vinakata mera vakayagataka vinaka na nodra igu mera qaravi Jiova kina. Eso e rairai gadrevi mera biubiu mai vale mera qarava na cakacaka​—e Peceli, taravale ni soqoni, kei na so tale​—era okata tu e levu me lolovira. Ia e sega ni dodonu vei ira na lotu vaKarisito mera raica me lolovira na cakacaka va qori, ni o Jiova e okata me itavi dokai.​—Iper. 6:10.

DEI O ILAISA ENA NONA ILESILESI

Ni bera ni ‘kau cake e lomalagi o Ilaija ena covulaca,’ a tukuna vua na Kalou me biubiu mai Kilikali me gole i Peceli. A tukuna o Ilaija me kua ni tomani koya na nona itokani, ia a sauma o Ilaisa: “Ka’u na sega ni laivi iko.” Ni rau tomana tiko nodrau ilakolako, a dreve na sasaga i Ilaija ena nona cikevi Ilaisa vakarua me kua ni tomani koya. (2 Tui 2:​1-6) Me vaka ga nona dei o Ruci me muri Neomai, a dei tale ga o Ilaisa me muri Ilaija. (Ruci 1:​8, 16, 17) Na vuna? Ni vakamareqeta o Ilaisa na itavi dokai a lesi koya kina na Kalou, me dauveiqaravi i Ilaija.

E ivakaraitaki vinaka dina vei keda o Ilaisa. Ke da lesi ena so na itavi ena isoqosoqo i Jiova, eda na raica qori me itavi dokai ke da vakasamataka tiko nida cakava tiko vei Jiova. E itavi dokai dina qori.​—Same 65:4; 84:10.

“KEREA MADA NA KA ME’U CAKAVA VEI IKO”

Ni rau tomana tiko nodrau ilakolako, a tukuna o Ilaija vei Ilaisa: “Kerea mada na ka me’u cakava vei iko, ni’u sa bera ni kau tani mai vei iko.” Me vakataki Solomoni nona kerea na veika vakayalo ena vica na yabaki yani e liu, a kerea tale ga qori o Ilaisa. E kerea me ‘vakaruataki vua na yalo e tu vei Ilaija.’ (1 Tui 3:​5, 9; 2 Tui 2:9) E dau kena ivakarau e Isireli me soli e rua na ivotavota ni sucu vua na tagane ulumatua. (Vkru. 21:​15-17) E vaka tale ga kina o Ilaisa nona kerei Ilaija me nona ulumatua vakayalo. A kerea gona o Ilaisa me sobuti koya na yaloqaqa vata ga a tiko vei Ilaija, me “yalokatakata vakalevu e na vuku i Jiova.”​—1 Tui 19:​13, 14.

Na cava a qai cakava o Ilaija ena ka e kerea na nona dauveiqaravi? E tukuna na parofita: “Sa ka dredre na ka ko sa kerea: ia kevaka ko na raici au ni’u sa kau tani tiko mai vei iko, ena yaco vakakina vei iko; ia kevaka e segai, ena sega ni vakakina.” (2 Tui 2:10) E votu ena isaunitaro i Ilaija e rua na ka. Kena imatai, na Kalou ga e rawa ni sauma na ka e kerea o Ilaisa. Kena ikarua, me vakayacori na ka e kerea o Ilaisa, e gadrevi vua me kabiti Ilaija tiko ga veitalia se mani cava e yaco.

KA E RAICA O ILAISA

Na cava na rai i Jiova ni kerea o Ilaisa me vakaruataki vua na yalo e tu vei Ilaija? E tukuna na iVolatabu: “Ni rau sa lako tiko, ka veivosaki, raica, sa dua na qiqi bukawaqa ka so na ose bukawaqa, sa tawasei rau; a sa lako cake ki lomalagi ko Ilaija e na covulaca. A sa raica tiko ko Ilaisa.”a E sauma sara ga e keri o Jiova na kerekere i Ilaisa. E raica sara ga o Ilaisa ni kau cake o Ilaija, e vakaruataki vua na yalo a tu vei Ilaija qai yaco me nona ulumatua vakayalo na parofita.​—2 Tui 2:​11-14.

A tomika qai daramaka o Ilaisa na isulu ni parofita a lutu mai vei Ilaija. Na isulu qori e vakaraitaka ni sa dua na parofita ni Kalou o Ilaisa. E dua tale na ivakadinadina ni nona lesi me parofita, oya nona wasea vakacakamana na Uciwai na Joritani.

E uqeti Ilaisa sara ga na veika e raica ena gauna e kau cake kina o Ilaija ena covulaca. Ni sega ni dua e dau raica na ose kei na qiqinivalu bukawaqa e veisiga! Na veika kece qori e vakadeitaka ni vakadonuya o Jiova na kerekere i Ilaisa. Ni sauma na Kalou na noda masu, eda na sega ni raivotutaka na ose kei na qiqinivalu bukawaqa. Ia eda rawa ni vakadeitaka ni na vakayagataka na Kalou na nona kaukaua me yaco kina na lomana. Nida raica ni vakalougatataka tiko o Jiova na nona isoqosoqo e vuravura, e vaka ga eda sa ‘raica’ tiko na nona qiqi vakayalo ni toso tiko.​—Isik. 10:​9-13.

Na levu ni ka e sotava o Ilaisa e vakadeitaka vua na kaukaua e tu vei Jiova. Na yalo tabu mada ga ni Kalou e vakavuna me cakava na parofita e 16 na cakamana​—e vakaruataki na ka e cakava o Ilaija.b Na ikarua ni gauna e raica kina o Ilaisa na ose kei na qiqinivalu bukawaqa qori nona tiko mai Tocani me vaka e vakamacalataki ena itekitekivu ni ulutaga qo.

NUITAKI JIOVA O ILAISA

E sega ni rere o Ilaisa ena gauna era wavokiti koya kina na meca e Tocani. Na vuna? Ni dei nona vakabauti Jiova. E gadrevi tale ga me va qori noda vakabauta. Koya gona, meda masuta na yalo tabu ni Kalou me rawa nida vakabauta, meda vakaitovotaka tale ga eso tale na itovo e umani ena vua ni yalo tabu.​—Luke 11:13; Kala. 5:​22, 23.

Na veika e yaco e Tocani e vukei Ilaisa me raica ni tiko na vuna vinaka me nuitaki Jiova kina kei na nona mataivalu vakayalo. E kila na parofita ni talai ira na agilosi na Kalou mera wavolita na siti kei ira na meca. A vakamatabokotaki ira na meca na Kalou, erau vakabulai kina vakacakamana o Ilaisa kei na nona dauveiqaravi. (2 Tui 6:​17-23) Ena gauna vakadomobula qori kei na so tale na ituvaki e sotava o Ilaisa, a vakabauta tiko ga qai nuitaki Jiova vakatabakidua.

Me vakataki Ilaisa ga, meda nuitaka tale ga na Kalou o Jiova. (Vkai. 3:​5, 6) Ke da vakayacora qori, ‘Ena lomani keda na Kalou qai vakalougatataki keda.’ (Same 67:1) E dina nira sega ni wavoliti keda na ose kei na qiqi bukawaqa, ia ena gauna ni “veivakararawataki levu” o Jiova ena taqomaki keda vakamataveitacini e vuravura raraba. (Maciu 24:21; Vkta. 7:​9, 14) Me yacova na gauna oya, meda nanuma tiko ni “nodai drodro na Kalou.”​—Same 62:8.