TORO VOLEKA VUA NA KALOU

E “Vosoti Kemuni Vakarawarawa o Jiova”

“Ke o sega ni dau veivosoti ena vaka ga nomu vakacacana e dua na ikawakawa o na qai takosova ena dua na gauna e muri.” Qori na ka e tukuna na dauvolaitukutuku makawa ena ika17 ni senitiuri o Edward Herbert ni vakabibitaka na vuna meda veivosoti kina: Ni dua na gauna e muri eda na vinakata tale ga meda vosoti. (Maciu 7:12) E tiko gona na vuna bibi meda veivosoti kina. Vakasamataka mada na ka e vola na yapositolo o Paula ena Kolosa 3:13.​—Wilika.

Nida ivalavala ca kece, eda na rairai cakava eso na ka e veivakacudrui se vakararawataki ira na so ra qai cakava tale ga qori vei keda. (Roma 3:23) Na cava meda cakava meda veiyaloni tiko ga kina kei ira na wekada ivalavala ca? E uqeti Paula na Kalou me vakasalataki keda meda dau veivosoti. Na ivakasala qori a volai ena ruanaudolu na yabaki sa oti, ia se yaga tiko ga nikua. Meda vakadikeva mada na nona vosa o Paula.

“Moni dau yalorawarawa.” Na vosa “dau yalorawarawa” e kena ibalebale ena vosa vaKirisi na veiciqomi kei na vosota. E tukuni ena dua na ivola, ni dua na lotu vaKarisito e bulataka na itovo qori ena “rawarawa ni vosoti ira na cala, se raibaleta eso na ka votivoti e caka vua.” Na vosa “moni dau,” e kena ibalebale nida okati kece kina, sega ni baleta ga e dua. Kena ivakaraitaki, nida kila ni dau votivoti vei ira tale eso na ka eda cakava, eda na sega ni cati ira ena ka votivoti era cakava vei keda. Ia vakacava ke ra caka cala vei keda eso tale?

“Ni dau veivosoti . . . vakarawarawa.” E tukuna e dua na dauvakadidike ni vosa vaKirisi e vakadewataki me ‘veivosoti vakarawarawa’ “e sega ni kena ibalebale ga na veivosoti . . . ia e titobu sara, e vakaraitaka nida tu vakarau e veigauna meda veivosoti.” E tukuna e dua tale na ivola ni rawa ni kena ibalebale “solia ena marau, soli wale, cakava na ka e yaga vua e dua tale.” Eda na vakaraitaka nida veikauaitaki ke da yalorawarawa ni vosota e dua ‘ke da cudruvaka mada ga e dua na ka me baleti koya.’ Na cava meda cakava kina qori? Baleta ni dua na gauna eda na vinakati koya tale ga eda vosota me vosoti keda.

“Me vaka ga na nona vosoti kemuni vakarawarawa o Jiova.” Qo na vuna levu meda dau veivosoti kina: Na Kalou o Jiova e vosoti keda vakarawarawa. (Maika 7:18) Vakasamataka mada nona vosota o Jiova e dua na tamata ivalavala ca e veivutuni dina. E sega ni ivalavala ca o Jiova me vakataki keda, ia e dau yalorawarawa qai vosoti ira dina na veivutuni, dina ga ni kila vinaka tu ni sega ni gadrevi vei ira na veivutuni mera vosoti koya tale ga. Koya gona, o Jiova duadua ga e vosoti ira vakarawarawa na ivalavala ca!

Na yalololoma i Jiova eda toro voleka kina vua, e uqeti keda tale ga meda vakatotomuri koya. (Efeso 4:32–5:1) E vinaka meda taroga, ‘Ni yalololoma o Jiova me vosoti au, na cava meu sega ni vosota kina e dua na taciqu e veivutuni dina?’​—Luke 17:​3, 4.

Wili iVolatabu e Vakatututaki ena Okotova

Kalatia 1-6; Efeso 1-6; Filipai 1-4; Kolosa 1-4; 1 Cesalonaika 1-5; 2 Cesalonaika 1-3; 1 Timoci 1-6–2 Timoci 1-4

[Tikina bibi ena tabana e 11]

O Jiova duadua ga e vosoti ira vakarawarawa na ivalavala ca!