Qarauna me Kua ni “Vakasesei Vakatotolo na Nomuni Vakasama”!

1, 2. Na cava e takalevu kina nikua na lawaki, e dau laurai vakalevu e vei? (Raica na imatai ni iyaloyalo.)

E TAKALEVU tu nikua na veidabui, veivakaisini kei na lawaki. E sega ni dodonu meda kurabuitaka qori. E vakamatatataka na iVolatabu ni dau veivakacalai o Setani na Tevoro, e lewa tale ga na vuravura qo. (1 Tim. 2:14; 1 Joni 5:19) Ni sa vakarau cava na ituvaki ca qo, sa qai cudru ga vakalevu o Setani ni sa “lekaleka nona gauna.” (Vkta. 12:12) Meda namaka gona nira na veidabui vakalevu o ira e vakamuai ira na Tevoro, vakabibi nira na cakava qori vei ira era tutaka na sokalou dina.

² Eso na gauna e dau tabaki se kacivaki ena tabana ni itukutuku na itukutuku lasu me baleti keda na dauveiqaravi i Jiova kei na noda vakabauta. E vakayagataki na ulunitukutuku ena niusiveva, porokaramu ena retioyaloyalo kei na Internet me vakatetei kina na itukutuku lasu. Era rawai kina eso nira vakabauta na itukutuku lasu va qori.

3. Na cava ena vukei keda meda kua ni lawakitaki?

³ Eda kalougata nida rawa ni vorata na nona ivadi qaseqase na noda meca baleta ni tiko na Vosa ni Kalou, e “yaga . . . me veivakadodonutaki.” (2 Tim. 3:16) E bibi meda vuli mai na ka e vola na yapositolo o Paula me baleta na nodra lawakitaki eso na lotu vaKarisito ena imatai ni senitiuri e Cesalonaika, era vakabauta na itukutuku lasu. E vakamasuti ira me “kua ni vakasesei vakatotolo na [nodra] vakasama.” (2 Ces. 2:​1, 2) Na cava eda vulica ena ivakasala vakayalololoma i Paula, eda na vakayagataka vakacava qori?

IVAKASALA E TAU ENA KENA GAUNA DONU

4. Era vakadreti vakacava na lotu vaKarisito e Cesalonaika me baleta na “siga i Jiova” sa roro tiko mai, ia vakacava o keda nikua?

⁴ Ena imatai ni ivola i Paula ina ivavakoso e Cesalonaika, a vakadreti ira ena “siga i Jiova” sa roro tiko mai. E sega ni vinakata mera tiko ena butobuto na tacina vakayalo se mera sega ni vakarau tu. E uqeti ira ga mera “luve ni rarama” mera ‘yadra tiko ra qai yalomatua.’ (Wilika 1 Cesalonaika 5:​1-6.) Nikua, eda waraka tu nona vakarusai o Papiloni na Ka Levu, na isoqosoqo ni lotu lasu kece e vuravura. Qori na itekitekivu sara ga ni siga levu i Jiova. Eda kalougata ni levu na ka eda sa kila me baleta na vakayacori ni inaki i Jiova. Eda dau rogoca tale ga na ivakasala e tau ena kena gauna donu ena soqoni, e vukei keda meda yadra tiko. Nida vakasamataka vakabibi na veika eda dau vakasalataki kina wasoma, ena uqeti keda meda dei ni qarava na Kalou “ena veiqaravi tabu e salavata kei na yalomatua.”​—Roma 12:1.

5, 6. (a) Na cava e vakamacalataka o Paula ena ikarua ni nona ivola vei ira e Cesalonaika? (b) Na cava sa vakarau cakava o Jisu, na cava meda dui taroga?

⁵ Ni vola oti ga na imatai ni nona ivola vei ira na lotu vaKarisito e Cesalonaika, a vola sara o Paula na ikarua ni nona ivola. E vakadreti ira kina ena veivakararawataki levu sa roro tiko mai, qori na gauna ena vakatauca kina na Turaga o Jisu na veilewai ni Kalou vei ira “era sega ni kila na Kalou kei ira era beca na itukutuku vinaka.” (2 Ces. 1:​6-8) Ena wase rua ni nona ivola, e vakamacalataki kina ni so ena ivavakoso era ‘taqayataka’ na siga i Jiova, era lai nanuma ni sa voleka sara ga. (Wilika 2 Cesalonaika 2:​1, 2.) O ira na lotu vaKarisito qori e lailai ga na ka era kila me baleta na vakayacori ni inaki i Jiova, me vaka ga a qai tukuna e muri o Paula me baleta na parofisai: “E sega ni taucoko na noda vuku, e sega tale ga ni taucoko noda parofisai, ia ni sa na yaco mai na ka e taucoko, sa na qai oti na ka e vakatikina.” (1 Kor. 13:​9, 10) Ia ena vakaukauataka tiko ga na nodra vakabauta na ivakaro uqeti vakalou a vola o Paula, na yapositolo o Pita, kei na so tale na tacida lumuti yalodina ena gauna ya.

⁶ Ena nona uqeti vaKalou o Paula, a vakamatatataka kina ni na basika na vukitani kei ira na “tamata ivalavala ca” ni bera na siga i Jiova.a Ena nona gauna lokuci na Turaga o Jisu, ena “vakawabokotaki” ira kece era rawai ena lawaki. Sa qai vakamatatataka na yapositolo na vuna era lewai kina; baleta nira ‘sega ni galeleta na ka dina.’ (2 Ces. 2:​3, 8-10) E vinaka meda dui taroga: ‘E vakacava na levu ni noqu taleitaka na ka dina? Vakacava na ka au sa kila, e lakolakovata kei na ivakamacala vovou e tabaki ena mekesini qo kei na so tale na ivola vakaivolatabu e vakarautaki vei ira na tamata ni Kalou ena ivavakoso e veiyasa i vuravura?’

DIGIA VAKAVUKU NOMU ILALA

7, 8. (a) Na ituvaki leqataki cava era sotava na lotu vaKarisito taumada? (b) Na ituvaki leqataki cava e rawa nira sotava na lotu vaKarisito nikua?

⁷ Eda na sega ni sotava ga na lotu vaKarisito na ituvaki rerevaki era vakavuna na vukitani se nodra ivakavuvuli. A vola o Paula vei Timoci “ni levu sara na ka ca e vu mai na lomani ni ilavo.” E vakamacalataka ni “nodra kakavaka qo eso, era vakamuai tani kina mai na vakabauta, ra qai sualaka na yagodra taucoko ena levu na mosi.” (1 Tim. 6:10) E veivakaleqai tale ga “na vua ni itovo vakayago.”​—Kala. 5:​19-21.

⁸ Eda sa qai kila na vuna e veivakaroti kina vakadodonu o Paula vei ira e Cesalonaika ena rerevaki ni ka era cakava o ira era vakatoka o koya mera “sega ni yapositolo dina.” E maliwai ira tale ga mai Cesalonaika o ira era “vakatanitaka na ivakavuvuli dina mera vakacalai ira kina na tisaipeli mera muri ira.” (2 Kor. 11:​4, 13; Caka. 20:30) Ena dua na gauna e muri, a vakacaucautaki ira na ivavakoso e Efeso o Jisu baleta nira sega ni “taleitaki ira na tamata ca.” Era dau “vakatovolei” ira era sega ni yapositolo dina qai kilai nira lasulasu. (Vkta. 2:2) Ena ikarua ni nona ivola vei ira e Cesalonaika, e vakamasuti ira o Paula: “Keitou vakaroti kemuni gona raveitacini ena yaca ni Turaga o Jisu Karisito, moni lako tani mai vei ira na veitacini e vakaveitalia tu ga na nodra bula.” Sa qai cavuti ira na lotu vaKarisito era “sega ni via cakacaka.” (2 Ces. 3:​6, 10) Ia ke ra vakatokai o ira qori me vakaveitalia tu nodra bula, sega ni vakabekataki ni na dina tale ga qori vei ira era sa tekivu muria tiko nodra ivalavala na vukitani! Io, e vakarerevaki dina ena gauna oya mera veimaliwai na lotu vaKarisito kei ira qori qai vinakati kina mera qaqarauni​—e bibi tale ga qori ena gauna qo.​—Vkai. 13:20.

9. Na cava meda qaqarauni kina ke dua e vakamua na veivosaki me kakasetaki kina e dua se me lai tini ena veivakalewai?

⁹ Eda sa volekata na veivakararawataki levu kei na icavacava ni ituvaki ca ni vuravura qo. Na veivakaroti gona e tau ena imatai ni senitiuri e sa qai bibi ga vakalevu nikua. Eda sega ni vinakata meda ‘lecava na inaki’ ni loloma soli wale i Jiova da qai calata na bula tawamudu, se mani bula e lomalagi se vuravura. (2 Kor. 6:1) Ke dua ena ivavakoso e vakamua na veivosaki me kakasetaki kina e dua se me lai tini ena veivakalewai, e dodonu meda qaqarauni sara kina.​—2 Ces. 3:​13-15.

“TAURA MATUA NA KA ONI VAKAVULICI KINA”

10. Na ivakavuvuli cava era uqeti kina na lotu vaKarisito e Cesalonaika mera taura matua?

¹⁰ E uqeti ira na mataveitacini e Cesalonaika o Paula mera “tudei” ra qai taura matua na ka era sa vakavulici kina. (Wilika 2 Cesalonaika 2:15.) Na cava gona e okati ena ka era “vakavulici” kina? Qo e sega ni ivakavuvuli e uqeta se vakavulica o lotu lasu. Ia e vakaibalebaletaka tiko o Paula na ka e vakavulica o Jisu vei koya kei na so tale. E okati tale ga kina na veika e uqeta o Jiova mera vola na yapositolo, era sa mai lewe ni iVolatabu. A vakacaucautaki ira na mataveitacini ena ivavakoso e Korinica o Paula, ena nona vola, “oni dau nanumi au ena ka kece ga, oni qai dei tu ga ena ivakavuvuli kece au a vakadewataka vei kemuni.” (1 Kor. 11:2) Na veivakavulici qori e vakasavuya sara ga mai e dua e nuitaki, e dodonu gona me muri.

11. Na cava e rawa ni yaco nira vakacalai eso?

¹¹ Ena nona volavola vei ira na Iperiu, a vakamatatataka o Paula e rua na sala e rawa ni malumu kina qai sega ni dei na nona vakabauta e dua na lotu vaKarisito. (Wilika Iperiu 2:1; 3:12.) E cavuta na vosa “ciri tani yani” kei na “yawaka.” Ke dua na waqa e ciri tani mai vanua, ena sega ni kidavi totolo baleta ni toso tu ga vakamalua, lakolako ga sa na yawa mai vanua. Ena yasana adua, e rawa tale ga ni vakatulewataka e dua me biliga nona waqa me yawaka na baravi. Na ivakaraitaki ruarua qori e dusia vinaka na kedra ituvaki eso era vakacalai, era vakalaiva me luluqa nodra vakabauta na ka dina.

12. Na cava eso na ka era tu nikua e rawa ni vakaleqa noda bula vakayalo?

¹² De dua qori na ka era sotava eso e Cesalonaika. Vakacava e rawa ni yaco tale ga qori nikua? E levu na ka e tu nikua e dau vakalusi gauna. Vakasamataka mada na levu ni gauna e vakayagataki ena sala ni veikilai ena Internet, na kena wiliki kei na saumi na itukutuku e vakau mai ena iyaya vakalivaliva, noda guta na ka eda dau taleitaka, se noda saga meda kila kece na itukutuku ni qito era yaco tiko. Na veika kece qori e rawa ni vakawelea e dua na lotu vaKarisito qai vakaseavutaka na nona gugumatua. Ena rawa ni vakaleqa sara ga na nona dau gumatua ena masu, nona vulica na Vosa ni Kalou, tiko ena soqoni, kei na nona vunautaka na itukutuku vinaka. Na cava meda cakava me kua ni vakasesei vakatotolo na noda vakasama?

ITATAQOMAKI MEDA KUA NI VAKASESEI

13. Me vaka sa parofisaitaki tu, na cava e nodra rai e levu, kei na cava ena vukei keda meda dei tiko ga ena vakabauta?

¹³ E bibi meda yadrava tiko na itabagauna eda sa bula tiko kina qo kei na noda qarauna noda veimaliwai kei ira era sega ni vakadinata nida bula tiko ena “iotioti ni veisiga.” A vola na yapositolo o Pita me baleta na itabagauna qo: “Na dauveivakasewasewani ena nodra veivakasewasewani, era cakava ga na ka era vinakata ra qai kaya: ‘I vei na ka a yalataka? E sa tiko dina o koya? Mai na gauna era mate kina na tukada, e duadua tu ga na ka kece me vaka mai na gauna e buli kina na vuravura.’ ” (2 Pita 3:​3, 4) Nida wilika e veisiga qai vulica wasoma na Vosa ni Kalou ena vukei keda meda yadrava tiko na itabagauna eda sa bula tiko kina qo​—eda na vakadeitaka kina nida sa bula tiko ena “iotioti ni veisiga.” A parofisaitaki tu ni na basika ena gauna ya na vukitani ena laurai tale ga nikua. Era se bula tiko na “tamata ivalavala ca” ra qai vakacacani ira na dauveiqaravi ni Kalou. E bibi gona meda yadrava tiko na kena sa voleka mai na siga i Jiova.​—Sefa. 1:7.

14. Ena taqomaki keda vakacava na noda gugumatua ena veiqaravi vua na Kalou?

¹⁴ E sa vakadinadinataki ni noda vakaitavi wasoma ena kacivaki ni itukutuku vinaka ni Matanitu ni Kalou, ena vukei keda meda yadra tiko qai sega ni vakasesei na noda vakasama. Kena ibalebale na nona vakaroti ira na nona imuri o Karisito Jisu, na Ulu ni ivavakoso mera vakavulici na lewe ni veivanua mera nona tisaipeli ra qai muria na ka e tukuna, qori ena taqomaki ira. (Maciu 28:​19, 20) Me rawa nida muria na ivakaro qori, e bibi meda gugumatua ena cakacaka vakavunau. O nanuma nira na cakava tu ga me rawa na cakacaka vakavunau kei na veivakavulici na mataveitacini e Cesalonaika baleta ga nira vakaroti kina? Vakasamataka nona vakadreti ira o Paula: “Ni kua ni vakaleqa na cakacaka ni yalo ni Kalou ena nomuni bula. Ni kua ni dau beca na parofisai.” (1 Ces. 5:​19, 20) Eda dau marautaka meda wasea vei ira na so e levu na parofisai vakatubuqoroqoro eda vulica!

15. Na cava eso na ka eda rawa ni vulica ena noda sokalou vakavuvale?

¹⁵ E sega ni vakabekataki nida vinakata meda vukei ira noda lewe ni vuvale mera kenadau ena cakacaka vakaitalatala. E levu na mataveitacini era vakayagataka eso na gauna ena nodra sokalou vakavuvale mera vakatovotovotaka kina na veika me baleta na cakacaka vakaitalatala, era raica ni vukei ira mera kenadau ena cakacaka qori. E rawa ni veivuke tale ga ke ra veitalanoataka vakavuvale na veika era na cakava nira lesuvi ira na tataleitaki. Na cava era na tukuna ena veisiko e tarava? Na ulutaga cava ena uqeti ira tiko ga na tataleitaki? Na gauna veiganiti cava mera sikovi kina? E levu era okata ena nodra sokalou vakavuvale na veika ena vulici ena soqoni vaKarisito, ena vukei ira qori mera kila na veika ena veivosakitaki ena soqoni. Vakacava mo vakavakarau vinaka mo rawa ni vakaitavi? Na nomu vakaitavi ena soqoni ena vaqaqacotaka nomu vakabauta, ena sega tale ga ni vakasesei na nomu vakasama. (Same 35:18) Io, nida vakaitavi ena sokalou vakavuvale ena taqomaki keda mai na rai cala kei na vakatitiqa.

16. Na cava e uqeti ira na lotu vaKarisito lumuti me kua ni vakasesei na nodra vakasama?

¹⁶ Nida vakasamataka na nona vakalougatataki ira nona tamata o Jiova ena levu ni ka era kila ena parofisai vakaivolatabu, eda vakavinavinakataka kina na icovi totoka e se bera mai. Era vakanamata na lumuti mera lai tomani Karisito e lomalagi. E bibi gona me kua ni vakasesei na nodra vakasama! E vakaibalebaletaki tale ga vei ira na lumuti na vosa i Paula vei ira e Cesalonaika: “E dodonu me keitou vakavinavinaka tiko ga vua na Kalou ena vukumuni raveitacini, o kemuni e lomani kemuni o Jiova, ni digitaki kemuni na Kalou . . . ena nona vakasavasavataki kemuni ena yalo tabu vaka tale ga kina na nomuni vakabauta na ka dina.”​—2 Ces. 2:13.

17. Na veivakauqeti cava e tiko ena 2 Cesalonaika 3:​1-5?

¹⁷ Mera saga tale ga o ira na vakanamata ena bula tawamudu e vuravura me kua ni vakasesei na nodra vakasama. Ke o nuitaka na bula e vuravura, kua ni guilecava na veiuqeti vakayalololoma i Paula vei ira na lumuti e Cesalonaika. (Wilika 2 Cesalonaika 3:​1-5.) E dodonu meda vakasamataka vakabibi na veivakasalataki vakayalololoma qori. Io, na ivola vei ira e Cesalonaika e vakadreti keda meda dau qarauna qai kua ni vakabauta na itukutuku e sega ni yavutaki vakaivolatabu. Eda sa volekata tu qo na icavacava, e dodonu meda raica sara vakabibi na lotu vaKarisito na ivakasala qori.