“Raica! Au sa Vakavoutaka na Ka Kece”

O vinakata mo dou bulabula vinaka vakavuvale, mo dou bula balavu tale ga? O vinakata mo bula ena vuravura sa na sega kina na rarawa, mosi kei na mate? E sega ni ka wale ga ni tadra nomu rawa ni bula ena vuravura qori. Na vuravura vou ni yalododonu a nakita na Kalou o Jiova sa voleka sara. Raica mada na nona yalayala me baleta na nona inaki ena Vakatakila 21:3-5.​—Wilika.

“[Na Kalou] ena qusia . . . na wainimata kece mai na matadra.” (Vakatakila 21:4) Na wainimata cava ena qusia na Kalou? Qo e sega ni vakaibalebaletaka na wainimata ni marau se na wainimata dina e dau tuturu mai matada. Ia e vakaibalebaletaka tiko na wainimata e vu mai na rarawa kei na lolosi. Ena sega ni qusia wale ga na wainimata na Kalou, ena muduka sara ga na rarawa kei na lolosi e vakavuna na tuturu ni wainimata.

“Sa na sega tale na mate.” (Vakatakila 21:4) E dua tale na ka e vakavuna vakalevu na tagi, na meca o mate. Ena sereki ira na tamata talairawarawa o Jiova mai na ivau ni mate. Ena cakava vakacava qori? Ena nona vaqeavutaka na vu ni noda mate: na ivalavala ca e vakadewa mai o Atama. (Roma 5:12) O Jiova ena vakayagataka na isoro ni veivoli i Jisua mera bula uasivi tale na tamata talairawarawa. Sa na qai “vakamalumalumutaki” na iotioti ni meca, o mate. (1 Korinica 15:26) O ira na yalodina sa na rawa mera bula uasivi me tawamudu me vaka a nakita taumada na Kalou.

“Sa na sega tale . . . na mosi.” (Vakatakila 21:4) Na mosi vakacava sa na oti? Qo na mosi e vakararawataki keda kece tu na lewe i vuravura me vaka na curuoso ni vakasama, rarawa ni lomada kei na mosi ni yago e vu mai na ivalavala ca.

Sa voleka sara na bula ena sega kina na rarawa e vakavuna na tuturu ni wainimata, na mate kei na mosi. O na rairai taroga, ‘Ena yaco beka e vei ya?’ ‘E yalataka beka na Kalou ni na yaco qori i lomalagi?’ Sega. Dikeva mada na vuna. Kena imatai, e cavuti ena nona yalayala, “sa tiko vei ira na tamata na vale ni Kalou,” na tamata era bula tiko e vuravura. (Vakatakila 21:3) Kena ikarua, e vakamacalataki tale ga ena yalayala qori ni “sa na sega tale na mate”​—na mate e dau yaco e vuravura sa na oti vakadua. E sega ni bau yaco mai lomalagi na mate, ia sa dua na gauna balavu na kena yaco tiko e vuravura. Koya gona, na bula uasivi e yalataka na Kalou ena yaco ena vuravura qo.

E vinakata o Jiova meda vakabauta na nona yalayala me baleta na vuravura vou ni yalododonu. Ni vakamacalataki oti ga na veivakalougatataki sa voleka ni yaco, e vakadeitaka o Jiova na nona yalayala, e kaya: “Raica! Au sa vakavoutaka na ka kece.” Sa qai tomana: “E donu na vosa qo, e dina tale ga.” (Vakatakila 21:5) O via kila eso tale na ka mo cakava kei ratou na nomu vuvale me rawa ni dou raica vata kei ira era marautaka tiko na nodra qaravi Jiova ena kena vakayacori na nona yalayala?