E Dua e Kila na Veika se Bera ni Yaco?

Eda dau vakasamataka na veika se bera ni yaco. Eda dau veinanuyaka se na vakacava na noda bula kei na nodra bula na wekada. Eda dau vakataroga: ‘Ena vinaka na vuravura era na bula kina na luvequ? Ena vakarusai beka na vuravura ena leqa tubukoso? Vakacava au rawa ni cakava e dua na ka ena gauna qo me vinaka kina na noqu bula mai muri?’ E noda ivakarau ga na tamata meda vaqaqa qori. Eda vinakata me tukuna vei keda e dua ni na vinaka na noda bula mai muri, me vakadeitaki ni na yaco dina qori, ni na yaco kece na veika eda gadreva qai vinaka tu ga na bula. Ke o kila na veika ena yaco ena gauna se bera mai, o na rawa ni vakarautaki iko kina.

Vakacava e dua gona e kila na veika ena yacovi iko ena gauna se bera mai? Era dau saga na kenadau mera tukuna na veika se bera ni yaco, ia e sega ni dau yaco kece. E tukuni ni dau donu na ka e parofisaitaka na Kalou me baleta na veika e vakarau yaco. E kaya na nona Vosa: “Ka’u sa dautukuna na kenai vakataotioti mai na kenai vakatekivu, ia mai na gauna eliu ka’u sa tukuna na ka sa bera ni caka.” (Aisea 46:10) Vakacava a yaco dina na veika e tukuna?

YACO DINA NA KA E TUKUNA NA KALOU

Na cava mo kauaitaka kina ke yaco dina na parofisai ni Kalou ena gauna makawa? Kaya mada ke dau donu tu ga na veika e tukuna e dua e dau kaburaka na itukutuku ni draki, o na qoroi koya sara ga. O na rairai nuitaka tale ga na veika e tukuna me baleta na veisiga se bera mai. Ni o kila e dau yaco dina na veika e tukuna na Kalou, o na nuitaka na veika ena tukuna me baleta na nomu bula mai muri.

VAKARUSAI E DUA NA SITI ROGO:

Kena ivakaraitaki, sa na vakatubuqoroqoro mada ga me donu na kena tukuni ni na vakarau bale e dua na siti rogo, a qaqa voli me vica vata na senitiuri. A vakayagataka na Kalou e dua me parofisaitaka ni na yaco qori, ena vakarusai o Ninive. (Sefanaia 2:13-15) Na cava era vola na daunitukutuku makawa? Ena ikavitu ni senitiuri B.S.K., kena irairai sa oti e 15 na yabaki mai na nona parofisai na Kalou, era ravuti qai vakabalei Ninive na kai Papiloni kei na kai Mitia. A parofisaitaka tale ga na Kalou ni na ‘lala qai vaka na vanua talasiga’ o Ninive. Vakacava a yaco dina na parofisai qori? Io. E rauta ni 518 na kilomita vakarivirivi na vanua e kovuta na siti kei na veitikotiko volekata, era nanuma e levu nira na vakabula na meca e dua na ka ena siti me nodra. Ia a sega ni yaco qori. Vakacava e rawa ni donu va qori na ka e tukuna e dua na dauvakadidike ena veika vakapolitiki?

ENA VAKAMAI NA SUI NI TAMATA:

O cei e doudou me tukuna ni se vo tu e 300 na yabaki, na yaca ni turaga ena vakama na sui ni tamata ena icabocabonisoro, na yatukawa ena basika mai kina kei na taoni e tiko kina na icabocabonisoro? E tu tu yadua me parofisaitaki na itukutuku va qori, ke yaco dina ena rogo sara ga o koya e kacivaka. A vakayagataka na Kalou e dua me kacivaka ni na “sucu e dua na gonetagane mai na mataqali i Tevita, ko Josaia na yacana,” e tukuna tale ga ni ‘na vakama o koya na sui ni tamata’ ena dua na icabocabonisoro ena taoni e Peceli. (1 Tui 13:1, 2) Oti e tolu na senitiuri e basika mai na yatukawa i Tevita na tui o Josaia, e sega ni cavuti vakalevu ena iVolatabu. Me vaka ga e parofisaitaki, a ‘kauta mai na sui mai na ibulubulu o Josaia qai vakama ena icabocabonisoro’ e Peceli. (2 Tui 23:14-16) Sa na sega tu ga ni rawa ni parofisaitaki vakamatailalai na itukutuku qori ke sega ni veidusimaki kina e dua e kaukaua cake sara.

VAQEAVUTAKI E DUA NA MATANITU:

Sa na vakasakiti mada ga ke parofisaitaka donu e dua na yacana na turaga e se bera mada ga ni sucu, me na liutaka na kena vuaviritaki e dua na matanitu qaqa kei na sala veivakurabuitaki ena vakayacora kina. E tukuna na Kalou ni na liutaka na kena ravuti e dua na matanitu qaqa o Sairusi. Na turaga tale ga qori ena sereki ira na Jiu era bobula tu qai tokona na kena taravaki tale na nodra valenisoro tabu. Kena ikuri, e tukuna na Kalou na iwalewale ni ravuravu i Sairusi, e okati kina na nona vakadiva na uciwai, e tukuna tale ga ni na dola tu na matamata ni koro me vakarawarawataka na nona ravuravu. (Aisea 44:27–45:2) Vakacava a yaco taucoko na itukutuku matailalai a parofisaitaka na Kalou? Era vakadinadinataka na daunitukutuku makawa ni a ravuravu dina o Sairusi qai vakasakiti na veika e cakava na nona mataivalu ena nodra vakadiva na uciwai e Papiloni me mamaca. Era curuma tale ga na siti ni a dola tu na kena matamata. Oti a sereki ira na Jiu o Sairusi qai vakarota mera lai tara tale na nodra valenisoro e Jerusalemi. E veivakurabuitaki qori ni sega ni qarava na nodra Kalou na Jiu o Sairusi. (Esera 1:1-3) Na Kalou ga e rawa ni parofisaitaka e dua na ka vakatubuqoroqoro va qori, se vakacava?

Na tolu na ivakaraitaki sa cavuti mai e vakadeitaka ni dau yaco dina na parofisai ni Kalou me baleta na gauna se bera mai. Levu tale na gauna e vakadinadinataki kina qori. Kena ivakaraitaki ni liutaki ira voli na Isireli o Josua, e tukuna e dua na ka era kila vinaka na rogoci koya: “[Oni] sa kila e na lomamuni taucoko kei na yalomuni taucoko, ni sa sega ni lutu e dua na ka e na ka vinaka kecega sa vosataka e na vukumuni ko Jiova na nomuni Kalou; sa yaco kecega vei kemuni; sa sega ni lutu e dua na ka oqori.” (Josua 23:1, 2, 14) Era vakadinata na Isireli ni dau yaco dina na veika e yalataka qai parofisaitaka na Kalou. Ia e cakava vakacava qori? E duidui na sala e dau cakava kina na ka na Kalou. E bibi mo kila qori ni o okati ena so na ka lelevu e tukuna na Kalou ni na yaco ena gauna se bera mai.

PAROFISAI NI KALOU KEI NA RAI VAKATAMATA

E dau yavutaki na rai vakatamata ena vakadidike vakasaenisi, itukutuku sa tu rawa kei na veiveisau e dau yaco, se nodra nanuma o ira era kaya ni tu vei ira na kaukaua vuni. Ni tukuna oti e dua na ka ena yaco, ena qai waraka tu na kena macala.—Vosa Vakaibalebale 27:1.

Ia na Kalou e kila na ka kece. E kila vinaka na noda itovo kei na inaki ni lomada, ni basika gona e dua na ituvaki e kila sara tu ga na ka ena cakava e dua na tamata se matanitu. Ia e rawa tale ga ni tarova qai veisautaka na ituvaki me vakayacori kina na nona inaki. E kaya: “Na noqu vosa ka’u sa vosataka yani; ena sega ni lesu tale wale vei au, ena vakayacora mada ga na ka ka’u sa vinakata.” (Aisea 55:11) Na parofisai ni Kalou e vakaraitaka ga vei keda ena so na gauna na veika ena cakava ena gauna se bera mai qai dau raica me yaco dina na ka e tukuna.

NOMU BULA MAI MURI

E tiko beka e dua e nuitaki na ka e tukuna me baleta na nomu bula mai muri kei na nodra bula na wekamu? Kaya mada ke o kila ni vakarau laba na cagi, e macala ga ni o na cakava na ka mo bula kina. O rawa ni cakava tale ga qori ena parofisai ena iVolatabu. Sa tukuna rawa tu na Kalou ni sa vakarau yaco e vuravura eso na ka lelevu. (Raica na kato, “Veika sa Vakatakila na Kalou me Baleta na Gauna se Bera Mai.”) Na veika qori e duidui sara mai na veika era tukuna o ira era nanuma nira kenadau.

De dua o na vakasamataka va qo: Na veika ena yaco e vuravura e vaka ga e dua na italanoa sa volai tu, o rawa tale ga ni kila na kena itinitini. E kaya na Kalou: “Ka’u sa dautukuna na kenai vakataotioti mai na kenai vakatekivu, . . . ka’u a kaya, ‘Na noqu lewa ena tu ga; ia na ka kece ka’u sa vinakata ka’u na cakava ga.’” (Aisea 46:10) Dou rawa ni marautaka vakavuvale na bula ena gauna se bera mai. Tarogi ira na iVakadinadina i Jiova ena ka e tukuna na iVolatabu me baleta na veika e vakarau yaco. Ia o ira na iVakadinadina era sega ni daurairai, se ra tukuna nira rogoca eso na domo, se tiko vei ira na kaukaua vuni mera tukuna kina na veika se bera ni yaco. Era gonevuli ga ni iVolatabu, era rawa ni vakaraitaka vei iko na veika vinaka sa tuvanaka tu na Kalou me baleta na nomu bula mai muri.