Sa Voleka ni Oti na Rarawa!

Raitayaloyalotaka mada ni o bula tu ena dua na vuravura e sega kina na rarawa, basulawa, ivalu, tauvimate, kei na leqa tubukoso. Ni o yadra e veimataka, o sega ni leqataka na ilavo, veivakaduiduitaki kei na veivakalolomataki. Vakacava ena yaco dina qori? E macala tu ga ni na sega ni vakayacora rawa qori na matanitu vakatamata. Ia e yalataka na Kalou ni na vakaotia na ka kece e vakavuna tiko na rarawa, okati kina na kena e vakamacalataki ena ulutaga sa oti. Dikeva mada na ka e yalataka tu na iVolatabu:

◼ VEILIUTAKI NA MATANITU NI KALOU

“Ena qai vakatura na Kalou ni lomalagi e dua na matanitu, ena sega sara ni vakarusai rawa: ia na matanitu ko ya ena sega ni biu tu me nodra na tamata tani, ia ena vurumemeataka ga ka vakaotia na veimatanitu oqori, ka na tu ga ka sega ni mudu.”​—Taniela 2:44.

E tiko mai lomalagi na Matanitu ni Kalou. Sa digitaki o Jisu Karisito me kena iliuliu, ena sosomitaki ira kece na iliuliu vakatamata, ena vakayacora tale ga na loma ni Kalou e vuravura me vaka sa caka tiko mai lomalagi. (Maciu 6:​9, 10) E sega tale ni dua na matanitu vakatamata me na sosomitaka na Matanitu qori baleta e “matanitu tawamudu ni noda Turaga kei na iVakabula o Jisu Karisito.” Sa na qai yaco dina na bula veiyaloni me tawamudu.​—2 Pita 1:11.

◼ VAKARUSAI O LOTU LASU

“O Setani mada ga e dau vukici koya tiko ga me agilosi ni rarama. E sega gona ni kurabuitaki nira vukici ira tale tiko ga na nona italatala mera italatala ni yalododonu. Ia na ka ena qai yacovi ira e muri ena salavata kei na nodra ivalavala.”​—2 Korinica 11:​14, 15.

Ena qai vakavotui ena dua ga na gauna qo ni o Setani e vakamua tiko na lotu lasu, ena vakarusai tale ga. Sa na sega tale na veivakaduiduitaki kei na vakadavedra e vakavuna tiko o lotu. Qori e rawa kina vei ira na lomana na “Kalou dina” mera sokaloutaki koya ‘vakayalo me yavutaki tale ga ena dina.’ Sa na qai rawa na duavata kei na veiyaloni!​—1 Cesalonaika 1:9; Efeso 4:5; Joni 4:23.

◼ SA NA SEGA NA IVALAVALA CA

“Na Kalou sara ga ena tiko vata kei ira. Ena qusia tale ga na wainimata kece mai na matadra, sa na sega tale na mate, na lolosi, na tagiyaso, kei na mosi. Sa sega na veika e dau yaco e liu.”​—Vakatakila 21:​3, 4.

Na nona solia na Kalou o Jiova na Luvena o Jisu me mai mate ena vukuda, e rawa kina nida na vakila na veivakalougatataki qori. (Joni 3:16) Ni sa veiliutaki o Jisu, ena vakalesui tale na kawatamata ina bula uasivi. Sa na sega tale na rarawa baleta na “Kalou sara ga ena tiko vata kei ira,” ena qusia tale ga na “wainimata kece mai na matadra.” Ena kawaboko vakadua na ivalavala ca kei na rarawa ra qai “taukena na vanua ko ira na yalododonu, ka tiko kina ka sega ni mudu.”​—Same 37:29.

◼ VAKARUSAI NA AGILOSI CA

“E taura [o Jisu Karisito] na gata, na gata makawa, na Tevoro, e yacana tale ga o Setani, qai vesuki koya me duanaudolu na yabaki. E kolotaki koya sara ina qara e sega ni vakabotona, e sogota na qara, qai dregata me kua tale ni vakacalai ira na veimatanitu me cava mada e duanaudolu na yabaki.”​—Vakatakila 20:​2, 3.

Sa na oti na veika ca kece ena gauna sa na vesu kina o Setani kei ira na timoni ra qai biu ina “qara e sega ni vakabotona.” Kena ibalebale nira sa na sega ni cakava rawa e dua na ka se mera vakamuai ira na tamata. Sa na wacava na vakacegu eda na vakila nida bula ena dua na vuravura e sega kina o Setani kei ira na agilosi ca!

◼ SA NA OTI NA “IOTIOTI NI VEISIGA”

Ena qai cava na “iotioti ni veisiga” ena gauna e vakatoka o Jisu me “veivakararawataki levu.” E tukuna: “Ni na qai yaco na veivakararawataki levu ena ivakatagedegede e sega ni bau vakilai me tekivu mai na buli ni vuravura me yacova mai qo, ena sega tale ni qai yaco e muri.” ​—Maciu 24:21.

Na veivakararawataki levu sa na vakarau yaco qo ena tarai vuravura taucoko. Sa na qai tinia qori na “ivalu ni siga levu ni Kalou Kaukaua Duadua,” e vakatokai na “Amaketoni.”​—Vakatakila 16:​14, 16.

O ira era dau caka dodonu era na vakanamata ena icavacava ni veika vakavuravura qo. Dikeva mada e vica na veivakalougatataki era namaka tu, ni sa na veiliutaki na Matanitu ni Kalou.

VEIVAKALOUGATATAKI I JIOVA!

Ena bula ena vuravura vou e “dua na isoqosoqo levu”: E tukuna na iVolatabu ni dua na “isoqosoqo levu” e sega ni kilai na kedra iwiliwili, era na “bula sivia na veivakararawataki levu” ra qai bula ena vuravura vou ni yalododonu. (Vakatakila 7:​9, 10, 14; 2 Pita 3:13) Era na vakavinavinakataki Jisu Karisito ena nodra vakabulai, ni o koya ga na “Lami ni Kalou ena kauta tani na nodra ivalavala ca na kai vuravura.”​—Joni 1:29.

Yaga vakalevu na veivakavulici ni Kalou: Ena vuravura vou, sa na “roboti ko vuravura e na veikilai kei Jiova.” (Aisea 11:9) Ena vakavulici keda na Kalou ena sala meda veiyaloni kina kei ira na tamata kece, kei na sala meda qarauna vinaka kina na iyau bula era tu e vuravura. E yalataka na Kalou: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova.”​—Aisea 48:17.

Era na vakaturi na wekada lomani: Ni se bula voli e vuravura o Jisu, a vakaturi Lasarusa na nona itokani. (Joni 11:​1, 5, 38-44) Qori e ivakaraitaki lailai wale ga ni ka ena cakava ni sa veiliutaki na Matanitu ni Kalou.​—Joni 5:​28, 29.

Vakilai na yalododonu kei na vakacegu me tawamudu: Ni sa na veiliutaki o Karisito, sa na sega tale na basulawa. Eda kila vakacava qori? Baleta ni kila vinaka o Jisu na ka e tu e lomada, qai vakayagataka qori me lewai ira kina na yalododonu kei na tamata ca. Era na sega ni vakadonui mera bula ena vuravura vou ni Kalou o ira era sega ni veisautaka na nodra ivakarau ca.​—Same 37:​9, 10; Aisea 11:​3, 4; 65:20; Maciu 9:4.

Qori e vica wale ga na ka e parofisaitaka na iVolatabu ni na yaco ena gauna totoka se bera mai. Ni sa na liutaki vuravura taucoko na Matanitu ni Kalou, ena vakilai me tawamudu na ‘vakacegu dina.’ (Same 37:​11, 29) Sa na oti vakadua na ka kece e vakavuna tiko na rarawa ni kawatamata. Eda vakabauta qori baleta e yalataka na Kalou: “Raica! Au sa vakavoutaka na ka kece . . . e donu na vosa qo, e dina tale ga.”​—Vakatakila 21:5.