Sa Vakarau Oti na Rarawa Kece!

De dua o dau vaqaqa voli na vuna e sa rui levu kina na rarawa. Ia sa rauta, baleta ni vica vata na udolu na yabaki na kune rarawa voli ni kawatamata ena vuku ni ivalu, bula dravudravua, leqa tubukoso, basulawa, lewa ca, tauvimate, kei na mate. Na duanadrau na yabaki sa oti e vakilai sara kina na rarawa a sega ni bau vakilai e liu. Ena oti beka na veika rarawa kece oqo?

Eda lomavakacegu meda kila ni sa voleka na gauna me oti kina! E kaya na Vosa ni Kalou, na iVolatabu: “Ena qai takali na tamata ca . . . Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.” Me vakacava na kena dede? “Era na taukena na vanua ko ira na yalododonu, ka tiko kina ka sega ni mudu.”​—Same 37:10, 11, 29.

Ni sa kauta laivi na Kalou na veika ca kei na rarawa, sa na qai veisautaki na vuravura me parataisi. Sa na qai rawa ni bula tawamudu na tamata, ena sega tale na tauvimate kei na rarawa. E tukuna makawa tu mai na Vosa ni Kalou: “Ia na Kalou ena tavoya tani kecega na wai-ni-mata mai na matadra; ia ena sega tale na ciba, se na rarawa, se na tagi, ka na sega tale na vutugu.”​—Vakatakila 21:4.

Ena ituvaki vou oya, o ira sara mada ga na mate era na vakaturi mera vakaivotavota ena kena veivakalougatataki. E yalataka na iVolatabu nira “na tu cake tale ko ira na mate, ko ira na yalododonu kei ira na sega ni yalododonu.” (Cakacaka 24:15) Oya na vuna e rawa ni kaya kina o Jisu Karisito vua na tamata ca e veivutuni qai vakaraitaka nona vakabauti koya: “Edaru na tiko vata mai Parataisi.”​—Luke 23:43.

iTekitekivu ni Rarawa

A inaki totoka ni Kalou meda bula vinaka na tamata ena veigauna mai muri, ia na cava ga e vakalaiva kina me tekivu na rarawa? Na cava e vakalaiva tu kina vakadede?

Ena gauna rau a buli kina o Atama kei Ivi, a vinaka vakaoti na yagodrau kei na nodrau vakasama. A biuti rau na Kalou ena parataisi totoka qai lesia na cakacaka marautaki me rau cakava. E kaya na iVolatabu: “Sa vakaraica na Kalou na ka kecega sa bulia ko koya, ka raica, sa ka vinaka sara.” (Vakatekivu 1:31) Ke rau a talairawarawa vua na Kalou, ke ra vinaka vakaoti na luvedrau, ke a parataisi na vuravura taucoko, ra qai bula tawamudu kina na tamata ena vakacegu kei na marau.

E solia o Jiova e dua na isolisoli talei vei Atama kei Ivi me tiki ni nodrau bula​—oya na galala ni vakatulewa. Erau sega ni vaka na misini me lewai tu ga mai na ka me rau cakava, ia erau buli me rau vakatulewa vakataki rau. O koya gona, na nodrau bula marau tiko ga ena vakatau ena nodrau vakayagataka vakadodonu na nodrau galala, oya me rau talairawarawa ina lawa ni Kalou. E tukuna na Kalou: “Koi au ko Jiova na nomu Kalou, ka’u sa vakavulici iko mo vinaka kina, ka’u sa tuberi iko e na sala mo lakova.” (Aisea 48:17) Ena yaco na leqa levu ke vakayagataki cala na galala oya, baleta ni sega ni buli na tamata me liutaki koya ga. E kaya na iVolatabu: “Ni sa sega ni vu mai vua na tamata na nona sala: sa sega ni vu mai vua na tamata sa lako tu me lewa na nonai lakolako.”​—Jeremaia 10:23.

Ka ni rarawa ni rau nanuma na noda itubutubu taumada ni rawa ni rau lewai rau ga me qai sega ni yacovi rau na leqa. Ia, na gauna erau vakanadakuya kina na veiliutaki ni Kalou, erau sa sega ni qai bula uasivi tiko ga. Sa tekivu torosobu na nodrau bula me yacova ni rau sa qase, rau mate yani. Nida vu mai vei rau, e sa dewavi keda tale ga kina na ivalavala ca kei na mate.​—Roma 5:12.

Vakalewai ni Veiliutaki ni Kalou

Na cava a sega ni vakarusai Atama kei Ivi kina na Kalou qai bulia tale e dua na veiwatini vou? Baleta ni a vakalewai na nona veiliutaki cecere. E basika kina e vica na taro oqo: O cei e dodonu me veiliutaki? Na veiliutaki nei cei e vinaka? Kena ikuri, Ena vinaka cake beka na bula ni kawatamata ke sega kina na veiliutaki ni Kalou? Ena nona solia na Kalou na gauna me lewai koya kina vakataki koya na tamata, sa na qai macala kina vakadua se vinaka na nona veiliutaki se na veiliutaki ni Kalou. E dodonu me balavu vinaka na gauna e vakatarai me vakatovolea kina na tamata na veimataqali veiliutaki e nanuma ni vinaka vua, na veiliutaki ena tabana vakapolitiki, tabana e qarava na bula raraba, bula vakailavo, kei na tabana vakalotu.

Na cava e sa vakadinadinataki? Ena vica na udolu na yabaki eda bula tu kina na tamata e vakadinadinataki ni sa qai levu ga na rarawa. Sa qai torosobu ga ena loma ni duanadrau na yabaki sa sivi. Era labati vakayauyau e vica na milioni na Jiu kei na so tale ena gauna e veiliutaki kina o Itala. E sivia na 100 na milioni era mate ena ivalu. Sa sega ni caka rawa na basulawa kei na ivakarau kaukaua. Sa tarai vuravura taucoko na vakayagataki ni wainimate gaga. E se tete tiko ga na mate ca ni veiyacovi. E vicasagavulu na milioni era mate e veiyabaki ena waloloi kei na tauvimate. Sa kavoro na bula vakavuvale qai torosobu na itovo ni bula e veivanua kece. E sega ni dua na matanitu vakatamata e rawa ni walia na leqa kece oqo, se me vakaotia na leqa e salavata mai kei na bula vaqase, tauvimate kei na mate.

E tukuna tu mai na iVolatabu na ituvaki ni kawatamata ena noda gauna. E vakatoka na Vosa ni Kalou na noda itabagauna me “iotioti ni veisiga” ni ituvaki kei vuravura, nida na sotava “na gauna cacamatua, lewalewai dredre.” Kena ikuri, e kaya na iVolatabu ni o “ira na tamata ca kei ira na dauveitemaki, era na tubu cake me ra ca sara.”​—2 Timoci 3:1-5, NW, 13.

Sa Voleka ni Oti na Rarawa

Na veika kece e sa yaco tu nikua e dusia ni sa voleka ni cava na gauna e soli vua na tamata me vakatovotovotaka kina na veimataqali veiliutaki kece ga e vakasamataka, ena nona sega ni via muria na veiliutaki ni Kalou. E matata vakasigalevu ni sega ni rawa ni lewai koya ga na tamata. Na veiliutaki ga ni Kalou e rawa ni kauta mai na sautu, marau, bula uasivi, kei na bula tawamudu. Sa voleka gona ni cava na nona vakalaiva tiko mai na Kalou na ivakarau ca kei na rarawa. Sa vakarau takoso mai me vakarusa na ivakarau kece ni veiliutaki vakatamata e kauta ga mai na leqa kei na rarawa.

E parofisaitaka na iVolatabu: “E na nodra gauna na tui ko ya [na veimatanitu vakatamata ena gauna oqo] ena qai vakatura na Kalou ni lomalagi e dua na matanitu [mai lomalagi], ena sega sara ni vakarusai rawa: . . . ena vurumemeataka ga ka vakaotia na veimatanitu oqori [na veimatanitu era veiliutaki tiko edaidai], ka na tu ga ka sega ni mudu.” (Taniela 2:44) E ivakavuvuli bibi sara ga ni iVolatabu na veiliutaki cecere i Jiova, na nona dodonu me veiliutaki ni vakayagataka na nona Matanitu vakalomalagi. A sa tukuna oti tu o Jisu e dua na tiki bibi ni “iotioti ni veisiga” ena nona kaya: “[E]na vunautaki mada na i Tukutuku Vinaka ni matanitu ki na vuravura taucoko, me i vakadinadina ki na veivanua kece ga, sa na qai yaco mai na i vakataotioti.”​—Maciu 24:14, VV.

Ni sa yaco na ivakataotioti, o cei ena bula? E sauma na iVolatabu: “Ni ra na tiko ga e na vanua na yalododonu, ka ra na tiko dei kina na yalodina. Ia ko ira na tamata ca era na muduki tani e vuravura.” (Vosa Vakaibalebale 2:21, 22) Era okati mera yalododonu o ira era vulica na loma i Jiova ra qai cakava. E kaya o Jisu Karisito: “Sai koya oqo na bula tawa mudu, me ra kilai kemuni na Kalou dina duaduaga, kei Jisu Karisito ko koya ko ni a tala mai.” (Joni 17:3) Io, “ko vuravura sa lako tani yani . . . ; ia ko koya sa cakava na ka sa vinakata na Kalou, sa tu dei ga ka sega ni mudu.”​—1 Joni 2:17.

Na tikinivolatabu kece e lavetaki mai na Vakadewa ni Vuravura Vou ni iVolatabu.