Au Malumalumu, ia e Vakaukauataki au o Jiova

Au dau vakasamataka na gauna vinaka niu se gone ena neitou itikotiko ena taudaku ni siti ena ceva kei Varanise. A cakava o tamaqu e dua noqu ililili, au taleitaka tale ga meu dau qito ena neitou lomanibai. Ena 1966, era lako mai vale na iVakadinadina i Jiova, era veitalanoa sara kei Ta. Ni oti e vitu na vula, a tukuna o koya ni sa na iVakadinadina i Jiova. Sega ni dede e cakava tale ga qori o Na rau qai susugi au ena dua na vuvale e veilomani.

Ni keitou lesu i Sipeni na vanua rau cavutu mai kina na noqu itubutubu, e vutu culacula na ligaqu kei na noqu qurulasawa. E levu na vuniwai keitou lai raica, ni oti e rua na yabaki keitou gole vua e dua na vuniwai kilai levu e kenadau ena vakadikevi ni mate ni isema ni yago. E kaya, “Au sa sega ni cakava rawa e dua na ka.” E tagi sara ga o Na ni rogoca qori. E tukuna o vuniwai ni tauvi au na mate ni sui e dau tauvi ira ga na gone. Na sotia ni yagoqu e sa vakamatea na viciko ni yago, vakavuna me vuce qai mosi. Au se yabaki 10 qai sega ni levu na ka au kila, ia na ka au rogoca au siqema kina ni sega ni vinaka na kequ ituvaki.

A vakatututaka sara o vuniwai meu lai qaravi ena vale era dau vakabulabula kina na gone era tauvimate bibi. Au sega ni taleitaka na ivakarau ni veiqaravi e kea. Era kotiva na uluqu na sista qai solia vei au na isulu makawa meu tokara. ‘Ena rawa vakacava meu bula eke?’ Au veinanuyaka ena yalorarawa.

NOQU ITOKANI O JIOVA

Rau a vakavulici au na noqu itubutubu meu qaravi Jiova duadua ga, au sega gona ni via vakaitavi ena nodra sokalou na lotu Katolika. E dredre vei ira na sista mera ciqoma qori. Au kerei Jiova me kua ni biuti au. Au vakila sara ga na lomavakacegu kei na veikaroni i Jiova me vaka ga e dua na tama dauloloma.

A vakatarai me rau sikovi au vakalekaleka na noqu itubutubu ena veisiga Vakarauwai. Erau dau kauta mai eso na noqu ivola vakaivolatabu meu dau wilika me kaukaua tiko ga kina na noqu vakabauta. Vakalevu me sega ni dua na gone e kea e tu na nona ivola, ia era vakatara na sista meu maroroya na noqu iVolatabu kei na so tale na ivola au qai wilika e veisiga. Au dau talanoataka tale ga vei ira keimami tiko vata na noqu inuinui ni bula tawamudu ena Parataisi, sa na sega kina na tauvimate. (Vakatakila 21:3, 4) Ena so na gauna au dau rarawa qai galili, ia e sega ni luluqa na noqu vakabauta kei na noqu nuitaki Jiova.

Ni oti e ono na vula, sa tukuna o vuniwai meu lako i vale. E sega ni veisau na kequ ituvaki, ia au marau niu lesu tale vei rau na noqu itubutubu. Sa bulicaki vakatani na noqu qurulasawa kei na ligaqu qai dua na ka na kena vutu. Na gauna au tubu cake kina, au sega ni kaukaua me vakataki ira na vo ni itabagone. Ia niu vinakata meu qarava na Tamaqu vakalomalagi ena noqu vinaka taucoko au papitaiso niu se yabaki 14. Ena so na gauna, au nanuma ni sa guilecavi au o koya. Au masuta, “Na cava e yacovi au kina qo? Yalovinaka vakabulai au. O sega ni raica na levu ni noqu rarawa?”

E dredre dina na noqu bula vakaitabagone. Au sa na ciqoma ga ni sa na sega ni vinaka na kequ ituvaki. Ia au saga me tu vei au na rai donu me baleta na kequ ituvaki. Au dau vakatauvatani au kei ira na noqu itokani—nira bulabula qai levu na ka era rawa ni cakava. Qo e vakavuna meu beci au qai maduataka na kequ ituvaki. Ia era tokoni au na noqu itokani kei na noqu vuvale. E dua na noqu itokani nuitaki o Alicia e qase vei au ena 20 na yabaki. A tukuna o koya meu kua ni vakasamataka vakalevu na kequ mate, ia meu saga meu dau veimaliwai.

SALA E VAKAINAKI KINA NOQU BULA

Sa qai ca sara na kequ ituvaki niu sa yabaki 18, qai ka ni oca meu lako ena soqoni. Ia au vakayagataka vinaka sara na gauna au tiko kina e vale meu vulica vakatitobu na iVolatabu. Na ivola na Jope kei na Same e vukei au meu kila ni bibi ena gauna qo na nona veitaqomaki vakayalo o Jiova, mai na veitaqomaki vakayago. Noqu dau masu vagumatua au vakila kina “na kaukaua e uasivia na kaukaua ni tamata” kei na “vakacegu ni Kalou e uasivia na vakasama kece.”—2 Korinica 4:7; Filipai 4:6, 7.

Niu yabaki 22, au kila niu sa na vakayagataka na idabedabe qiqi ena vo ni noqu bula ni sa ca sara na kequ ituvaki. Au vakasamataka nira sa na raici au na tamata meu vaka e dua na lokiloki. Ia e cala noqu rai, ni rawa niu cakava e levu na ka. A uqeti au na noqu itokani o Isabel me keirau saga ena dua na vula me keirau rawata e 60 na aua ena cakacaka vakavunau.

Au nanuma ni na sega ni rawa, ia ena veivuke i Jiova, noqu vuvale kei na itokani, au vakayacora rawa kina. Ni oti na vula oya, au kila niu sa sega ni rere se madua. Niu marautaka vakalevu qori, au vakatulewataka kina ena 1996 meu painia tudei, oya meu vakayagataka e 90 na aua e veivula ena vunau. Qo na vakatulewa vinaka duadua au cakava, e vakavolekati au vua na Kalou, e vakaukauataki au tale ga vakayago. E rawa gona meu wasea vei ira e levu na noqu vakabauta, qai vakavulica eso mera itokani ni Kalou.

KARONI AU TIKO GA O JIOVA

Ena vula ikatakata ni 2001, au coqa qai ramusu ruarua na yavaqu. Niu davo tu e valenibula ena levu ni mosi, au masuta lo: “Kerekere Jiova kua ni biuti au.” Ni oti qori e tarogi au na marama e davo volekati au toka, “Oni iVakadinadina i Jiova?” Niu malumalumu vakalevu au kurea ga na uluqu. E tukuna tale, “Au kilai kemuni. Au dau wilika na nomuni ivola.” E vakayaloqaqataki au sara ga na vosa ya. Ena ituvaki au tu kina, au se rawa ga ni vakadinadinataki Jiova. Qori e itavi dokai dina.

Ni sa vinaka vakalailai na kequ ituvaki, au nanuma meu vunau ena so tale na vanua. E dau biligi au wavoki ena qiqi e valenibula o tinaqu ni simedetaki tu na yavaqu. Keirau dau sikovi ira e vica, veitalanoa, qai solia na nodra ivola vakaivolatabu. Au dau wawale sara ga ni oti neirau veisiko, ia e dau vakaukauataki au o Jiova.

Ena vica na yabaki sa oti, e kuria na noqu mosi kei na rarawa na nona takali o tamaqu. Ia au saga meu kua ni vakasamataka vakalevu. Ena sala cava? Noqu dau veimaliwai kei na noqu vuvale kei ira na noqu itokani. Qo e vukea meu kua ni vakasamataka vakasivia na noqu leqa. Niu tiko taudua, au dau wilika qai vulica na iVolatabu se vunau ena talevoni.

Au saga tale ga meu marautaka eso na ka lalai me vaka na mudre ni cagi se na boi kamica ni senikau. Ena so na gauna au dau dredrevaka eso na ka au cakava. Ena dua na siga ni keirau cegu vakalekaleka kei noqu itokani ena cakacaka vakavunau me volavola, au kidacala niu sa qiqi sobu qai coqa e dua na motoka e kele tu. Keirau kidroa vakalevu, ia ni sega ni dua na leqa e yaco keirau tabaka na veidredrevaki.

E levu na ka au sega ni cakava rawa ena gauna qo. Au vakatoka qori me noqu gagadre ena qai vakayacori ena gauna se bera mai. Levu na gauna au raitayaloyalotaka niu sa tu ena vuravura vou e yalataka na Kalou. (2 Pita 3:13) Au sa bulabula vinaka, au veilakoyaki qai marautaka vakalevu na bula. Au dau vakasamataka vakabibi na vosa i Tui Tevita: “Mo waraki Jiova: Gugumatua, ena qai vakataudeitaka na yalomu.” (Same 27:14) E dina sa malumalumu tiko ga na yagoqu, ia e vakaukauataki au o Jiova.