Ni Takali na Kemu Isa

E MATATA vakasigalevu na ka e kaya na iVolatabu: O tagane me ‘lomani watina me vaka ga nona lomani koya.’ Na yalewa tale ga e dodonu “me dokai watina vakalevu.” E dodonu me rau cakacaka vata me vaka rau “lewe dua ga.” (Efeso 5:33; Vkte. 2:​23, 24) Toso na gauna, ena kaukaua na kedrau ivau kei na nodrau veilomani. Na nodrau bula na veiwatini ena vaka ga na veiqaliqali ni rua na waka ni kau ena nodrau veivolekati.

Ia vakacava ke takali e dua na isa ni vakawati? Sa na cavuka ekea na kedrau ivau. O koya e se bula tiko ena vakila na rarawa, galili, de dua ena cudru se ora na lomana. Ena loma ni 58 na yabaki a vakawati tu kina o Daiana, e kilai ira e levu sa takali na kedra isa.a Ia na gauna e takali kina o watina, e tukuna: “Au sega ni vakila tu qo e liu. O na sega ni kila na veika e vakilai kina vakavo ke o sotava sara ga.”

VAKA E SEGA NI OTI NA RARAWA

Era tukuna eso na daunivakadidike ni dau sivia na lomabibi ena gauna e takali kina e dua na isa ni vakawati. Era duavata kei na tikina qori o ira sa takali na watidra. O Millie a takali ena vica na yabaki sa oti o watina, e tukuna ena gauna sa yada kina, “Au vaka sara ga na lokiloki.” E vakaibalebaletaka o koya na ka e vakila ni takali na kena isa, e 25 na yabaki na nodrau vakawati.

A nanuma tu o Susan ni sa sivia tale na nodra lolosi na yada e vakayabaki na nodra rarawataka tu na mate nei watidra. A qai takali o watina ni oti e 38 na yabaki na nodrau vakamau. Sa sivi e 20 na yabaki nona takali, ia e tukuna, “Au dau vakasamataki koya e veisiga.” E dau tagi ena levu ni nona nanumi koya.

E tukuna na iVolatabu ni sega ni marautaki na nona takali e dua na isa ni vakawati, qai taura na gauna me seavu kina na rarawa qori. Ena gauna e takali kina o Sera, e ‘yasovaki koya qai tagicaki koya’ na watina o Eparama. (Vkte. 23:​1, 2) E vakabauta o Eparama na veivakaturi, ia dua na ka na nona rarawa ni takali nona daulomani. (Iper. 11:​17-19) Na gauna tale ga e takali kina o Rejeli, e dredre vei Jekope me guilecavi koya. E dau talanoataka vei ratou na luvena na veika vinaka me baleti Rejeli.​—Vkte. 44:27; 48:7.

Na cava eda vulica mai na rua na ivakaraitaki vakaivolatabu qori? Ni takali e dua na isa ni vakawati, e taura na gauna me seavu na rarawa era dau vakila na watidra. Meda kua ni raica nodra tagi se rarawa me ivakaraitaki ni malumalumu, ia meda raica ni qori na ka e dau yaco ni takali na kena isa e dua. De dua era gadreva tu ena dua na gauna balavu meda veivakacegui da qai tokoni ira.

SASAGA ENA VEISIGA YADUA

E sega ni rawarawa mera lesu tale ina bula vakadawai o ira sa takali na kedra isa. Na dede ni nodrau vakawati e dua na veiwatini, sa na kila o tagane na sala me vakacegui watina kina, me vakayaloqaqataki koya ni rarawa se yalolailai. Ia ni takali o tagane, sa yali tale ga ekea o koya e dauveivakacegui qai dauloloma. E va tale ga qori o yalewa, na balavu ni gauna e vakawati kina ena kila o koya na sala me karona qai vakamarautaki watina kina. Na nona itovo, nona dau vosa vakayalovinaka, kei na nona dau kauaitaka na veika e gadreva kei na veika e vinakata o watina e sega ni vakatauvatani rawa ina dua na ka. Ia ke takali o yalewa, ena galili sara ga o tagane. Koya gona, eso vei ira e takali na kedra isa era dau veilecayaki ra qai lomaleqa. Na ivakavuvuli vakaivolatabu cava ena vukei ira mera vakila na vakacegu kei na marau?

“Mo kua sara ni lomaocaocataka na siga nimataka, ni veisiga yadua ena tu vata kei na kena lomaocaoca. Na siga yadua e sa dui tu ga na kena ca.” (Maciu 6:34) Na vosa qori i Jisu e dau vakaibalebaletaki vakalevu ena veika eda gadreva ena noda bula, ia e sa vukei ira e levu mera vosota na nona takali e dua era lomana. A vola e dua na turaga o Charles ni oti e vica na vula na takali i watina: “Au se nanumi Monique tiko ga vakalevu, eso na gauna e vaka me sa sega ni oti rawa. Ia au kila ni oya na ka e dau yaco, ena seavu tale ga na noqu rarawa ni toso na gauna.”

Io, a vinakati vei Charles me vosota tiko “ni toso na gauna.” A vakayacora vakacava qori? E tukuna, “Ena veisiga yadua au vosota rawa ena veivuke i Jiova.” E sega ni vakalaiva o Charles me vakayalolailaitaki koya na lolosi. E sega ni yali vakasauri na lolosi e vakila, e sega tale ga ni vakamalumalumutaki koya. Ke sa takali na kemu isa, saga ena veisiga yadua mo vosota na nomu lolosi. O sega ni kila na veika vinaka se na veivakayaloqaqataki o na sotava ena veisiga.

E sega ni inaki taumada i Jiova meda mate, e ‘cakacaka ga ni Tevoro.’ (1 Joni 3:8; Roma 6:23) O Setani e vakabobulataki ira na tamata, e vakavuna tale ga me sega nodra inuinui, ena nona vakayagataka na mate kei na rerevaki ni mate. (Iper. 2:​14, 15) E marau o Setani ni dua e yalolailai qai nanuma ni na sega ni vakila na marau kei na vakacegu ena gauna qo kei na vuravura vou ni Kalou. Koya gona, ni yalolailai e dua ena nona lolositaka na takali ni kena isa, qori e vu mai na ivalavala ca i Atama qai dua na ivadi i Setani. (Roma 5:12) Ena vakaotia o Jiova na leqa e vakavuna o Setani, ena nona vakaotia na meca naba dua o mate. E levu era sa sereki mai na veivakabobulataki i Setani, okati kina o ira sa takali na kedra isa, de dua o iko tale ga.

Ena vakilai na veisau ena ivakarau ni nodra veimaliwai ena gauna ena yaco kina na veivakaturi e vuravura. Vakasamataka mada na gauna era na vakaturi kina o ira na itubutubu, ira na tukada, kei na so tale na weka qai vakalesui vakamalua na bula uasivi vei ira, na luvedra, kei na makubudra. Ena sega tale na qase. De dua ena gadrevi vei ira na itabagone ena gauna ya mera veisautaka na ivakarau ni nodra rai me baleti ira na nodra qase. Vakacava eda vakabauta ni veiveisau qori e vakayacori me vinaka kina na bula ni kawatamata?

E levu na taro eda na rairai vakasamataka tiko me baleti ira na vakaturi, me vakataki ira e rua se sivia na watidra era sa takali. Era vakataroga na Setoki me baleta e dua na yalewa e mate na imatai ni watina, ikarua kei na vica tale na watina. (Luke 20:​27-33) Vakacava ena dua tale na isema ena kedra maliwa o ira qori? Eda sega ni kila, e sega tale ga ni yaga meda lai vaqaqa se meda lai via kila na veika va qori. E vinakati ga meda nuitaki Jiova. Dua na ka meda vakadeitaka, ena totoka kece na veika ena cakava o Jiova ena veigauna se bera mai, e dodonu gona meda vakanuinui kina, da qai kua ni rerevaka.

NA INUINUI NI VEIVAKATURI​—IVUREVURE NI VAKACEGU

Dua na ivakavuvuli matata ena iVolatabu, oya na nodra vakaturi na wekada lomani era sa takali. Na itukutuku ena iVolatabu me baleta na veivakaturi e vakadeitaka nira na “rogoca na domona [Jisu] o ira kece na tu ena ibulubulu mera tucake mai.” (Joni 5:​28, 29) Era na marau o ira na bula ena gauna ya nira na veisotari kei ira era sereki mai na mate. Ena yasana adua, sa na wacava na nodra marau o ira na vakaturi.

Nira vakaturi na mate, ena roboti vuravura na marau e sega vakadua ni bau vakilai e liu. Era na vakaturi e bilioni vakacaca era mate tu mera maliwai ira tale na bula. (Mari. 5:​39-42; Vkta. 20:13) Nida vakasamataka vakatitobu na cakamana me baleta na veigauna se bera mai, e dodonu me vakacegui ira sa takali na wekadra lomani.

E tiko na vuna meda marautaka kina na veivakaturi vakatubuqoroqoro ya. Me vaka e volai ena Aisea 25:​8, o Jiova “ena vakaotia sara na mate.” Qori e okati kina na kena vakaoti vakadua na revurevu ni mate, ni tomana na parofisai ya: “Na Turaga ko Jiova ena tavoya na wai ni mata mai na matadra na tamata kecega.” Ke o lolositaka tiko ena gauna qo na takali ni kemu isa, ena vakamarautaki iko dina na inuinui ni veivakaturi.

Eda sega ni kila na veika kece ena vakayacora o Jiova ena vuravura vou. E kaya o Jiova: “Me vaka na kena cecere cake na lomalagi ki vuravura, sa cecere cake vakakina na noqui valavala ki na nomudoui valavala, kei na noqu vakanananu ki na nomudou vakanananu.” (Aisea 55:9) Na veika e yalataka o Jisu me baleta na veivakaturi sa roro tiko mai e vakavuna meda nuitaki Jiova, me vakataki Eparama ga. E bibi gona vei keda yadua na lotu vaKarisito nikua meda muria mada ga na ka e tukuna na Kalou, me rawa nida ‘vakadonui meda bula ena gauna se bera mai’ kei ira era na vakaturi.​—Luke 20:35.

VUNA ME TIKO KINA NODA INUINUI

Meda kua ni lomaleqa, meda saga me tiko noda inuinui. Ena rai vakatamata, e butobuto tu na veigauna se bera mai. Ia o Jiova e yalataka tu na veika vinaka meda vakanuinui kina. Eda sega ni kila na sala ena vakacegui keda kina o Jiova, ia meda vakabauta ni na cakava qori o koya. E vola na yapositolo o Paula: “Na inuinui e laurai e sega ni inuinui, eda na vakanuinuitaka vakacava na ka eda raica? Ia nida nuitaka na ka eda sega ni raica, eda na waraka ga ena vosota na ka eda nuitaka qori.” (Roma 8:​24, 25) Ni dei nomu nuitaka na veika e yalataka na Kalou, ena uqeti iko mo vosota. Ni o vosovoso, o na bula ena veigauna vinaka se bera mai qai ‘solia vei iko o Jiova na ka o gadreva.’ Ena vakamamautaka “na ka bula kecega e na ka era gadreva.”​—Same 37:4; 145:16; Luke 21:19.

Eratou lomaleqa na yapositolo ena gauna e voleka ni mate kina o Jisu. Sa qai vakacegui ratou o Jisu ena nona kaya: “Dou kua ni lomaleqa. Dou vakabauta na Kalou, dou vakabauti au tale ga.” E kuria: “Au na sega ni laivi kemudou mo dou luveniyali. Au na lako mai vei kemudou.” (Joni 14:​1-4, 18, 27) Na vosa qori i Jisu e vukei ira nona imuri lumuti ena veisenitiuri tarava mera vosota, me tu tale ga vei ira na inuinui. O ira tale ga era via raici ira na wekadra lomani ena veivakaturi, e sega ni dodonu mera yalolailai. O Jiova kei Luvena erau na sega ni laivi ira qori mera lolosi tu ga. Kua ni vakatitiqataka ya!