VEIVOSAKI KEI TAUKEINIVALE
Era Vakabauti Jisu na iVakadinadina i Jiova?
Qo e dua na ivakaraitaki ni ka e rawa ni veivosakitaka kei taukeinivale e dua na iVakadinadina i Jiova. Kaya mada e gole yani ina vale nei Marika o Ropate e dua na iVakadinadina.
BIBI MEDA VAKABAUTI JISU
Ropate: Bula Marika.
Marika: Bula vinaka Ropate.
Ropate: Au kauta tiko mai na nomu Vale ni Vakatawa kei na Yadra ni vula qo. Au kila ni o na taleitaka sara ga na ulutaga e tu kina.
Marika: Vinaka vakalevu. Ropate, au via tarogi iko ena dua na ka.
Ropate: Na cava ya?
Marika: Keirau veitalanoa kei na dua noqu itokani vakacakacaka, au tukuna vua ni ivola yaga dina o dau kauta mai. Ia e kaya meu kua ni wilika baleta oni sega ni vakabauti Jisu na iVakadinadina i Jiova. E dina ya? Au tukuna vua niu na tarogi iko ena gauna daru sota tale kina.
Ropate: Io, e vinaka mo taroga ga e dua na iVakadinadina i Jiova. O na kila vinaka ga nona vakabauta e dua ke o tarogi koya sara ga, se vakacava?
Marika: Io, e dina qori.
Ropate: Keimami vakabauti Jisu na iVakadinadina i Jiova. Keimami kila tale ga ni bibi meda vakabauti Jisu ke da via bula.
Marika: Sa va tiko qori na noqu nanuma, au qai lomatarotaro ga ni tukuna o noqu itokani ni oni sega ni vakabauti Jisu. Daru se sega beka ga ni veitalanoataka.
Ropate: Vakacava meu vakaraitaka vakaivolatabu vei iko na vuna e bibi kina meda vakabauti Jisu? Keimami dau vakayagataka vakalevu ena cakacaka vakavunau na tikinivolatabu qo.
Marika: Sa donu.
Ropate: Daru raica mada na ka e tukuna o Jisu ena Joni 14:6, ni rau veitalanoa kei na dua na nona yapositolo. E tukuna: “E kaya vua o Jisu: ‘O yau na sala, na dina, kei na bula. Ena vukuqu ga ena qai torovi Tamaqu rawa kina e dua.’” Na cava e tukuni ena tikinivolatabu qo ni sala duadua ga eda na torova kina na Kalou?
Marika: Ena vuku i Jisu.
Ropate: Io. Keimami vakabauta tale ga qori na iVakadinadina i Jiova. Au taro mada: Ena veika o sa bau kila ni vinakata na Kalou, ni masu e dua, me masu ena yaca i cei?
Marika: Ena yaca i Jisu.
Ropate: Io. Qori na vuna au dau cavuta kina na yaca i Jisu ena noqu masu. Era cakava tale ga qori na iVakadinadina i Jiova.
Marika: Oi.
Ropate: Daru raica tale mada na Joni 3:16. Qo e dua na tikinivolatabu bibi e dau vakatokai me Kosipeli lailai. Na tikinivolatabu qori e rawa ni umani ira kece na ka e bau volai me baleta na bula i Jisu e vuravura kei na nona cakacaka vakaitalatala. Vakacava, o na taleitaka mo wilika?
Marika: Io. E kaya: “Na levu ni nona lomani vuravura na Kalou e solia kina na Luvena e duabau ga e bulia, mera kua ni rusa o ira era vakabauti koya, mera rawata ga na bula tawamudu.”
Ropate: Vinaka. Vakacava o sa bau rogoca oti na tikinivolatabu qo?
Marika: Io. Au sa raica tale ga ni volai tu ena levu na vanua.
Ropate: E tikinivolatabu kilai levu. Dikeva na ka e tukuna e keri o Jisu. Eda rawa ni bula tawamudu ena loloma ni Kalou, ia na cava meda cakava?
Marika: Meda vakabauta.
Ropate: Io. Meda vakabauti Jisu Karisito, na Luvena e duabau ga e bulia na Kalou. E tukuni ena tabana e rua ni mekesini qo ni noda vakabauti Jisu e rawa kina na bula tawamudu. E tukuni tale ga kina ni dua na inaki ni kena tabaki na Vale ni Vakatawa, oya me “uqeti keda meda vakabauti Jisu Karisito, ni a mate meda rawa ni bula tawamudu kina, sa veiliutaki tiko vakatui ena Matanitu ni Kalou.”
Marika: Oi. E tukuni sara tu ga ena nomuni mekesini ni oni vakabauti Jisu na iVakadinadina i Jiova.
Ropate: Io.
Marika: Ia na cava ga era dau tukuna kina e levu ni oni sega ni vakabauti Jisu?
Ropate: E levu tu na vuna. Eso era tukuna ya nira rogoca vei ira eso tale. Se ra vakavulica na lasu qori na italatala ni lotu.
Marika: De ra tukuna ya baleta oni vakatokai kemuni me iVakadinadina i Jiova, sega ni iVakadinadina i Jisu.
Ropate: Io, qori e rawa ni dua tale ga na vuna.
Marika: Na cava oni dau tukuni Jiova kina vakalevu?
‘AU SA VAKATAKILA NA YACAMUNI’
Ropate: Dua na vuna, keimami vakabauta ni bibi meda vakayagataka na yaca ni Kalou o Jiova—me vaka ga e dau cakava na Luvena o Jisu. Dikeva mada na ka e tukuna o Jisu ena nona masu vei Tamana ena Joni 17:26. O na taleitaka mo wilika?
Marika: Io. “Au sa vakatakila vei iratou na yacamuni au na vakatakila tiko ga, me rawa ni ratou veilomani ena loloma vata ga oni lomani au kina, meu duavata tale ga kei iratou.”
Ropate: Vinaka. Dikeva ni tukuna o Jisu ni sa vakatakila na yaca ni Kalou. Na cava e cakava kina qori?
Marika: Sega mada ni macala.
E bibi meda vakabauti Jisu ke da via bula
Ropate: Ena vakamatatataka qori e dua tale na tikinivolatabu, na Cakacaka 2:21. E kaya: “Era na bula o ira kece era masuta na yaca i Jiova.” Ke bibi meda masuta na yaca i Jiova meda bula kina, ena kila tale ga ya o Jisu se vakacava?
Marika: Io.
Ropate: E raica o Jisu ni bibi mera kila qai vakayagataka na nona tisaipeli na yaca ni Kalou ni na rawa kina na bula. Qori tale ga e dua na vuna keimami dau tukuni Jiova kina vakalevu. Keimami vakabauta ni bibi me vakatakilai na yaca ni Kalou ra qai vukei eso tale mera masuta na yacana.
Marika: Ia ke ra sega mada ga ni kila se vakayagataka na yaca ni Kalou, era se kila tiko ga o cei era vakaibalebaletaka nira cavuta na Kalou.
Ropate: E rairai dina qori. Ia ni vakatakila vei keda na Kalou na yacana, sa vakarawarawataka tiko vei keda meda toro volekati koya.
Marika: Au sega ni taura rawa na ka o kaya.
Ropate: Vakasamataka mada va qo: E sega ni gadrevi meda kila na yaca i Mosese. E rawa nida kilai koya ga me turaga a wasea na Wasa Damudamu, se soli vua na iVunau e Tini. E sega ni gadrevi tale ga meda kila na yaca i Noa. E rawa nida kilai koya ga me turaga a ta na waqa qai vakabulai ratou na nona vuvale kei na manumanu. O Jisu Karisito mada ga e rawa ni kilai ga me o koya a lako mai lomalagi me mate ena vuku ni noda ivalavala ca, se vakacava?
Marika: Io, e rawa ni va ya.
Ropate: Ia a raica na Kalou meda kila kece na yacadra. Na noda kila qori ena vakaibalebale kina na ka eda wilika me baleti ira. Eda sega ni bau sotavi ratou o Mosese, Noa, kei Jisu, ia na noda kila na yacadratou eda vakabauta kina ni ratou bula dina.
Marika: Au sega ni bau vakasamataka tu va qori, ia e dina sara ga.
Ropate: Qori e dua tale na vuna era vakayagataka kina vakalevu na iVakadinadina i Jiova na yaca ni Kalou. Keimami via vukei kemuni moni vakabauta ni tiko dina na Kalou, moni veitokani voleka kina kei koya. Keimami kauaitaka tale ga vakabibi na itavi i Jisu ena noda vakabulai. E vinaka me daru wilika e dua tale na tikinivolatabu e tokona qori.
Marika: Sa donu.
Ropate: Daru a wilika e liu na Joni 14:6, e tukuna kina o Jisu ni o koya “na sala, na dina, kei na bula.” Ia daru wilika mada qo na Joni 14:1. Kerekere wilika ga na iotioti ni cegu.
Marika: E kaya: “Dou vakabauta na Kalou, dou vakabauti au tale ga.”
Ropate: Vinaka. O nanuma ni rawa ni vakatau ga vei keda, meda vakabauti Jiova se vakabauti Jisu?
Marika: Sega. E kaya o Jisu meda vakabauti rau ruarua.
Ropate: Io. Au kila ni o vakabauta tale ga ni sega ni rauta meda tukuna ga nida vakabauta na Kalou kei Jisu. E bibi meda vakaraitaka sara ga qori ena noda ivakarau ni bula.
Marika: Io, dina.
Ropate: Ia ena vakaraitaka vakacava e dua ni vakabauta dina na Kalou kei Jisu? Vakacava me daru qai veitalanoataka qori ena dua tale na gauna?a
Marika: Io, au na taleitaka sara ga.
O dau lomatarotarotaka tu e dua na ulutaga vakaivolatabu? O via kila na ka era vakabauta na iVakadinadina i Jiova kei na nodra ivakarau ni sokalou? Ke vaka kina, taroga e dua na iVakadinadina i Jiova. Era na marau mera vakamacalataka vei iko na kena isau.
a Me ikuri ni ivakamacala, raica na wase 12 ni ivola Na Cava Sara Mada e Kaya na iVolatabu? tabaka na iVakadinadina i Jiova.