Au Marau Tiko Ga Dina ni Vakaleqai na Yagoqu

Talanoataka o Paulette Gaspar

E dina ni tolu na kilokaramu na kequ bibi ena siga au sucu kina, e kila o vuniwai ni dua na leqa levu e manati au tiko. E ramusu na noqu sui ena gauna au sucu kina. E tauvi au na mate e vakatokai na osteogenesis imperfecta, se sa rui malumalumu na noqu sui. Au kau vakatotolo ena vanua ni veisele, era sega ni vakabauta na vuniwai niu na bula. Era namaka meu sa na mate ga ena siga ya.

AU SUCU e Canberra, na koroturaga kei Ositerelia ena 14 June, 1972. Dina ga ni nanumi niu na mate, ia au bulata rawa na imatai ni siga. Oti, sa qai tauvi au na niumonia. Nira nanuma na vuniwai niu na mate, era sega kina ni via solia vei au e dua na wainimate, “me waraki ga meu mate.” Ia au a bula.

Au vakasamataka na dredre ni gauna ya vei rau na noqu itubutubu. E sega ni vakabauti niu na bula, ra mani vakasalataki rau na noqu itubutubu na veiqaravi e valenibula me rau kua sara ni vakavolekati rau vei au. Ena imatai ni tolu na vula noqu curu tu e valenibula, a sega ni vakatarai me rau tarai au na noqu itubutubu. E rivarivabitaki na totolo ni noqu rawa ni mavoa. Ni kilai au sa na bula, ratou mani vakatura na vuniwai vei rau noqu itubutubu me rau kauti au ena vale ra qaravi kina na gone e vakaleqai tale ga na yagodra.

Rau mani vakatulewataka na noqu itubutubu me rau kauti au ga i vale. Ena gauna qo sa qai tekivu vuli iVolatabu tiko kina o tinaqu kei ira na iVakadinadina i Jiova. E uqeti koya vakalevu na ka e vulica ni dodonu ga me qaravi au. Ia ena via dredre toka me keirau veivolekati, ni taura na gauna, e cakacaka levu tale ga me qarava vakavinaka sara na veika au gadreva. Au kau vakalevu e valenibula. Rawarawa sara ni ramusu na noqu sui ena veika lalai sara mada ga e caka vei au me vaka na noqu vakasilimi. Keu suru mada ga, se rawa ga ni ramusu e dua na noqu sui.

Au Lomabibi

Niu tubu tiko, au dau dabe voli ga ena idabedabe qiqi, e yawa kalia sara na vakavuvuli lako. Dina ga ni dredre na noqu bula, dua na ka na nodrau qaravi au vinaka na noqu itubutubu.

Me kena ikuri, e tovolea ena nona vinaka taucoko o tinaqu me vakavulici au ena itukutuku veivakacegui ena iVolatabu. Kena ivakaraitaki, e vakavulica vei au ni Kalou ena veisautaka me parataisi na vuravura ena dua na gauna sa tu qo e liu, me marautaki kina na bula vakayalo e uasivi, vinaka na ivakarau ni vakasama, da qai bulabula vakayago. (Same 37:10, 11; Aisea 33:24) Ia a sega ni qai wereubiubi tale o tinaqu ni vakamacalataka niu na sega soti ni marautaka na bula ena gauna qo me yacova na gauna ya.

Taumada au a lai vuli ena nodra koronivuli na gone e vakaleqai na yagodra. Era sega ni vakavulica na noqu qasenivuli meu tekia e dua na noqu isausau, au sega tale ga ni kauaitaka meu cakava kina e dua na ka. E bau dredre tale toka ga vei au na vuli ni sega soti ni dau vinaka na nodra itovo vei au e levu na gonevuli. E muri, au sa qai vuli ena dua ga na koronivuli era vuli kina na gone e vinaka tu na yagodra. Meu veimaliwai mada ga kei ira tale na so, e vakayagataki kece kina noqu kaukaua, vakasama, kei na lomaqu. Au vakadeitaka ga meu vakacavara vinaka na 12 na yabaki ni noqu vuli.

Niu vuli tiko ena sekeneri au raica ni sega ni vakainaki na nodra bula na gone keimami vuli vata. Au kila ni dina na ka e vakavulici au kina o tinaqu ena iVolatabu, ia au sega ni taura vakabibi. Ena gauna ya a se sega ni tara na lomaqu na ivakavuvuli vakaivolatabu. Au mani nanuma ena dua na gauna meu qara mada na marau kei na lasa, meu kua ni vakasamataka se cava ena yaco mai muri.

Niu yabaki 18, au toki meu lai tiko kei na so e vakaleqai tale ga na yagodra. Au vakila kina na marau, e rerevaki tale toka ga na noqu toki qo. E vaka meu kunea kina eso tale na galala, au lewai au ga, au veimaliwai kei ira noqu itokani, levu vei ira era vakawati. Au vinakata tale ga me dua na kequ isa ni vakamau, meu lomani tale ga. Ia ena bau dredre toka meu kunea e dua na kequ isa baleta na ituvaki ni yagoqu. E dau vakararawataki au dina niu vakasamataka.

Ia au sega vakadua ni beitaka na Kalou ena kequ ituvaki. Au kila ni yawa kalia sara vua me cakacaka vakatawadodonu. (Jope 34:10) Au saga meu lomavakacegu ena kequ ituvaki, ia au lomabibi kina vakalevu.

Taura na Gauna Meu Qai Bula Vinaka

Au vakavinavinaka ni a kila na kequ ituvaki o tinaqu, mani qirita e dua na qase ena ivavakoso, voleka ga ena vanua au vakaitikotiko kina. E qiriti au sara yani na qase qo, sureti au ina soqoni vaKarisito ena nodra Kingdom Hall na iVakadinadina i Jiova. Kuria oya na nona vakavulici au ena iVolatabu e veimacawa e dua na taciqu vakayalo ena ivavakoso.

A veisau vakamalua na noqu raica na bula ena noqu vakananuma tale na ka dina a vakavulica vei au o tinaqu ena vica na yabaki sa oti. E ka marautaki na veimaliwai kei ira na taciqu lotu vaKarisito. Ia au qarauna sara meu kua ni cakava e dua na ka me lai vakamosia wale kina na lomaqu. Au vakabauta ni qo e vakadredretaka me titobu na noqu lomana na Kalou. Ia au kila ni dodonu meu na yalataka na noqu bula vua. Ena Tiseba ni 1991 au mai papitaiso kina meu vakaraitaka na noqu yalayala.

Au biubiu mai na vale keimami dau tiko kina kei ira noqu itokani e vakaleqai tale ga na yagodra meu lai saumi rumu duadua. E yaga na veisau au cakava qo e vakavu leqa tale ga. Me kena ivakaraitaki, au galili, au rerevaka tale ga de dua na siga era na curuma yani vakatawadodonu na noqu vale o ira na tagane. Na ka qo e vakavuna tale meu lomabibi, au dau matadredredre, ia e sega ni vinaka sara na noqu bula. Au gadreva sara ga e dua na noqu itokani vinaka ena tokoni au e veigauna.

Au vakila ni noqu itokani vinaka ga na Kalou o Jiova. Era tuvanaka na qase ni ivavakoso au lewena meu tomana na noqu vulica na iVolatabu kei Suzie, e dua na marama lotu vaKarisito vakawati. A sega ni vakavulici au ga o Suzie, ia e noqu itokani voleka au dau lomana vakalevu.

E vakavulici au o Suzie meu vukei ira na so ena ka au sa vulica​—ena noqu cakacaka vakavunau e veivale kei na noqu vunau ena so tale na vanua. Ena gauna qo au sa qai taleitaka vakalevu na nona itovo na Kalou. Dina ga niu sa papitaiso, e sega ni titobu na noqu lomana na Kalou. Au a nanuma sara ga ena dua na gauna meu sa kua ni qaravi koya. Au mani talaucaka na lomaqu vei Suzie, e vukei au kina o koya.

E vakamacalataka o Suzie ni vakavuna tale ga vakalevu na noqu rarawa na noqu vakailala kei ira era sega ni lomani Jiova dina. Tekivu sara ga e ke noqu vakailala kei ira na matua vakayalo​—vakauasivi o ira na itabaqase. A tadre tale ga vakalailai na neirau veiwekani kei tinaqu, ia au mani vakavinakataka tale, vaka kina na neirau veiwekani kei ganequ. Au kurabuitaka ni marau au vakila ena gauna qo, au sega tu ni dau vakila e liu. E vu ni reki kei na kaukaua vei au o ira na taciqu vakayalo, noqu lewenivuvale, vakauasivi o Jiova.​—Same 28:7.

Dua na Cakacaka Vou

Au rogoca e dua na ivunau ena dua na soqo ni tikina, ni vakabibitaka na nodra marau na veiqaravi vakatabakidua ena cakacaka vakaitalatala vaKarisito. E soli vakasama dina vei au niu na rawa tale ga ni cakava. Au kila ni na dredre toka baleta na kequ ituvaki vakayago. Ia au masulaka, oti au vakalewena sara na fomu meu veivakavulici vakatabakidua ena iVolatabu, qori e tekivu ena Epereli 1998.

Au na vunau rawa vakacava ni vakaleqai tu na yagoqu? E noqu ivakarau ni bula meu cakava vakataki au na ka, au sega ni dau via vakaogaoga vua e dua, se meu vakararavitaka vua na noqu veilakoyaki se so tale na ka ni veivuke. Rau vakatura o Suzie kei nona lewenivale o Michael, meu volia e dua na motopai! Au na vodoka vakacava? Me vaka ga e laurai toka ena kequ itaba ni a buli vakatabakidua na motopai me baleta na kequ ituvaki. A sega mada ga ni vinakati meu sobu mai na noqu idabedabe qiqi!

Na sala vou ni noqu veitosoyaki qo e rawa kina meu sikovi ira tale na so meu vakavulici ira ena iVolatabu ena gauna e veiganiti vei au, kei ira tale ga. Au taleitaka dina na noqu dau vodo motopai me qai liwava toka na mataqu na cagi​—dua na ka lailai ga e marautaki kina na bula!

E talei vei au meu dau veitalanoa kei ira au sotava e salatu, nira dau vosa vakayalovinaka ra dokai au tale ga. Au dau marautaka na veituberi ena iVolatabu. Au nanuma lesu sara ena dua na gauna keirau cakacaka vakavunau kina kei na dua na noqu itokani e balavu toka vei au. Ni vakabula yani o noqu itokani, a vakaraici au toka ga mai o taukeinivale qai taroga, “E rawa ni vosa?” Keirau veiraici ga qai kacabote na neirau dredre. Ni oti noqu vunau vua na marama ya, sa qai kila o koya niu rawa dina ni vosa!

Au marautaka na noqu bula ena gauna qo, au lomana dina na Kalou o Jiova. Au vakavinavinakataka dina na marama na tinaqu ni vakavulici au ena ka dina vakaivolatabu. Au vakanamata ena nuidei ina gauna sa tu qo e liu, ena ‘vakavouya kina na ka kecega’ na Kalou oka kina na yagoqu midikai qo.​—Vakatakila 21:4, 5.

[Tikina bibi ena tabana e 26]

“Au saga meu lomavakacegu ena kequ ituvaki, ia au lomabibi kina vakalevu”