Ke Vakasivoi na Wekamu, Mo Yalodina Tiko Ga

1. Na ituvaki vakacava ena tovolei kina na nona yalodina e dua na lotu Vakarisito?

¹ Dau kaukaua sara na isema vakadra. E vakatovolei gona noda yalodina ke o koya e sivo se vakanadakuya na ivavakoso vakarisito e watida, luveda, noda itubutubu, se dua tale na wekada voleka. (Maciu 10:37) Me raici koya vakacava na wekana oqori na lotu Vakarisito yalodina? Me na duidui beka na noda raici koya baleta ni vakaitikotiko ga e noda vale? De vinaka meda dikeva na ka e tukuna na iVolatabu. Na ivakavuvuli e kau cake mai kina e vauci rau ruarua o koya e sivo kei koya e vakanadakuya vakataki koya na ka dina.

2. Me vaka e kaya na iVolatabu, mera raici ira vakacava na vakasivoi mai na ivavakoso na lotu Vakarisito?

² Mera Raici Vakacava na Sivo?: Era vakaroti na lotu Vakarisito ena Vosa ni Kalou mera kua ni veimaliwai se vakailala kei na dua e sivo mai na ivavakoso: “Mo ni kakua ni i lala vata kaya e dua sa kaya tiko ni sa noda i tokani lotu va-Karisito ka qai dau veidauci tiko, se daukocokoco, se dau qarava na matakau, se dauveivakasewasewani, se daumateni, se daubutako; me kakua sara mada ga na kana vata kei na tamata vaka ko ya. . . . Ni biuta tani mai na kemuni maliwa na tamata i tovo ca.” (1 Kor. 5:11, 13, VV) Na vosa tale ga i Jisu ena Maciu 18:17 e vauca na tikina oqo: “Me qai vaka na tawa-lotu kei koya sa kumuna nai vakacavacava vei iko ko koya [e sivo].” Era kila vinaka o ira na rogoci Jisu ena siga oya nira sega ni dau veimaliwai kei ira na kai Matanitu Tani o ira na Jiu, era beci ira na daukumuni vakacavacava ra qai sega tale ga ni via torovi ira. A vakavulici ira tiko gona nona imuri o Jisu mera kua ni veimaliwai kei ira na sivo.​—Raica na Watchtower, 15 Sepiteba, 1981, tabana 18-20.

3, 4. Na veimaliwai vakacava e tabu kei na dua e sivo se dua e sa vakanadakuya na dina?

³ Kena ibalebale oqo ni o ira na lotu Vakarisito yalodina era na sega ni veivosakitaka vata na veika vakayalo kei na dua e sivo mai na ivavakoso. Ia e sega ni yala wale ga e kea. E kaya na Vosa ni Kalou meda ‘kua sara mada ga ni kana vata kaya.’ (1 Kor. 5:11, VV) Kena ibalebale, eda na sega tale ga ni vakailala kei koya e sivo. Na vakailala oqo e vauci kina na noda sureti koya meda lai vakatakakana vata, sureti koya ina dua noda pati, qito, se meda lai saraiyaloyalo vata, se dabe kei koya meda kana vata e vale se na dua na valenikana.

⁴ E rawa beka nida vosa vei koya e sivo? Na iVolatabu e sega ni sereka na ituvaki kece ena tikina oqo, ia eda wilika na rai i Jiova ena 2 Joni 10 (VV): “Kevaka e lako yani vei kemuni e dua na tamata ka sega ni vakatavuvulitaka na i vakavuvuli oqo, ni kakua ni vakacurumi koya ki vale se vosa vakalougatataki koya [se, “vakabula vei koya,” NW].” E vakamacala ena tikina oqo na Watchtower, 15 Sepiteba, 1981, tabana  25 qai kaya: “Na vakabula wale ga sa rawa ni imatai ni kalawa me tekivu kina na veivosaki kei na dua tale, se na veitokani sara kei koya. Vakaevei, eda na via taura beka na imatai ni ikalawa oqori kei na dua e sivo tu?”

5. Na cava e so na ka e sa na kalouca kina o koya e sivo?

⁵ E dina kina na ka e kaya na tabana 31 ni Watchtower vata tiko ga oya: “Macala tu ga ni levu na ka e sa na kalouca kina na lotu Vakarisito e soli koya vakarawarawa ina ca, mani sivo kina: dua oqo na nona sa sega ni vakadonui tale ena mata ni Kalou; sa sega ni lewe tale ni ivavakoso vakarisito mamarau; sa oti na veimaliwa kamikamica kei ira na tacina vakayalo, wili kina e levu na veilasamaki vinaka a dau marautaka kei ira na wekana voleka era lotu Vakarisito.”

6. E tukuni beka me sa kua sara ga na veimaliwai kei na wekada e sivo eda tiko vata ga ena dua na vale? Vakamacala kina.

⁶ Ena Noda Vuvale Sara Ga: Kena ibalebale oqo, ena nodra bula ni veisiga na vuvale lotu Vakarisito, mera sa kua beka ni vosa, kana vata, se veimaliwai kei koya oqori? E kaya na Watchtower, 15 Epereli, 1991, ena ivakamacala e ra ena tabana  22: “Ke se tiko ga e vale kei iratou na vo ni nona vuvale lotu Vakarisito o koya e sivo, e se rawa ni vakaitavi tiko ga o koya ena ka e dau caka e vale.” O koya gona, ena vakatau vei iratou na lewenivale se me yaco e vei na nodratou via okati koya e sivo ena veika eratou dau cakava e veisiga me vaka beka ni ratou dabe me ratou kana, kei na so tale na ka. Ia ena qarauna ga na vuvale oqori me kua ni boroi na iyaloyalo vei ira na mataveitacini era na rai tu ni sega ni veisau na veimaliwai kei koya e sivo.

7. E veisau vakacava na veimaliwai vakayalo e vale ni sa sivo e dua na lewenivuvale?

⁷ Ia na Watchtower, 15 Sepiteba, 1981, tabana 28, e kaya oqo me baleti koya e sivo se vakanadakuya na dina: “Sa na tagutuvi na isema ni veiwekani vakayalo kei koya. Oqori na ka mera na cakava tale ga na wekana voleka, wili kina o ira sara mada ga na lewe ni nona vuvale. . . . Kena ibalebale ni sa na veisau na nodratou veimaliwai vakayalo na vuvale. Me kena ivakaraitaki, ke sivo o ulunivale, eratou na sega ni logalogavinaka na watina kei na luvena me taura o koya na vuli iVolatabu vakavuvale se me liutaka na wili iVolatabu kei na masu. Ke na via masu o koya, me vaka beka ena gauna ni kana, oqori e nona dodonu ni ulunivale. Ia me ratou dui masu lo ga vua na Kalou na veitinani. (Vkai. 28:9; Same 119:145, 146) Vakaevei ke vinakata o koya e sivo me dabe tale ga ni caka na wili iVolatabu se na vuli iVolatabu vakavuvale? Ena vakatau vei iratou na kena vo ke ratou vinakata me tomani iratou, ia me kua ga ni via vakavulici iratou se me vakamacalataka na nona rai vakalotu.”

8. Na cava sa nodrau itavi na itubutubu lotu Vakarisito vua na luvedrau gone e sivo e se tiko voli ga e vale?

⁸ Ke sivo e dua na gone e se tiko voli ga e vale, e se nodrau itavi tiko ga na nona itubutubu lotu Vakarisito na nona tuberi. E kaya na Watchtower, 15 Noveba, 1988, tabana 20: “Ni se nodrau itavi tiko ga me rau vakarautaka vua na kakana, isulu, kei na vale me tiko kina, ena vaka tale ga kina ena vuku ni nona tuberi kei na nona vakadodonutaki me lako vata kei na Vosa ni Kalou. (Vosa Vakaibalebale 6:20-22; 29:17) O ira gona na itubutubu dau loloma era na saga mera vuli iVolatabu kei koya, dina ga ni sa vakasivoi. De dua ena yaga vakalevu vua na nodrau vakarautaka na gauna me rau vuli tani ga kina kei koya. Se rau na lewa me tomani iratou tiko ga na vo ni vuvale ena nodratou dau vuli vata.”​—Raica tale ga Na Vale ni Vakatawa, 1 Okotova, 2001, tabana 16-17.

9. Me vakaevei na levu ni nona veitaratara na lotu Vakarisito kei na wekana e sivo e sega ni vakaitikotiko e vale?

⁹ O Ira na Wekada Era Sega ni Tiko e Noda Vale: “Ena duidui toka ke o koya e sivo se vakanadakuya na dina e wekada e sega ni tiko kei keda e noda vale,” e kaya na Watchtower, 15 Epereli, 1988, tabana 28. “De dua ena rawa vei keda meda muduka sara ga na veitaratara kei na wekada oqori. Ia ke gadrevi me ia na veitaratara kei koya ena vuku beka ni dua na veivosaki vakavuvale, ena vakaiyalayalataki oqori,” me salavata ga kei na ivakaro ni Kalou e kaya meda “kakua ni i lala vata” kei na dua e nakita na nona valavala ca. (1 Kor. 5:11, VV) Mera saga na lotu Vakarisito yalodina mera vakalailaitaka na nodra veimaliwai kei na wekadra oqori, me yalani sara mada ga na veitaratara ena ka vakabisinisi.​—Raica tale ga na Watchtower, 15 Sepiteba, 1981, tabana 29-30.

10, 11. Na cava me na vakasamataka na lotu Vakarisito ni se bera ni vakadonuya me suka yani i vale na wekana e sivo?

¹⁰ Dua tale na ituvaki e rawa ni votu e vosa kina na Watchtower: “Vakacava ke a sa sega ni tu e vale e dua, oti e qai sivo, ia oqo e sa via toki lesu yani? E rawa ni ratou vakatulewa kina na nona vuvale ni ratou dikeva na kena ituvaki. Kaya mada, de o koya e sivo e itubutubu, ia e sa tauvimate qai dredre vua me qaravi koya ga vakayago se me qaravi koya ga vakailavo. Sa kilikili ga vei iratou na gone lotu Vakarisito me ratou vukei koya, qai nodratou itavi tale ga vakalou oqori. (1 Tim. 5:8) . . . Ia na veivuke eratou na via vakayacora ena vakatau ena kena ituvaki o nodratou itubutubu, na nona rai, kei na nona kauai o ulunivale me baleta na nodratou bula vakayalo na nona vuvale.”​—Na Watchtower, 15 Sepiteba, 1981, tabana 28-9.

¹¹ Ia, ke o koya e sivo e gone, e kaya kina na Watchtower vata tiko ga oya: “So na gauna era vakatara na itubutubu lotu Vakarisito me suka yani i vale na luvedra e sivo e tauvimate bibi se lomabibi vakalevu. Ia ena ituvaki vaka oqori, mera na qai dui lewa vakayalomatua ga na itubutubu na ka mera cakava kina. Sa dredre beka vei gone e sivo me qaravi koya vakataki koya ena vale a sa lai tu duadua voli kina? Se vu ni nona via suka yani i vale baleta ga ni na rawarawa cake kina vua na bula? Vakacava na nona itovo kei na nona ivalavala? Ena kauta beka mai vale na ‘leveni’?​—Kala. 5:9.”

12. E yaga vakacava na veivakasivoi?

¹² Eda Kalougata Nida Yalodina Vei Jiova: E yaga meda tokona na ituvatuva vakaivolatabu me baleta na nodra sivo o ira na dau cakaca era sega ni veivutuni, kei na noda kua ni vakailala kei ira. Oqori e taqomaka na savasava ni ivavakoso, eda na kilai tani tale ga kina nida tutaka tiko na ivakatagedegede uasivi ni iVolatabu me baleta na itovo kilikili. (1 Pita 1:14-16) Eda na taqomaki mai na leqa. (Kala. 5:7-9) E yaga tale ga vei koya e cala na nona sivo ni na vuli mai na nona vakadodonutaki oya, ena “tauca kina na vakacegu kei na yalododonu.”​—Iper. 12:11.

13. Na cava erau cakava e dua na veiganeni, ia na cava e qai yaco kina?

¹³ Ni rau sa lesu mai na dua na soqo ni tabacakacaka e dua na veiganeni, rau liaca sara ni na gadrevi me rau veisautaka na ivalavala ni nodrau dau veitaratara kei tinadrau, sa yabaki ono na nona sivo, e vakaitikotiko ena dua tani tale na vanua. Ni cava ga na soqo oya, qiri tinadrau sara o koya na tagane. A kaya vei tinana ni dei tu ga na nodrau lomani koya vakaveiganeni, oti e sa qai vakamacalataka ni rau na sega tale ni veitaratara kei koya vakavo sara ke gadrevi me veivosakitaki e so na ka bibi vakavuvale. Sega ni dede, sa tekivu sosoqoni o tinadrau, mani vakalesui mai ina ivavakoso. Mai vuli iVolatabu tale ga na watina e sega ni vakabauta, e papitaiso sara.

14. Na cava meda tutaka kina ena yalodina na ituvatuva me baleta na veivakasivoi?

¹⁴ Nida tutaka ena yalodina na ituvatuva me baleta na veivakasivoi me vaka e virikotori ena iVolatabu, ena vakaraitaka oqori nida lomani Jiova, ena vagalui tale ga kina o koya e beitaka tiko na Kalou. (Vkai. 27:11) Ena vakalougatataki keda o Jiova. A vola o Tui Tevita me baleti Jiova: “Ia na nona vunau, ka’u a sega ni lesu tani maikina. Vei koya sa yalododonu, ko ni na cakacaka vakayalododonu.”​—2 Sam. 22:23, 26.