TARO NA DAUWILIWILI

E dodonu vei ira na itubutubu lotu vaKarisito mera dabe vata kei luvedra e vakasivoi ena gauna ni soqoni?

E sega ni gadrevi meda kauaitaka vakasivia na vanua me dabe kina o koya e vakasivoi ena Vale ni Soqoni. Na mekesini qo e vakauqeti ira na itubutubu lotu vaKarisito mera vukei luvedra vakayalo e vakasivoi era se tiko vata ke ra raica ni veiganiti. E vakamacalataki ena ilavelave ni Vale ni Vakatawa 1 Okotova, 2001, ena tabana 16 ina 18 ni rawa mada ga vei ira na itubutubu mera vulica na iVolatabu kei luvedra e vakasivoi era se tiko vata. E nuitaki ni na uqeti gone na veika e vulica me veisautaka nona ivalavala.

E ka vakayalomatua gona me dabe galugalu o gone e vakasivoi kei nona itubutubu ena Vale ni Soqoni. E sega ni gadrevi me dabe ena yatu dabedabe e muri ena Vale ni Soqoni o koya e vakasivoi, sega tale ga ni cala ke dabe o gone e vakasivoi kei na nona itubutubu, se mani vanua cava eratou dabe kina. Nira kauaitaka na itubutubu na bula vakayalo i luvedra, era na raica sara ga mera vakarorogo o luvedra ena gauna ni soqoni. Ena yaga gona ke dabe o gone kei nona itubutubu mai na nona lai dabe taudua tu ena dua tale na vanua.

Ia vakacava ke sa sega ni tiko kei nona itubutubu o gone e vakasivoi? Kena ibalebale beka ni sega ni rawa ni ratou dabe vata ena gauna ni soqoni? Ena veigauna sa sivi, e vakamacalataka sara ga vakamatata na mekesini qo na rai e dodonu me tiko vei ira na lotu vaKarisito me baleta na nodra veimaliwai kei ira na lewenivale o koya e vakasivoi.a Ia na nona dabe galugalu kei nona vuvale e dua e vakasivoi ena gauna ni soqoni, e duidui sara mai na nodratou saga me ratou veimaliwai kei koya. Ke donu tiko nodratou rai na lewenivuvale yalodina me baleti koya na weka e vakasivoi, ratou qai saga me ratou talairawarawa ina ivakavuvuli vakaivolatabu me baleta na veimaliwai kei koya, e sega ni gadrevi meda leqataka kina e dua na ka.​—1 Kor. 5:​11, 13; 2 Joni 11.

Ke mani dabe galugalu kei na nona lewenivuvale se dua ena ivavakoso o koya e vakasivoi, e sega ni dodonu mera leqataka qori na mataveitacini. E rawa ni vakavuna tale ga e levu na leqa na nodra sega ni vakatarai mera dabe vata ni vakatau ena ituvaki. Ke ra doka na ivakavuvuli vakaivolatabu me baleta na vakasivoi o ira na tiko ena soqoni, okati kina na lewenivuvale, ra qai sega ni vakatarabetaki ira na mataveitacini, e sega ni gadrevi me kauaitaki sara vakasivia na vanua era na dabe kina o ira na tikova na soqoni vaKarisito.b