SAUMI NA TARO VAKAIVOLATABU
Na cava na inaki ni nona lesu mai o Karisito?
Ni bera ni lesu i lomalagi ena 33 S.K., a yalataka o Jisu Karisito ni na lesu mai. A vakatauvatana me vaka e dua e sucu turaga e dede na nona lako ina dua na vanua qai lesu mai me veiliutaki vakatui. Koya gona, na inaki ni nona lesu mai o Jisu me liutaki keda vinaka na kawatamata.—Wilika Luke 19:11, 12.
Ena vakalesuya mai o Jisu e dua na matanitu e vinaka na kena veiliutaki
Na yago vakacava ena lesu mai kina na Karisito? A vakaturi ena yago vakayalo. (1 Pita 3:18) E lesu tale i lomalagi qai dabe ena ligaimatau ni Kalou. (Same 110:1) Dua na gauna emuri a qai kau vua na Kalou o Jiova, o koya sa “dede sara na nona bula,” mani lesi Jisu me liutaka na vuravura. Ena sega gona ni lesu mai vakatamata o Jisu, ena lesu ga mai ena yago vakayalo ena nona lewa vakatui.—Wilika Taniela 7:13, 14.
Na cava ena cakava o Jisu ni lesu mai?
Ena lewai ira na lewe i vuravura kei ira na agilosi. Ena vakarusai ira na tamata ca qai vakadonuya mera bula tawamudu o ira era vakamalumalumu ina nona lewa vakatui.—Wilika Maciu 25:31-33, 46.
Na nona veiliutaki ena veisautaka na vuravura me parataisi. Ena vakaturi ira tale na mate mera marautaka tawamudu na bula ena Parataisi e vuravura.—Wilika Luke 23:42, 43.