SAUMI NA TARO VAKAIVOLATABU
Na cava ena cakava o Jisu ena gauna se bera mai?
A mate o Jisu ena 33 S.K., a vakaturi qai lako i lomalagi. A lai wawa tu me dua na gauna balavu, sa qai soli vua na lewa me veiliutaki vakatui. (Taniela 7:13, 14) Ni sa lewa vakatui e vuravura ena gauna se bera mai, ena kauta mai na sautu, ena vakaotia tale ga na dravudravua.—Wilika Same 72:7, 8, 13.
Ni sa lewa vakatui o Jisu e vuravura, ena vakaotia na veika tawadodonu
E levu tale na ka totoka ena cakava o Jisu ni sa veiliutaki vakatui. Ena vakayagataka na kaukaua e solia vua o Tamana me vakalesuya na kawatamata ina bula uasivi. Era na marautaka na bula e vuravura, era na sega ni qase tale se mate.—Wilika Joni 5:26-29; 1 Korinica 15:25, 26.
Na cava e cakava tiko nikua o Jisu?
E veidusimaki ena nodra cakacaka vakavunau e veiyasa i vuravura na nona imuri dina, era vunautaka tiko na ka e tukuna na iVolatabu me baleta na Matanitu ni Kalou. Ena tokoni ira tiko nona tisaipeli ena cakacaka vakavunau me yacova na gauna sa na vakarusa kina na matanitu kece vakatamata na Matanitu ni Kalou.—Wilika Maciu 24:14; 28:19, 20.
E vakayagataka o Jisu na ivavakoso lotu vaKarisito dina me dusimaki keda ina ivakarau ni bula vinaka duadua. Ena veidusimaki tiko ga ena gauna sa na vakarusai kina na ituvaki ca qo me yacova yani na vuravura vou e yalataka na Kalou.—Wilika 2 Pita 3:7, 13; Vakatakila 7:17.