‘Na Kalou e Vu ni Vosota kei na Veivakacegui’

ENA rauta na 2,000 na yabaki sa oti, a vakamacalataki Jiova na dauvola iVolatabu o Paula me ‘Kalou e vu ni vosota kei na veivakacegui.’ (Roma 15:5) E vakadeitaka vei keda na iVolatabu ni o Jiova e sega ni dau veisau ni toso tiko na gauna, eda nuidei gona ni na dau vakacegui ira na qaravi koya. (Jemesa 1:​17) E vakaraitaka na iVolatabu ni levu na sala e dau vakacegui ira kina na gadreva tu mera vakacegui o Jiova. Sala cava soti beka? Nira kere veivuke yani vua ena masu, ena vakaukauataki ira. Dau uqeti ira tale ga na lotu Vakarisito dina mera vakacegui ira na nodra itokani era vakabauta vata. E vakarautaka na itukutuku veivakauqeti ena nona Vosa na iVolatabu, mera vakaukauataki kina na lolositaka tu na takali ni luvedra. Meda dikeva mada oqo e tolu na ivakaraitaki ni nona veivakacegui.

“Sa Vakarorogo ko Jiova”

E vola o Tui Tevita me baleti koya na Dauveibuli, o Jiova: “Dou vakararavi vua e na veisiga kecega; oi kemudou na tamata, dou sova yani na lomamudou e matana: sa nodai drodro na Kalou.” (Same 62:8) Na cava e nuitaki Jiova kina vaka oqori o Tevita? E vola o Tevita ni vakamacalataka na veika e sotava: “Sa tagi na tamata dravudravua oqo, ka sa vakarorogo ko Jiova, ka vakabulai koya mai na nona rarawa kecega.” (Same 34:6) Na ituvaki rarawa kece e sotava o Tevita, e dau masuta na veivuke ni Kalou, qai vukei koya kina o Jiova ena veigauna. E kila o Tevita mai na veika sa sotava oti ni na tokoni koya tu ga na Kalou, ena vukei koya tale ga me dau vosota.

Mera kila na itubutubu ni na vakaukauataki ira tale ga o Jiova ena gauna era rarawa kina vakalevu, me vaka ga a cakava vei Tevita. Era rawa ni torovi koya “sa daurogoca na masu,” ra qai nuidei ni na vukei ira. (Same 65:2) O William, a tukuni taumada ena ulutaga sa oti, e kaya: “Sa sega ni vinaka vei au na bula ena levu na gauna ni sa yali e tikiqu na luvequ tagane, au qai kerei Jiova me vakacegui au. Sega wale ga ni dau vakaukauataki au o koya, e vakayaloqaqataki au sara ga meu kua ni yalolailai.” Kevaka tale ga o dau masuti Jiova ena vakabauta, ena vakaukauataki iko na Kalou cecere ni lomalagi oqo. E yalataka na Kalou o Jiova vei ira na gumatua na qaravi koya: “Ni sai au ko Jiova na nomu Kalou, ka’u na taura na ligamu i matau, ka kaya vei iko, Mo kakua ni rere; ka’u na vukei iko.”​—Aisea 41:13.

Era Veitokoni na iTokani Dina

O ira na itubutubu sa takali na luvedra era dau vinakata e dua na gauna mera na lolosi taudua ra qai vakasama tale ga kina. Ia, e sega ni vinaka mera tiko taudua vakabalavu ra qai sega ni veimaliwai. Kaya na Vosa Vakaibalebale 18:​1, ni o koya e “tawasei koya tani” e rawa ni sotava na leqa. Bibi gona mera qarauna na tikina oqo na lolosi tiko.

O ira na itokani dau rerevaka na Kalou era rawa ni vukei ira na rarawa voli. E kaya na Vosa Vakaibalebale 17:17: “Sa loloma tiko e na veigauna kece na wekana [itokani] na tamata, ka sa vaka na tacina e na gauna ni rarawa.” E vakila o Lucy, a tukuni ena ulutaga sa oti, na nodra veivakacegui na nona itokani ena gauna e takali kina na luvenatagane. E kaya me baleti ira nona itokani vakabauta ena ivavakoso: “E vukei keirau vakalevu na nodra veisiko, dina ni sega ni levu na ka era kaya. Dua e dau sikovi au mai ena siga sara ga au tiko taudua voli kina. E kila niu na baci tagi tiko, keirau mai veitagicaki vata toka. Dua tale e dau qiri mai ena veisiga me vakayaloqaqataki au. So era dau sureti keirau tu ga me keirau lai kana ena nodra vale.”

Dau dede na rarawa era vakila na itubutubu e takali e dua na luvedra, ia era na kunea na vakacegu kevaka era masuti Jiova, ra qai vakasosoqoni wasoma kei ira na itokani lotu Vakarisito. Levu na itubutubu lotu Vakarisito e takali na luvedra era dau vakila ni tiko kei ira o Jiova. Sega ni vakabekataki ni o Jiova e dau “vakabulai ira sa ramusu na yalodra, ka sa vauca na nodra vue.”​—Same 147:3.

iTukutuku ena iVolatabu e Veivakacegui

Me ikuri ni yaga ni masu kei ira na itokani vakabauta vata, e vu ni veivakacegui levu tale ga na Vosa ni Kalou na iVolatabu vei ira na lolosi tu. E vakamacalataki ena itukutuku ni iVolatabu na kaukaua i Jisu kei na nona vinakata me vakaotia sara ga na nodra rarawa na itubutubu, ena nona vakaturi ira na mate. Sa bau veivakacegui dina vei ira na lolosi tu na itukutuku vaka oya. Meda dikeva mada oqo e rua na itukutuku oqori.

E vakamacalataki ena Luke wase 7 na ka a yaco ena gauna e sotava kina o Jisu e dua na ilakolako ni veibulu ena koro o Neini. Era vakarau buluta tiko na luvena duabau e dua na yada. Kaya na tikina e 13: “Ni sa raici koya na Turaga, sa lomana, ka kaya vua, Kakua ni tagi.”

Vica wale sara era na doudou ni tukuna vua na tina e leqa na luvenatagane me kua ni tagi ena gauna ni veibulu. Ia cava ga e tukuna kina vua o Jisu me kua ni tagi? E kila vinaka tu o koya ni sa vakarau oti nona rarawa na tina oya. Tomana na kena itukutuku: “A sa lako ko koya [Jisu], ka tara na tavata: a ra sa tu vakadua ko ira sa colata. A sa kaya ko koya, Ko iko na cauravou, au sa kaya vei iko, Tu cake. A sa duri cake na mate, ka vakatekivu me vosa. A sa solia ko koya vei tinana.” (Luke 7:​14, 15) A rairai tagi tale ga na tina oya ena levu ni nona marau.

Dua tale na gauna a kerei Jisu e dua na turaga o Jairo me vakabula na luvenayalewa yabaki 12 sa tauvimate bibi tu. Sega ni dede sa rogo yani ni sa leqa. Rarawataka dina o Jairo na itukutuku oya, ia e tukuna vua o Jisu: “Kakua ni yalolailai, vakabauta tiko ga.” Ni ratou sa yaco yani i vale, a lai raica sara o Jisu na goneyalewa oqo. E taura na ligana qai kaya: “Goneyalewa lailai, au sa kaya vei iko, tucake!” Na cava e yaco? “Mai tucake sara yani na goneyalewa ka veilakoyaki.” Cava erau cakava nona itubutubu? ‘Erau kurabui vakalevu.’ Dua na ka na marau i Jairo kei watina ni rau sa mokoti luvedrau tale. Vaka ga rau tadra tiko.​—Marika 5:​22-​24, 35-43, VV.

Na itukutuku matata vaka oqori ena iVolatabu me baleta na nodra vakaturi na gone, era rawa ni rai vakanamata kina na itubutubu era lolositaka tiko nikua na takali ni luvedra. E kaya o Jisu: “Sa lako mai na gauna era na rogoca kina na domona ko ira kecega e nai bulubulu, a ra na lako maikina.” (Joni 5:​28, 29) Nona inaki o Jiova me vakabulai ira na sa mate o Luvena. Era na ‘rogoca na domona’ na vica na milioni na gone era sa mate ni tukuna vei ira: “Au sa kaya vei iko, tucake mai.” Era na veilakoyaki, ra qai veivosaki tale na gone oqori. Me vakataki Jairo ga kei na watina, era na “kurabui vakalevu sara” na itubutubu.

Kevaka gona sa takali na luvemu yalewa se tagane, nanuma tiko ni o Jiova e rawa ni veisautaka nomu rarawa me marau ena vuku ni veivakaturi. Mo rawa ni vakalougatataki ena inuinui lagilagi oqo, sa dodonu mo muria na veiuqeti ni daunisame: “Dou vakasaqarai Jiova, kei na nona kaukauwa: dou vakanamata tikoga vua. Dou nanuma na nona cakacaka e veivakurabuitaki sa cakava ko koya; ia, na nona cakacaka mana.” (Same 105:​4, 5) Qarava na Kalou dina o Jiova, qai sokalou vua ena sala e vakadonuya.

Na cava beka na yaga ni noda “vakasaqarai Jiova”? Nida masuta na Kalou eda na vakaukauataki kina, ena vakacegui keda tale ga na nodra veikauaitaki vakayalololoma na itokani lotu Vakarisito, vaka kina na veiuqeti ni kena vulici na Vosa ni Kalou. Kuria oya, eda sa volekata sara yani na kena vakadinadinataki na ‘cakacaka veivakurabuitaki kei na cakamana’ ena cakava o Jiova meda vakalougatataki kina me tawamudu vaka kina o ira na luveda era sa mate.

[Kato ena tabana e 5]

“Kauti Koya Mada Mai na Marama a Takali e Rua na Luvena”

Rau a laucoqa mate e rua na luve i Kehinde kei Bintu, e dua na veiwatini ni Nigeria, erau iVakadindina i Jiova. Tekivu mai na gauna oya, rau rarawataka tu ga na ka a yaco. Ia, e vakaukauataki rau nodrau nuitaki Jiova, rau tomana tiko ga kina nodrau wasea vei ira na tiko tikivi rau na inuinui totoka mai na iVolatabu.

Era raica rawa e so ni rau kaukaua vinaka tu o Kehinde kei Bintu rau qai lomavakacegu. Dua na siga sa tukuna sara e dua na marama, o Mrs. Ukoli, vua e dua na itokani i Bintu: “Kauti koya mada mai na marama a takali e rua na luvena, e dau vunautaka na itukutuku mai na iVolatabu. Au via kila se cava e vakaukauataki koya me dau vosota.” Ni yaco yani o Bintu ena vale ni marama oqori, e kaya vua o Mrs. Ukoli: “Au via kila se cava o vunautaka tiko kina na veika e baleta na Kalou a vakamatei rau na luvemu. A vakamatea na luvequ yalewa duabulu na Kalou. Tekivu mai na gauna oya, au sega sara ga ni via kilai koya.” Vakayagataka o Bintu na iVolatabu me vakamacalataka na vu ni nodra mate tiko na tamata, na vuna tale ga meda nuitaka kina nira na vakaturi dina na noda daulomani era sa mate.​—Cakacaka 24:15; Roma 5:​12.

Sa qai kaya o Mrs. Ukoli: “Au dau nanuma tu ga ni vakavuna na Kalou nodra mate na tamata. Au sa qai kila oqo na kena dina.” Mani vakatulewataka me vulica na iVolatabu kei ira na iVakadinadina i Jiova me kila e so tale na ka me baleta na vosa ni yalayala ni Kalou.

[Kato ena tabana e 6]

‘Au Via Veivuke, ia Au Sega ga ni Kila na Ka Meu Cakava’

Ni rau rarawa voli na itubutubu kei ira na tacina na gone e takali, era na via lomalomarua na veivuke na nodratou itokani. Era na via vukei iratou dina, ia era lomaleqataka de cala na ka era kaya se cakava, qai kuria ga na nodratou rarawa. Oqo e so na vakatutu vei ira na rairai nanuma, ‘Au via veivuke, ia au sega ga ni kila na ka meu cakava.’

❖ Kevaka o sega ni kila na ka mo kaya se cakava, e sega ni kena ibalebale oqo mo sa kua sara ga ni lako vei iratou na lolosi tiko. Ena vakaukauataki iratou na nomu lako mada ga yani. O sega beka ni kila na ka mo kaya? Eratou na vakila na nomu veikauaitaki dina ni o lululu vei iratou, o kaya tale ga mai vu ni lomamu: “Isa, au duavata kei kemudou ena nomudou rarawa.” Vakacava o leqataka ni ratou na qai rarawa ga vakalevu ke o tagi? E kaya na iVolatabu: “Tagi vata kei ira era sa tagi.” (Roma 12:15) Nomu tagi gona ena vakaraitaka ni o duavata kei iratou ena nodratou rarawa, ena vakacegui iratou tale ga.

❖ Vakaliuliu. Rawa sara ga ni o vakarautaka e dua na kakana lailai vei iratou na vuvale oya. Se mo masia na iyayanikana duka era sa kumuni tu. O rawa ni lai kauta mai na ka eratou vinakata. Mo kua ni kaya, “Kevaka dou vinakata e dua na ka, dou qai tukuna ga yani.” Kevaka mada ga e tukuni ena inaki donu, na veivosa oqori sa vaka ga e tukuna tiko vei rau na itubutubu erau lolosi ni o osooso mo veivuke. Ia, o rawa ni taroga “Dua beka na ka au rawa ni veivukei kina oqo?” o qai cakava sara na ka eratou kerea. Ia, kua ga ni siosio tale na lako vakaveitalia e lomanivale, se mo siova na ka eratou via cakava.

❖ Kua ni tukuna, “Au kila sara ga na ka dou vakila tiko.” E sega ni tautauvata na ka era dau vakila na tamata ena gauna e takali kina e dua nodra dau lomani. Ke a leqa tale ga e dua na luvemu, o na sega ni kila na ivakarau dina ni lomadratou oqori.

❖ Ena taura toka e dua na gauna me na qai vinaka tale na nodratou ivakarau ni bula me vaka ga e liu. Mo veivuke tiko ga ena kena levu o rawata. Dau kena ivakarau ga mera kauaitaki vakalevu na lewenivuvale era lolosi tiko ena dua ga na gauna lekaleka, ia e levu na ka era na vinakata ni toso tiko na gauna. Vukei iratou ena veika eratou na gadreva ena veimacawa kei na veivula e tarava.a

[iVakamacala e ra]

[iYaloyalo ena tabana e 7]

E vakaraitaki ena itukutuku ni iVolatabu na kaukaua e tu vei Jisu kei na nona vinakata dina me vakaturi ira na gone