‘Meda Yadra Nida Gumatua ena Masu’

“Moni yalomatua, . . . moni qai yadra tiko ena nomuni gumatua ena masu.”​—1 PITA 4:7.

O NA SAUMA VAKACAVA?

Na veimataqali masu cava e gadrevi mo cabora vakalevu?

Na cava meda dau masu tiko ga kina na lotu vaKarisito dina?

Ena yaga vei cei na nomu masulaki ira tale eso?

1, 2. (a) Na cava e bibi kina meda “gumatua ena masu”? (b) Na cava meda taroga me baleta na ivakarau ni noda masu?

E TUKUNA e dua a dau cakacaka tu ena bogi: “E gauna dredre duadua ni yadra ni sa voleka na mataka.” Qori tale ga na ka era kaya eso na dau yadra bogi. Eda sotava tale ga na lotu vaKarisito nikua na ituvaki dredre va qori, nida sa donuya tu qo na gauna butobuto duadua ena ituvaki ca i Setani. (Roma 13:12) Sa na bau ririkotaki dina meda mocelutu ena iotioti ni aua qo! E bibi kina meda “yalomatua” da qai muria na veiuqeti vakaivolatabu meda ‘yadra tiko ena noda gumatua ena masu.’​—1 Pita 4:7.

² Ena gauna eda bula donuya tu qo, e ka vakavuku kina meda taroga: ‘Au dau gumatua ena masu? Vakacava e dau dua tu ga na ivakarau ni noqu masu? Au dau masu tiko ga? Au dau masulaki ira eso tale seu masulaka ga vakalevu na ka au gadreva kei na ka au vinakata? E bibi tale ga vakacava na masu ena noqu vakabulai?’

MEDA CABORA NA VEIMATAQALI MASU

3. Na veimataqali masu cava eda rawa ni cabora?

³ A vakamacalataka na yapositolo o Paula na “veimataqali masu” ena nona ivola vei ira e Efeso. (Efeso 6:18) De dua eda dau kerei Jiova ena masu me vakaceguya na ka eda gadreva, meda vosota tale ga na ituvaki dredre. E yalololoma o koya na ‘daurogo masu’ me rogoca na noda kerekere. (Same 65:2) Ia e bibi meda cabora na veimataqali masu. Qori e okati kina na vakacaucau, vakavinavinaka, kei na vakamamasu.

4. Na cava me wasoma kina na noda vakacaucautaki Jiova ena masu?

⁴ E tiko e levu na vuna meda cavuta kina na vosa ni veivakacaucautaki vei Jiova ena noda masu. Kena ivakaraitaki, nida vakasamataka na “nona cakacaka kaukauwa” kei na nona ‘cecere vakaidina’ e uqeti keda sara ga meda vakacaucautaki koya. (Wilika Same 150:​1-6.) Eda uqeti mada ga vaka13 ena ono na tikina ni ika150 ni Same meda vakacaucautaki Jiova! Ena nona doka vakalevu na Kalou e dua tale na daunisame e seretaka kina: “Au sa vakavinavinaka vei kemuni vakavitu e na veisiga e na vuku ni nomuni lewa dodonu.” (Same 119:164) E ganiti Jiova dina me vakacaucautaki. E dodonu gona meda vakacaucautaki koya “vakavitu e na veisiga” ena masu, kena ibalebale me wasoma.

5. Ena taqomaki keda vakacava na masu ni vakavinavinaka?

⁵ E bibi tale ga na masu ni vakavinavinaka. E uqeti ira na lotu vaKarisito ena siti e Filipai o Paula: “Moni kua ni lomaocaocataka e dua na ka, ia na ka kece me vakaraitaki vua na Kalou ena masu kei na kerekere salavata kei na vakavinavinaka.” (Fpai. 4:6) Eda na taqomaki nida masu ena vakavinavinaka mai vu ni lomada vei Jiova. E bibi qori nida sa bula tu qo ena iotioti ni veisiga era “sega ni dau vakavinavinaka” kina na tamata. (2 Tim. 3:​1, 2) E takalevu tu e vuravura na sega ni vakavinavinaka. Ke da sega ni qaqarauni, e rawa ni takavi keda na yalo qori. Nida vakavinavinaka vua na Kalou ena masu eda na lomavakacegu, eda na sega tale ga ni ‘vosa kudrukudru se didivaka na keda ituvaki.’ (Juta 16) Nira vakavinavinaka tale ga na ulunivuvale ena nodra masu vakavuvale, ena uqeti ira na watidra kei na luvedra mera dauvakavinavinaka.

6, 7. Na cava na vakamamasu, na cava me okati ena noda vakamamasu vei Jiova?

⁶ Na vakamamasu e okati kina na masu vagumatua qai vu sara ga mai lomamu. Na cava soti eda rawa ni cavuta nida vakamamasu vei Jiova? Eda rawa ni cavuta sara ga na veivakacacani eda sotava se nida tauvimate bibi. Ena ituvaki va qori na noda masu ni kere veivuke vei Jiova e rawa ni okati me vakamamasu. Vakacava qori ga na gauna eda rawa ni vakamamasu kina vei Jiova?

⁷ Dikeva mada na ivakarau ni masu a vakavulica o Jisu qai vakasamataka na ka e tukuna me baleta na yaca ni Kalou, Matanitu ni Kalou kei na loma ni Kalou. (Wilika Maciu 6:​9, 10.) E lomoci tu o vuravura ena veika ca, ra qai guce na matanitu vakatamata mera vakarautaka na veika era gadreva dina na lewenivanua. E dodonu gona meda masuta me dokai na yacana na Tamada vakalomalagi, me qai kauta laivi na nona Matanitu na veiliutaki i Setani e vuravura. Qo tale ga e gauna vinaka meda vakamamasu kina vei Jiova me caka na lomana e vuravura me vaka ga sa caka tiko mai lomalagi. Koya gona, meda gumatua tiko ga da qai yalorawarawa ni cabora na veimataqali masu.

‘MASU TIKO GA’

8, 9. Na cava meda kua kina ni vakalewa na nona moce o Pita kei ratou na vo ni yapositolo ena were o Kecisemani?

⁸ Na yapositolo o Pita e uqeti keda na lotu vaKarisito meda ‘yadra tiko ena noda gumatua ena masu,’ ia ena dua mada ga na gauna a sega ni cakava qori o koya. O Pita a dua vei ratou na tisaipeli a moce ena gauna a masu tiko kina o Jisu ena were o Kecisemani. Eratou sega mada ga ni cakava na ka e tukuna o Jisu, oya me ratou ‘yadra qai masu tiko ga.’​—Wilika Maciu 26:​40-45.

⁹ Meda kua ni vakalewa na nona moce o Pita kei ratou na vo ni yapositolo, e bibi ga meda nanuma tiko ni levu na ka eratou cakava ena siga ya e vakavuna sara ga nodratou wawale. Eratou a vakarautaka na veika me baleta na Lakosivia, ratou qai solevutaka ena yakavi ya. Oti qori sa qai tauyavutaka o Jisu na iVakayakavi ni Turaga, e kotora kina na ivakaraitaki me na muri ena gauna kece e vakananumi kina nona mate. (1 Kor. 11:​23-25) “Ni ratou lagata oti na sere ni veivakacaucautaki, eratou gole sara ina Ulunivanua ni Veiolive” ena nodratou taubaletaka e dua na vanua yawa, ni ratou muria na gaunisala qiqo e Jerusalemi. (Maciu 26:​30, 36) Kena irairai sa sivi toka na tinikarua ena bogilevu qori. Ke da tiko ena were o Kecisemani ena bogi ya, eda na rairai moce lutu tale ga. Eratou wawale na yapositolo, ia o Jisu a sega ni vakalewai ratou, e tukuna ga ena yalololoma ni “gu na yalo, ia sa malumalumu ga na yago.”

10, 11. (a) Na cava e vulica o Pita ena ka e yaco ena were o Kecisemani? (b) Na cava o vulica ena ka e yaco vei Pita?

¹⁰ A yaga na ka e yaco ena were o Kecisemani ni a vulica kina o Pita na bibi ni gumatua. Ni bera qori a tukuna o Jisu: “Dou na tarabe kece ena veika ena yacovi au ena bogi nikua.” A sauma o Pita: “Ke ratou tarabe kece qo, au na sega vakadua ni tarabe!” E tukuna sara o Jisu ni na cakitaki koya vakatolu o Pita. E tukuna ga ena nuidei o Pita: “Au na sega vakadua ni cakitaki kemuni veitalia sara ke daru mate vata.” (Maciu 26:​31-35) Ia a qai tarabe o Pita me vaka ga a parofisaitaka o Jisu. E “tabalaka na tagi” ena levu ni nona rarawataka nona cakitaki Jisu.​—Luke 22:​60-62.

¹¹ A vukei Pita dina na ka a sotava ya, rawa kina ni valuta na nona dau nuitaki koya vakasivia. E macala ga ni vukei Pita ena ituvaki qori na masu. Ni a tauca sara ga o koya na ivakasala meda ‘yadra tiko ena noda gumatua ena masu.’ Eda muria tiko beka na ivakasala uqeti vakalou qori? Vakacava eda ‘masu tiko ga’ da qai vakaraitaka nida nuitaki Jiova? (Same 85:8) Meda nanuma tale tiko ga na nona ivakasala na yapositolo o Paula: “Me qaqarauni o koya e nanuma ni sa tudei tu, de qai bale.”​—1 Kor. 10:12.

ROGOCI NA MASU I NIEMAIA

12. Na cava e ivakaraitaki vinaka kina vei keda o Niemaia?

¹² Vakasamataka mada na ivakaraitaki i Niemaia, e dau kauta na mena na Tui Perisia, o Atakisekise ena ikalima ni senitiuri B.S.K. E ivakaraitaki vinaka o Niemaia ena nona masu vagumatua. E vica vata na siga na nona ‘lolo kei na nona masu tiko ga vua na Kalou’ ena vuku ni ituvaki dredre era sotava tiko na Jiu mai Jerusalemi. (Niem. 1:4) Ni via kila o Atakisekise na vuna e vakaveveku mata tiko kina o Niemaia, ‘sega ni bera nona masu sara o Niemaia vua na Kalou ni lomalagi.’ (Niem. 2:​2-4) Na cava e qai yaco? A sauma nona masu o Jiova qai dusimaka na ka me caka me yaga vei ira na nona tamata. (Niem. 2:​5, 6) Sa na bau vaqaqacotaki mada ga na vakabauta i Niemaia!

13, 14. Na cava meda cakava me dei kina noda vakabauta da qai vorata na sasaga i Setani me vakayalolailaitaki keda?

¹³ Nida vakatotomuri Niemaia ena noda sega ni cegu na masu, ena qaqaco tiko ga na noda vakabauta. E tawaveinanumi o Setani qai dau taketetaki keda ena gauna sara ga eda malumalumu tu kina. Kena ivakaraitaki, ke da tauvimate tiko se da lomabibi, eda na rairai nanuma ni sega ni kauaitaka vakalevu na Kalou na gauna eda dau vakayagataka ena cakacaka vakaitalatala. De dua eso vei keda e se rarawataka tu ga na ivakarau ni noda bula e liu. E vinakata o Setani meda vakabauta nida tawayaga. E nona inaki me vakayalolailaitaki keda, me vakamalumalumutaka na noda vakabauta. Ia nida ‘yadra tiko ena noda gumatua ena masu,’ ena dei na noda vakabauta. Io, ‘na isasabai levu ni vakabauta e rawa ni bokoca na gasau waqa kece i koya na Vunica.’​—Efeso 6:16.

¹⁴ Ke da ‘yadra tiko ena noda gumatua ena masu,’ eda na tu vakarau ena gauna e vakatovolei vakasauri kina na noda vakabauta, eda na sega tale ga ni rawai. Nida vakatovolei, meda nanuma sara na ivakaraitaki i Niemaia da qai masuta na Kalou ena kena gauna totolo duadua. Ena veivuke duadua ga i Jiova eda rawa ni vorata kina na veitemaki da qai vosota ni vakatovolei na noda vakabauta.

MASULAKI IRA NA TACIDA

15. Na cava meda taroga me baleta na noda dau masulaki ira na so tale?

¹⁵ E vakamamasu o Jisu ena vuku i Pita me kua kina ni malumalumu na nona vakabauta. (Luke 22:32) Qori tale ga na ka a cakava o Epafira, e lotu vaKarisito yalodina ena imatai ni senitiuri, e dau gumatua tale ga ena nona masulaki ira na tacina vakayalo e Kolosa. E vola vei ira o Paula me baleti Epafira: “[E] dau masulaki kemuni vagumatua ka kerea tiko ga kina mo ni tudei e na yalomatua kei na lomadei e na nomuni muria taucoko na lomana [na Kalou].” (Kolo. 4:​12, Veiyalayalati Vou) E vinaka meda taroga: ‘Au dau masulaki ira vagumatua na taciqu vakayalo e veiyasa i vuravura? E vakacava na levu ni gauna au dau cavuti ira kina ena masu na taciqu vakayalo era vakaleqai ena leqa tubukoso? Na gauna cava au se masulaki ira kina vagumatua o ira era lesi ena itavi bibi ena isoqosoqo i Jiova? Au bau masulaka e dua na taciqu ena ivavakoso ena dua na gauna wale ga qo e sotava tiko na ituvaki dredre?’

16. Vakacava e yaga na noda masulaki ira na so tale? Vakamacalataka.

¹⁶ Ena veivuke sara vakalevu na noda masu vei Jiova ena vukudra eso tale. (Wilika 2 Korinica 1:11.) E sega ni kena ibalebale ni na yavala o Jiova baleta nira masuti koya vakawasoma e levu na nona dausokalou, ia e sauma na nodra masu ni marautaka na nodra dau veikauaitaki na nona tamata. E dodonu gona meda raica vakabibi na noda itavi dokai meda masulaki ira eso tale. Me vakataki Epafira, e dodonu meda vakaraitaka nida lomani ira da qai kauaitaki ira dina na tacida vaKarisito ena noda gumatua ni masulaki ira. Nida cakava qori, eda sa na qai marau ga vakalevu baleta ena “marau vakalevu o koya e solia na ka, vakalailai o koya e taura na ka.”​—Caka. 20:35.

‘SA VOLEKA MEDA VAKABULAI’

17, 18. Ena yaga vakacava na noda ‘yadra tiko ena noda gumatua ena masu’?

¹⁷ Ni bera ni vola o Paula “sa balavu sara na bogi; sa voleka na mataka,” a vola mada e liu: “Oni kila na gauna, ni sa gauna moni yadra kina mai na moce, sa voleka tale ga na gauna meda vakabulai kina ni vakatauvatani kei na gauna eda vakabauta kina.” (Roma 13:​11, 12) Sa voleka na vuravura vou e yalataka tu na Kalou, e sega tale ga ni yawa na noda vakabulai me vaka eda rairai nanuma tu. Meda kua gona ni moce vakayalo, meda kua tale ga ni vakalaiva me vakawelei keda na veika ni vuravura qo me sega kina na gauna meda masu duadua vei Jiova. Ia meda ‘yadra tiko ena noda gumatua ena masu.’ Nida cakava qori eda na vakaogai keda ena ‘veika e savasava da qai qarava na Kalou’ nida waraka tiko na siga i Jiova. (2 Pita 3:​11, 12) Ena laurai gona ena ivakarau ni noda bula nida yadra tiko vakayalo kei na noda vakabauta dina ni sa voleka sara na gauna me na vakarusai kina na ituvaki ca qo. Meda ‘kua mada ga ni cegu ena masu.’ (1 Ces. 5:17) Meda vakatotomuri Jisu tale ga ena noda qara e dua na vanua vakanomodi meda masu duadua kina. Ke da gumatua ena noda masu vei Jiova, eda na qai volekati koya ga vakalevu. (Jeme. 4:​7, 8) Io, eda na vakalougatataki dina!

¹⁸ E tukuni ena iVolatabu: “Ena nona bula vakatamata, e vakamamasu o Karisito, e kerekere tale ga vei koya ena rawa ni vakabulai koya mai na mate, salavata kei na nona kaci vakadomoilevu kei na tagi, mani rogoci ena nona doka na Kalou.” (Iper. 5:7) Ena gauna se bula kina e vuravura o Jisu, a dau vakamamasu qai kerekere, qai yalodina tiko ga vua na Kalou me yacova sara nona mate. E yaga vakacava na ka e cakava qori o Jisu? E vakaturi koya kina o Jiova qai vakalougatataki koya ena bula tawamate e lomalagi. Eda rawa tale ga ni yalodina vua na Tamada vakalomalagi se mani vakacava na veitemaki kei na veivakatovolei eda na sotava ena gauna se bera mai. Io, eda rawa ni taura na icovi ni bula tawamudu ke da ‘yadra tiko ga ena noda gumatua ena masu.’

[iYaloyalo ena tabana e 3]

[iYaloyalo ena tabana e 5]

A tarabe o Pita, ia a vulica me ‘yadra tiko ena nona gumatua ena masu’ (Raica na parakaravu 10, 11)

[iYaloyalo ena tabana e 6]

Noda ‘yadra tiko ena noda gumatua ena masu’ ena vukei keda nida sotava na ituvaki dredre (Raica na parakaravu 13, 14)